2 Nephi 21–24

Ang Milenyum

Hunahunaa kon unsa ang kinabuhi kon walay kadautan sa kalibotan. Usa unya ka adlaw ang kalibotan mahimong ingon niini. Kini mahitabo sa panahon sa melinyal nga paghari ni Jesukristo. Daghang mga propeta, lakip sila si Nephi ug Isaias, nanagna mahitungod sa 1,000 ka tuig nga kalinaw nga gitawag og Milenyum. Kini nga leksiyon makatabang kanimo sa pagsabot ug pag-andam alang sa melinyal nga paghari sa Manluluwas.

Pag-focus ngadto sa Langitnong Amahan ug ni Jesukristo.Kon magdesisyon kon unsa nga mga kamatuoran o mga baroganan ang makatabang sa mga estudyante sa pagkahibalo, pangitaa kon unsay makatabang kanila sa pagduol ngadto ni Jesukristo. Ang Espiritu Santo makatabang kanimo ug sa mga tigkat-on sa pag-ila sa mga kamatuoran mahitungod sa Manluluwas ug sa Iyang matubsanong gahom sa matag baroganan, sugo, ug propetikanhong pagtulon-an.

Pagpangandam sa estudyante: Dapita ang mga estudyante sa pagpamalandong sa unsay ilang nahibaloan mahitungod sa Milenyum ug sa pagtambong nga andam sa pagpangutana og mga pangutana nga tingali aduna sila mahitungod niini.

Mga Posibleng Kalihokan sa Pagkat-on

Ang umaabot

Mahimong isulat sa mga estudyante ang ilang mga tubag sa mosunod nga mga pangutana diha sa pisara o hisgotan kini diha sa gagmay nga mga grupo.

• Unsa ang pipila ka importante nga mga panghitabo sa umaabot nga imong gipaabot? Ngano man?

• Unsa ang imong mga pagbati kon imong hunahunaon kini nga mga panghitabo?

• Unsay imong gibuhat aron mangandam?

Ang Milenyum

Ang usa ka importante nga panghitabo sa umaabot mao ang Milenyum.

Paminaw og maayo kon unsaon pagtubag sa mga estudyante ang mosunod nga mga pangutana. Ikonsiderar ang paglista sa mga pangutana sa mga estudyante diha sa pisara. Imbis nga direktang tubagon kini, awhaga ang mga estudyante sa pagpangita og mga tubag samtang magtuon sila.

Ipahiangay ang leksiyon sumala sa mga tubag nga ilang gihatag. Sama pananglit, kon daghang mga estudyante ang adunay parehas nga pangutana, mahimo kamong mangita sa tubag isip usa ka klase. Ang mga estudyante nga adunay susama nga mga pangutana mahimong ibutang sa mga grupo aron dungan nga mangita og mga tubag.

• Unsay imong nahibaloan bahin sa Milenyum? Unsa imong mga pangutana bahin niini?

Si propeta Nephi misulat mahitungod sa kataposang mga adlaw ug milakip sa daghan sa mga panagna ni Isaias mahitungod sa kataposang mga adlaw. Si Isaias nanagna sa kalaglagan sa Asiria ug Babelon isip usa ka matang sa kalaglagan sa Ikaduhang Pag-anhi (tan-awa sa 2 Nephi 20; 23). Nanagna usab siya sa Pagpahiuli sa ebanghelyo nga mag-una pa sa melinyal nga paghari ni Jesukristo. Ang iyang mga panagna puno sa simbolismo ug mga paghulagway nga makadugang sa giladmon sa atong pagsabot sa Milenyum.

Basaha ang mosunod nga mga panagna gikan ni Nephi ug ni Isaias ug pangitaa ang mga paghulagway sa Milenyum.

Ikonsiderar ang pagbutang og mga papel nga adunay mosunod nga mga pakisayran sa kasulatan sa palibot sa kwarto ug dapita ang mga estudyante sa paglibot ug pagbasa sa nagkalain-laing mga tudling. Laing opsiyon mao ang pagdapit sa mga estudyante sa pag-drowing diha sa journal sa pagtuon o diha sa pisara sa pipila ka mga paghulagway niini nga mga bersikulo.

