Fifehezana fotopampianarana: 2 Nefia 32:3

“Mivokisa amin’ny tenin’i Kristy; fa indro hilaza aminareo ny zava-drehetra tokony hataonareo ny tenin’i Kristy”

Tao anatin’ny lesona iray teo aloha, “2 Nefia 32:1–7,” dia nianatra ny maha-zava-dehibe ny fivokisana amin’ny tenin’i Kristy ianao. Ity lesona ity dia afaka manampy anao hitadidy ny toko sy andininy fifehezana fotopampianarana sy andian-teny manan-danja ao amin’ny 2 Nefia 32:3, sy hanazava ny fotopampianarana ary hampihatra fitsipiky ny fahazoana fahalalana ara-panahy amina toe-javatra tena misy eo amin’ny fiainana.

Hery amin’ny alalan’ny fandalinana soratra masina. Ny fandalinan’ny tena manokana ny soratra masina amin’ny fomba matotra dia hanampy anao amin’ny fahatakaranao ny filazantsaran’ny Mpamonjy sy ny Sorompanavotany, ary koa hampianatra sy hijoro ho vavolombelona amin-kery lehibe kokoa. Hotahina sy hahazo fanentanam-panahy amin’ny alalan’ny fijoroana ho vavolombelona ataonao manokana momba ny fomba itahian’ny soratra masina ny fiainanao ny mpianatra.

Fanomanana ny mpianatra: Mety nanana fahafahana nampihatra ny “mivoky amin’ny tenin’i Kristy” ny mpianatra tamin’ny fiafaran’ny lesona teo aloha. Asao hanohy ny fanaovana fampiharana ao amin’ny fandalinana soratra masina ataon’izy ireo manokana izy ireo ary ho tonga ao am-pianarana efa vonona hizara momba ny zavatra niainan’izy ireo.

Ireo sahanasa azo atao ao anatin’ny fianarana

Ity lesona momba ny andinin-tsoratra masina fifehezana fotopampianarana ity dia natao hampianarina aorian’ny lesona “2 Nefia 32:1–7,” izay lesona mifandray amin’ny sahan-kevitra ho an’ny andinin-tsoratra masina fifehezana fotopampianarana ao amin’ny 2 Nefia 32:3. Raha ohatra ka ilaina ny hamindrana ity lesona momba ny andinin-tsoratra masina fifehezana fotopampianarana ity amin’ny herinandro hafa dia ataovy azo antoka tsara fa lesona miresaka sahan-kevitra mifandray amin’izany ihany koa no ampianarina amin’io herinandro io.

Hazavao sy tadidio

Ampiasao izay rehetra mety ho fomba fiasa mahomby hanampiana ny mpianatra hitadidy ny andinin-tsoratra masina sy andian-teny manan-danja ao amin’ny 2 Nefia 32:3 ary hanazava ny fahamarinana hita ao amin’io andininy io.

Ireto sahanasa manaraka ireto dia sosokevitra momba ny fomba mety hanatanterahana izany.

Alaivo sary an-tsaina hoe nangatahina hanome fampaherezam-panahy fohy ao amin’ny seminera momba ny maha-zava-dehibe ny fandalinana soratra masina ianao. Vakio ny 2 Nefia 32:3 ary tsarovy ilay fitsipika hoe rehefa mivoky amin’ny tenin’i Jesoa Kristy isika, dia hilaza amintsika ny zava-drehetra tokony hataontsika izany.

• Ahoana no mety hampiasanao ny zavatra nianaranao tao amin’ny lesona teo aloha sy ny zavatra niainanao manokana, mba hanazavana ny hevitry ny hoe “mivoky amin’ny tenin’i Kristy”? (2 Nefia 32:3).

• Inona no fiovana azon’ny fivokisana amin’ny tenin’i Kristy entina eo amin’ny fiainan’ny zatovo?

Mety ho toerana mety tsara hanasana ny mpianatra hampiditra ny zavatra niainan’izy ireo manokana izany rehefa mizara ny eritreritr’izy ireo avy amin’ny sahanasa fanomanana izy ireo.

