Иаков 1

Бусдыг Христэд ирэхийг ятга

Нифай нас барахынхаа өмнө, ялтаснуудыг хадгалж, дээр нь зөвхөн “хамгийн үнэт“ (Иаков 1:2) зүйлүүдийг бичих үүргийг дүү Иаковтаа хариуцуулж өгөв. Иаковын мэдээ бусдыг Есүс Христ рүү чиглүүлж, итгэлгүй байдал, нүглийн үр дагавраас сэргийлэхэд нь тэдэнд тусалсан. Энэ хичээл суралцагчдад бусдыг Есүс Христэд ирэхэд нь туслах арга замуудыг олж мэдэхэд тусалж чадна.

Суралцагчдыг идэвхтэй оролцогчид болоход туслах. Судруудаас судлахын тулд хүчин чармайлт гаргах нь зарим суралцагчид ойлгомжгүй, ямар нэг байдлаар хэцүү санагдаж болох юм. Гэвч суралцагчид ур чадвараа сайжруулж, яваандаа суралцахдаа илүү хариуцлагатай хандах боломжтой. Суралцагчдад хичээлдээ идэвхтэй оролцоход тусалж, хичээл зүтгэл, ахиц дэвшлийг нь магтах боломжийг эрэлхийл.

Суралцагчийн бэлтгэл: Суралцагчдыг Есүс Христийн тухай бусадтай ярилцаж болох үеийн талаар бодохыг урь. Тэднийг боломж хүсэн залбирч, чадах бүхнээ хийхийг урамшуулан дэмж.

Боломжит суралцах үйл ажиллагаа

Найзтайгаа ярилцах

Есүс Христийн тухай бусадтай ярилцахад ямар байх талаар хэлэлцэхэд дараах асуулт, видео бичлэг зэрэг нь суралцагчдад тусална. Хэрэв суралцагчдаас суралцагчийн бэлтгэл үйл ажиллагааг гүйцэтгэхийг хүссэн бол тэднийг Есүс Христийн тухай бусадтай ярьж болох үеэ хуваалцахад урь. Хэрэв суралцагчдад өөрсдийн сэтгэгдэл, туршлагын талаар хуваалцах зүйл их байвал видео бичлэгийг заавал үзүүлэх шаардлагагүй байж болох юм.

• Есүс Христийн тухай бусадтай ярих нь хэзээ айж ичмээр санагдаж болох вэ? Айдсаа даван туулахад бидэнд юу тус болох вэ?

• Есүс Христийн сайн мэдээг бусадтай хуваалцах тал дээр сайн үлгэр жишээ үзүүлсэн хэн нэгнийг та мэдэх үү?

Сайн мэдээг хуваалцах талаар Жуниор хэмээх залуу сайн үлгэр дуурайл үзүүлжээ. Тэрээр АНУ-ын Флорида дахь жижиг сүмд явдаг цорын ганц залуу эрэгтэй байв. Тэр өөрийн найзуудын нэгэнтэй Есүс Христийн сайн мэдээний талаар ярилцаж сүмд урихаар шийджээ. Та “Бүгдийг Христэд ирэхийг урих нь: Сайн мэдээг хуваалцах нь” (4:30) видеог үзэж, ChurchofJesusChrist.orgЖуниороос болон түүний сүмийн бусад хүнээс суралцаж болох ганц хоёр зүйлийг хайж ол.

Бусад хүний жишээ бусдыг Христэд ирэхэд хэрхэн урих талаарх шалтгааныг мөн санааг бидэнд өгнө. Өнөөдөр суралцаж байхдаа яагаад бусдад Аврагчид ирэхэд нь туслахыг хүсэж болохыг мөн үүнийг хийх ердийн, энгийн арга замуудын талаар бод.

Бусдыг Христэд ирэхийг ятга

Нифай нас барахынхаа өмнө (Иаков 1:12), Их Эзэний өөрт нь хийхийг зарлигласан жижиг ялтаснууд дээр бичих үүргийг дүү Иаковтаа хариуцуулж өгөв. Жижиг ялтаснууд нь сүнслэг зүйлсэд төвлөрч, бусад ялтсыг хүмүүсийн түүх бичихэд зориулсан байв (Иаков 1:1–3).

