Jacob 5:1–53

“Ang Panginoon ng Olibohan”

olibohan

Pinagmamalasakitan ng Diyos ang lahat ng Kanyang anak, yaong mabubuti at yaong pinipiling maging masama. Ibinahagi ni Jacob ang talinghaga ni Zenos tungkol sa mga punong olibo, na simbolikong naglalarawan ng pagkalat ng ilang mabubuti at ilang masasama. Inilalarawan din ng talinghagang ito ang mga pagsisikap ng Panginoon na tipunin ang Israel sa mga huling araw. Ang lesson na ito ay makatutulong sa iyo na madama ang pagmamahal ni Jesucristo para sa iyo at sa lahat ng tao.

Pag-anyaya sa Espiritu Santo na magpatotoo sa katotohanan. Kapag nagturo ka ng totoong doktrina mula sa mga banal na kasulatan at mga salita ng mga propeta, magkakaroon ang Espiritu Santo ng pagkakataong patotohanan ang katotohanan. Sa pamamagitan ng kapangyarihan ng Espiritu Santo, “malalaman [natin] ang katotohanan ng lahat ng bagay” (Moroni 10:5).

Paghahanda ng estudyante: Maaari mong bigyan ang mga estudyante ng diagram na may pamagat na “Ang Talinghaga ng mga Punong Olibo (Jacob 5)” na makikita sa bahaging “Komentaryo at Pinagmulang Impormasyon.” Sabihin sa mga estudyante na gamitin ang diagram upang matulungan silang pag-aralan ang talinghaga sa Jacob 5 at maging pamilyar sa kabuuang mensahe nito.

Mga Posibleng Aktibidad sa Pag-aaral

Ang pagmamahal ng Diyos sa mga naliligaw ng landas

ChurchofJesusChrist.org

Nakokonsensya si Lisa tungkol sa ilan sa mga pagkakamaling nagawa niya kamakailan. Nagsimula na siyang mag-isip kung nagmamalasakit pa rin ba sa kanya ang Diyos dahil sa mga pagkakamaling ito.

• Ano kaya ang masasabi mo kung sinisikap mong tulungan ang isang taong nakadarama ng katulad ng kay Lisa?

• Bakit maaaring mahirap mahiwatigan o madama ang pagmamahal ng Diyos matapos nating piliing magkasala?

Pag-aaralan mo ngayon ang isang salaysay sa banal na kasulatan na nagpapakita ng pagmamahal ng Panginoon sa mga taong naliligaw ng landas. Sa pag-aaral mo, maghanap ng mahahalagang aral tungkol sa kahandaan ni Jesucristo na tulungan ang mga taong lumayo sa Kanya. Pag-isipan kung paano makatutulong sa iyong sitwasyon ang mga katotohanang natutuhan mo.

Ang talinghaga ng mga punong olibo

Ipinropesiya ni Jacob na tatanggihan ng mga Judio si Jesucristo (tingnan sa Jacob 4:15). Upang matulungan ang kanyang mga tao na maunawaan kung paano tutulungan ng Tagapagligtas ang mga Judio na bumalik sa Kanya, itinuro sa kanila ni Jacob ang isang talinghagang ibinigay ng isang propetang nagngangalang Zenos. Ang isang talinghaga ay gumagamit ng mga tauhan, bagay, at kilos na may sinisimbolo upang magturo ng mga katotohanan.

Ang sumusunod ay ilan sa mahahalagang simbolo ng talinghaga, kasama ang posibleng mga kahulugan nito. Isiping ilista ang mga simbolong ito sa iyong study journal o mga banal na kasulatan.

Maaari mong kopyahin ang sumusunod na chart sa pisara at sabihin sa mga estudyante na kopyahin ito sa kanilang study journal. Maaari mong idagdag ang mga ideya at komento ng mga estudyante sa buong lesson.

Isang pinalawak na chart na may mga karagdagang simbolo ang makikita sa bahaging “Komentaryo at Pinagmulang Impormasyon.”

Simbolo	Posibleng Kahulugan
Simbolo Panginoon o pinuno ng olibohan	Posibleng Kahulugan Jesucristo
Simbolo Ang olibohan	Posibleng Kahulugan Ang daigdig
Simbolo Likas na punong olibo	Posibleng Kahulugan Ang sambahayan ni Israel, ang mga pinagtipanang tao ng Diyos
Simbolo Ligaw na punong olibo	Posibleng Kahulugan Mga Gentil (mga hindi nakipagtipan sa Panginoon) at nag-apostasiyang Israel

Upang matulungan kang maghandang matuto tungkol kay Jesucristo habang pinag-aaralan mo ang Jacob 5, isulat ang “Ang natutuhan ko tungkol kay Jesucristo mula sa Jacob 5” sa gitna ng isang blangkong pahina sa iyong study journal at bilugan ito. Sa buong lesson, maghanap ng mga katotohanan at kaalaman tungkol kay Jesucristo, ang Panginoon ng olibohan. Isulat ang mga natuklasang ito sa loob o sa paligid ng bilog sa iyong study journal.

