2 Nefi 26

T’i Shohim, t’i Duam dhe t’i Trajtojmë të Tjerët siç Bën Perëndia

Çdo ditë përballemi me mesazhe dhe informacione që kanë për qëllim të ndikojnë te ndjenjat dhe këndvështrimet tona. Te 2 Nefi 26, Nefi dha mësim për këndvështrimin e Perëndisë. Ky mësim ka për qëllim të të ndihmojë t’i shohësh, duash dhe trajtosh të tjerët siç bën Perëndia.

Ndihma ndaj nxënësve që të ndiejnë se kontributi i tyre vlerësohet. Tregojuni nxënësve që i vlerësoni pyetjet dhe komentet e tyre duke i dëgjuar me kujdes dhe duke bërë një përpjekje të sinqertë për t’i kuptuar. Komunikojeni interesimin tuaj duke u përqendruar tek ajo që thonë nxënësit dhe jo tek ajo që ju do të thoni në vijim.

Përgatitja e nxënësve: Ftojini nxënësit të pyesin prindërit ose një shok a shoqe të besuar se si përpiqen ata t’i shohin të tjerët ashtu siç bën Shpëtimtari.

Veprimtari të Mundshme të të Mësuarit

Këndvështrimi ynë

Në vend që t’i paraqitni figurat vijuese, mund të sillni lloje të ndryshme syzesh që nxënësit t’i provojnë dhe më pas të diskutoni se si e ndryshon secila palë shikimin dhe këndvështrimin e tyre. Merreni parasysh t’i ftoni nxënësit të tregojnë përvojat e tyre vetjake me mbajtjen e syzeve të ndryshme ose thjerrave korrigjuese dhe ndryshimin që sjell ajo gjë.

Këqyri figurat vijuese dhe mendo se si ndikojnë syzet e ndryshme te shikimi ynë.

• Si mund të ndikojnë këto syze të ndryshme te këndvështrimi i dikujt?

• Cilat janë disa gjëra që ndikojnë te mënyra se si i shohim dhe i trajtojmë të tjerët?

Gjej një çast për të reflektuar mbi perceptimin tënd për të tjerët. Mendo rreth asaj që mund të jetë duke i dhënë formë këndvështrimit tënd dhe faktit se si kjo mund të ndikojë tek ajo që ndien për të tjerët, dhe mënyra si i trajton ata. Ndërsa studion, kërko frymëzim për të ditur atë që mund të bësh për t’i parë dhe trajtuar të tjerët ashtu siç bën Perëndia.

Ky mësim ka për qëllim të të ndihmojë t’i shohësh, duash dhe trajtosh të tjerët siç bën Perëndia.

Karakteri i Perëndisë

Te 2 Nefi 26, Nefi pa shërbesën e Shpëtimtarit mes nefitëve, si dhe ligësinë dhe shkatërrimin përfundimtar të popullit të tij. Ai pa edhe ligësinë e johebrenjve në ditët e fundit. Në kundërshtim me këtë, ai më pas theksoi përkujdesjen e Perëndisë për të gjithë fëmijët e Tij.

Merri parasysh tri pyetjet vijuese ndërsa lexon vargjet te 2 Nefi 26:12–13, 23–33:

Jepuni nxënësve kohë të bollshme për të studiuar vargjet te 2 Nefi 26:12–13, 23–33 dhe merreni parasysh t’i ftoni ata të shenjojnë fjalët dhe frazat që u përgjigjen pyetjeve vijuese. Krijoni një atmosferë nderuese ku Shpirti mund të japë mësim. Mund të vini muzikë të qetë ndërkohë që ecni përqark dhomës, duke i pyetur me zë të ulët nxënësit se çfarë po mësojnë, ndiejnë ose shenjojnë ndërsa studiojnë.

Mund të jetë e dobishme t’i paraqitni pyetjet teksa nxënësit lexojnë.

• Si i sheh Perëndia fëmijët e Tij dhe çfarë ndien për ta?

• Si e demonstron Ai këtë?

• Si dëshiron Ai që ne t’i shohim dhe t’i trajtojmë të tjerët?

Pasi nxënësit t’i studiojnë mësimet e Nefit rreth karakterit të Perëndisë, ftojini ata të tregojnë atë që mësuan. Pyetjet vijuese, krahas pyetjeve të tjera për ndjekjen e ecurisë, mund të ndihmojnë për të inkurajuar të treguarit. Përndryshe, nxënësit mund të renditin në tabelë të vërtetat që mësuan rreth Perëndisë, dhe më pas të diskutojnë kuptimin dhe domethënien e këtyre.

