« ចំណេះចំណានខាងគោលលទ្ធិ ៖ នីហ្វៃទី២ ៣២:៣—‹ ទទួលទាននូវព្រះបន្ទូលទាំងឡាយនៃព្រះគ្រីស្ទ ត្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ចំណេះចំណានខាងគោលលទ្ធិ ៖ នីហ្វៃទី២ ៣២:៣ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ចំណេះចំណានខាងគោលលទ្ធិ ៖ នីហ្វៃទី២ ៣២:៣
« ទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ »
នៅក្នុងមេរៀនមុន « នីហ្វៃទី២ ៣២:១–៧ » អ្នកបានរៀនពីសារៈសំខាន់នៃទទួលទាននូវព្រះបន្ទូលទាំងឡាយនៃព្រះគ្រីស្ទ ។ មេរៀននេះអាចជួយអ្នកឲ្យទន្ទេញសេចក្តីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ នីហ្វៃទី២ ៣២:៣ ពន្យល់ពីគោលលទ្ធិ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្តែង ។
អានុភាពតាមរយៈការសិក្សាព្រះគម្ពីរ ។ការសិក្សាព្រះគម្ពីរផ្ទាល់ខ្លួនប្រកបដោយអត្ថន័យ នឹងជួយអ្នកឲ្យរីកចម្រើនក្នុងការយល់ដឹងរបស់អ្នកអំពីដំណឹងល្អ និងដង្វាយធួនរបស់ទ្រង់ ព្រមទាំងបង្រៀន និងថ្លែងទីបន្ទាល់កាន់តែមានអានុភាពខ្លាំងណាស់ ។ សិស្សនឹងទទួលបានពរជ័យ និងបានទទួលការបំផុសគំនិតដោយសាក្សីផ្ទាល់ខ្លួនរបស់អ្នកអំពីរបៀបដែលបទគម្ពីរផ្តល់ដល់ជីវិតរបស់អ្នក ។
ការរៀបចំសិស្ស ៖ សិស្សប្រហែលជាមានឱកាសអនុវត្ត « តាមការទទួលទាននូវព្រះបន្ទូលទាំងឡាយនៃព្រះគ្រីស្ទ » នៅចុងបញ្ចប់នៃមេរៀនមុន ។ សូមអញ្ជើញពួកគេឲ្យបន្តអនុវត្តក្នុងការសិក្សាព្រះគម្ពីរផ្ទាល់ខ្លួនរបស់ពួកគេ ហើយមកថ្នាក់ដោយត្រៀមខ្លួនដើម្បីចែកចាយអំពីបទពិសោធន៍របស់ពួកគេ ។
សកម្មភាពរៀនសូត្រដែលអាចមាន
មេរៀនវគ្គចំណេះចំណានខាងគោលលទ្ធិនេះត្រូវបានរៀបចំឡើងដើម្បីបង្រៀនបន្ទាប់ពីមេរៀន « នីហ្វៃទី២ ៣២:១–៧ » ដែលជាមេរៀនបរិបទសម្រាប់វគ្គចំណេះចំណានខាងគោលលទ្ធិ នីហ្វៃទី២ ៣២:៣ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវលើកទៅសប្តាហ៍ផ្សេងវិញ សូមឲ្យប្រាកដថាត្រូវបង្រៀនមេរៀនបរិបទដែលដូចគ្នានេះនៅអំឡុងសប្តាហ៍នោះផងដែរ ។
ពន្យល់ និងទន្ទេញ
សូមប្រើវិធីសាស្រ្តដ៏មានប្រសិទ្ធភាពណាមួយ ដើម្បីជួយសិស្សទន្ទេញសេចក្តីយោងបទគម្ពីរ និងឃ្លាបទគម្ពីរគន្លឹះសម្រាប់ នីហ្វៃទី២ ៣២:៣ និងពន្យល់ពីសេចក្តីពិតដែលមាននៅក្នុងវគ្គបទគម្ពីរនេះ ។
សកម្មភាពខាងក្រោមគឺជាយោបល់អំពីរបៀបដែលការណ៍នេះអាចសម្រេចបាន ។
សូមស្រមៃថា អ្នកត្រូវបានសុំឲ្យថ្លែងនៅការប្រជុំធម្មនិដ្ឋានខ្លីមួយក្នុងថ្នាក់សិក្ខាសាលាអំពីសារៈសំខាន់នៃការសិក្សាព្រះគម្ពីរ ។ សូមអាន នីហ្វៃទី២ ៣២:៣ ហើយរំឭកពីគោលការណ៍នេះ នៅពេលយើងទទួលទាននូវព្រះបន្ទូលទាំងឡាយនៃព្រះគ្រីស្ទ នោះព្រះបន្ទូលនឹងប្រាប់យើងរាល់កិច្ចការដែលយើងគួរធ្វើ ។
-
តើអ្នកអាចប្រើអ្វីដែលអ្នកបានរៀននៅក្នុងមេរៀនមុន និងបទពិសោធន៍ផ្ទាល់ខ្លួនរបស់អ្នក ដើម្បីពន្យល់ពីអត្ថន័យនៃ « ការទទួលទាននូវព្រះបន្ទូលទាំងឡាយនៃព្រះគ្រីស្ទ » យ៉ាងដូចម្ដេច ? ( នីហ្វៃទី២ ៣២:៣ ) ។
-
តើការទទួលទាននូវព្រះបន្ទូលទាំងឡាយនៃព្រះគ្រីស្ទអាចធ្វើឲ្យមានភាពខុសគ្នាអ្វីខ្លះក្នុងជីវិតយុវវ័យ ?
