2 Nephi 31:14–21

“Kamo Kinahanglan Gayod Mopadayon Sa Unahan”

Usahay ang panaw padulong sa kinabuhing dayon ingon og mahagiton. Ang atong Langitnong Amahan ug ang Iyang Anak, si Jesukristo, wala mobiya kanato niini nga panaw nga nag-inusara; Gusto nila nga tabangan kita diha sa dalan. Kini nga leksiyon makatabang nimo nga madugangan ang imong tinguha nga mopadayon sa unahan ug molahutay hangtod sa kataposan aron usa ka adlaw makaabot ka sa imong kataposang destinasyon: kinabuhing dayon uban sa imong Langitnong Amahan.

Pagtan-aw sa mga estudyante sama sa pagtan-aw sa Ginoo kanila.Kon ang mga magtutudlo maningkamot sa paghigugma sama sa paghigugma sa Manluluwas, magsugod sila sa pagtan-aw sa uban sama sa Iyang pagtan-aw kanila. Ang Kristohanong gugma nagdasig sa mga magtutudlo sa pagpadayon sa pagtabang sa matag estudyante nga mahimong tinud-anay nga makabig. Ang Espiritu Santo makatabang nimo sa pag-ila sa balaanong bili sa matag estudyante ug sa pagtabang kanila sa pagkab-ot sa ilang potensiyal.

Pagpangandam sa estudyante: Dapita ang mga estudyante sa pagtambong sa klase nga andam sa pagpaambit kon unsaon nila pagtabang ang usa ka tawo kinsa nanlimbasog sa pagtinguha nga mopadayon sa unahan diha sa pagkamatarong sa ilang panaw balik sa Langitnong Amahan.

Mga Posibleng Kalihokan sa Pagkat-on

Ang atong layo nga biyahe

Ikonsiderar ang pagpakita og hulagway sa usa ka magdadagan [runner] o usa ka lumba, sama sa usa diha sa sinugdanan niini nga leksiyon. Pangutan-a kon aduna bay mga estudyante nga nakadagan sukad og layo nga distansiya sa lumba sa dagan ug ipahulagway kanila kon unsay ilang nasinati.

Kon mapuslanon, ipahiangay kini nga ehemplo sa bisan unsang ubang kalihokan nga mahimong magkinahanglan og paglahutay nga mahimong may kalabotan sa imong mga estudyante.

• Sa usa ka layo og distansiya nga lumba sa dagan, unsa nga mga butang ang kalagmitang hinungdan sa usa ka magdadagan [runner] nga gusto nga moundang?

• Unsa kaha ang makapadasig sa usa ka magdadagan nga humanon ang lumba kon kini nahimong malisod na?

ChurchofJesusChrist.org

Pamalandongi ang mosunod:

Ikonsiderar ang pagpakita sa mosunod nga mga pangutana ug dapita ang mga estudyante sa pagrekord sa ilang mga tubag diha sa ilang mga journal sa pagtuon.

• Unsa ang nagdasig kanimo, o makapadasig kanimo, sa pagpadayon sa imong panaw pabalik sa Langitnong Amahan?

• Unsa nga mga hagit ang imong giatubang?

Samtang magtuon ka niini nga leksiyon, pangitaa ang mga kamatuoran o mga panabot nga makatabang nimo sa pagbuntog sa imong mga hagit ug paningkamot sa pagbalik ngadto sa imong Langitnong Amahan.

Usa ka balaan nga pagdapit

Human mitudlo si Nephi mahitungod sa bunyag ug pagdawat sa Espiritu Santo, mitudlo siya og laing importante nga aspeto sa doktrina ni Kristo gamit ang direktang kinutlo gikan sa Langitnong Amahan. Basaha ang 2 Nephi 31:15 nga mangita sa unsay gitudlo sa Langitnong Amahan.

• Unsa sa imong hunahuna ang gipasabot sa molahutay hangtod sa kataposan?

• Unsa sa imong hunahuna ang kalainan tali sa yanong paglahutay, ug paglahutay pinaagi sa pagsunod sa ehemplo sa Manluluwas?

Si Nephi migamit og mga paghulagway aron sa pagtabang kanato nga mahanduraw ang atong panaw balik sa Langitnong Amahan. Basaha ang 2 Nephi 31:17–20 ug pagdrowing og yano nga hulagway sa dalan nga gihulagway ni Nephi. Butangi kon unsa ang girepresentar sa lain-laing mga aspeto sa dalan.

• Unsaon nimo pagpamubo [summarize] sa unsay imong nakat-onan?

Usa ka butang nga atong makat-onan gikan niini nga mga bersikulo mao nga samtang kita mosunod sa ehemplo sa Manluluwas ug molahutay hangtod sa kataposan, kita makadawat og kinabuhing dayon uban sa atong Langitnong Amahan.

• Ngano nga gusto nimo nga makadawat og kinabuhing dayon uban sa imong Langitnong Amahan?

