2 Nefia 32:1–7

“Mivokisa amin’ny tenin’i Kristy”

fianakaviana misakafo hariva

Makà sary an-tsaina fety fankalazana iray misy sakafo matsiro be dia be. Ahoana no fahitanao ny tenanao mankafy sakafo be toy izany? Rehefa avy nampianatra ny olony momba ny fanarahana an’i Jesoa Kristy eo amin’ny lalan’ny fanekempihavanana i Nefia, dia tsapany fa mbola tsy nahazo antoka ny zavatra tokony hatao aorian’ny batisa izy ireo. Namaly tamin’ny alalan’ny famporisihana ny olony “hivoky amin’ny tenin’i Kristy” izy ary nanome toky fa ny tenin’ny Tompo no hitarika azy ireo handroso (2 Nefia 32:3). Ity lesona ity dia natao hanampiana anao hivoky amin’ny tenin’i Jesoa Kristy.

Ny zavatra iainan’ny mpianatra. Rehefa manatratra ny Tanjon’ny Seminera sy ny Institiota isika, dia mikendry ny hanampy ny mpianatra tsirairay hiaina fiovam-po, fahatsapana ho manan-danja ary fahatsapana ho mpikambana ao anatina vondrona iray. Mitadiava fomba hanampiana ny mpianatra ho tonga olona miova fo ho an’i Jesoa Kristy, hampifandray ny zavatra ianaran’izy ireo amin’ny toe-javatra iainan’izy ireo manokana, ary hahatsapa filaminana sy fanohanana eo amin’ny fianaran’izy ireo.

Fanomanana ny mpianatra: Asao ny mpianatra mba hampitaha ny fandalinana soratra masina ataon’izy ireo manokana amin’ny fihinanana sakafo ary amporisiho izy ireo ho tonga efa vonona hizara ny hevitr’izy ireo mandritra ny fotoam-pianarana.

Ireo sahanasa azo atao ao anatin’ny fianarana

Fotoana hisakafoanana!

Rehefa hanomboka ny fotoam-pianarana, mba tsy hampisehoana ireo sary eo ambany, dia hevero ny hanasa mpianatra roa hilalao an-tsehatra ireto manaraka ireto ka ny sisa ao amin’ny kilasy dia haminavina ny zavatra aseho: mihinana tsakitsaky, mihinana sakafo tsotra mahazatra, ary mihinana sakafo be any amina fanasana na fankalazana iray.

Jereo ireto sary manaraka ireto ary eritrereto ny fitovitoviana sy ny fahasamihafana eo amin’ny fihinanana tsakitsaky, na fihinanana sakafo tsotra mahazatra, na fihinanana sakafo be mandritra ny fotoana manokana iray.

akondro

Vary iray lovia

sakafo be

• Inona avy ireo fitovitoviana sy fahasamihafana neritreretinao?

• Raha ampitahaintsika amin’ireo fomba fihinanana telo ireo ny fandalinana ny tenin’i Kristy, dia mety maneho inona izy tsirairay ireo?

Maniry ny hanome anao tari-dalana, fitarihana, fanampiana, ary fampiononana ny Ray any An-danitra sy i Jesoa Kristy. Eritrereto ny fotoana farany nandalinanao ny tenin’ny Mpamonjy. Hofaritanao ho toy ny mihinana tsakitsaky, sa mihinana sakafo tsotra mahazatra, sa mihinana sakafo be ve ilay zavatra niainanao? Ahoana ny momba ny tao anatin’ny herinandro na volana lasa? Rehefa manohy ny fandalinanao ianao, dia katsaho ny fanampian’ny Fanahy Masina mba hahafantarana ny naha-fitahiana teo amin’ny fiainanao ny fandalinana ny tenin’i Kristy. Mikatsaha ihany koa fitaomam-panahy hanampy anao hahafantatra ny fomba hanatsarana ny ezaka ataonao hivoky amin’ny tenin’i Kristy.

Ny tenin’i Jesoa Kristy

Tsarovy fa i Nefia dia nampianatra ny olony momba ny “lalana ety sy tery izay mitondra mankany amin’ny fiainana mandrakizay” sy ny fepetra takina hanombohana izany dia izany (jereo ny 2 Nefia 31:17–18). Tsikaritr’i Nefia fa nanontany tena momba ny zavatra hatao aorian’ny fandraisana ny ôrdônansin’ny batisa sy ny fomba hanohizana eo amin’ny lalan’ny fanekempihavanana ny olony.

