“2 Nephi 32:1–7: ‘Pagbusog sa mga Pulong ni Kristo,’” Manwal sa Magtutudlo sa Basahon ni Mormon (2024)
“2 Nephi 32:1–7,” Manwal sa Magtutudlo sa Basahon ni Mormon
2 Nephi 32:1–7
“Pagbusog sa mga Pulong ni Kristo”
Paghunahuna og usa ka selebrasyon nga kombira nga adunay daghang lamian nga pagkaon. Sa unsang paagi nimo makita ang imong kaugalingon nga nalingaw sa ingon niana nga kombira? Human sa pagtudlo sa iyang mga katawhan mahitungod sa pagsunod ni Jesukristo subay sa dalan sa pakigsaad, si Nephi nakamatikod nga dili gihapon sila segurado kon unsay buhaton human sa bunyag. Siya mitubag pinaagi sa pagdasig sa iyang katawhan sa “pagbusog sa mga pulong ni Kristo” ug mipasalig kanila nga ang mga pulong sa Manluluwas mogiya kanila sa unahan (2 Nephi 32:3). Kini nga leksiyon gituyo aron sa pagtabang kanimo sa pagbusog sa mga pulong ni Jesukristo.
Ang Kasinatian sa Tigkat-on.Sa atong pagtuman sa Tumong sa Seminaries ug Institutes, atong tumong nga tabangan ang matag estudyante nga makasinati sa pagkakabig, kalambigitan, ug pagkasakop. Pangita og mga paagi sa pagtabang sa mga estudyante nga makabig ngadto ni Jesukristo, ikonektar ang unsay ilang nakat-onan ngadto sa ilang personal nga mga kahimtang, ug mobati nga luwas ug gisuportahan sa ilang pagkat-on.
Pagpangandam sa estudyante: Dapita ang mga estudyante nga itandi ang ilang personal nga pagtuon sa kasulatan ngadto sa nagkaon og pagkaon [eating food] ug awhaga sila sa pag-andam sa pagpaambit sa ilang mga ideya atol sa klase.
Mga Posibleng Kalihokan sa Pagkat-on
Panahon sa pagkaon!
Sa pagsugod sa klase, imbes nga ipakita ang mga hulagway sa ubos, ikonsiderar ang pagdapit og duha ka estudyante sa pag-aksiyon sa mosunod samtang ang nahibilin sa klase motag-an kon unsay gipakita: mag-snack, mokaon og usa ka kaonan [meal], ug magbusog sa bangkete o selebrasyon.
Tan-awa ang mosunod nga mga hulagway ug paghunahuna og mga pagkaparehas ug kalainan tali sa mag-snack, magkaon og usa ka kaonan [meal], o magbusog atol sa espesyal nga okasyon.
-
Unsa ang pipila ka pagkaparehas ug kalainan nga imong nahunahunaan?
-
Kon atong itandi ang pagtuon sa mga pulong ni Kristo niining tulo ka paagi sa pagkaon, unsa kaha ang girepresentar sa matag usa?
Ang Langitnong Amahan ug si Jesukristo nagtinguha sa pagpanalangin kanimo og giya, direksiyon, tabang, ug kahupayan. Hunahunaa ang kataposang higayon nga imong gitun-an ang mga pulong sa Manluluwas. Imo bang ihulagway ang kasinatian sama sa mag-snack, magkaon, o magbusog? Unsa man usab kadtong sa miaging semana o bulan? Samtang magpadayon ka sa imong pagtuon, pangayo og tabang sa Espiritu Santo aron makahibalo kon sa unsang paagi ang pagtuon sa mga pulong ni Kristo nahimong panalangin sa imong kinabuhi. Pangita usab og inspirasyon aron matabangan ka nga makahibalo unsaon pagpalambo sa imong mga paningkamot sa pagbusog sa mga pulong ni Kristo.