Pagpadayon sa unahan

Sa mga bersikulo 19–20, gilista ni Nephi ang lain-laing mga kinaiya ug mga binuhatan nga gikinahanglan aron sa pagpadayon sa unahan subay sa dalan padulong sa kinabuhing dayon. I-rebyo kini nga mga bersikulo ug ilista diha sa dalan nga imong gidrowing ang mga kinaiya ug mga binuhatan nga imong nakit-an. Kon gusto kang makakita og bidyo nga naghulagway kang Nephi nga naghatag niini nga mga pagtulun-an, tan-awa ang “Si Nephi Mipasabot sa Doktrina ni Kristo,” sa time code 2:55 hangtod sa 3:47, anaa sa ChurchofJesusChrist.org ChurchofJesusChrist.org, ug sunda subay diha sa imong mga kasulatan.

Paggahin og makadiyot aron sa paggrado sa imong kaugalingon sa sukdanan nga 1–5 (1 maoy ubos; 5 maoy taas) og unsa ka kamaayo sa imong pagsabot ug pagpaningkamot sa pagpuyo niini nga mga kinaiya ug mga binuhatan.

Pagpili og usa sa mga hugpong sa mga pulong nga gusto nimong masabtan o mapuy-an og mas tarong. Pangita og kasulatan o kinutlo nga makatabang sa pagdugang sa imong pagsabot. Ikonsiderar ang paggamit sa Giya ngadto sa mga Kasulatan, Gospel Library nga app, mga pakigpulong sa kinatibuk-ang komperensiya, o ubang kasaligan nga mga kapanguhaan.

Ikonsiderar ang pagtugot sa mga estudyante sa pagpaambit sa unsay ilang nakat-onan gikan sa kalihokan ngadto sa klase, diha sa gagmay nga mga grupo, o sa paresan. Mahimo nimong ikonsiderar ang pagpangutana sa pipila o sa tanan sa mosunod nga mga pangutana aron madugangan ang pagsabot ug tinguha sa mga estudyante sa paggamit sa unsay ilang nakat-onan.

Isip alternatibo, mahimo nimong ipakita ang pipila o ang tanan nga mga pangutana ug ipatubag kini sa mga estudyante samtang nagtuon sila. Dayon dapita ang pipila ka mga estudyante sa pagpaambit.

Timan-i: Ang mosunod nga leksiyon mas magtutok sa magbusog sa mga pulong ni Kristo.

• Unsa ang imong nakat-onan mahitungod sa kinaiya o binuhatan nga imong gipili?

• Unsaon kaha kini pagtan-aw sa usa ka tawo nga nagpakita sa kinaiya o binuhatan nga imong gipili?

• Kanus-a nimo gibati nga ang Langitnong Amahan mipanalangin kanimo o sa usa ka tawo nga imong nailhan tungod sa usa niini nga mga kinaiya o mga binuhatan?

Ang imong indibidwal nga panaw

Paghunahuna sa imong kinabuhi ug sa imong kasamtangang panaw pabalik ngadto sa Langitnong Amahan. Pamalandongi kon kumusta ka sa imong paglahutay hangtod sa kataposan.

Ikonsiderar ang pagdapit sa mga estudyante sa pagsulat sa ilang tubag sa usa sa mosunod nga mga pangutana diha sa hulagway o sa tapad sa hulagway nga ilang gidrowing. Dayon mahimo nila kining dad-on sa balay ug ibutang sa dapit nga ilang makita pag-usab.

• Unsa ang imong nakat-onan karon nga makatabang nimo nga mopadayon sa unahan paingon sa Langitnong Amahan?

• Unsaon nimo sa paggamit sa unsay imong nakat-onan karon? (Ang usa ka ehemplo mahimong mas maayong pagapuy-an ang usa sa mga hugpong sa mga pulong nga imong gitun-an.)

Basaha ang mosunod gikan ni Elder Jeffrey R. Holland sa Korum sa Napulog Duha ka Apostoles, mamalandong unsay imong nasulat. Mahimo nimong ikonsiderar ang pagtan-aw sa usa ka clip gikan sa iyang pakigpulong sa “Ugma ang Ginoo Mobuhat og Katingalahan diha Kaninyo” gikan sa time code 15:12 hangtod sa 16:20, anaa sa ChurchofJesusChrist.org ChurchofJesusChrist.org.

Kon atong ipahinungod ang atong kasingkasing ngadto sa Dios ug mobuhat kutob sa atong mahimo sa pagsunod sa ebanghelyo, dayon ang ugma—ug ang ubang adlaw—mahimong talagsaon, bisan og dili nato kini mailhan sa kanunay nga ingon niini. Ngano man? Tungod kay ang atong Langitnong Amahan gusto nga mahimo kini! Gusto niyang mopanalangin kanato. Ang magantihon, buhong, ug walay kataposan nga kinabuhi mao gayod ang tumong sa Iyang plano nga puno sa kaluoy alang sa Iyang mga anak! Mao kini ang plano nga gipasikad sa kamatuoran “nga tanan nga mga butang nagabuhat og maayo ngadto kanila nga nahigugma sa Dios.” Padayon sa paghigugma. Padayon sa pagpaningkamot. Padayon sa pagsalig. Padayon sa pagtuo. Padayon sa paglambo. Ang langit moabiba kaninyo karon, ugma, ug sa kahangtoran. (Jeffrey R. Holland, “Ugma ang Ginoo Mobuhat og Katingalahan diha Kaninyo,” Liahona, Mayo 2016, 127)

Ikonsiderar ang pagpaambit sa imong pagpamatuod. Mahimo usab nimong dapiton ang mga estudyante sa pagpaambit sa ilang mga pagpamatuod o mga hunahuna.