Hevero ny hanome fitaovana hanampiana ny mpianatra hamita ity sahanasa manaraka ity. Azo atao ny manasa azy ireo hanao izany ao amin’ny diary fandalinan’izy ireo. Mety ho azonao amboarina ity sahanasa ity mba hamelana ny mpianatra hanao sary maneho kokoa ny kolontsain’izy ireo.

Mba hanampiana anao hitadidy sy hampihatra io andinin-tsoratra masina io, dia manaova sarina latabatra misy ireo fitaovana fihinanana sy fisotroana nalamina araka ny tokony ho izy eo amina taratasy iray. Mety hitovitovy amin’ny sary etsy ambany izany. Afaka manao sarina sakafo na soratra masina eo ambonin’ny lovia ihany koa ianao. Soraty eo amin’ny faritra iray ao amin’ny pejinao ilay andian-teny ao amin’ny “2 Nefia 32:3—mivokisa amin’ny tenin’i Kristy; fa indro hilaza aminareo ny zava-drehetra tokony hataonareo ny tenin’i Kristy”. Vakio imbetsaka io andian-teny io mandra-pahavitanao tsianjery azy. Hevero ny hametaka ny sary nataonao any amina toerana iray ao an-tranonao na eo amin’ny vata fampangatsiahana izay ahafahanao mamerina mijery izany isaky ny misakafo ianao.

Rehefa avy omena fotoana ampy ny mpianatra, dia asao hizara ny sary nataon’izy ireo amina vondrona kely na amin’ny iray kilasy izy ireo.

Fampiharana hanazaran-tena

Zarao ho vondron’olona telo ny kilasy, ka ny mpianatra tsirairay dia samy misafidy fitsipiky ny fahazoana fahalalana ara-panahy iray (jereo ny Tahirin-kevitra fototra ho an’ny fifehezana fotopampianarana [2022], “Mahazo fahalalana ara-panahy,” andiam-pehezan-teny 5–12). Angataho hamerina hijery fohifohy ilay fitsipika ny mpianatra ary avy eo dia hanazava izany amin’ny vondrona misy azy ireo.

Avy eo dia zarao ity rafi-tantara manaraka ity. Na, raha toa ka mifanaraka kokoa amin’ny zavatra ilain’ny mpianatrao, dia hevero ny hangataka azy ireo hanao lisitra ny antony mety mahatonga ny olona iray ho sahirana amin’ny fandalinany ny soratra masina. Avy eo dia azo atao ny manasa ny mpianatra hisafidy fahasahiranana iray avy eo amin’ny lisitra ary hanao izay handresena izany amin’ny alalan’ny fampiasana ireo fitsipiky ny fahazoana fahalalana ara-panahy.

• Ahoana no hanazavanao fohifohy ilay fitsipika izay nosafidinao amin’ny olona izay mety tsy dia mahafantatra izany loatra?

Alaovy sary an-tsaina hoe aorian’ny lesona iray ao amin’ny seminera momba ny maha-zava-dehibe ny fandalinana soratra masina isan’andro, dia milaza aminao ny namanao hoe: “Fantatro hoe zavatra tsara hatao ny fandalinana ny soratra masina isan’andro, saingy eo anatrehan’ireo zavatra rehetra miseho eo amin’ny fiainako amin’izao fotoana izao, dia tena tsy manana fotoana aho, indrindra fa ny hoe isan’andro”.

Mety hahomby ny hanontany ny mpianatra raha toa ka afaka mampifandray ny tenany amin’io zava-misy io izy ireo.

Fakafakao amin’ny fomba fijery mibanjina ny mandrakizay ireo foto-kevitra sy fanontaniana.

• Inona no tianao ho fantatry ny namanao momba an’i Jesoa Kristy na ny drafitry ny famonjena ka afaka manampy azy ireo hiezaka hivoky amin’ny teniny isan’andro?

• Ahoana no mety hahafahan’ny fivokisana tsy tapaka amin’ny tenin’i Kristy hisy fiantraikany eo amintsika rehefa mandeha ny fotoana, na mandrakizay mihitsy aza?