• Cilat fjalë, fraza ose të vërteta shenjove që mund t’u përgjigjen pyetjeve? Përse?

• Çfarë mësove ose ndjeve rreth karakterit të Perëndisë?

• Si mund të ndikojë të kujtuarit e këtyre të vërtetave rreth Perëndisë te marrëdhënia jote me Të? Si mund të ndikojë te mënyra se si i trajton të tjerët?

Nxënësit mund të kenë vënë re një larmi të vërtetash rreth karakterit të Perëndisë. Merreni parasysh t’i pyesni nxënësit pse të vërtetat që gjetën, janë kuptimplota dhe t’i lavdëroni për idetë e tyre. Pjesa në vazhdim e këtij mësimi do të përqendrohet tek e vërteta në vargun 33 se “të gjithë janë njësoj para Perëndisë”. Kjo do t’i ndihmojë nxënësit të përgatiten për ta përdorur këtë fragment tek ushtrimi i vënies në zbatim i zotërimit doktrinor në mësimin vijues.

Vër re se te 2 Nefi 26:33, Nefi theksoi shumë lloje të ndryshme të individëve duke i vendosur ata bashkë në grupe me dallime. Përkufizimet vijuese mund të të ndihmojnë t’i kuptosh më mirë këto. Mund të marrësh parasysh t’i shkruash këto përkufizime në shkrimet e tua të shenjta pranë këtij vargu.

• Skllav: Një rob.

• Idhujtar: Dikush që nuk beson në Perëndi.

• Judenjtë dhe johebrenjtë: Një frazë që u referohet të gjithë atyre që i përkasin shtëpisë së Izraelit dhe të gjithë atyre që nuk i përkasin.

2 Nefi 26:33 është një fragment i zotërimit doktrinor. Merreni parasysh t’i shenjoni fragmentet e zotërimit doktrinor në mënyrë të dallueshme që të mund t’i gjeni me lehtësi. Ju do të keni mundësinë në mësimin e ardhshëm të ushtroni zbatimin e doktrinës që jepet mësim në këtë fragment, për një pyetje ose situatë.

• Çfarë ndryshimi mund të sjellë po t’i pranonte dhe zbatonte bota mësimet te vargu 33?

Gjej një çast për të reflektuar mbi këndvështrimin tënd, përfshirë atë që ndien për të tjerët dhe si i trajton ata, në krahasim me këndvështrimin e Perëndisë dhe asaj që ndien Ai për të tjerët dhe si i trajton Ai ata.

Një mënyrë për t’i ndihmuar nxënësit të krahasojnë se si i trajtojnë ata të tjerët me mënyrën si i trajton Perëndia, është t’i vini nxënësit t’i riformulojnë pyetjet që thotë Nefi te 2 Nefi 26:25–28 për t’i zbatuar për veten e tyre. Për shembull: “A i bëj njerëzit të ndiejnë që unë dua që ata të më largohen? Të mos adhurojnë me mua? Ose a hamendësoj unë se ata nuk duhet të marrin nga mirësia e Jezu Krishtit?”

Nëse dëshiron, mund të shikosh materialin filmik “We Don’t Need to Be the Same to Be One” [“Nuk Ka Pse të Jemi Njësoj që të Jemi Një”] (01:00), në dispozicion në ChurchofJesusChrist.org, duke reflektuar mbi atë që Zoti do të donte të përmirësoje.

Pyetjet dhe paragrafi vijues mund t’i ndihmojnë nxënësit që t’i vlerësojnë ndjenjat dhe veprimet e tyre kundrejt të tjerëve dhe më pas ta vënë në zbatim atë që po mësojnë. Nxënësit mund t’i shënojnë në ditarin e tyre ose t’i diskutojnë përgjigjet e tyre për pyetjet.

• Si mund të ndikojë tek ti të kujtuarit e këndvështrimit dhe ndjenjave të Perëndisë kundrejt të gjithë njerëzve?

• Në çfarë mënyrash po ia del mirë me të parit dhe trajtimin e të tjerëve ashtu siç do t’i trajtonin Ati Qiellor dhe Jezusi?

• Si mund të të ndihmojë të kujtuarit e mësimeve rreth Zotit te 2 Nefi 26:33 që t’i shohësh, duash dhe trajtosh të tjerët siç bën Perëndia?