Ang mga pulong ni Jesukristo
Hinumdomi nga si Nephi mitudlo sa iyang mga katawhan mahitungod sa “higpit ug pig-ot nga dalan nga mopadulong sa kinabuhi nga dayon” ug ang mga kwalipikasyon sa pagsugod niana nga panaw (tan-awa sa 2 Nephi 31:17–18). Si Nephi nakamatikod nga ang iyang mga katawhan naghunahuna kon unsay buhaton human makadawat sa ordinansa sa bunyag ug unsaon sa pagpadayon diha sa dalan sa pakigsaad.
Basaha ang 2 Nephi 32:1–3, nga mangita sa tambag ni Nephi mahitungod sa pagtuon sa mga pulong ni Kristo. Samtang buhaton nimo, hunahunaa ang imong kaugalingon nga mga kabalaka, mga pangutana, ug mga panginahanglan ug sa unsang paagi ang mga pagtulun-an ni Nephi makabenepisyo kanimo. Mahimong makatabang ang pagkahibalo nga ang hugpong sa mga pulong nga “makapamulong sa mga pinulongan sa mga anghel” (2 Nephi 32:2) “yanong nagpasabot [nga] … makasulti sa gahom sa Espiritu Santo” (Boyd K. Packer, “Ang Gasa sa Espirito Santo: Unsa ang Angay Mahibaloan sa Matag Miyembro,” Liahona, Ago. 2006, 21).
Ang 2 Nephi 32:3 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
-
Unsay imong nadiskobrehan?
Samtang ipaambit sa mga estudyante ang unsay ilang napalgan, paminaw og maayo ug isulat ang bisan unsang tinuod nga mga baroganan nga ilang gipaambit diha sa pisara.
Usa ka kamatuoran nga tingali imong nadiskobrehan gikan sa 2 Nephi 32:3 mao nga kon kita magbusog sa mga pulong ni Jesukristo, kini mosulti kanato sa tanan nga mga butang nga kinahanglan natong buhaton. Ikonsiderar ang pagmarka niini nga kamatuoran diha sa imong mga kasulatan.
-
Asa nato makita ang mga pulong ni Jesukristo?
-
Ngano sa imong hunahuna nga si Nephi migamit sa pulong nga “pagbusog” dihang naghulagway kon unsaon nato pagtuon sa mga pulong sa Manluluwas (2 Nephi 32:3)?
Basaha ang mosunod nga pamahayag ni Elder Takashi Wada sa Seventy. Kon anaa, ikonsiderar ang pagtan-aw sa mensahe ni Elder Wada sa ChurchofJesusChrist.org gikan sa time code 0:53 hangtod sa 1:42.
Niadtong batan-on pa ko, naghunahuna ko nga ang magbusog mao lang ang adunay daghang pagkaon nga may kan-on, sud-an, ug patis. Karon nasayod na ko nga ang tinuod nga magbusog sobra pa sa pagtagamtam og lamiang pagkaon. Kasinatian kini sa kalipay, pahimsog, selebrasyon, pagpakigbahin, pagpahayag og gugma ngadto sa mga pamilya ug mga hinigugma, pagpadangat sa atong pasalamat ngadto sa Dios, ug pagtukod og mga relasyon samtang makatagamtam og abunda, espesyal nga lamiang mga pagkaon. Nagtuo ko nga kon kita magbusog sa mga pulong ni Kristo, kinahanglan kitang maghunahuna sa samang matang sa kasinatian. Ang magbusog sa mga kasulatan dili lamang ang magbasa niini. Kinahanglan kining magdala og tinuod nga kalipay ug magpalig-on sa atong pakigrelasyon sa Manluluwas. (Takashi Wada, “Magbusog sa mga Pulong ni Kristo,” Liahona, Mayo 2019, 38)
-
Unsa ang mipatigbabaw kanimo gikan sa pamahayag ni Elder Wada?
