2 Nephi 32:8–9

“Kamo Kinahanglan Gayod nga Mag-ampo sa Kanunay”

Usa sa labing sukaranan nga mga sugo nga anaa kanato mao ang pag-ampo ngadto sa Langitnong Amahan. Apan daghang butang ang makababag kanato sa pag-ampo. Gipahinumdoman ni Nephi ang mga tawo sa kaimportante sa pag-ampo ug sa mga panalangin nga moabot gikan sa makanunayon nga komunikasyon ngadto sa atong Langitnong Amahan. Kini nga leksiyon makatabang nimo nga madugangan ang imong tinguha sa pagpakig-istorya sa imong Langitnong Amahan pinaagi sa pag-ampo.

Pagsukod sa kahibalo sa mga estudyante.Ang matag estudyante adunay lain-laing ang-ang sa pagsabot sa mga hilisgotanan sa ebanghelyo. Ang pagdapit sa mga estudyante sa pagpaambit sa unsay ilang nahibaloan nga makatabang nimo sa pagpili kon unsa nga mga bahin sa leksiyon ang kinahanglang gahinan og panahon sa mga estudyante.

Pagpangandam sa estudyante: Ikonsiderar ang pagdapit sa mga estudyante sa pagmatikod kon unsa kasagad silang mag-ampo ug kon ngano.

Mga Posibleng Kalihokan sa Pagkat-on

Kanus-a ka mag-ampo?

Ikonsiderar ang pagsugod pinaagi sa mosunod nga kalihokan aron matabangan ang mga estudyante sa paghunahuna kon ngano ug kanus-a sila mag-ampo.

Mahimo nimong isulat diha sa pisara ang mosunod nga pamahayag: Nag-ampo ako kon …

Paghunahuna og daghang mga paagi nga tukma nimong makompleto ang mosunod nga pamahayag: Nag-ampo ako kon …

Mahimong epektibo ang pagdapit sa mga estudyante sa pagkompleto sa pamahayag nga dili magpaila diha sa gagmay nga mga piraso sa papel nga mahimo nimong tigumon ug basahon og kusog.

ChurchofJesusChrist.org

Paggahin og kadiyot sa pagpamalandong kon unsa ka kasagad mag-ampo ngadto sa Langitnong Amahan ug nganong nag-ampo ka. Samtang magpadayon ka sa imong pagtuon, pamalandongi kon sa unsang paagi ka gipanalanginan sa Langitnong Amahan tungod sa imong mga pag-ampo, ingon man sa bisan unsang paagi nga imong gibati nga gusto Niya nga pauswagon nimo ang imong komunikasyon ngadto Kaniya.

Ang mga pagtulun-an ni Nephi sa pag-ampo

Human si Nephi mitudlo sa iyang katawhan sa pagpabilin diha sa higpit ug pig-ot nga dalan padulong sa kinabuhing dayon ug sa pagbusog sa mga pulong ni Kristo (tan-awa sa 2 Nephi 31:19–20; 32:1–3), mitudlo siya unsaon nila pagkahibalo sa katinuod sa Iyang mga pulong.

Basaha ang mga pulong ni Nephi sa 2 Nephi 32:4, 7.

• Unsa ang dili gustong buhaton sa pipila sa mga katawhan ni Nephi?

• Ngano sa imong hunahuna nga kini makapaluya ni Nephi?

Si Nephi dayon mipadayon sa pagtudlo mahitungod sa kaimportante sa pag-ampo.

Basaha ang 2 Nephi 32:8–9, nga mangita sa unsay gitudlo ni Nephi mahitungod sa pag-ampo.

Ang 2 Nephi 32:8–9 usa ka tudling sa doktrinal nga kahanas.  Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa nga mga kamatuoran ang imong nakit-an?

Awhaga ang pipila ka mga estudyante sa pagpaambit. Samtang nagpaambit sila og mga kamatuoran, isulat kini diha sa pisara o tugoti ang mga estudyante sa pagsulat niini diha sa pisara. Ang mosunod mao ang pipila ka kamatuoran nga mahimong maila sa mga estudyante:

Pipila sa mga kamatuoran nga gitudlo ni Nephi naglakip sa:

• Kon kita mag-ampo kanunay, ang Langitnong Amahan mopahinungod sa atong paningkamot alang sa kaayohan sa atong mga kalag.