Gjatë ditëve në vijim, përpiqu të vësh re se si i sheh, çfarë ndien për të tjerët dhe si i trajton ata. Mbaj vesh për nxitje nga Fryma e Shenjtë dhe kërko ndihmën e Zotit për të bërë çfarëdo ndryshimi të nevojshëm për t’i dashur dhe trajtuar të tjerët më shumë si Perëndia.

Komente dhe Informacion për Rrethanat

Si mund të jem më shumë si Perëndia për t’i parë dhe dashur të tjerët?

Presidenti Rasëll M. Nelson dha mësim se si Jezu Krishti mund të na ndihmojë në përpjekjet tona për t’u përmirësuar:

“Ne nuk e kemi arritur ende harmoninë dhe respektin e ndërsjellë që do t’i lejonte çdo burri dhe gruaje si dhe çdo djali e vajze që të bëhej varianti më i mirë i mundshëm i vetvetes.

Kura për atë që na sëmur, u dha nga Shëruesi Mjeshtër, Jezusi, Krishti. Kur një farise përqeshës e sfidoi Atë që të përcaktonte urdhërimin më të madh në ligj, përgjigjja e Shpëtimtarit ishte më e paharrueshmja dhe e shkurtër. Ajo qe e mbushur me të vërtetë që të çon te një jetë e gëzueshme. Udhëzimi i Tij qe që së pari ta duam Perëndinë me gjithë zemër dhe, më pas, t’i duam të afërmit tanë porsi vetveten (shih te Mateu 22:35–39). …

Ne jemi të gjithë të lidhur dhe kemi një përgjegjësi të dhënë nga Perëndia që të ndihmojmë për ta bërë më të mirë jetën për njerëzit rreth nesh. Nuk kemi pse të jemi të ngjashëm ose të dukemi të ngjashëm që të kemi dashuri për njëri-tjetrin. Madje nuk kemi as pse të jemi dakord me njëri-tjetrin për ta dashur njëri-tjetrin. Nëse kemi ndonjë shpresë që t’i rivendosim mirëdashjen dhe ndjesinë e humanizmit për të cilat jemi të etur, kjo gjë duhet të fillojë me secilin prej nesh, çdo person një e nga një.” (Russell M. Nelson, “NAACP Convention Remarks” [fjalim dhënë në kuvendin vjetor të National Association for the Advancement of Colored People në Detroit, Miçigan, 21 korrik 2019], newsroom.ChurchofJesusChrist.org)

Plaku Dejll G. Renland, i Kuorumit të Dymbëdhjetë Apostujve, tregoi sa vijon:

“Uniteti kërkon përpjekje. Ai zhvillohet kur ne kultivojmë dashuri për Perëndinë në zemrat tona dhe përqendrohemi te fati ynë i përjetshëm. Ne na bashkon identiteti ynë i përbashkët parësor si fëmijë të Perëndisë dhe zotimi ynë ndaj të vërtetave të ungjillit të rivendosur. Për rrjedhojë, dashuria jonë për Perëndinë dhe dishepullimi ynë ndaj Jezu Krishtit prodhojnë një shqetësim të çiltër për të tjerët. Ne e vlerësojmë kaleidoskopin e karakteristikave, këndvështrimeve dhe talenteve të të tjerëve. Nëse nuk jemi në gjendje që ta vëmë dishepullimin tonë ndaj Jezu Krishtit mbi interesat dhe pikëpamjet personale, ne duhet t’i rishqyrtojmë përparësitë tona dhe të ndryshojmë.” (Dejll G. Renland, “Paqja e Krishtit e Shuan Armiqësinë”, Liahona, nëntor 2021, f. 84)

Motra Mishel D. Krejg, Këshilltare e Parë në Presidencën e Përgjithshme të Të Rejave, dha mësim sa vijon:

Si mundet që mësimet te 2 Nefi 26:33 t’i ndihmojnë njerëzit për të ardhur te Shpëtimtari?

Kaliana ishte kërkuese në Kishë, por kishte shqetësime. Shikoje materialin filmik më poshtë për të parë se si vargu te 2 Nefi 26:33 e ndihmoi atë.

• Vër re se materiali filmik i mëparshëm sugjerohet edhe si material filmik për t’u ushtruar në mësimin e radhës.

A do të thotë të qenit të bashkuar në Krisht që ne të gjithë duhet të jemi njësoj?