Kon gikinahanglan, tabangi ang mga estudyante nga makasabot sa mga kasulatan. Sama pananglit, mahimo nimong itudlo nga ang mga hayop nga nag-uban nga walay panag-away nagrepresentar sa mga kahimtang sa kalinaw (tan-awa sa 2 Nephi 21:6–7) o nga ang mga tubig nga nagtabon sa dagat nagrepresentar sa kasayoran sa Ginoo nga nagtabon sa yuta (tan-awa sa 2 Nephi 21:9).

• 1 Nephi 22:24–26

• 2 Nephi 21:6–9

• 2 Nephi 22:1–6

• 2 Nephi 24:3, 7

• Gikan niini nga mga paghulagway, sa unsang paagi sa imong hunahuna ang imong kinabuhi mahimong lahi diha sa Milenyum?

• Unsa nga mga paghulagway sa Manluluwas ang imong napalgan? Unsa ang gitudlo niini kanimo mahitungod Kaniya?

Usa sa mga kamatuoran nga atong makat-onan gikan niini nga mga kasulatan mao nga si Jesukristo maghari sa yuta diha sa pagkamatarong ug kalinaw atol sa Milenyum.

Hunahunaa diha sa imong hunahuna kon unsa kaha ang pagpuyo sa panahon sa Milenyum—sa dihang ang Manluluwas maghari diha sa pagkamatarong ug kalinaw. Pamalandongi kon sa unsang paagi ang kalinaw sa Manluluwas makapanalangin sa imong kinabuhi.

Si Presidente Dallin H. Oaks sa Unang Kapangulohan mihulagway sa laing panalangin sa Milenyum:

Ang pagkawala maminyo, pagkawalay anak, kamatayon, ug diborsyo makapakyas sa mga mithi ug nagpalangan sa katumanan sa gisaad nga mga panalangin. … Ang Ginoo misaad nga sa kahangtoran walay panalangin nga ihikaw sa iyang mga anak kinsa nagsunod sa mga sugo, mga matinuoron sa ilang mga pakigsaad, ug nagtinguha sa unsay matarong.

Daghan sa labing importante nga mga kawad-on sa mortalidad itakdang ihusto sa Milenyum, nga mao ang panahon sa pagtuman sa tanan nga dili kompleto sa dakong plano sa kalipay alang sa tanang takos nga mga anak sa atong Amahan. Nasayod kita nga tinuod kana sa mga ordinansa sa templo. Ako nagtuo nga tinuod usab kini sa mga relasyon sa pamilya ug mga kasinatian. (Presidente Dallin H. Oaks, “The Great Plan of Happiness,” Ensign, Nob. 1993, 75)

• Unsa ang gitudlo niini nga pamahayag kanimo mahitungod sa Langitnong Amahan ug ni Jesukristo?

• Hain sa mga panalangin sa Milenyum ang imong labihang gitinguha? Ngano man?

• Atol sa leksiyon, unsa nga mga tubag ang imong napalgan sa imong mga pangutana mahitungod sa Milenyum?

Kon ang mga estudyante nangita pa gihapon og mga tubag sa ilang mga pangutana, idirekta sila kon asa sila makakita og tubag. Ang pipila sa mosunod nga mga tudling mahimong makatabang: Doktrina ug mga Pakigsaad 29:11; 88:110; 101:26–34; Mga Artikulo sa Hugot nga Pagtuo 1:10. Tan-awa usab ang “Milenyum [Kaliboan]” diha sa Giya ngadto sa mga Kasulatan.

Pagpangandam alang sa Milenyum

Niadtong 2020, gisugdan ang mga pagbag-o [renovation] sa Salt Lake Temple. Si Elder Gary E. Stevenson sa Korum sa Napulog Duha ka Apostoles namulong mahitungod niini nga mga pagbag-o. Pangitaa kon giunsa niya kini pagtandi sa atong kaugalingong mga kinabuhi. Tan-awa ang bidyo “Usa ka Maayong Patukuranan alang sa Umaabot,” anaa sa ChurchofJesusChrist.org, gikan sa time code 14:51 hangtod sa 15:26, o basaha ang pamahayag sa ubos.

