Jacob 1

Hikayatin ang Iba na Lumapit kay Cristo

Bago namatay si Nephi, ibinigay niya sa kanyang nakababatang kapatid na si Jacob ang responsibilidad na ingatan ang mga lamina at itala sa mga ito kung ano ang “pinakamahalaga” (Jacob 1:2). Ang mensahe ni Jacob ay nagtuon sa iba patungo kay Jesucristo, na tumulong sa kanila na maiwasan ang mga bunga ng kawalang-paniniwala at kasalanan. Ang lesson na ito ay makatutulong sa iyo na tumuklas ng mga paraan para matulungan ang iba na lumapit kay Jesucristo.

Pagtulong sa mga estudyante na aktibong makibahagi. Para sa ilang estudyante, ang pagsisikap na matuto mula sa mga banal na kasulatan ay tila hindi pamilyar at medyo mahirap. Gayunman, ang mga estudyante ay maaaring umunlad sa kanilang mga kakayahan at unti-unting mas maging responsable sa kanilang pag-aaral. Humanap ng mga pagkakataon na matulungan ang mga estudyante na magkaroon ng aktibong bahagi sa klase at purihin ang kanilang mga pagsisikap at pag-unlad.

Paghahanda ng estudyante: Sabihin sa mga estudyante na mag-isip ng mga pagkakataon na maaari silang makipag-usap sa iba tungkol kay Jesucristo. Hikayatin silang manalangin na magkaroon ng pagkakataon at lakas ng loob na kumilos sa sandaling iyon.

Mga Posibleng Aktibidad sa Pag-aaral

Pakikipag-usap sa isang kaibigan

Ang mga sumusunod na tanong at video ay makatutulong sa mga estudyante na talakayin kung ano ang pakiramdam ng makipag-usap sa iba tungkol kay Jesucristo. Kung ipinagawa sa mga estudyante ang paghahanda ng estudyante, sabihin sa kanila na magbahagi ng mga pagkakataon na maaari silang makipag-usap sa iba tungkol kay Jesucristo.

• Kailan maaaring nakakatakot ang pakikipag-usap sa iba tungkol kay Jesucristo? Ano ang maaaring makatulong para madaig natin ang ating takot?

• Sino ang isang taong kilala ninyo na magandang halimbawa ng pagbabahagi ng ebanghelyo ni Jesucristo sa iba?

Ang isang binatilyong nagngangalang Junior ay isang magandang halimbawa ng pagbabahagi ng ebanghelyo. Siya lang ang nag-iisang binatang nagsisimba sa isang maliit na branch sa Florida, USA. Nagpasya siyang kausapin ang isa sa kanyang mga kaibigan tungkol sa ebanghelyo ni Jesucristo at anyayahan siyang magsimba. ChurchofJesusChrist.org

Ang halimbawa ng iba ay makapagbibigay sa atin ng mga dahilan at ideya kung paano anyayahan ang iba na lumapit kay Cristo. Habang nag-aaral ngayon, pag-isipan kung bakit maaari mong naising tulungan ang iba na lumapit sa Tagapagligtas at kung anong mga normal at natural na paraan ang gagamitin mo para magawa ito.

Paghikayat sa iba na lumapit kay Cristo

Bago namatay si Nephi (tingnan sa Jacob 1:12), ibinigay niya sa kanyang kapatid na si Jacob ang responsibilidad na magsulat sa maliliit na lamina na iniutos ng Panginoon na gawin niya. Ang maliliit na lamina ay nakatuon sa mga espirituwal na bagay at ang iba pang mga lamina ay nakalaan sa kasaysayan ng mga tao (Jacob 1:1–3).

Basahin ang Jacob 1:4–6, at alamin kung ano ang sinabi ni Nephi kay Jacob na isama sa mga lamina at ituro sa mga tao.

• Ano ang ilang bagay na alam nina Nephi at Jacob? Paano nila nalaman ang mga bagay na ito?