Pleqtë Kuentin L. Kuk dhe Xhefri R. Holland, të Kuorumit të Dymbëdhjetë Apostujve, dhanë mësim se si kultura e Krishtit lë vend për ndryshime individuale:

“Në kohën tonë, … për shumë njerëz theksimi është te besnikëria fisnore, shpesh nisur nga pozita, gjinia, raca dhe pasuria. Në shumë vende, për të mos thënë në shumicën, njerëzit janë të ndarë thellësisht sipas mënyrës se si jetojnë. Në Kishën e Zotit, e vetmja kulturë që e mbështetim dhe e japim mësim, është kultura e ungjillit të Jezu Krishtit. Uniteti që kërkojmë, është të bëhemi një me Shpëtimtarin dhe mësimet e Tij. …

Përmbushja e përgjegjësive të caktuara në mënyrë hyjnore, mbi bazën e drejtësisë, unitetit dhe barazisë përpara Zotit, sjell lumturi dhe paqe vetjake në këtë botë dhe na përgatit për jetën e përjetshme në botën që vjen.” (Kuentin L. Kuk, “Përgatituni që të Takoni Perëndinë”, Ensign ose Liahona, maj 2018, f. 116, 117)

“Ka vend për ata që flasin gjuhë të ndryshme, kremtojnë kultura të shumëllojshme dhe jetojnë në një mori vendndodhjesh. Ka vend për të pamartuarit, për të martuarit, për familjet e mëdha dhe për familjet pa fëmijë. Ka vend për ata që dikur kishin pyetje lidhur me besimin e tyre, dhe vend për ata që ende kanë pyetje. Ka vend për ata me tërheqje të ndryshme seksuale. Shkurtimisht, ka vend për çdo njeri që e do Perëndinë dhe i nderon urdhërimet e Tij si shufrën e pacenueshme matëse për sjelljen vetjake.” (Xhefri R. Holland, “Këngë të Kënduara e të Pakënduara”, Ensign ose Liahona, maj 2017, f. 51)

Shikoje materialin filmik vijues, në të cilin Plaku Holland u jep këshilla atyre që ndihen të shkurajuar ose të lënë mënjanë në mbretërinë e Zotit sepse mendojnë se janë goxha të ndryshëm nga gjithë të tjerët.

Veprimtari Plotësuese të të Mësuarit

Ballafaqimi i Perëndisë me Satanin

Merreni parasysh të krahasoni mënyrën se si i trajton Perëndia fëmijët e Tij me mënyrën se si Satani nxit grindje dhe përçarje. Ftojini nxënësit t’i renditin mënyrat e Perëndisë nga studimi që u bënë vargjeve te 2 Nefi 26:23–28, 33 dhe mënyrat e Satanit që gjenden te 2 Nefi 26:20–22, 29, 32. Ftojini nxënësit të tregojnë se çfarë kanë mësuar rreth ndjenjave të Atit Qiellor për ne dhe se si ky fragment mund t’i ndihmojë ata ndërsa përpiqen fort të bëhen më shumë si Ai.

2 Nefi 26:29–31. Intrigat e priftërinjve

Merreni parasysh të përkufizoni termin intrigat e priftërinjve (vargu 29) dhe të diskutoni se pse Perëndia urdhëroi që të mos kishte intriga të priftërinjve. Nxënësit mund të diskutojnë se si individët mund të bien në kurthin e intrigave të priftërinjve dhe se si dashuria hyjnore mund të ndihmojë që të kapërcehen intrigat e priftërinjve. Mund të jetë e dobishme të vini në dukje se ata që përfshihen në intrigat e priftërinjve, e bëjnë këtë për përfitimin e tyre vetjak dhe kështu, e largojnë vëmendjen nga Drita e Botës, Jezu Krishti. Ne mund t’i kapërcejmë intrigat e priftërinjve duke u përqendruar te Shpëtimtari.

Burime shtesë

Merreni parasysh të shpenzoni ca kohë në klasë për t’i ndihmuar nxënësit të mësojnë më shumë rreth asaj që jep mësim Zoti rreth racës, paanësisë dhe barazisë për të gjithë, duke përdorur burimet që gjenden te programi Gospel Library [Biblioteka e Ungjillit] dhe në këndet zyrtare të internetit të Kishës. Këto burime mund të përfshijnë sa vijojnë:

• ChurchofJesusChrist.org

• topics.ChurchofJesusChrist.org

• Tema të Ungjillit, “Raca dhe Priftëria”, topics.ChurchofJesusChrist.org

• ChurchofJesusChrist.org