Vakio ny 2 Nefia 32:1–3 mba hitadiavana ny torohevitr’i Nefia momba ny fandalinana ny tenin’i Kristy. Rehefa manao izany ianao, dia eritrereto ireo fanahianao, ireo fanontaniana anananao, ireo zavatra ilainao manokana ary ny fomba ahafahanao mahazo tombontsoa avy amin’ireo fampianaran’i Nefia. Mety hanampy ny fahafantarana fa ilay andian-teny hoe “miteny amin’ny fitenin’ny anjely?” (2 Nefia 32:2) “dia midika fotsiny hoe … miteny miaraka amin’ny herin’ny Fanahy Masina” (Boyd K. Packer, “The Gift of the Holy Ghost: What Every Member Should Know,” Ensign, Aug. 2006, 50).

Ny 2 Nefia 32:3 dia andinin-tsoratra masina fifehezana fotopampianarana. Hevero ny hanisy marika ireo andinin-tsoratra masina fifehezana fotopampianarana amin’ny fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hamerimberina fampiharana ny fotopampianarana nampianarina tao amin’io andininy io amina fanontaniana na toe-javatra iray.

• Inona no hitanao?

Rehefa mizara ny zavatra hitany ny mpianatra dia mihainoa tsara ary soraty eny amin’ny solaitrabe ny fitsipika marina rehetra zarain’izy ireo.

Fahamarinana iray mety ho hitanao tao amin’ny 2 Nefia 32:3 ny hoe rehefa mivoky amin’ny tenin’i Jesoa Kristy isika, dia hilaza amintsika ny zava-drehetra tokony hataontsika izany. Hevero ny hanisy marika io fahamarinana io ao anatin’ny soratra masinao.

• Aiza no ahafahantsika mahita ny tenin’i Jesoa Kristy?

• Nahoana araka ny eritreritrao no nampiasa ny teny hoe “mivokisa” i Nefia rehefa namaritra ny fomba tokony handalinantsika ny tenin’ny Mpamonjy (2 Nefia 32:3)?

Vakio ity teny nambaran’ny Loholona Takashi Wada ao amin’ny Fitopololahy manaraka ity. Raha misy dia hevero ny hijery ny hafatry ny Loholona Wada ao amin’ny ChurchofJesusChrist.org manomboka amin’ny kaodim-potoana 0:53 ka hatramin’ny 1:42.

Loholona Takashi Wada

Fony aho mbola tanora, dia nihevitra aho fa ny dikan’ny hoe mivoky dia tsy inona fa mihinana sakafo be ahitana vary, sy sushi, ary saosy soja. Fantatro ankehitriny fa ny tena hoe mivoky dia mihoatra noho ny fankafizana sakafo matsiro. Izany dia zavatra iainana feno fifaliana, famelomana, fankalazana, fizarana, fanehoam-pitiavana amin’ny fianakaviana sy ny olon-tiana, fanambarana ny fankasitrahantsika an’ Andriamanitra, ary fanorenana fifandraisana eo am-pankafizana sakafo betsaka sy tena matsiro. Mino aho fa rehefa mivoky amin’ny tenin’i Kristy isika dia tokony hieritreritra zavatra iainana mitovy karazana amin’izany. Ny fivokisana amin’ny soratra masina dia tsy famakiana izany fotsiny. Tokony hitondra fifaliana marina ho antsika izany ary hanorina ny fifandraisantsika amin’ny Mpamonjy. (Takashi Wada, “Mivoky amin’ny tenin’i Kristy,” Liahona, mey 2019, 38–39)

• Inona no nanan-danja taminao tao anatin’ny teny nambaran’ny Loholona Wada?

  Hevero ny hampiasa ny sasany amin’ireto fanontaniana manaraka ireto na izy rehetra mba hanampiana ny mpianatra hamakafaka ilay fahamarinana natao sora-matevina.

  Manasà mpianatra maromaro hamaly sy hihevitra ny hanao lisitra ny zavatra lazain’izy ireo eny amin’ny solaitrabe. Raha ilaina dia ampahatsiahivo azy ireo ireto manaraka ireto:

• Inona no manampy anao, na afaka manampy anao, tsy hamaky fotsiny ny tenin’i Kristy fa hivoky amin’izany?

• Rehefa mahatsiaro ny zavatra fantatrao momba an’i Jesoa Kristy ianao, dia nahoana no mety mitondra fahatsapana fifaliana, famokisana, ary fitiavana ny teniny?

• Ahoana no ahafahan’ny fivokisana amin’ny tenin’ny Mpamonjy manome fitarihana ho an’ny fiainanao sy milaza ny zavatra tokony hataonao?

ChurchofJesusChrist.org

Ny fiheverana ny zavatra niainanao manokana dia afaka manampy anao hivoky amin’ny tenin’i Kristy.