Pag-unawa sa talinghaga

Kung hindi mo pa nagagawa, bigyan ang mga estudyante ng diagram na may pamagat na “Ang Talinghaga ng mga Punong Olibo (Jacob 5),” na makikita sa bahaging “Komentaryo at Pinagmulang Impormasyon.” Maaaring sumangguni ang mga estudyante sa mga bahagi ng diagram na ito sa buong lesson.

Ang simula ng talinghaga ay maaaring kumatawan sa panahon bago ang mortal na ministeryo ni Jesucristo. Basahin ang Jacob 5:3–6, at alamin ang nangyari sa likas na punong olibo, na kumakatawan sa mga pinagtipanang tao ng Diyos.

• Ano sa palagay mo ang isinisimbolo ng pagkabulok ng puno?

• Ano sa palagay mo ang isinasagisag ng pagpupungos, pagbubungkal, at pag-aalaga ng panginoon ng olibohan?

• Ano ang itinuturo sa iyo ng mga gawaing ito tungkol kay Jesucristo? (Idagdag ang iyong mga nalaman sa pahina sa iyong journal.)

Maaaring makatulong na ilarawan ang mga sumusunod na pahayag sa pamamagitan ng pagdrowing ng isang representasyon ng mga ito sa pisara.

Matapos ang unang pagdalaw na ito, may dalawa pang mahalagang ginawa ang panginoon ng olibohan upang iligtas ang kanyang likas na punong olibo:

1. Iniutos niya na alisin ang mga nabubulok na mga sanga ng punong olibo at ihugpong sa pangunahing puno ang ilang sanga mula sa isang ligaw na punong olibo (tingnan sa Jacob 5:7–10). Ang paghuhugpong na ito ay maaaring sumasagisag sa pagsisikap ng Panginoon na tulungan ang mga Gentil na maging bahagi ng Kanyang mga pinagtipanang tao sa pamamagitan ng pagpapabinyag at pagbabalik-loob.

2. Kinuha niya ang mga sariwa at murang sanga mula sa pangunahing punong olibo at inihugpong Niya ang mga ito sa iba’t ibang dako ng olibohan (tingnan sa Jacob 5:8, 13–14). Ito ay maaaring kumatawan sa pagkalat ng Israel sa iba’t ibang dako ng mundo. Ang ilan sa mga nakalat ay mabubuti, tulad ng pamilya ni Lehi (tingnan sa 1 Nephi 10:12–13). Ang iba ay ikinalat dahil sa kasamaan.

Inilalarawan sa nalalabing bahagi ng talinghaga ang pagdalaw ng panginoon ng olibohan sa kanyang olibohan kalaunan. Ang mga pagdalaw na ito ay maaaring sumagisag sa iba’t ibang panahon sa kasaysayan ng mundo.

Maaari mong pagpartner-partnerin ang mga estudyante o hatiin sila sa maliliit na grupo at italaga sa bawat grupo ang isa sa mga sumusunod na grupo ng mga scripture verse na pag-aaralan. Pagkatapos, maaaring ibahagi ng mga estudyante sa klase ang mga nalaman nila.

Pag-aralan ang mga sumusunod na scripture verse, at alamin ang nangyari sa pangunahing puno at sa mga nakalat na puno sa bawat pagdalaw.

• Pangalawang pagdalaw (sumasagisag sa panahon ni Jesucristo): Jacob 5:15–17, 19–20, 23–28

• Pangatlong pagdalaw (sumasagisag sa Malawakang Apostasiya): Jacob 5:29–32, 38–41, 46–47

• Ano ang napansin ninyo tungkol sa kalagayan ng mga puno at mga bunga sa mga pagdalaw na ito?

• Ano ang napansin ninyo tungkol sa mga salita at ginawa ng panginoon ng olibohan sa mga pagdalaw na ito?

• Ano ang itinuturo sa inyo ng mga salita at pariralang ito tungkol kay Jesucristo? (Idagdag ang inyong mga nalaman sa pahina ng inyong journal.)