• Gusto sa Langitnong Amahan nga mag-ampo kita.

• Si Satanas dili gusto nga kita mag-ampo.

• Kinahanglang mag-ampo kita kanunay.

Pakigsulti ngadto sa Langitnong Amahan

Ikonsiderar kon unsay napaambit na sa mga estudyante mahitungod sa pag-ampo ug dayon tinoa kon hain sa mosunod nga mga kalihokan ang mahimong labing makatabang. O mahimo nimong ihatag sa mga estudyante ang mosunod nga handout ug dapita sila sa pagkompleto sa usa o duha ka mga kalihokan nga ilang gibati nga labing makatabang kanila.

Ang mga estudyante mahimong magtrabaho nga mag-inusara o kauban ang usa ka klasmeyt. Kon magtinabangay sila, mahimo nilang ipresentar ang ilang mga nahibaloan nga magkauban.

Dugang Pagkat-on mahitungod sa Pag-ampo

Manwal sa Magtutudlo sa Basahon ni Mormon (2024)––“2 Nephi 32:8–9: ‘Kamo Kinahanglan Gayod nga Mag-ampo sa Kanunay”’

Kalikohan A

Unsa ang pipila ka rason nga ang Langitnong Amahan gusto nga kita mag-ampo samtang si Satanas motintal kanato nga dili?

• Unsa ang pipila ka mga paagi nga si Satanas mahimong motintal kanato sa dili pag-ampo?

Usa sa mga paagi nga si Satanas mahimong“motudlo [kanato] nga [kita] dili gayod kinahanglan mag-ampo” mao ang pagsulay sa pagkombinsir kanato sa bakak nga tungod kay nakasala kita, dili na kita takos sa pag-ampo.

Pagpamalandong kon unsa nga mga panalangin ang gisulayan ni Satanas sa pagpugong kanato sa pagdawat samtang imong buhaton ang mosunod:

• Paggahin og panahon sa pagtuon bahin sa pag-ampo. Mahimo nimong pangitaon ang pag-ampo diha sa Giya ngadto sa mga Kasulatan , pangitaa sa Gospel Topics, o pangita sa mga pakigpulong sa kinatibuk-ang komperensiya nga naghisgot bahin sa pag-ampo. Samtang magtuon ka, pangitaa ang mga panalangin sa pag-ampo. Mahimo usab nimong hunahunaon ang mga panalangin nga imong nasinati gumikan sa pag-ampo diha sa imong kinabuhi. Base sa imong pagtuon ug mga kasinatian, pagpamalandong nganong gusto sa Langitnong Amahan nga kita mag-ampo ug nganong si Satanas motintal kanato nga dili.

ChurchofJesusChrist.org

Isulat ang labing menos duha ka kamatuoran nga imong nakat-onan mahitungod sa pag-ampo. Ilakip nganong sa imong hunahuna gusto sa Langitnong Amahan nga kita mag-ampo ug si Satanas motintal kanato nga dili.

Kalihokan B

Unsa ang gipasabot sa mag-ampo sa kanunay?

Ikonsiderar ang pagmarka sa hugpong sa mga pulong nga “mag-ampo sa kanunay, ug dili mawad-an sa paglaum” (2 Nephi 32:9).

Basaha ang Alma 34:21, 27, nga mangita og mga panabot kon unsay ipasabot sa pag-ampo kanunay.

• Nganong ang mag-ampo “sa buntag, sa udto, ug sa gabii” (Alma 34:21) mahimong usa ka panalangin?

• Unsaon nato pagduol ang atong mga kasingkasing ngadto sa Dios, bisan kon wala kita mag-ampo?

