Doktrinal nga Kahanas: 2 Nephi 32:3

“Pagbusog sa mga Pulong ni Kristo; kay Tan-awa, ang mga Pulong ni Kristo Magtug-an Kaninyo sa Tanan nga mga Butang Nga Inyong Buhaton”

Sa miaging leksiyon, “2 Nephi 32:1–7,” nakat-on ka sa kaimportante sa pagbusog sa mga pulong ni Kristo. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa 2 Nephi 32:3, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Gahom pinaagi sa pagtuon sa kasulatan.Ang makahuluganon, personal nga pagtuon sa kasulatan makatabang nimo nga molambo ang imong pagsabot sa ebanghelyo sa Manluluwas ug sa Iyang Pag-ula, ingon man usab sa pagtudlo ug sa pagpamatuod nga adunay mas dakong gahom. Ang mga estudyante mapanalanginan ug madasig pinaagi sa imong personal nga saksi kon sa unsang paagi ang mga kasulatan nagpanalangin sa imong kinabuhi.

Pagpangandam sa estudyante: Ang mga estudyante tingali nakahigayon sa pagpraktis nga “magbusog sa mga pulong ni Kristo” sa kataposan sa miaging leksiyon. Dapita sila sa pagpadayon sa pagpraktis sa ilang personal nga pagtuon sa kasulatan ug motambong sa klase nga andam sa pagpaambit sa ilang kasinatian.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “2 Nephi 32:1–7,” nga mao ang pangkonteksto nga leksiyon alang sa tudling sa doktrinal nga kahanas sa 2 Nephi 32:3. Kon kini nga leksiyon sa tudling sa doktrinal nga kahanas kinahanglang ibalhin sa laing semana, seguroha nga itudlo usab ang katugbang nga leksiyon sa konteksto niana nga semana.

Ipasabot ug isag-ulo

Gamita ang bisan unsa nga epektibong paagi aron matabangan ang mga estudyante nga makamemorya sa pakisayran sa kasulatan ug sa mahinungdanon nga hugpong sa mga pulong sa kasulatan alang sa 2 Nephi 32:3 ug sa pagpasabot sa mga kamatuoran nga makita niini nga tudling.

Ang mosunod nga mga kalihokan maoy mga sugyot kon sa unsang paagi kini mahimo.

Hunahunaa nga gihangyo ka sa paghatag og mubo nga panghunahuna atol sa debosyonal [short devotional thought] sa seminary mahitungod sa kaimportante sa pagtuon sa mga kasulatan. Basaha ang 2 Nephi 32:3 ug hinumdomi ang baroganan nga kon kita magbusog sa mga pulong ni Jesukristo, kini magtug-an kanato sa tanan nga mga butang nga kinahanglan natong buhaton.

• Unsaon nimo sa paggamit ang unsay imong nakat-onan sa miaging leksiyon, ug ang imong personal nga kasinatian, sa pagpasabot kon unsay buot ipasabot sa “pagbusog sa mga pulong ni Kristo”? (2 Nephi 32:3).

• Unsa nga kalainan ang mahimo sa pagbusog sa mga pulong ni Kristo sa kinabuhi sa kabatan-onan?

Mahimong usa kini ka maayong dapit sa pagdapit sa mga estudyante sa paglakip sa ilang kaugalingong mga kasinatian samtang ipaambit nila ang ilang mga hunahuna gikan sa kalihokan sa pagpangandam.

Ikonsiderar ang paghatag og mga materyal aron matabangan ang mga estudyante sa pagkompleto sa mosunod nga kalihokan. Mahimo silang dapiton sa pagbuhat niini diha sa ilang mga journal sa pagtuon. Mahimo nimong i-adjust kini nga kalihokan aron tugotan ang mga estudyante nga magdrowing og hulagway nga mas nagpakita sa ilang kultura.

Aron matabangan ka sa pagsag-ulo ug paggamit niini nga tudling, pagdrowing og table setting sa usa ka piraso nga papel. Mahimong susama kini sa hulagway sa ubos. Mahimo ka usab nga magdrowing og mga litrato sa pagkaon o mga kasulatan diha sa plato. Isulat ang hugpong sa mga pulong “2 Nephi 32:3—pagbusog sa mga pulong ni Kristo, kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” bisan asa diha sa inyong pahina. Basaha kini nga hugpong sa mga pulong sa makadaghang higayon hangtod nga mamemorya nimo kini. Ikonsiderar ang pagbutang sa imong drowing sa usa ka dapit diha sa imong balay o sa refrigerator diin mahimo nimong i-rebyo kini matag higayon nga mokaon ka.

Human sa igong panahon, dapita ang mga estudyante sa pagpaambit sa ilang mga drowing diha sa gagmay nga mga grupo o uban sa klase.

Pagbansay sa Paggamit

Bahina ang klase ngadto sa tinagtulo ka grupo, nga ang matag estudyante mopili og managlahi nga baroganan sa pag-angkon og espirituhanong kahibalo (tan-awa sa Mahinungdanon nga Dokumento sa Doktrinal nga Kahanas [2022], “Pag-angkon og Espirituhanong Kahibalo,” mga parapo 5–12). Hangyoa ang mga estudyante sa pagrebyo og daklit sa baroganan ug dayon ipasabot kini ngadto sa ilang grupo.