Kini sinsero nga paglaum sa mga lider sa Simbahan nga ang mahinungdanong mga pagbag-o sa Templo sa Salt Lake makatabang sa katumanan sa tinguha ni Brigham Young nga makakita nga “ang templo matukod sa paagi nga kini molungtad hangtod sa milenyum.” Sa umaabot nga katuigan, unta atong tugotan kining mga kalamboan nga gihimo sa Templo sa Salt Lake sa pagdasig nato, isip mga indibidwal ug pamilya, aron kita sab—sa pinasumbingay—“matukod sa paagi nga molungtad hangtod sa milenyum.” (Gary E. Stevenson, “Usa ka Maayong Patukuranan alang sa Umaabot,” Liahona, Mayo 2020, 51–52)

• Unsa sa imong hunahuna ang gipasabot sa “matukod sa paagi nga molungtad hangtod sa milenyum”?

Ikonsiderar ang paghisgot og balik sa umaabot nga mga panghitabo nga gipaabot sa mga estudyante ug hisgoti kon unsay ilang gibuhat sa pagpangandam alang niini. Dayon hisgoti ang mga paagi sa pagpangandam alang sa Milenyum.

Mahimong makaayo sa mga estudyante ang pagtubag sa mosunod nga mga pangutana diha sa ilang journal sa pagtuon.

• Kon maghunahuna ka bahin sa melinyal nga paghari sa Manluluwas, unsay imong bation?

• Unsa ang imong mahimo karon aron mangandam alang sa Milenyum?

• Unsa kaha nga mga hagit ang imong atubangon samtang maghimo ka niini nga mga pagpangandam?

Komentaryo ug Background nga Impormasyon

Ang mga miyembro lamang ba sa Ang Simbahan ni Jesukristo sa mga Santos sa Ulahing mga Adlaw ang maanaa sa yuta atol sa Milenyum?

Si Presidente Joseph Fielding Smith (1878–1972) mitudlo:

Ang ubang mga miyembro sa Simbahan adunay sayop nga ideya nga sa higayon nga moabot ang milenyum ang tanan nga mga tawo mapapas gikan sa yuta gawas sa matarong nga mga miyembro sa Simbahan. Dili kana mao. Adunay minilyon ka mga tawo … sa tanang matang, ug sa tanang mga tinuohan, tugotan gihapon nga magpabilin sa ibabaw sa yuta, apan sila mao kadtong kinsa nagpuyo og limpyo nga mga kinabuhi, kadtong kinsa gawasnon gikan sa pagkadautan ug pagkadunot. …

Sa kataposan, bisan pa niana, ang kahibalo sa Ginoo motabon sa yuta sama sa tubig sa dagat. Apan adunay panginahanglan alang sa pagsangyaw sa ebanghelyo, human ang pag-abot sa milenyum, hangtod nga ang tanan nga mga tawo makabig o mamatay. (Joseph Fielding Smith, Doctrines of Salvation, 1:86–87)

Unsa kaha ang kinabuhi sa Milenyum?

Si Presidente Brigham Young (1801–1877) mitudlo:

Ang Milenyum naglangkob niini—ang matag kasingkasing sa Simbahan ug sa Gingharian sa Dios nga nahiusa; ang Gingharian nagtubo sa pagbuntog sa tanan nga mosupak sa pagpalakaw sa langit, ug si Satanas gigapos, ug gisilyohan siya. Ang tanang mga butang ingon ra sama karon, kita mokaon, moinom, ug mosul-ob og sinina. …

Sa Milenyum, kon ang Gingharian sa Dios matukod na dinhi sa yuta sa gahom, himaya ug kahingpitan, ug ang paghari sa dautan dugay na kaayong nagpatigbabaw mabuntog, ang mga Santos sa Dios adunay kahigayonan sa pagtukod sa ilang mga templo, ug sa pagsulod niini, mahimong, ingnon ta, nga mga haligi sa mga templo sa Dios [tan-awa sa Pinadayag 3:12], ug sila mopahigayon alang sa ilang mga patay. Dayon atong makita ang atong mga higala nga mobarog, ug tingali ang uban nga atong nakaila dinhi. … Ug kita makabaton og mga pagpadayag nga makaila sa atong mga katigulangan balik ngadto ni Amahang Adan ug Inahang Eva, ug kita makasulod ngadto sa mga templo sa Dios ug mopahigayon alang kanila. Dayon [ang mga anak] pagabugkuson ngadto sa [mga ginikanan] hangtod ang kadena mahimong hingpit balik ngadto ni Adan, aron adunay hingpit nga kadena sa Priesthood gikan ni Adan ngadto sa kataposan sa kalibotan.