Tulungan ang mga estudyante na matukoy ang patotoo ni Jacob tungkol kay Jesucristo at kung paano siya nahikayat nitong kumilos.

Basahin ang Jacob 1:7–8, at alamin kung ano ang ginawa ni Jacob dahil sa kanyang naunawaan. Maaari mong markahan ang mga parirala sa iyong banal na kasulatan na nagpapakita kung ano ang naghikayat kay Jacob na kumilos. Ang mga sumusunod na paliwanag ay maaaring magbigay-linaw sa motibasyon ni Jacob.

“Isaalang-alang ang kanyang kamatayan”:Malamang na inanyayahan ni Jacob ang mga Nephita na isipin ang pagkamatay ni Jesucristo para sa kanila at pagbabayad-sala Niya para sa kanilang mga kasalanan.

“Batahin ang kanyang krus”:Ang pariralang ito ay tumutukoy sa kahandaan nating itanggi sa ating sarili ang kasamaan at mga makamundong pagnanasa at sundin ang mga kautusan ng Panginoon (tingnan sa Pagsasalin ni Joseph Smith, Mateo 16:26; Lucas 9:23; 2 Nephi 9:18). Ang ibig sabihin din nito ay maipapakita natin ang ating kahandaang magtiis at magsakripisyo sa pagsunod natin sa Tagapagligtas.

• Aling mga dahilan ang isinulat ni Jacob na makahihikayat sa iyo? Ano pang ibang mga dahilan ang naiisip mo sa pag-anyaya sa iba na lumapit kay Cristo?

Maaari mong itanong sa mga estudyante kung anong mga parirala sa mga talata ang kailangan nila ng tulong para maunawaan ito. Sabihin sa mga estudyante na tulungan ang isa’t isa.

Maaari mong ibigay ang mga paliwanag na matatagpuan sa bahaging “Komentaryo at Pinagmulang Impormasyon” kung kinakailangan.

• Ano ang matututuhan natin sa halimbawa ni Jacob sa mga talatang ito?

Ang isang katotohanan na matututuhan natin mula sa halimbawa ni Jacob ay ang nalalaman natin tungkol kay Jesucristo at sa Kanyang kaharian ay makahihikayat sa atin na masigasig na kumilos upang tulungan ang iba na lumapit sa Kanya.

Maaaring makatulong sa mga estudyante na marinig ang ilan sa kanilang mga kaklase na magbahagi ng kanilang mga sagot sa sumusunod na pahayag.

Pagnilayan ang nalalaman mo tungkol kay Jesucristo at pag-isipan kung anong mga katotohanan ang nais mong malaman ng iba tungkol sa Kanya.

Maaaring gawin ng mga estudyante ang sumusunod bilang aktibidad ng grupo, kung saan maaari silang mag-isip ng mga sitwasyon na matutulungan nila ang isang tao na lumapit kay Cristo.

Pag-isipan sandali kung ano ang maaari mong gawin upang masigasig na kumilos upang mahikayat ang iba na lumapit kay Cristo. Isulat ang mga sitwasyon kung saan maaari kang magkaroon ng mga pagkakataong gawin ito. Sa tabi ng bawat sitwasyon, isulat kung paano mo matutulungan ang iba sa sitwasyong iyon na makilala at mahalin si Jesucristo. Maaari mong gamitin ang mga sumusunod na halimbawa at maaari kang magdagdag ng iba pa:

1. Sa tahanan

2. Sa isang kaibigan

3. Sa social media

4. Sa iyong tungkulin o sa pamamagitan ng ministering

Maaaring makinabang ang mga estudyante sa talakayan sa klase tungkol sa kung paano makatutulong sa kanila ang mga tungkuling mayroon sila o maaaring hilingin na gampanan nila upang mailapit ang iba kay Cristo. Maaari silang magtanong tungkol sa ministering o magbahagi ng payo tungkol sa paglilingkod sa Simbahan ng Panginoon.

Maaari kang magbahagi ng karanasan sa pagtulong mo sa isang tao na lumapit kay Cristo.

Maaari ka ring magpalabas ng isang video bilang halimbawa. Pumili mula sa isa sa mga sumusunod na video o iba pa na available sa iyo.

“Brodkast ng 2021: Magmahal, Magbahagi, at Mag-anyaya” (54:06) mula sa time code na 0:00 hanggang 1:35

“Paglilingkod na Tulad ng Ginagawa ng Tagapagligtas” (6:08)

Habang nag-iisip ka ng mga paraan upang matulungan ang iba na lumapit kay Jesucristo, maaari kang kumuha ng lakas ng loob mula sa mga pangako at payo sa mga banal na kasulatan.

Basahin ang Doktrina at mga Tipan 15:6; 18:15–16 upang matuklasan kung ano ang ipinangako ng Panginoon sa mga tumutulong sa iba na lumapit sa Kanya.

Basahin ang Alma 31:34–35 upang matuto mula sa halimbawa ni Alma sa pagnanais niya na tumulong na ilapit ang mga Zoramita kay Cristo.

• Kailan mo natulungan ang ibang tao na malaman ang tungkol kay Jesucristo?

• Sino ang isang tao na gusto mong anyayahang lumapit kay Cristo? Ano ang magagawa mo upang maanyayahan siya? Paano ka makakaasa sa Tagapagligtas na tulungan ka?

Komentaryo at Pinagmulang Impormasyon

Jacob 1:7–8. Ano ang ibig sabihin ng mga salita ni Jacob?

Maaaring makatulong ang pag-unawa sa mga sumusunod na salita na ginamit ni Jacob.

“Makapasok sa kapahingahan [ng Diyos]”:Kapag sinunod natin si Jesucristo,makatatamasa tayo ng kapayapaan at kalayaan mula sa pag-aalala o pangamba.

“Pagpapagalit sa mga araw ng panunukso”:Matapos silang maligtas mula sa Egipto, ginalit ng mga sinaunang Israelita ang Diyos. Ibig sabihin, sila ay naghimagsik laban sa Kanya, nagpagala-gala sa ilang sa loob ng 40 taon, at nawalan ng malalaking pagpapala, kabilang na ang pagiging nasa presensya ng Diyos (tingnan sa Mga Bilang 14:2–3, 22–23; Mga Hebreo 3:8–9; Doktrina at mga Tipan 84:23–25).

“Tiisin ang kahihiyan ng sanlibutan”:Natanto ni Jacob na hindi madaling maging disipulo ni Jesucristo. Inaanyayahan tayong sundin ang Tagapagligtas kahit may oposisyon na kadalasang kasama nito.

Paano ko mapaglilingkuran ang iba at aakayin sila patungo kay Cristo?

Ipinaliwanag ni Pangulong Bonnie H. Cordon, Young Women General President:

Sa pagsisikap nating sundan ang halimbawa ng Tagapagligtas, kailangan muna nating kilalanin at bilangin ang Kanyang mga tupa. … Gayunman, ang pagbilang ay hindi talaga tungkol sa dami; ito ay pagtiyak na nadarama ng bawat tao ang pagmamahal ng Tagapagligtas sa pamamagitan ng isang taong naglilingkod para sa Kanya. Sa gayong paraan, malalaman ng lahat na kilala sila ng mapagmahal na Ama sa Langit. …

… Habang hinahangad ninyo ang patnubay ng Panginoon kung paano ipadama ang Kanyang pagmamahal at tugunan ang mga pangangailangan ng mga taong inyong pinaglilingkuran, mabubuksan ang inyong mga mata. (Bonnie H. Cordon, “Pagiging Isang Pastol,” Liahona, Nob. 2018, 75–76)

Paano ako mapagpapala ng Panginoon kapag tinutulungan ko ang iba na lumapit sa Kanya?

Itinuro ni Pangulong Henry B. Eyring ng Unang Panguluhan:

Ang inyong lakas ay ilang ulit na pag-iibayuhin ng Panginoon. Ang hiling lang Niya ay ibigay ninyo ang inyong buong kakayahan at buong puso. Gawin ito nang may kasiyahan at may panalangin ng pananampalataya. Isusugo ng Ama at ng Kanyang Pinakamamahal na Anak ang Espiritu Santo para makasama ninyo upang kayo’y magabayan. Ang inyong mga pagsisikap ay palalakihin sa buhay ng mga taong inyong pinaglilingkuran. (Henry B. Eyring, “Manindigan sa Iyong Tungkulin,” Liahona, Nob. 2002, 78)

Paano ko tutuparin ang aking tungkulin?

Itinuro ni Pangulong Henry B. Eyring ng Unang Panguluhan kung ano ang kailangang gawin sa pagtupad ng ating mga tungkulin:

Nakasalalay ito sa ating masigasig na pagsisikap na malaman ang kalooban ng Panginoon at sa ating pagsisikap na marinig ang Kanyang tinig upang malaman natin nang mas mabuti kung ano ang nais Niya para sa taong pinaglilingkuran natin para sa Kanya. Ang pagtupad na iyon ay darating nang paunti-unti. Maaaring mabagal itong dumating, ngunit darating ito. (Henry B. Eyring, “Magbasbas sa Kanyang Pangalan,” Liahona, Mayo 2021, 70)

Mga Karagdagang Aktibidad sa Pag-aaral

Jacob 1:17. Ang aking gawain mula sa Panginoon

Maaaring makinabang ang mga estudyante sa isang talakayan tungkol sa kahulugan ng pagtanggap ng gawain mula sa Panginoon. Tulungan ang mga estudyante na maunawaan na nakatatanggap tayo ng gawain mula sa Panginoon kapag tinatanggap natin ang tawag na maglingkod sa Kanyang Simbahan o tumupad tayo sa isang ministering assignment. Maaari din tayong manalangin na patnubayan tayo ng ating Ama sa Langit at sundin ang mga pahiwatig na natatanggap natin mula sa Espiritu Santo. Maaari mong gamitin ang pahayag na ito ni Pangulong Thomas S. Monson (1927–2018): “Kapag tayo ay nasa paglilingkod ng Panginoon, tayo ay karapat-dapat sa tulong ng Panginoon. Tandaan na sinumang tinawag ng Panginoon ay binibigyan Niya ng kakayahan” (“Duty Calls,” Ensign, Mayo 1996, 44).

Jacob 1:18–19. Binibigyan tayo ng Panginoon ng mga pagkakataong maglingkod sa iba

Maaari mong ibahagi na “ang pagiging matapat na disipulo upang matulungan ang iba pa na maging tapat na mga disipulo ang layunin sa likod ng bawat calling sa Simbahan” (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 4.1, ChurchofJesusChrist.org). Ipabasa ang Jacob 1:18–19 sa buong klase. Tulungan ang mga estudyante na makita na tinupad nang mabuti ni Jacob at ng kanyang kapatid na si Jose ang kanilang mga responsibilidad dahil tinawag sila ng Panginoon. Maaari mong gamitin ang mga pahayag sa bahaging “Komentaryo at Pinagmulang Impormasyon” upang hikayatin ang mga estudyante na maglingkod sa Panginoon sa Kanyang Simbahan.

Jacob 1:19. “Tinupad namin ang aming mga tungkulin”

Upang matulungan ang mga estudyante na maunawaan ang ibig sabihin ng tumupad sa tungkulin, magdala ng magnifying glass sa klase at talakayin kung ano ang ibig sabihin ng i-magnify o tuparin ang isang bagay. Pagkatapos ay tulungan ang mga estudyante na talakayin kung ano ang maaaring ibig sabihin ng tuparin ang tungkulin. Maaaring makatulong ang Doktrina at mga Tipan 24:9; 84:33 o mga pahayag mula sa mga lider ng Simbahan.