Misy fomba fandalinana maro hanatsarana ny fivokisana amin’ny tenin’i Kristy izay mety hanampy, tafiditra ao anatin’izany ny fivavahana mba hahazoana fitaomam-panahy alohan’ny handalinanao, ny fametrahana fanontaniana anananao mialoha sy mandritra ny fandalinana, ny famaritana teny, ny fisaintsainana, ny fampifandraisana soratra masina, ny fandraisana naoty, ny fitadiavana fahamarinana momba ny Ray any An-danitra sy ny Mpamonjy, ary ny fampiharana ny soratra masina eo amin’ny fiainantsika manokana (Jereo ny 1 Nefia 19:23).

• Inona no fahatsapana ankapobeny na tari-dalana manokana tonga taminao teo am-pivokisana ny tenin’i Kristy?

Mivoky amin’ny tenin’i Kristy

Omeo fotoana sahaza ny mpianatra hanaovany ity sahanasa manaraka ity. Asaivo mijery ireo hevitra eny amin’ny solaitrabe ny mpianatra mba hahitany fomba fandalinana azon’izy ireo andramana rehefa manatanteraka ny sahanasa fivokisana izy ireo.

Amin’ny alalan’ny fampiasana ny zavatra nianaranao androany, dia makà minitra maromaro hampiharana ny fivokisana amin’ny tenin’i Kristy. Izany dia mety hahitana fandalinana soratra masina na ny tenin’ireo mpaminany. Miezaha manatanteraka ny iray na ny maromaro amin’ireto manaraka ireto rehefa mivoky ianao:

• Aoreno ny fifandraisanao amin’ny Ray any An-danitra sy i Jesoa Kristy.

• Tiavo sy itokio kokoa Izy ireo.

• Mitadiava fahamarinana izay mitondra fifaliana sy famokisana ho anao.

• Mandraisa tari-dalana amin’ny zavatra tokony hataonao eo amin’ny fiainanao.

Raketo an-tsoratra ny sasany amin’ireo zavatra nianaranao, tsapanao, ary niainanao teo am-pivokisana tamin’ny tenin’i Kristy.

Mandritra ny minitra vitsivitsy farany amin’ny fotoam-pianarana, manasà mpianatra maromaro hizara ny zavatra niainan’izy ireo teo amin’ny fivokisana ny tenin’i Kristy. Raha ilaina dia amporisiho izy ireo hizara fahamarinana hitan’izy ireo, na ny zavatra tsapan’izy ireo, na ny tari-dalana noraisin’izy ireo. Ny fahenoana avy amin’ireo mitovy amin’izy ireo dia afaka ny ho zavatra iainana mahery vaika ho an’ny mpianatra.

Hevero ny hizara ireo zavatra niainanao manokana sy hijoro ho vavolombelona momba ireo fitahiana raisintsika rehefa mivoky amin’ny tenin’i Kristy isika.

Fanamarihana sy fampahalalana voarakitra

2 Nefia 32:2. Ahoana no ahafahako miteny amin’ny fitenin’ny anjely?

Ny Loholona Jeffrey R. Holland ao amin’ny Kôlejin’ny Apôstôly Roambinifolo dia nanazava fa rehefa miteny amin’ny hafa amin’ny fijerena ny lafin-tsaran-javatra sy amin’ny fitiavana isika, dia miteny amin’ny fitenin’ny anjely isika.

Loholona Jeffrey R. Holland

Ry rahalahy sy anabavy, mandritra ity fikatsahana maharitra mandrakizay mba hitovy bebe kokoa amin’ny Mpamonjy antsika ity dia enga anie isika mba hiezaka ny ho lehilahy sy vehivavy “lavorary,” farafaharatsiny amin’ity fomba iray ity amin’izao fotoana izao, dia ny mba tsy hanafintohina amin’ny teny izany, na raha lazaina amin’ny fomba tsaratsara kokoa, dia mba hiteny amin’ny fiteny vaovao, ny fitenin’ny anjely.” Ny teny lazaintsika toa ireo asa ataontsika dia tokony ho feno finoana sy fanantenana ary fiantrana, izay andraikitra telo manan-danja iantsorohan’ny Kristianina izay tena ilaina mafy eto amin’izao tontolo izao ankehitriny. Ny fampiasana teny toy izany, eo ambany fitarihan’ny Fanahy, dia afaka mamafa ny ranomaso, manasitrana ny fo, mampivoatra ny fiainana, mampiverina ny fanantenana ary mampibahana ny fahatokian-tena. (Jeffrey R. Holland, “The Tongue of Angels,” Liahona, Mey 2007, 18)

Ahoana no ahafahan’ny fivokisana amin’ny tenin’i Jesoa Kristy ao amin’ny soratra masina maneho amiko ny tokony hatao?