Si Elder David A. Bednar sa Korum sa Napulog Duha ka Apostoles mihatag og usa ka ehemplo kon unsay ipasabot sa pag-ampo kanunay:

Pagpakitambag ngadto sa Langitnong Amahan diha sa pag-ampo sa buntag. …

Sulod sa dagan sa adlaw, maghupot kita og pag-ampo diha sa atong kasingkasing alang sa mapadayunon nga panabang ug paggiya. …

Sa pagkahuman sa atong adlaw, moluhod na usab kita ug motaho pagbalik ngadto sa atong Amahan. Atong balikon pagtan-aw ang mga panghitabo niana nga adlaw ug mopahayag og kinasingkasing nga mga pagpasalamat alang sa mga panalangin nga atong nadawat. Kita maghinulsol ug, uban sa panabang sa Espiritu sa Ginoo, atong ilhon ang mga paagi nga atong mabuhat ug mahimo nga mas labaw pa ka maayo sa pagka-ugma. Sa ingon ang atong pag-ampo sa gabii mapalig-on ug usa ka sumpay sa atong pag-ampo sa buntag. Ug ang atong pag-ampo sa gabii mao usab ang pagpangandam alang sa makahuluganon nga pag-ampo sa buntag. (David A. Bednar, “Pag-ampo sa Kanunay,” Liahona, Nob. 2008, 41–44)

Isulat sa imong kaugalingong mga pulong unsa sa imong hunahuna ang gipasabot sa pag-ampo kanunay.

Kalihokan C

Sa unsang paagi ang Langitnong Amahan mopahinungod sa atong mga paningkamot alang sa kaayohan, o benepisyo, sa atong kalag?

Si Nephi mitudlo “pag-ampo ngadto sa Amahan diha sa ngalan ni Kristo, aron siya mopahinungod sa inyong binuhatan nganha kaninyo, nga [kini] mahimo unta nga kaayohan sa inyong kalag” (2 Nephi 32:9). Ang mopahinungod nagpasabot sa paghimo nga sagrado o ipahinungod.

Paghunahuna og bisan usa ka ehemplo diin ang Langitnong Amahan mipanalangin og usa ka tawo samtang siya nag-ampo ug naningkamot sa pagbuhat sa unsay Iyang gusto. Mahimong kini usa ka personal nga kasinatian, usa ka modernong-adlaw nga ehemplo, o mahimo kang makakita og asoy diha sa mga kasulatan (gamita ang Index, o Giya ngadto sa mga Kasulatan sa pagpangita og usa ka panig-ingnan kon gikinahanglan).

Isulat ang ehemplo ug unsay gitudlo niini kanimo kon sa unsang paagi panalanginan sa Langitnong Amahan ang atong mga paningkamot sa pagtuman sa Iyang kabubut-on samtang mag-ampo kita.

© 2024 by Intellectual Reserve, Inc. All rights reserved.

Pipila sa mga ehemplo nga mahimong mahunahunaan sa mga estudyante alang sa Kalihokan C naglakip ni Nephi nga nag-ampo ug ang iyang mga gapos nahubad (tan-awa sa 1 Nephi 7:16–19) ug ni Lehi nga nag-ampo alang sa giya aron matabangan si Nephi nga makakuha og pagkaon alang sa ilang pamilya (tan-awa sa 1 Nephi 16:21–26, 30–32).

Dapita ang daghang mga estudyante sa pagpaambit unsay ilang nakat-onan gikan sa mga kalihokan nga ilang nahuman. Ang pagbuhat sa ingon makatugot sa mga estudyante nga makakat-on gikan sa mga kasinatian sa ilang mga kaedad. Mahimo usab nga ipaambit sa mga estudyante ang bisan unsang mga pangutana nga naa sila. Kon buhaton nila kini, dapita ang ubang mga estudyante sa paggamit sa unsay ilang gitun-an ug sa ilang kaugalingong kasinatian aron makatabang sa pagtubag sa mga pangutana.

Unsa ang gusto nakong mahinumdoman

Pamalandongi ang imong nakat-onan karong adlawa. Ikonsiderar ang pagsulat unsa ang gusto nimong mahinumdoman o buhaton isip resulta. Sama pananglit, mahimo nimong dugangan kon unsa ka kasagad nga mag-ampo, maningkamot nga makaila kon sa unsang paagi ang Ginoo mopanalangin kanimo samtang ikaw mag-ampo ug molihok, o maningkamot sa pagbuntog sa bisan unsang mga tintasyon nga imong gibati nga dili mag-ampo.

Kon imong gibati nga kini angay, ikonsiderar ang pagdapit sa mga estudyante sa paghunong ug pag-ampo sa hilom, paggamit sa unsay ilang gihunahuna mahitungod sa pag-ampo.

Komentaryo ug Background nga Impormasyon

Nganong importante kaayo ang pag-ampo?