ការណ៍នេះអាចជាកន្លែងដ៏ល្អមួយក្នុងការអញ្ជើញសិស្សឲ្យរួមបញ្ចូលបទពិសោធន៍ផ្ទាល់ខ្លួនរបស់ពួកគេ នៅពេលពួកគេចែកចាយគំនិតរបស់ពួកគេពីសកម្មភាពរៀបចំនេះ ។
សូមពិចារណាផ្តល់ឯកសារផ្សេងៗដើម្បីជួយសិស្សបំពេញសកម្មភាពខាងក្រោម ។ ពួកគេអាចត្រូវបានអញ្ជើញឲ្យធ្វើកិច្ចការនេះនៅក្នុងសៀវភៅកំណត់ហេតុការសិក្សារបស់ពួកគេ ។ អ្នកអាចកែសម្រួលសកម្មភាពនេះ ដើម្បីអនុញ្ញាតឲ្យសិស្សគូររូបភាពដែលឆ្លុះបញ្ចាំងពីវប្បធម៌របស់ពួកគេ ។
ដើម្បីជួយអ្នកទន្ទេញ និងអនុវត្តតាមវគ្គបទគម្ពីរនេះ សូមគូរតារាងនៅលើក្រដាសមួយសន្លឹក ។ វាអាចស្រដៀងនឹងរូបភាពខាងក្រោមនេះ ។ អ្នកក៏អាចគូររូបភាពអាហារ ឬគម្ពីរនៅលើចានផងដែរ ។ សូមសរសេរឃ្លាថា « នីហ្វៃទី២ ៣២:៣—ទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ » នៅកន្លែងណាមួយនៅលើទំព័ររបស់អ្នក ។ សូមអានឃ្លានេះឲ្យច្រើនដង រហូតដល់អ្នកចាំវាបាន ។ សូមពិចារណាបិទរូបគំនូររបស់អ្នកនៅកន្លែងណាមួយនៅក្នុងផ្ទះរបស់អ្នក ឬនៅលើទូរទឹកកកដែលអ្នកអាចរំឭកវារាល់ពេលដែលអ្នកទទួលទានអាហារ ។
បន្ទាប់ពីទុកពេលគ្រប់គ្រាន់ហើយ សូមឲ្យសិស្សចែកចាយរូបគំនូររបស់ពួកគេជាក្រុមតូចៗ ឬជាមួយថ្នាក់ទាំងមូល ។
រៀនអនុវត្ត
សូមបំបែកសិស្សក្នុងថ្នាក់ជាក្រុមដែលមានគ្នាបីនាក់ ដោយសិស្សម្នាក់ៗជ្រើសរើសគោលការណ៍ផ្សេងគ្នានៃការទទួលបានចំណេះដឹងខាងវិញ្ញាណ ( សូមមើល ឯកសារគោលចំណេះចំណានខាងគោលលទ្ធិ [ ឆ្នាំ ២០២២ ] « ការទទួលបានចំណេះដឹងខាងវិញ្ញាណ » កថាខណ្ឌ ៥–១២ ) ។ សូមឲ្យសិស្សពិនិត្យគោលការណ៍នេះដោយសង្ខេប ហើយបន្ទាប់មកពន្យល់វាដល់ក្រុមរបស់ពួកគេ ។
បន្ទាប់មក សូមចែកចាយស្ថានភាពដូចខាងក្រោមនេះ ។ ឬ ប្រសិនបើវាកាន់តែទាក់ទងទៅនឹងសិស្សរបស់អ្នក សូមពិចារណាសុំឲ្យពួកគេបង្កើតបញ្ជីមូលហេតុដែលមនុស្សម្នាក់អាចជួបការលំបាកក្នុងការសិក្សាព្រះគម្ពីររបស់ពួកគេ ។ បន្ទាប់មក អាចអញ្ជើញសិស្សឲ្យជ្រើសរើសការលំបាកពីបញ្ជីនេះ ហើយខិតខំដើម្បីយកឈ្នះវា ដោយប្រើគោលការណ៍នៃការទទួលបានចំណេះដឹងខាងវិញ្ញាណ ។
-
តើអ្នកនឹងពន្យល់ដោយសង្ខេបអំពីគោលការណ៍ដែលអ្នកបានជ្រើសរើសនេះទៅកាន់នរណាម្នាក់ដែលប្រហែលជាមិនធ្លាប់ស្គាល់គោលការណ៍នេះយ៉ាងដូចម្តេច ?