Ikonsiderar ang paggamit sa pipila o sa tanan nga mosunod nga mga pangutana aron matabangan ang mga estudyante sa pag-analisar sa gihatagan og gibug-aton nga kamatuoran.
Dapita ang pipila ka estudyante sa pagtubag ug ikonsiderar ang paglista sa unsay ilang gisulti diha sa pisara. Kon gikinahanglan, pahinumdomi sila sa mosunod:
-
Unsa ang nagtabang kanimo, o makatabang kanimo, dili lang sa pagbasa sa mga pulong ni Kristo apan sa pagbusog niini?
-
Sa paghinumdom sa unsay imong nahibaloan mahitungod ni Jesukristo, nganong ang Iyang mga pulong makadala og mga pagbati sa kalipay, pag-amuma, ug gugma?
-
Sa unsang paagi nga ang pagbusog sa mga pulong sa Manluluwas makahatag og direksiyon sa imong kinabuhi ug magsulti unsay angay nimong buhaton?
ChurchofJesusChrist.org
Ang pagkonsiderar sa imong kaugalingong mga kasinatian makatabang nimo sa pagbusog sa mga pulong ni Kristo.
Adunay daghang mga pamaagi sa pagtuon aron mapalambo ang pagbusog sa mga pulong ni Kristo nga mahimong makatabang, lakip ang pag-ampo alang sa inspirasyon sa dili ka pa magtuon, pagpangutana sa imong mga pangutana sa wala pa ug atol sa pagtuon, pagpangitag kahulugan sa mga pulong, pagpamalandong, pag-cross reference, pagsulat og mubo nga mga sulat, pagpangita sa mga kamatuoran bahin sa Langitnong Amahan ug sa Manluluwas, ug pagpahisama sa mga kasulatan diha sa atong kaugalingong mga kinabuhi (tan-awa sa 1 Nephi 19:23).
-
Unsa nga kinatibuk-ang mga impresyon o piho nga giya ang miabot kanimo samtang nagbusog sa mga pulong ni Kristo?
Pagbusog sa mga pulong ni Kristo
Hatagi ang mga estudyante og igong panahon alang sa mosunod nga kalihokan. Iduso ang mga estudyante ngadto sa mga ideya diha sa pisara alang sa mga pamaagi sa pagtuon nga mahimo nilang masulayan samtang sila mokompleto sa kalihokan sa pagbusog.
Gamit ang unsay imong nakat-onan karon, paggahin og pipila ka minuto sa pagbansay sa pagbusog diha sa mga pulong ni Kristo. Mahimong maglakip kini sa pagtuon sa mga kasulatan o mga pulong sa mga propeta. Sulayi nga matuman ang usa o daghan pa sa mga mosunod samtang nagpakabusog ka:
-
Itukod ang imong relasyon ngadto sa Langitnong Amahan ug ni Jesukristo.
-
Higugmaa ug salig Kanila sa labaw pa gayod.
-
Pangita og mga kamatuoran nga makahatag kanimo og kalipay ug pag-amuma.
-
Pagdawat og giya alang sa unsay angay nimong buhaton sa imong kinabuhi.
Irekord ang pipila ka mga butang nga imong nakat-onan, gibati, ug nasinati samtang nagbusog sa mga pulong ni Kristo.
Sa kataposang pipila ka minuto sa klase, dapita ang pipila ka mga estudyante sa pagpaambit mahitungod sa ilang mga kasinatian sa pagbusog sa mga pulong ni Kristo. Kon angay, awhaga sila sa pagpaambit sa mga kamatuoran nga ilang napalgan, unsay ilang gibati, o giya nga ilang nadawat. Ang pagpamati gikan sa ilang mga kaedad mahimong gamhanan nga kasinatian alang sa mga estudyante.
Ikonsiderar ang pagpaambit sa imong kaugalingon nga mga kasinatian ug paghatag og pagpamatuod sa mga panalangin nga atong nadawat samtang kita nagbusog sa mga pulong ni Kristo.