Mikatsaha fahatakarana bebe kokoa amin’ny alalan’ireo loharanom-pahalalana nofidin’ Andriamanitra

Alaivo sary an-tsaina hoe aorian’ny fifanakalozan-kevitra mombana fomba fijery mibanjina ny mandrakizay dia hoy ny namanao: “Misaotra. Manampy kely izany. Saingy mbola mieritreritra aho fa ho sahirana hitady fotoana isan’andro handalinako ny soratra masina.”

• Ahoana araka ny eritreritrao no ahafahan’ny 2 Nefia 32:3 manampy ny namanao?

• Inona no soratra masina na teny nambarana mpaminany mety ho afaka manampy ny namanao?

Hevero ny hanome fotoana ny mpianatra mba hitadiavany soratra masina sy teny nambara.

Ny ohatra sasany dia mety hahitana ny Fotopampianarana sy Fanekempihavanana 26:1 ary eo ihany koa ity teny manaraka ity izay nambaran’ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo:

Aza milefitra amin’ny laingan’i Satana hoe tsy manana fotoana handalinana ny soratra masina ianareo. Misafidiana haka fotoana handalinana azy ireny. Manan-danja kokoa noho ny torimaso, ny sekoly, ny asa, ny fandaharana amin’ny fahitalavitra, ny jeux vidéo, na ny tambajotran-tserasera ny fivokisana isan’andro amin’ny tenin’ Andriamanitra. Mety mila reorganize mamerina mandamina indray ireo laharam-pahamehanareo ianareo mba hanokanana fotoana ho an’ny fandalinana ny tenin’ Andriamanitra. Raha ilaina izany dia ataovy! (Richard G. Scott, “Ataovy voalohany amin’ny laharam-pahamehanareo ny fampiasana finoana,” Liahona, nôv. 2014, 93)

• Ahoana no mety hanampian’ireo fampianarana ireo?

Manao asa amim-pinoana

Omeo fotoana hisaintsainana ireto sosokevitra sy fanontaniana manaraka ireto ny mpianatra. Rehefa avy omena fotoana ampy izy ireo dia manasà mpianatra vitsivitsy hizara ny valintenin’izy ireo amin’ny iray kilasy. Azonao atao koa ny mizara amin’ny iray kilasy ny fijoroana ho vavolombelona anananao manokana momba ny fandalinana soratra masina.

Alaivo sary an-tsaina hoe namaly tsara ny zavatra nozarainao ny namanao, saingy fantatrao fa tsy tena handresy ny fanahiany izy ireo raha tsy manao asa amim-pinoana izy ireo, mitoky amin’ny Tompo.

Makà fotoana hieritreretana ireo zavatra niainanao manokana tamin’ny tenin’i Kristy sy ny zavatra fantatrao momba ny Mpamonjy izay mety handrisika ny namanao hivoky amin’ny teniny isan’andro.

• Inona avy ireo zavatra niainana na fijoroana ho vavolombelona azonao zaraina ka mety hanampy ny namanao hanao asa amim-pinoana?

• Inona no zavatra nianaranao ka tsapanao fa afaka manampy anao hanatsara ny fandalinanao manokana ny soratra masina?

Famerenana ny fifehezana fotopampianarana

Mandritra ny lesona ho avy manaraka, dia mandania minitra vitsy hamerenana mijery ny andinin-tsoratra masina sy ny andian-teny manan-danja ao amin’ny 2 Nefia 32:3. Fomba iray hanaovana izany ny mampiseho ireto andinin-tsoratra masina sy andian-teny manan-danja tsy araka ny filaharany marina ireto ary manasa ny mpianatra handamina izany.

tenin’i tokony aminareo 32: indro, Kristy tenin’i mivokisa ny 2 Kristy; amin’ny hilaza aminareo i Nefia ny 3 ny fa hataonareo. zava-drehetra

Safidy hafa azo atao ny manoratra ny tsirairay amin’ireo teny ireo eo amina taratasy kely ary manome iray na maromaro ny mpianatra tsirairay. Asao hiaraka hiasa handamina azy io ny mpianatra.

Valiny: 2 Nefia 32:3 Mivokisa amin’ny tenin’i Kristy, fa indro hilaza aminareo ny zava-drehetra tokony hataonareo ny tenin’i Kristy.