Иаков 1:4–6-г уншаад, Нифай Иаковаас ялтаснууд дээр юуг бичиж, хүмүүст зааж өгөхийг хүссэн болохыг олж мэд.

• Нифай, Иаков хоёрын мэдсэн зарим зүйл юу вэ? Тэд эдгээр зүйлийг хэрхэн олж мэдсэн бэ?

Есүс Христийн тухай Иаковын гэрчлэлийг мөн энэ нь түүний үйлдэлд хэрхэн урам зориг өгснийг олж танихад суралцагчдадаа тусал.

Иаков 1:7–8-ыг уншаад, Иаков өөрийн ойлголтынхоо улмаас юу хийснийг олж мэд. Иаковыг үйлдэл хийхэд юу нөлөөлснийг харуулсан хэллэгүүдийг судартаа тэмдэглэж болно. Дараах тайлбар Иаковын урам зоригийг тодруулж болох юм.

“Өөрийн үхлийг харсан”:Иаков нифайчуудыг Есүс Христ өөрсдийнх нь төлөө нүглийг нь цагаатган үхсэн тухай бодохыг урьсан байх.

“Загалмайгаа үүрсэн”:Энэ хэллэг нь бурханлаг бусаас мөн дэлхийн хүсэл тачаалаас өөрсдийн хүслээр татгалзан, Их Эзэний зарлигуудыг дагахыг онцолжээ (Иосеф Смитийн орчуулга, Матай 16:26-г үзнэ үү [Матай 16:24-д, зүүлт тайлбарm]; Лук 9:23; 2 Нифай 9:18). Энэ нь мөн бид Аврагчийг дагахдаа тэвчиж, золиос гаргаж чадахаа харуулахыг хэлнэ.

• Иаковын бичсэн ямар ямар шалтгаан танд урам зориг өгч чадах вэ? Таны бодлоор бусдыг Христэд ирэхэд урих өөр ямар шалтгаан байх вэ?

Суралцагчдаас шүлгийн ямар хэллэгийг ойлгоход нь туслах хэрэгтэйг асууж болно. Суралцагчдыг бие биедээ туслахад урь.

Шаардлагатай бол “Тайлбар ба нөхцөл байдлын талаарх мэдээлэл” хэсэг дэх тайлбарыг хэлж өгч болно.

• Бид эдгээр шүлэг дэх Иаковын жишээнээс юу сурч болох вэ?

Иаковын жишээнээс бидний сурч болох нэг үнэн бол Есүс Христийг болон Түүний хаант улсыг мэдэх нь бусдыг Түүнд ирэхэд туслахаар хичээнгүйлэн хөдөлмөрлөхөд биднийг урамшуулж чаддаг явдал юм.

Үе тэнгийнхэн нь дараах сүнслэг өдөөлтөд хэрхэн хариулсныг сонсох нь суралцагчдад тустай байж болох юм.

Есүс Христийн талаар юу мэддэгээ мөн Түүний тухай ямар үнэнийг та бусдад мэдэгдэхийг хүсэж байгаагаа тунгаан бод.

Суралцагчид хэн нэгэнд Христэд ирэхэд нь тусалж болох нөхцөл байдлын талаар санал бодлоо цуглуулж, дараах бүлгийн үйл ажиллагааг хийж болно.

Бусдыг Христэд ирэхийг ятгахаар хичээнгүйлэн хөдөлмөрлөхийн тулд та юу хийж болох талаар цаг гарган бод. Танд үүнийг гүйцэтгэх боломж гарч болох нөхцөл байдлыг бич. Нөхцөл байдал бүрийн ард Есүс Христийг таньж, хайрлахад нь бусдад хэрхэн тусалж болохоо бич. Та дараах жишээг ашиглаж мөн бусад жишээг нэмж болно:

1. Гэртээ

2. Найзуудтайгаа

3. Нийгмийн сүлжээнд

4. Тохинууллаар дамжуулан эсвэл дуудлагадаа

Тэдний дуудлага эсвэл биелүүлэхийг хүссэн дуудлага нь бусдыг Христэд ирэхэд хэрхэн тусалж болох талаар ангиараа ярилцах нь суралцагчдад тустай байж болох юм. Тэд тохинуулах талаар өөрсдийн асуултыг асууж эсвэл Их Эзэний Сүмд үйлчлэх талаар зөвлөгөө хуваалцаж болно.