Dayon ipaambit ang mosunod nga senaryo. O kon kini mas may kalabotan sa imong mga estudyante, ikonsiderar ang paghangyo kanila sa paghimo og lista sa mga rason nga ang usa ka tawo mahimong maglisod sa pagtuon sa ilang mga kasulatan. Mahimo dayong dapiton ang mga estudyante sa pagpili og kalisod gikan sa lista ug maningkamot sa pagbuntog niini pinaagi sa paggamit sa mga baroganan sa pag-angkon og espirituhanong kahibalo.

• Unsaon nimo sa pagpasabot sa daklit ang baroganan nga imong gipili ngadto sa usa ka tawo nga tingali dili pamilyar niini?

Hunahunaa nga human sa usa ka leksiyon sa seminary mahitungod sa kaimportante sa inadlaw nga pagtuon sa kasulatan, ang imong higala nag-ingon kanimo, “Nasayod ko nga ang pagtuon sa mga kasulatan usa ka maayong butang nga buhaton, apan sa tanang mga butang nga nahitabo sa akong kinabuhi karon, wala lang akoy panahon, hilabina dili kada adlaw.”

Mahimong epektibo ang pagpangutana sa mga estudyante kon maka-relate ba sila niini nga sitwasyon ug ngano.

Susihon ang mga konsepto ug mga pangutana inubanan sa mahangtorong panglantaw

• Unsa ang gusto nimong masayran sa imong higala mahitungod ni Jesukristo o sa plano sa kaluwasan nga makatabang nila nga magtinguha sa pagpaningkamot nga magbusog sa Iyang mga pulong kada adlaw?

• Sa unsang paagi nga ang kanunay nga pagbusog sa mga pulong ni Kristo makaapekto kanato sa paglabay sa panahon, gani sa kahangtoran?

Tinguhaa ang dugang nga panabot pinaagi sa balaanong gitudlo nga mga tinubdan

Hunahunaa nga human maghisgot og mahangtorong panglantaw, ang imong higala miingon og, “Salamat. Kana nakatabang og gamay. Apan nagtuo gihapon ko nga maglisod ko sa pagpangita og panahon kada adlaw sa pagtuon sa akong mga kasulatan.”

• Sa unsang paagi kaha sa imong hunahuna nga ang 2 Nephi 32:3 makatabang sa imong higala?

• Unsa nga mga kasulatan o mga pamahayag gikan sa mga propeta ang mahimong makatabang sa imong higala?

Ikonsiderar ang paghatag og panahon sa mga estudyante sa pagpangita og mga kasulatan ug mga pamahayag.

Ang pipila ka mga ehemplo mahimong maglakip sa Doktrina ug mga Pakigsaad 26:1 ingon man ang mosunod nga pamahayag gikan ni Elder Richard G. Scott (1928–2015) sa Korum sa Napulog Duha ka Apostoles:

Ayaw patuo sa bakak ni Satanas nga kamo walay panahon sa pagtuon sa kasulatan. Pilia nga makagahin og panahon sa pagtuon niini. Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media. Tingali kinahanglan ninyong i-organisar pag-usab reorganize ang inyong mga prayoridad aron makagahin og panahon sa pagtuon sa pulong sa Dios. Kon mao, buhata kini! (Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 93)

• Sa unsang paagi kini nga mga pagtulun-an makatabang?

Lihokon Inubanan sa hugot nga pagtuo

Hatagi og panahon ang mga estudyante sa pagpamalandong sa mosunod nga sugyot ug mga pangutana. Human sa igo nga panahon, dapita ang pipila ka estudyante sa pagpaambit sa ilang mga tubag ngadto sa klase. Mahimo usab nimong ipaambit ang imong personal nga pagpamatuod sa pagtuon sa kasulatan ngadto sa klase.

Hunahunaa nga maayo ang reaksiyon sa imong higala sa imong gipaambit, apan nahibalo ka nga dili gayod niya mabuntog ang iyang kabalaka [concern] hangtod molihok siya uban ang hugot nga pagtuo, mosalig sa Ginoo.

Paggahin og panahon sa pagkonsiderar sa personal nga mga kasinatian nga imong nasinati sa mga pulong ni Kristo ug unsay imong nahibaloan mahitungod sa Manluluwas nga mahimong makadasig sa imong higala sa pagbusog sa Iyang mga pulong kada adlaw.

• Unsa nga mga kasinatian o pagpamatuod ang imong mapaambit nga mahimong makatabang sa imong higala nga molihok inubanan ang hugot nga pagtuo?

• Unsa ang imong nakat-onan nga imong gibati nga makatabang kanimo sa pagpalambo sa imong personal nga pagtuon sa kasulatan?

Rebyo sa doktrinal nga kahanas

Atol sa umaabot nga leksiyon, paggahin og pipila ka minuto sa pagrebyo sa pakisayran sa kasulatan ug sa mahinungdanon nga hugpong sa mga pulong alang sa 2 Nephi 32:3. Usa ka paagi sa pagbuhat niini mao ang pag-display sa mosunod nga gisagolsagol nga tudling ug mahinungdanon nga hugpong sa mga pulong sa kasulatan ug dapita ang mga estudyante sa pagtarong niini:

mga pulong inyong 32: tan-awa, ni Kristo mga pulong Pagbusog 2 Kristo; sa magtug-an kaninyo ni Nephi ang 3 kay nga buhaton sa tanan. nga mga butang

Ang laing opsiyon mao ang pagsulat sa matag usa niini nga mga pulong sa usa ka gamay nga piraso sa papel ug paghatag og usa o daghan pa sa matag estudyante. Dapita ang mga estudyante nga magtinabangay sa paghan-ay niini sa saktong pagkasunod-sunod.

Tubag: 2 Nephi 32:3 Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.