សូមស្រមៃថា បន្ទាប់ពីមេរៀនថ្នាក់សិក្ខាសាលាអំពីសារៈសំខាន់នៃការសិក្សាព្រះគម្ពីរប្រចាំថ្ងៃ មិត្តរបស់អ្នកនិយាយទៅកាន់អ្នកថា « ខ្ញុំដឹងថា ការសិក្សាព្រះគម្ពីរគឺជារឿងល្អដែលត្រូវធ្វើ ប៉ុន្តែជាមួយនឹងអ្វីៗទាំងអស់ដែលកំពុងកើតឡើងនៅក្នុងជីវិតរបស់ខ្ញុំនៅពេលនេះ គឺខ្ញុំគ្មានពេលទេ ជាពិសេសមិនបានសិក្សារាល់ថ្ងៃទេ » ។
វាអាចមានប្រសិទ្ធភាពក្នុងការសួរសិស្សប្រសិនបើពួកគេអាចភ្ជាប់នឹងស្ថានភាពនេះ ហើយប្រាប់ពីមូលហេតុ ។
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
-
តើអ្នកចង់ឲ្យមិត្តរបស់អ្នកដឹងអ្វីខ្លះអំពីព្រះយេស៊ូវគ្រីស្ទ ឬផែនការនៃសេចក្តីសង្គ្រោះដែលអាចជួយពួកគេឲ្យព្យាយាមទទួលទាននូវព្រះបន្ទូលទាំងឡាយរបស់ទ្រង់ជារៀងរាល់ថ្ងៃ ?
-
តើការទទួលទាននូវព្រះបន្ទូលទាំងឡាយនៃព្រះគ្រីស្ទ អាចជះឥទ្ធិពលដល់យើងបន្តិចម្តងៗ រហូតដល់អស់កល្បជានិច្ចដោយរបៀបណា ?
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
សូមស្រមៃគិតថា បន្ទាប់ពីពិភាក្សាអំពីទស្សនវិស័យដ៏នៅអស់កល្បជានិច្ច មិត្តរបស់អ្នកនិយាយថា « អរគុណ ។ វាជួយបានបន្តិចបន្តួចប៉ុណ្ណោះ ។ ប៉ុន្តែខ្ញុំនៅតែគិតថា ខ្ញុំនឹងលំបាករកពេលរាល់ថ្ងៃដើម្បីសិក្សាព្រះគម្ពីររបស់ខ្ញុំណាស់ » ។
-
តើអ្នកគិតថា នីហ្វៃទី២ ៣២:៣ អាចជួយមិត្តរបស់អ្នកដោយរបៀបណា ?
-
តើខគម្ពីរ ឬសេចក្ដីថ្លែងការណ៍អ្វីពីព្យាការីអាចជួយមិត្តរបស់អ្នកបាន ?
សូមពិចារណាផ្តល់ពេលវេលាដល់សិស្សដើម្បីស្វែងរកបទគម្ពីរ និងសេចក្តីថ្លែងការណ៍ទាំងឡាយ ។
ឧទាហរណ៍ខ្លះអាចរួមមាន គោលលទ្ធិ និងសេចក្តីសញ្ញា ២៦:១ ក៏ដូចជាសេចក្ដីថ្លែងការណ៍ខាងក្រោមពីអែលឌើរ រីឆាដ ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់ ៖
សូមកុំជឿពាក្យកុហករបស់សាតាំងថា អ្នកគ្មានពេលសិក្សាព្រះគម្ពីរឲ្យសោះឡើយ ។ សូមជ្រើសរើសយកពេលសិក្សាព្រះគម្ពីរទាំងនោះ ។ ការទទួលទានព្រះបន្ទូលព្រះរៀងរាល់ថ្ងៃគឺសំខាន់ជាងការដេក ការទៅសាលារៀន ការទៅធ្វើការការមើលកម្មវិធីទូរទស្សន៍ ការលេងវីដេអូហ្គេម ឬបណ្ដាញសង្គមទៅទៀត ។ អ្នកត្រូវ reorganize ស្គាល់ពីអាទិភាពខ្លួនឯង ដើម្បីមានពេលសិក្សាព្រះបន្ទូលរបស់ព្រះ ។ ប្រសិនបើដូច្នេះមែន សូមធ្វើបែបនោះចុះ ! ( រីឆាដ ជី ស្កត « Make the Exercise of Faith Your First Priority » Liahona ខែ វិច្ឆិកា ឆ្នាំ ២០១៤ ទំព័រ ៩៣ )
-
តើការបង្រៀនទាំងនេះអាចជួយដោយរបៀបណា ?