Nampianatra izao ny Loholona Spencer J. Condie ao amin’ny Fitopololahy:

Loholona Spencer J. Condie

Mety miatrika fanapahan-kevitra momba ny fanaovana asa fitoriana, ny ho asanao any aoriana ary, any amin’ny farany, ny fanambadiana ianao. Rehefa mamaky ny soratra masina sy mivavaka mba hahazo fitarihana ianao, ny tena marina dia mety tsy mahita ny valiny amina endrika vita printy amin’ny taratasy ianao, saingy rehefa mamaky ianao dia handray fahatsapana sy bitsika miavaka, ary, araka ny nampanantenaina, ny Fanahy Masina dia “hampiseho aminao ireo zavatra rehetra tokony hataonao” [2 Nefia 32:5]. (Spencer J. Condie, “Becoming a Great Benefit to Our Fellow Beings,” Ensign, May 2002, 45)

Nahoana no mila mivoky tsy tapaka amin’ny tenin’i Mpamonjy aho?

Sahanasa fianarana fanampiny

Tari-dalana amin’ny zava-drehetra

Mba hanampiana ny mpianatra hahatakatra ny fifandraisana misy eo amin’ny fivokisana amin’ny tenin’i Kristy sy ny hoe tarihin’ny Fanahy Masina, dia hevero ny hamaky ny 2 Nefia 32:3, 5 sy hanasa azy ireo hanisy marika ny andian-teny hoe “hilaza aminareo ny zava-drehetra” ao amin’ny andininy 3 sy ny hoe “hampiseho aminareo ny zavatra rehetra” ao amin’ny andininy 5. Azo ampiasaina hanaovana fifanakalozan-kevitra ireto fanontaniana manaraka ireto:

• Ahoana no ahafahan’ny tenin’i Jesoa Kristy manome anao tari-dalana manokana sy fanampiana?

• Ahoana no ahafahan’ny fivokisana amin’ny tenin’i Kristy manomana anao handray tari-dalana sy fampiononana avy amin’ny Fanahy Masina?

• Inona no zavatra niainana fantatrao izay nampisehoan’ny Fanahy Masina tamin’ny olona iray ny zavatra tokony hatao na ny fomba hiatrehana toe-javatra sasantsasany?

Ohatra ao amin’ny soratra masina

Hevero ny hanasa ny mpianatra hieritreritra ohatra ao amin’ny soratra masina na avy amin’ny tantaran’ny Fiangonana izay ahitana fotoana nitarihan’ny tenin’i Kristy ny olona iray tamin’ny fanapahan-keviny. Raha mila fanampiana amin’ny fieritreretana ohatra ny mpianatra, dia azonao atao ny manao lisitra eny amin’ny solaitrabe ireto toko sy andininy manaraka ireto ary manasa vondrona mpianatra samihafa hamaky ilay andinin-tsoratra masina sy hizara amin’ny kilasy ny zavatra nianaran’izy ireo.

• Joseph Smith—Tantara 1:11–14

• Josoa 1:7–8

• 2 Mpanjaka 23:1–3

• Matio 4:1–11

Fanombanana ny fahaizan’ny tena

Hevero ny hanoratra ity lisitra manaraka ity eny amin’ny solaitrabe ary hanasa ny mpianatra hieritreritra ny fomba handalinan’izy ireo ny tenin’i Jesoa Kristy ao anatin’ny tsirairay amin’ireto sehatra manaraka ireto. Azon’izy ireo atao ny manome naoty ny tenan’izy ireo amin’ny fampiasana ny teny hoe mihinana tsakitsaky,, na mihinana sakafo tsotra mahazatra, na mihinana sakafo be. Raha toa ka tsy mandalina na tsy miezaka mihaino ao anatin’ny iray amin’ireo sehatra ireo izy ireo amin’izao fotoana izao, dia azon’izy ireo ampiasaina ilay teny hoe afaka.

1. Fandalinana manokana ny soratra masina

2. Fandalinana ny filazantsara miaraka amin’ny fianakaviana any an-trano

3. Fivoriana fanasan’ny Tompo

4. Fihaonamben’ny Fiangonana maneran-tany

5. Seminera

6. Sekoly Alahady

7. Fivorian’ny kilasin’ny Zatovovavy na kôlejin’ny Fisoronana Aharôna

Asao hizara ny sasany amin’ny hevitr’izy ireo momba ny fomba mety hahafahan’izy ireo mivoky tsara kokoa amin’ny tenin’i Kristy ao amina sehatra iray manokana ny mpianatra. Azonao atao ihany koa ny manasa ny mpianatra hizara ny fomba nahazoan’izy ireo tombontsoa noho ny fivokisana tao amina sehatra iray manokana. Azon’ny mpianatra atao ny mametraka tanjona mba hivoatra ao anatin’ny iray amin’ireo sehatra ireo.