Хэн нэгнийг Христэд ирэхэд тусалсан туршлагаасаа хуваалц.

Мөн видео жишээг үзүүлж болно. Дараах видеонуудын аль нэгийг эсвэл өөрт байгаа бусад видеог сонгоно уу.

 

“Гишүүний түүх: Өсвөр үеийнхэн ба залуучууд” (5:08)

 

Та бусдад Есүс Христэд ирэхэд туслах арга замуудын талаар бодох үедээ судрууд дахь амлалт, зөвлөгөөнөөс урам зориг авч болно.

Сургаал ба Гэрээ 15:6; 18:15–16-г уншаад, Их Эзэн бусдыг Өөр лүү нь ирэхэд тусалсан хүмүүст юу амласныг олж мэд.

Алма 31:34–35-ыг уншиж, зорамчуудыг Христ рүү чиглүүлэхэд туслахыг хүссэн Алмагийн жишээнээс суралц.

• Та хэзээ хэн нэгэнд Их Эзэний талаар суралцахад нь тусалж чадсан бэ?

• Таны Христэд ирэхэд урихыг хүсэж буй хүн хэн бэ? Та тэднийг урихын тулд юу хийж чадах вэ? Та Аврагчийн тусламжид хэрхэн найдаж чадах вэ?

Тайлбар ба нөхцөл байдлын талаарх мэдээлэл

Иаков 1:7–8. Иаковын үг ямар утгатай вэ?

Иаковын ашигласан дараах үг хэллэгийг ойлгох нь тустай юм.

“[Бурханы] амралтад орох”:Бид зөвхөн Есүс Христийг дагаснаар амар амгалан, санаа зовохгүй байж чадна.

“Уруу таталтын өдрүүд дэх өдөөн хатгалга”:Египетээс чөлөөлөгдсөний дараа эртний израилчууд Бурханыг өдөөсөн. Өөрөөр хэлбэл, тэд Түүнийг эсэргүүцэж, цөлд 40 жил тэнүүчилсэн ба Бурханы оршихуйд байх агуу адислалуудыг алдсан (Тооллого 14:2–3, 22–23; Еврей 3:8–9; Сургаал ба Гэрээ 84:23–25-ыг үзнэ үү).

“Дэлхийн ичгүүрийг үүрэх”:Есүс Христийн шавь байх амаргүй болохыг Иаков ойлгосон. Эсэргүүцэл байнга тулгардаг ч биднийг Аврагчийг дагахад урьсан.

Би хэрхэн бусдад тохинуулж, тэднийг Христ рүү хөтөлж чадах вэ?

Залуу эмэгтэйчүүдийн ерөнхий ерөнхийлөгч Бонни Х.Кордон ийн тайлбарласан.

Бид Аврагчийн үлгэр жишээг дагахаар хичээх үедээ эхлээд Түүний хоньдыг таньдаг болж, тэгээд тоолох ёстой. … Хэдий тийм ч, тоологдох нь зөвхөн тооны тухай асуудал биш юм. Энэ нь хүн нэг бүр Аврагчийн төлөө үйлчилдэг хэн нэгнээр дамжуулан Түүний хайрыг мэдрэх явдлыг баттай болгох явдал юм. Ийм замаар бүгд хайрт Тэнгэр дэх Эцэг тэднийг мэддэг гэдгийг ухаарч чадна. …

… Та бүгд Их Эзэний хайрыг хэрхэн хүргэх, тохинуулах хүмүүсийнхээ хэрэгцээг хэрхэн таних тал дээр Түүний удирдамжийг хайх үед нүд тань нээгдэх болно. (Бонни Х.Кордон, “Хоньчин болох нь,” 2018 оны 10-р сарын Ерөнхий чуулган, 66–70)

Бусдад Өөр лүү нь ирэхэд туслах үед Их Эзэн намайг хэрхэн адислах вэ?

Тэргүүн зөвлөлийн ерөнхийлөгч Хэнри Б.Айринг ийн заасан.