Komentaryo ug Background nga Impormasyon

Unsay buot ipasabot sa molahotay hangtod sa kataposan?

Si Elder Joseph B. Wirthlin (1917–2009) sa Korum sa Napulog Duha ka Apostoles mitudlo:

Ang paglahutay hangtod sa kataposan nagpasabot nga maayo natong pagkatisok ang atong mga kinabuhi diha sa mga doktrina sa ebanghelyo, nagtuman sa gidawat nga mga doktrina sa Simbahan, mapainubsanong nagserbisyo sa atong isigkatawo, nagpuyo og mga kinabuhi nga sama kang Kristo, ug nagtuman sa atong mga pakigsaad. Kadtong molahutay balansyado, mapadayunon, mapainubsanon, kanunayng naglambo, ug walay pagkamalimbungon. Ang ilang pagpamatuod wala gibase sa kalibotanon nga mga rason—gibase kini sa kamatuoran, kahibalo, kasinatian, ug sa Espiritu. (Joseph B. Wirthlin, “Press On,” Liahona, Nob. 2004, 101)

Si Elder Dieter F. Uchtdorf sa Korum sa Napulog Duha ka Apostoles mitudlo:

Ang paglahutay ngadto sa kataposan maoy usa ka proseso nga buhaton kada minuto sa atong kinabuhi, kada oras, kada adlaw, gikan sa pagsubang hangtod sa laing pagsubang. Kini makab-ot pinaagi sa personal nga disiplina sa pagsunod sa mga sugo sa Dios.

Ang gipahiuli nga ebanghelyo ni Jesukristo usa ka paagi sa kinabuhi. Kini dili lamang ma-Domingo. Kini dili usa ka butang nga atong mahimo lamang ingon nga naandan o tradisyon kon kita nagpaabut nga moani sa tanang gisaad niini nga mga panalangin. “Ayaw kamo palimbong; ang Dios dili mabiaybiay: kay bisan unsay igapugas, mao usab kana ang iyang pagaanihon” (Mga Taga-Galacia 6:7). (Dieter F. Uchtdorf, “Wala Ba Kita’y Rason nga Maglipay?,” Liahona, Nob. 2007, 20)

Unsa kaha kon akong bation nga wala ko sa dalan padulong sa kinabuhing dayon?

Si Presidente Russell M. Nelson mitudlo:

Kon nahisalaag kamo, o kon adunay pipila ka butang nga kinahanglan ninyong undangon aron mas mahimong putli ang inyong hunahuna ug kasingkasing, karon ang hingpit nga panahon sa pag-usab.

Kon dili kamo sigurado kon unsaon sa paghinulsol, pakigsulti sa inyong bishop o sa inyong ginikanan o sa duha. Motabang sila ninyo nga makasabot sa Pag-ula ni Jesukristo. Motabang sila ninyo nga masinati ang kalipay nga kanunay nga dala sa tinuod nga paghinulsol.

Palihog ayaw pagtipas sa dalan sa pakigsaad og dugang nga minuto. Palihog balik pinaagi sa tinuod nga paghinulsol, karon. (Russell M. Nelson, “Paglaom sa Israel,” Tibuok Kalibotan nga Debosyonal sa Kabatan-onan, Hun. 2018)

Si Elder Jeffrey R. Holland sa Korum sa Napulog Duha ka Apostoles mitudlo:

Ang Dios wala kaayo maghunahuna kon unsay nanghitabo sa inyong kagahapon apan siya naghunahuna kon unsa kamo karon ug, uban sa Iyang tabang, unsay gusto ninyong mahitabo. (Jeffrey R. Holland, “Ang Labing Maayo Moabot Pa,” Liahona, Ene. 2010, 21)

Dugang nga mga Kalihokan sa Pagkat-on

Alternatibo nga pagsugod sa leksiyon

Dapita ang mga estudyante sa paghimo og pipila ka mga jumping jack, mga push-up, mga sit-up, ug uban pa. Pangutan-a ang mga estudyante: “Kon kinahanglan nimong buhaton ang matag usa niini sulod sa pipila ka minuto, sa unsang paagi kaha malahi ang imong kasinatian? Ngano nga mahimong lisod ang pagpadayon sa pag-apil sa maayong mga kalihokan sa paglabay sa panahon? Unsa nga mga kaayohan ang atong makuha?”

ChurchofJesusChrist.org.