Si Elder José A. Teixeira sa Korum sa Seventy miingon:

Nagpuyo kita sa panahon nga sa usa ka tuplok o mando sa tingog [voice command], makasugod kita sa pagpangita og mga tubag sa hapit bisan unsang hilisgotan sa kadaghan sa datos nga gitipigan and organized sa usa ka lapad ug komplikado nga network sa mga kompyuter.

Sa laing bahin, aduna kitay yano nga imbitasyon nga magsugod sa pagtinguha og mga tubag gikan sa langit. “Pag-ampo sa kanunay, ug Ako mo[bubo] sa akong Espiritu diha kanimo.” Dayon ang Ginoo nagsaad, “Ug daghan ang imong panalangin—oo, gani labaw pa sa mga bahandi sa kalibotan nga imong [m]aangkon.” [Doktrina ug mga Pakigsaad 19:38].

Hingpit nga nakaila ang Dios sa matag usa kanato ug andam nga maminaw sa atong mga pag-ampo. Kon kita makahinumdom sa pag-ampo, makaplagan nato ang Iyang makaabag nga gugma, ug kon dugangan pa nato ang atong pag-ampo ngadto sa atong Amahan sa Langit sa ngalan ni Kristo, mas malakip nato ang Manluluwas sa atong kinabuhi ug mas mailhan nato ang agianan nga iyang giandam paingon sa atong langitnong panimalay. (José A. Teixeira, “Hinumdomi ang Inyong Agianan Pauli sa Langitnong Panimalay,” Liahona, Mayo 2021, 93)

Unsa ang akong mahimo aron ang mga pag-ampo mahimong mas makahuluganon ug epektibo?

Si Presidente M. Russell Ballard sa Korum sa Napulog Duha ka Apostoles mipahayag:

Ang pag-ampo alang sa kaangayan, kalinaw, sa mga kabos, ug sa mga masakiton sa kasagaran dili paigo. Human nga kita moluhod sa pag-ampo, kinahanglan kitang mobarog ug mobuhat unsay atong ikatabang—sa pagtabang sa atong kaugalingon ug sa uban. (M. Russell Ballard, “Panagtukaw Kamo sa Tanang Panahon, ug Manag-ampo,” Liahona, Nob. 2020, 78)

Sa pakigpulong nga “Pag-ampo sa Kanunay” si Elder David A. Bednar sa Korum sa Napulog Duha ka Apostoles mitudlo og tulo ka mga baroganan sa paglig-on sa atong komunikasyon ngadto sa Langitnong Amahan.

Dugang nga mga Kalihokan sa Pagkat-on

Mga lakang sa pag-ampo

Kon ang mga estudyante nagkinahanglan og tabang sa pagkat-on unsaon sa pag-ampo, ikonsiderar ang pagdapit kanila sa pagbasa sa pag-ampo sa Ginoo diha sa Mateo 6:9–13. Aron matabangan ang mga estudyante sa pag-ila sa importante nga mga elemento sa pag-ampo, dapita sila sa pagrebyo sa pakigpulong ni Presidente Russell M. Nelson sa “Mga Leksiyon gikan sa Pag-ampo sa Ginoo” (Liahona, Mayo 2009). Awhaga sila sa paghunahuna kon unsaon nila sa pagpuyo niini nga mga butang sa ilang kaugalingong mga pag-ampo.

Pagtuon og pakigpulong sa kinatibuk-ang komperensiya

Dapita ang lain-laing grupo sa mga estudyante sa pagbasa sa matag usa sa tulo ka mga baroganan sa pakigpulong ni Elder David A. Bednar nga “Pag-ampo sa Kanunay.” Dayon ang mga estudyante mahimo nga moreport sa unsay ilang nakat-onan ug sa unsang paagi kini makatabang kanila sa pag-ampo kanunay.

Mga pagtintal nga dili mag-ampo

Ang mga estudyante mahimong managhisgot [brainstorm] og mga paagi ug mga rason nga si Satanas mahimong mosulay sa pagtintal sa usa ka tin-edyer nga dili mag-ampo. Mahimo dayon silang mangita diha sa mga kasulatan og mga kamatuoran nga mahimong makatabang sa usa ka tin-edyer sa pagbuntog niini nga mga tintasyon.