ធ្វើសកម្មភាពដោយសេចក្តីជំនឿ
សូមផ្តល់ពេលវេលាឲ្យសិស្សសញ្ជឹងគិតពីយោបល់ និងសំណួរខាងក្រោមនេះ ។ បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យចែកចាយចម្លើយរបស់ពួកគេជាមួយថ្នាក់ ។ អ្នកក៏អាចចែកចាយទីបន្ទាល់ផ្ទាល់ខ្លួនរបស់អ្នកអំពីការសិក្សាព្រះគម្ពីរជាមួយសិស្សក្នុងថ្នាក់ផងដែរ ។
សូមស្រមៃថា មិត្តរបស់អ្នកមានប្រតិកម្មល្អចំពោះអ្វីដែលអ្នកបានចែកចាយ ប៉ុន្តែអ្នកដឹងថា ពួកគេនឹងមិនយកឈ្នះលើការព្រួយបារម្ភរបស់ពួកគេឡើយ រហូតទាល់តែពួកគេធ្វើសកម្មភាពដោយសេចក្តីជំនឿ ដោយទុកចិត្តលើព្រះអម្ចាស់សិន ។
សូមចំណាយពេលពិចារណាបទពិសោធន៍ផ្ទាល់ខ្លួនដែលអ្នកធ្លាប់មានពីព្រះបន្ទូលរបស់ព្រះគ្រីស្ទ និងអ្វីដែលអ្នកដឹងអំពីព្រះអង្គសង្គ្រោះដែលអាចជំរុញចិត្តមិត្តរបស់អ្នកឲ្យទទួលទានព្រះបន្ទូលរបស់ទ្រង់ជារៀងរាល់ថ្ងៃ ។
-
តើបទពិសោធន៍ ឬទីបន្ទាល់អ្វីខ្លះដែលអ្នកអាចចែកចាយដែលអាចជួយមិត្តរបស់អ្នកធ្វើសកម្មភាពដោយសេចក្ដីជំនឿ ?
-
តើអ្នកបានរៀនអ្វីខ្លះដែលអ្នកទទួលអារម្មណ៍ថា អាចជួយអ្នកកែលម្អការសិក្សាព្រះគម្ពីរផ្ទាល់ខ្លួនរបស់អ្នក ?
ការរំឭកចំណេះចំណានខាងគោលលទ្ធិ
ក្នុងអំឡុងពេលមេរៀនបន្ទាប់ សូមចំណាយពេលពីរបីនាទីរំឭកសេចក្ដីយោងបទគម្ពីរ និងឃ្លាគន្លឹះសម្រាប់ នីហ្វៃទី២ ៣២:៣ ។ របៀបមួយដើម្បីធ្វើការណ៍នេះគឺត្រូវបង្ហាញវគ្គបទគម្ពីរដែលច្របល់ចូលគ្នា និងឃ្លាបទគម្ពីរគន្លឹះដូចខាងក្រោម ហើយអញ្ជើញសិស្សឲ្យរៀបវាឡើងវិញ ៖
ដល់អ្នកនូវគ្រប់អ្វីសូមទទួលទាននូវព្រះបន្ទូល ៣ទាំងឡាយ ៣២នៃព្រះគ្រីស្ទ ដ្បិតទាំងឡាយនីហ្វៃទី នៃព្រះគ្រីស្ទ នឹង ២ប្រាប់ទាំងអស់ដែលអ្នកត្រូវធ្វើ មើលចុះ ព្រះបន្ទូល ។
ជម្រើសមួយទៀតអាចជាការសរសេរពាក្យនីមួយៗទាំងនេះនៅលើក្រដាសតូចមួយ ហើយឲ្យក្រដាសមួយ ឬច្រើនសន្លឹកដល់សិស្សម្នាក់ៗ ។ សូមឲ្យសិស្សធ្វើការជាមួយគ្នាដើម្បីរៀបចំវាតាមលំដាប់លំដោយ ។
ចម្លើយ ៖ នីហ្វៃទី២ ៣២:៣ សូមទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ ។