Jacob 2:22–35

Ang Batas ng Kalinisang-puri

dalagita

Ang mundo ay tumatalikod sa mga pamantayan ng kadalisayan ng puri, ngunit ang pamantayan ng Panginoon sa kadalisayan ng puri ay hindi nagbabago. Matapos matanggap ang kanyang tungkulin mula sa Panginoon, itinuro ni Jacob sa kanyang mga tao ang tungkol sa batas ng kalinisang-puri. Angkop pa rin ngayon ang mga turo ni Jacob. Ang lesson na ito ay makatutulong sa iyo na malugod sa kalinisang-puri tulad ng Panginoon.

Ipagdasal na maunawaan ang mga pangangailangan ng mga estudyante. Sa pagsisikap mong pagtuunan ang bawat estudyante, ipagdasal ang mga estudyante nang binabanggit ang kanilang mga pangalan. Hilingin sa Ama sa Langit na tulungan kang maunawaan ang kanilang mga pangangailangan at mga paraan kung paano ka makapagtuturo sa paraang makatutugon sa mga pangangailangang iyon. Pakinggan ang mga pahiwatig na natatanggap mo na may mga ideya kung paano mo matutulungan ang bawat estudyante.

Paghahanda ng estudyante: Maaari mong anyayahan ang mga estudyante na itanong sa kanilang mga magulang o lider ng Simbahan ang tungkol sa mga pagpapalang nagmumula sa pagsunod sa batas ng kalinisang-puri. Maaari mo ring kontakin ang mga magulang upang ipaalam sa kanila na pag-aaralan ng mga estudyante ang tungkol sa batas ng kalinisang-puri upang maipagpatuloy ng mga magulang ang talakayan sa tahanan kung gusto nila.

Mga Posibleng Aktibidad sa Pag-aaral

Babala ni Jacob

Maaari kang gumuhit sa pisara ng isang diagram na katulad ng halimbawa sa ibaba. Pagkatapos ay mag-anyaya ng talakayan gamit ang mga tanong na tulad ng mga sumusunod sa diagram.

Maaari mo ring ibahagi ang video na “Tumayo nang Hindi Natitinag sa mga Banal na Lugar” mula sa time code na 3:22 hanggang 4:50, kung saan inilarawan ni Elder Robert D. Hales (1932–2017) kung paano lumalayo ang mga pamantayan ng mundo sa mga pamantayan ng Panginoon. Ang video na ito ay nasa ChurchofJesusChrist.org.

Chart ng mga pamantayan

• Paano ninyo ilalarawan ang ipinapakita ng diagram na ito tungkol sa mga pamantayan ng Panginoon at sa mga pamantayan ng mundo?

• Sa anong mga paraan ninyo nakikitang lumalayo ang mga pamantayan ng mundo sa mga pamantayan ng Panginoon?

Nagbahagi si Pangulong Russell M. Nelson ng isang paraan kung paano lumalayo ang mundo sa pamantayan ng Panginoon:

Pangulong Russell M. Nelson

Pananampalataya ang kailangan para mamuhay nang dalisay kapag isinisigaw ng mundo na makaluma na ang batas ng Diyos sa kalinisang-puri. (Russell M. Nelson, “Si Cristo ay Nagbangon; Ang Pananampalataya sa Kanya ay Makapagpapalipat ng mga Bundok,” Liahona, Mayo 2021, 104)

• Anong mga halimbawa nito ang nakikita mo?

Kung may mga tanong ang mga estudyante tungkol sa mga partikular na pag-uugali o gawi hinggil sa batas ng kalinisang-puri, hikayatin silang maghanap ng mga sagot sa pamamagitan ng pakikipag-usap sa kanilang mga magulang o mga lider ng simbahan at sa pamamagitan ng pag-aaral ng mga banal na kasulatan at mga turo ng mga buhay na propeta. Maging sensitibo sa mga estudyante na maaaring lumabag na sa batas ng kalinisang-puri. Ipaalala sa kanila ang kapangyarihan ng Tagapagligtas na magpatawad at hikayatin sila na kausapin ang kanilang bishop.

Maging sensitibo sa mga estudyante na maaaring biktima ng pang-aabuso. Kung tila may isang estudyanteng makikipag-usap sa iyo tungkol sa personal na pagkakasangkot o pagkakasangkot ng pamilya sa pang-aabuso, ipaliwanag na kailangan mong isumbong ang anumang paratang. Maging matiyaga, maunawain, at magbigay ng katiyakan at hikayatin siyang makipag-usap sa kanilang bishop. Kung may estudyanteng magsusumbong ng pang-aabuso, kontakin ang help line o legal counsel ng Simbahan sa inyong lugar.

Ang batas ng kalinisang-puri ng Panginoon ay malinaw at hindi nagbabago. “Ang kalinisang-puri ay kadalisayan ng puri. Ang mga taong dalisay ang puri ay malinis sa kanilang mga iniisip, sinasabi, at ginagawa. Ang ibig sabihin ng kalinisang-puri ay hindi pagkakaroon ng seksuwal na relasyon bago ang kasal. Ang ibig ding sabihin nito ay lubos na katapatan sa asawa” (Mga Paksa ng Ebanghelyo, “Kalinisang-puri”).

Sa pag-aaral mo ng Jacob 2, alamin ang nadarama ng Tagapagligtas tungkol sa kalinisang-puri.

Mahal ni Jacob ang kanyang mga tao. Sa pamamagitan ng kapangyarihan ng Panginoon, nalaman ni Jacob ang mga iniisip ng mga tao at ang kasamaan ng kanilang mga puso (tingnan sa Jacob 1:15; 2:5–6). Alam Niya na sila ay “nagsisimula [na] maging makasalanan, kung aling kasalanan ay labis na karumal-dumal … sa Diyos” (Jacob 2:5). Matapos balaan ang mga Nephita tungkol sa kasalanan na kapalaluan (tingnan sa Jacob 2:12–21), nagbabala si Jacob sa mga Nephita tungkol sa “higit na mabigat na kasalanan” (Jacob 2:22) na pinag-iisipan ng kanyang mga tao.

Basahin ang Jacob 2:22–24, at alamin kung paano inilarawan ni Jacob ang higit na mabigat na kasalanang ito. (Ang pagpapatutot ay kapag ang isang tao ay may seksuwal na relasyon sa isang tao na hindi niya asawa.)

Maaari mo ring panoorin ang video na “Nagturo si Jacob tungkol sa Kalinisang-puri,” na nasa ChurchofJesusChrist.org, mula sa time code na 0:20 hanggang 1:51.

• Ano ang papel na ginagampanan ng ating isipan sa pagsunod natin sa batas ng kalinisang-puri (tingnan sa Mateo 5:28)?

Ang Panginoon ay nalulugod sa kalinisang-puri

Ang ilan sa mga Nephita ay lumalabag sa batas ng kalinisang-puri sa pamamagitan ng pagkakaroon ng mahigit sa isang asawa, gayong ang gawaing ito ay kinundena na ng Panginoon bago nilisan ni Lehi ang Jerusalem (Jacob 2:34). Pag-isipan ang ginagawa mo sa iyong buhay upang mapaglabanan ang mga tukso na nauukol sa batas ng kalinisang-puri.

Basahin ang Jacob 2:25–28, at alamin ang itinuro ni Jacob sa mga Nephita upang matulungan sila na mapaglabanan ang tuksong gumawa ng kasalanang seksuwal.

• Ano ang pananaw ng Panginoon tungkol sa kalinisang-puri?

Tulungan ang mga estudyante na matukoy ang katotohanan, ang Panginoon ay nalulugod sa kalinisang-puri. Maaaring makatulong sa mga estudyante na markahan ang katotohanan sa talata 28.

Si Jacob ay nagsalita sa kalalakihan, na karamihan sa kanila ay hinihimok ang kababaihan na labagin ang batas ng kalinisang-puri. Kaya nga, nagsalita siya tungkol sa pagkalugod ng Panginoon sa kalinisang-puri ng kababaihan. Ang Panginoon ay nalulugod sa kalinisang-puri ng lahat ng Kanyang mga anak—kapwa kalalakihan at kababaihan.

Magbigay ng kopya ng Para sa Lakas ng mga Kabataan (buklet, 2022) sa bawat estudyante o tulungan sila na hanapin ito sa internet. Sabihin sa kanila na basahin ang bahaging “Ang inyong katawan ay sagrado” nang tahimik, at alamin kung bakit ang pagsunod sa batas ng kalinisang-puri ay isang bagay na dapat ikalugod.

ChurchofJesusChrist.org

• Bakit sa palagay mo ay nalulugod ang Panginoon sa kalinisang-puri?

• Ano ang maaaring katibayan sa buhay ng isang tao na nalulugod siya sa kalinisang-puri?

• Ano ang mga katangiang tulad ng kay Cristo ang natataglay natin sa pagsunod sa batas ng kalinisang-puri?

Basahin ang Jacob 2:31–35, at alamin kung paano nakaapekto ang mga imoral na desisyon ng mga lalaking Nephita sa kanilang mga pamilya.

• Anong mga problema ang dumarating kapag hindi natin pinahahalagahan ang kalinisang-puri tulad ng pagpapahalaga ng Panginoon?

• Paano maiiba ang mundo kung pinahahalagahan ng lahat ang kalinisang-puri tulad ng pagpapahalaga ng Panginoon?

• Sa iyong palagay, paano nakakaimpluwensya ang pagkalugod sa kalinisang-puri sa iyong ugnayan sa Panginoon at sa iba pang tao?

templo

Isa sa mga tanong sa interbyu para sa temple recommend ay “Sinusunod mo ba ang batas ng kalinisang-puri?”

Sabihin sa mga estudyante na tahimik na pag-isipan ang mga sumusunod na tanong:

• Ano ang naiisip at nadarama mo kapag iniisip mo ang isasagot mo sa tanong na ito sa iyong bishop?

• Ano ang magagawa mo upang malugod ang Panginoon sa iyong kalinisang-puri?

Pag-isipan kung ano ang ginagawa mo upang sundin ang batas ng kalinisang-puri at kung paano ito nakakaapekto sa iyong buhay sa positibong paraan. Kung nalabag mo ang batas ng kalinisang-puri, makipag-usap sa iyong bishop. Matutulungan ka niya na magsisi. Nais kang patawarin ng Tagapagligtas. Sa Kanya ay makahahanap ka ng kapatawaran, kapayapaan, paggaling, at lakas na sundin ang batas ng kalinisang-puri.

Ang susunod na bahagi ng lesson ay naglalayong tulungan ang mga estudyante na maunawaan ang mga turo ni Jacob tungkol sa pag-aasawa ng higit sa isa.

Mga turo ni Jacob tungkol sa pag-aasawa ng higit sa isa

Matapos turuan ni Jacob ang kanyang mga tao na huwag magkaroon ng mahigit sa isang asawa sa isang pagkakataon (tingnan sa Jacob 2:27), ipinaliwanag niya ang mga kundisyon kung kailan maaaring pahintulutan ng Panginoon ang pag-aasawa ng higit sa isa (tingnan sa Jacob 2:30).

• Ano ang itinuro ni Jacob tungkol sa pag-aasawa ng higit sa isa sa talata 30?

Ang pag-aasawa ng higit sa isa ay pinahihintulutan lang kapag iniutos ito ng Panginoon sa pamamagitan ng Kanyang propeta—ang Pangulo ng Simbahan—at wala nang iba (tingnan sa Doktrina at mga Tipan 132:45–48). May ilang pagkakataon at lugar sa kasaysayan ng mundo kung saan iniutos ng Panginoon na mag-asawa ng higit sa isa ang Kanyang mga tao. Halimbawa, ang pag-aasawa ng higit sa isa ay ginawa nina Abraham, Sara, at Hagar (tingnan sa Genesis 16:1–3; Doktrina at mga Tipan 132:34–35). Ang apo ni Abraham na si Jacob ay nag-asawa rin ng higit sa isa (tingnan sa Genesis 29–30; Doktrina at mga Tipan 132:37). Ginawa ito nang ilang panahon noong mga unang araw ng ipinanumbalik na Simbahan, simula kay Propetang Joseph Smith. Ang pag-aasawa ng higit sa isa ay hindi na isinasagawa ng mga miyembro ng Simbahan (tingnan sa Opisyal na Pahayag 1).

Komentaryo at Pinagmulang Impormasyon

Ano ang papel ng mga relasyong seksuwal sa plano ng Ama sa Langit?

Itinuro ni Elder David A. Bednar ng Korum ng Labindalawang Apostol:

Elder David A. Bednar

Ang kapangyarihang lumikha ng buhay ay may espirituwal na kahalagahan. Ang maling paggamit sa kapangyarihang ito ay sumisira sa mga layunin ng plano ng Ama at sa ating buhay sa lupa. Ang ating Ama sa Langit at ang Kanyang Pinakamamahal na Anak ay mga tagalikha at ipinagkatiwala Nila sa atin ang bahagi ng Kanilang kapangyarihang lumikha. Ang mga tuntunin sa wastong paggamit ng kakayahang lumikha ng buhay ay mahalagang bahagi sa plano ng Ama. Ang damdamin natin at paggamit sa banal na kapangyarihang ito ang magiging batayan ng ating kaligayahan sa mortalidad at sa ating tadhana sa kawalang-hanggan. …

Ang Simbahan ni Jesucristo ng mga Banal sa mga Huling Araw ay may iisa, at di-nagbabagong pamantayan sa kalinisang seksuwal: ang intimasiya ay nararapat lamang mangyari sa isang lalaki at isang babae na ikinasal ayon sa itinakda ng plano ng Diyos. Ang ganitong relasyon ay hindi pag-uusisa lamang na dapat hanapan ng kasagutan, hangaring dapat bigyang-kasiyahan, o uri ng libangan na gagawin lang para sa sarili. Hindi ito bagay na dapat mapagtagumpayan o kilos na dapat isagawa. Sa halip, isa ito sa mga pangunahing pagpapahayag sa mortalidad ng ating banal na katangian at potensiyal at paraan ng pagpapatibay ng emosyonal at espirituwal na ugnayan ng mag-asawa. Tayo ay mga kinatawan na may kalayaang pumili at nakikilala sa ating banal na katangian bilang mga anak ng Diyos—hindi sa seksuwal na pag-uugali, modernong pagkilos, o mga pilosopiya ng mundo. (David A. Bednar, “Naniniwala Kami sa Pagiging Malinis,” Liahona, Mayo 2013, 41–42)

Mapapatawad ba ako sa mga kasalanang seksuwal?

Sa pagsasalita sa mga lumabag sa batas ng kalinisang-puri, nagpatotoo si Elder Jeffrey R. Holland ng Korum ng Labindalawang Apostol:

Elder Jeffrey R. Holland

Ipinaaabot sa inyo ang kapayapaan at pagpapanibago ng pagsisisi na matatamo sa pamamagitan ng nagbabayad-salang sakripisyo ng Panginoong Jesucristo. Sa gayong mabibigat na bagay ang landas ng pagsisisi ay hindi madaling simulan ni nilalakbay nang walang nadaramang sakit. Ngunit lalakarin ninyo ang mahalagang paglalakbay na iyon na kasama ang Tagapagligtas ng sanlibutan. Palalakasin Niya kayo kapag kayo ay nag-aalinlangan. Siya ang inyong magiging ilaw kapag tila napakadilim. Hahawakan Niya ang inyong kamay at magiging pag-asa ninyo kapag tila pag-asa na lang ang natitira sa inyo. Ang Kanyang habag at awa, taglay ang lahat ng naglilinis at nagpapagaling na kapangyarihan ng mga ito, ay malayang ibinibigay sa lahat ng tunay na nagnanais na lubusang mapatawad at gagawa ng mga hakbang para matamo ito. (Jeffrey R. Holland, “Personal Purity,” Ensign o Liahona, Nob. 1998, 78)

Saan ako makahihingi ng tulong upang madaig ang pornograpiya?

• Dallin H. Oaks, “Paghulagpos mula sa Bitag ng Pornograpiya,” Liahona, Oktubre 2015, 32–38

• AddressingPornography.ChurchofJesusChrist.org

Isinasagawa pa rin ba ang pag-aasawa ng higit sa isa sa Simbahan ngayon?

Noong 1890, si Pangulong Wilford Woodruff ay nabigyang-inspirasyon na maglabas ng isang pahayag o manipesto kung saan ipinahayag niya na ang mga Banal sa mga Huling Araw ay tumigil sa pakikipagkasundo sa pag-aasawa ng higit sa isa (tingnan sa Opisyal na Pahayag 1). Isang maliit na bilang ng pag-aasawa ng higit sa isa ang isinagawa sa ilalim ng pahintulot ng ilang lider ng Simbahan hanggang sa winakasan ng pangalawang pahayag, na isinulat ni Pangulong Joseph F. Smith, ang gawain sa buong mundo noong 1904. Simula noon, sinumang Banal sa mga Huling Araw na magsasagawa nito ay maaaring maitiwalag sa Simbahan (tingnan sa Pangkalahatang Hanbuk, 32.6.2.5).

ChurchofJesusChrist.org

Mga Karagdagang Aktibidad sa Pag-aaral

Pag-iwas sa Tukso

Pag-isipang basahin at talakayin ang salaysay tungkol kay Jose sa Egipto bilang halimbawa ng pag-iwas sa tuksong seksuwal. Tingnan sa Genesis 39:1–12.

Maaari ding kantahin o talakayin ng mga estudyante ang ikalawang talata ng himnong “Kailangan Ko Kayo” (Mga Himno, 54).

Doctrinal Mastery. Alma 39:9; Genesis 39:9; 1 Corinto 6:19–20

Maaaring basahin at talakayin ng mga estudyante kung paano makatutulong sa kanila ang mga alituntuning itinuro sa isa o mahigit pang mga doctrinal mastery passage na sundin ang batas ng kalinisang-puri.