Mao kini ang trabaho sa mga Santos sa UIahing mga Adlaw sa Milenyum. (Mga Pagtulun-an sa mga Presidente sa Simbahan: Brigham Young [2007], 382–3)

Maanaa ba sa Milenyum Ang Simbahan ni Jesukristo sa mga Santos sa Ulahing mga Adlaw?

Si Presidente Russell M. Nelson mipahayag:

Kini nga Simbahan dili mairog gikan sa iyang dapit, bisan hangtod pa sa Milenyum. (Russell M. Nelson, “How Firm Our Foundation,” Liahona, Mayo 2002, 76)

1 Nephi 22:26. Sa unsang paagi si Satanas walay gahom?

Si Presidente Spencer W. Kimball (1895–1985) mitudlo:

Kon si Satanas gigapos na sa usa ka panimalay—kon si Satanas gigapos na sa usa ka kinabuhi—ang Milenyum nagsugod na niana nga panimalay, niana nga kinabuhi. (Teachings of Spencer W. Kimball, ed. EdwardL. Kimball [1982], 172)

Dugang nga mga Kalihokan sa Pagkat-on

2 Nephi 21. Ang pagbisita ni Moroni ngadto kang Joseph Smith

Pagpakita og hulagway sa pagbisita ni Moroni ngadto kang Joseph Smith. Ipasabot nga sa dihang si Moroni mipakita ngadto kang Joseph Smith niadtong Septyembre 21, 1823, iyahang gikutlo ang Isaias 11, nga mao usab sa 2 Nephi 21 (tan-awa sa Joseph Smith Kasaysayan 1:40). Dapita ang mga estudyante sa pagsiksik sa 2 Nephi 21 ug pangitaa ang mga panagna nga mahimong makahuluganon ngadto ni Joseph Smith ug nagtabang sa pag-andam kaniya alang sa iyang propetikanhong misyon.

2 Nephi 21. Ang saha, ang kaliwatan, ug ang gamot

Kini nga buluhaton makatabang sa mga estudyante nga makadiskobre kon unsaon paggamit ang mga kasulatan aron masabtan ang mga kasulatan. Dapita ang mga estudyante sa pagsiksik sa 2 Nephi 21:1–5, 10 ug pangitaa ang saha, ang kaliwatan, ug ang gamot. Dayon dapita ang mga estudyante sa pagsiksik sa Doktrina ug mga Pakigsaad 113:1–6, nga mangita sa paghubad niini nga mga simbolo.

2 Nephi 21:10–12. Bandila ngadto sa mga nasod

Ikonsiderar ang pagdala og bandila ngadto sa klase ug hisgoti kon sa unsang paagi ang usa ka bandila mahimong sinyas kon asa magpundok. Ipasabot nga ang ensign usa ka bandila.

Basaha ang 2 Nephi 21:10–12, nga mangita kon unsay buhaton sa Ginoo pinaagi ni Joseph Smith ug sa gipahiuli nga ebanghelyo.

Hisgoti kon sa unsang paagi nga ang gipahiuli nga ebanghelyo sama sa usa ka bandila. Paghunahuna pag-ayo [brainstorm] og mga paagi nga kita makadapit sa mga tawo sa pagduol ngadto kang Kristo pinaagi sa Iyang gipahiuli nga ebanghelyo.

2 Nephi 22:2. Pagsalig kang Jesukristo

Dapita ang mga estudyante sa pagpaambit unsa nga mga impresyon ang ilang nabatonan gikan niini nga bersikulo. Pagpangutana og lain-laing follow-up nga mga pangutana aron matabangan ang mga estudyante sa pagpaambit sa ilang mga pagbati mahitungod sa Manluluwas. Pananglitan: Sa unsang paagi si Jesukristo mahimong tinubdan sa kalig-on sa usa ka tin-edyer? Unsa ang pipila ka mga paagi nga atong mapakita ang atong pagsalig kang Jesukristo? Sa unsang paagi nga ang pagsalig kang Jesukristo makatabang kanato sa pagbuntog sa kahadlok?