Их Эзэн хүч чадлыг тань олон дахин үржүүлэх болно. Түүний хүсдэг зүйл гэвэл биднээс бүх хүчээ дайчилж, бүх зүрх сэтгэлээ зориулахыг л хүсдэг. Үүнийг баяр хөөртэйгөөр мөн итгэлийн залбирлаар залбирч хий. Эцэг мөн Түүний Хайрт Хүү та нарыг хөтлөн удирдах Ариун Сүнсийг хамтрагч болгон илгээх болно. Та нарын хүчин чармайлт үйлчилж буй хүмүүсийн тань амьдралд улам үржигдэн өсөх болно. (Henry B. Eyring, “Rise to Your Call,” Liahona, Nov. 2002, 78)

Би дуудлагаа хэрхэн эрхэмлэн биелүүлэх вэ?

Ерөнхийлөгч Хэнри Б.Айринг дуудлагаа эрхэмлэн биелүүлэхэд маань юу шаардлагатай болохыг ийн заасан.

Энэ нь Их Эзэний тааллыг мэдэхийг хичээж, Түүний дуу хоолойг сонсохын тулд гаргах хичээл зүтгэлээс маань хамаарна. Ингэж чадах юм бол Их Эзэний төлөө үйлчилж байгаа хүмүүст маань Тэрээр юу хүсэж байгааг бид илүү сайн мэдэж болно. Үүргээ ийн эрхэмлэн биелүүлэх нь жижиг алхмуудаас эхэлнэ. Энэ нь алгуур боловч ирэх болно. (Хэнри Б.Айринг, “Түүний нэрээр адислах нь,” 2021 оны 4-р сарын Ерөнхий чуулган, 72)

Нэмэлт суралцах үйл ажиллагаа

Иаков 1:17. Их Эзэнээс авсан миний даалгавар

Их Эзэнээс даалгавар авах гэдэг нь юу гэсэн үг болохыг ярилцах нь суралцагчдад тустай байж болох юм. Бид Түүний Сүмд үйлчлэх буюу тохинуулах даалгаврыг биелүүлэх дуудлагыг хүлээн авснаар Их Эзэнээс даалгавар хүлээн авдаг гэдгийг ойлгоход суралцагчдад тусал. Мөн бид Тэнгэрлэг Эцэгээсээ удирдамж гуйн залбирч, Ариун Сүнснээс хүлээн авсан өдөөлтүүдийг дагаж чадна. Ерөнхийлөгч Томас С.Монсоны (1927–2018) “Бид Их Эзэний зараалд байхдаа Их Эзэний тусламжийг авах эрхтэй. Их Эзэн дуудсан нэгнээ тохирохоор болгодог гэдгийг санаарай” (“Duty Calls,” Ensign, 1996 оны 5 сар, 44) хэмээн заасныг ашиглах талаар бод.

Иаков 1:18–19 Их Эзэн бидэнд бусдад үйлчлэх боломжийг олгодог

“Бусдыг үнэнч дагалдагч болоход нь туслахын тулд итгэлтэй шавь байх нь Сүм дэх дуудлага бүрийн цаад зорилго мөн” (Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 4.1, ChurchofJesusChrist.org) болохыг хуваалцах талаар бодож үз. Иаков 1:18–19-ийг ангиараа унш. Иаков, түүний ах Иосеф нарыг Их Эзэн дуудсан учраас тэд үүрэг хариуцлагаа маш нухацтай хүлээсэн болохыг олж харахад нь суралцагчдад тусал. “Тайлбар ба нөхцөл байдлын талаарх мэдээлэл” хэсэг дэх зарим мэдэгдлийг ашиглан, суралцагчдаа Их Эзэнд болон Түүний Сүмд үйлчлэхэд урамшуулж болно.

Иаков 1:19. “Бид өөрсдийн албан тушаалд хичээнгүйлэн зүтгэсэн”

Дуудлагаа эрхэмлэн биелүүлэх гэдэг нь юу гэсэн үг болохыг ойлгоход нь туслахын тулд томруулдаг шил ангид авчран, ямар нэг зүйлийг томруулна гэдэг нь юу гэсэн үг болохыг ярилц. Дараа нь дуудлагаа эрхэмлэн биелүүлэх гэдэг нь ямар утгатай болохыг ярилцахад нь суралцагчдад тусал. Сургаал ба Гэрээ 24:9; 84:33 эсвэл Сүмийн удирдагчдын үг танд тусалж болох юм.