Nagbahagi si Elder Jeffrey R. Holland ng Korum ng Labindalawang Apostol ng isang aral na matututuhan natin tungkol sa Diyos mula sa mga scripture verse na ito:

Elder Jeffrey R. Holland

Matapos ang pagbubungkal at pagpupungos, pagdidilig at pagdadamo, pagpuputol, paglilipat, at paghuhugpong, ay tumigil sa paggawa ang Panginoon ng olibohan at nanangis, at sinabi sa sinumang makikinig, “Ano pa ba ang magagawa ko para sa aking olibohan?” [Jacob 5:41, 49].

Di malilimutan ang paglalarawang ito ng pagmamalasakit ng Diyos sa ating buhay! Napakasakit sa isang magulang kapag hindi Siya pinili ng Kanyang mga anak ni “ang ebanghelyo ng Diyos” [Roma 1:1] na Kanyang ipinadala! Kay daling mahalin ang taong lubos na nagmamahal sa atin! (Jeffrey R. Holland, “Ang Kadakilaan ng Diyos,” Liahona, Nob. 2003, 72)

• Ano ang mahalaga para sa iyo sa pahayag na ito? Bakit?

Ang patuloy na pagsisikap ng panginoon ng olibohan

Basahin ang Jacob 5:51–53, at alamin ang piniling gawin ng panginoon ng olibohan matapos makita ang kanyang mga nabubulok na puno.

• Ano ang itinuturo ng mga talatang ito sa inyo tungkol sa Panginoon? (Idagdag ang inyong mga nalaman sa pahina ng inyong journal.)

• Paano ninyo ibubuod ang mga aral na natutuhan ninyo mula sa Jacob 5 sa isang pahayag ng katotohanan?

Ang isang katotohanan na matututuhan natin mula sa Jacob 5 ay mahal ng Panginoon ang lahat ng anak ng Ama sa Langit at patuloy Niya silang pinagmamalasakitan kahit tumalikod sila sa Kanya.

• Paano makatutulong ang katotohanang ito sa isang tao na magkaroon ng mas malaking hangaring magsisi?

• Ano ang ilang halimbawa mula sa mga banal na kasulatan o mula sa inyong buhay na nagpapakita na patuloy na minamahal at pinagmamalasakitan ng Panginoon ang mga tao kahit na tumalikod sila sa Kanya?

Pag-isipan ang natutuhan at nadama mo ngayon na maaaring makaimpluwensya sa iyong buhay. Maaari mong isulat sa iyong study journal ang mga impresyon mo.

Komentaryo at Pinagmulang Impormasyon

Ano ang mga karagdagang simbolo at posibleng kahulugan sa Jacob 5?

Ang sumusunod ay nagbibigay ng mahalagang buod ng mga detalye at simbolismo ng talinghaga sa Jacob 5.

Chart ng Talinghaga ng mga Punong Olibo

Simbolo	Posibleng Kahulugan
Simbolo Mga ugat ng likas na punong olibo	Posibleng Kahulugan Ang mga taong nakipagtipan sa Panginoon noong unang panahon, tulad nina Abraham, Isaac, at Jacob (tingnan sa Jacob 6:4); gayundin, ang mga tipang ginagawa ng Panginoon sa mga sumusunod sa Kanya
Simbolo Bunga ng puno	Posibleng Kahulugan Ang mga buhay o ginawa ng mga tao
Simbolo Pagbubungkal, pagpupungos, paglalagay ng abono (pataba)	Posibleng Kahulugan Ang mga pagsisikap ng Panginoon sa Kanyang mga anak
Simbolo Paglilipat ng mga sanga	Posibleng Kahulugan Pagkalat ng mga grupo sa buong mundo o pagbabalik sa kanila sa kanilang orihinal na kalagayan
Simbolo Paghuhugpong	Posibleng Kahulugan Ang pagkalat at pagtitipon ng mga pinagtipanang tao ng Panginoon; gayundin, ang pagbabalik-loob ng mga taong naging bahagi ng mga pinagtipanang tao ng Panginoon (paghuhugpong ng mga ligaw na sanga sa likas na punong olibo)
Simbolo Mga nabubulok na sanga	Posibleng Kahulugan Kasalanan at apostasiya
Simbolo Pagtatapon ng mga sanga sa apoy	Posibleng Kahulugan Mga kahatulan ng Diyos sa masasama

Hinihintay ba ng Diyos na madaig ko ang aking mga kahinaan bago Niya ako mahalin?

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Pangulong Dieter F. Uchtdorf

Mahal kayo ng Diyos sa araw na ito at sa tuwina.

Hindi Niya hinihintay na madaig muna ninyo ang inyong kahinaan at masasamang gawi bago Niya kayo mahalin. Mahal Niya kayo ngayon nang may buong pag-unawa sa inyong mga paghihirap. … Alam Niya ang inyong mga pagdurusa. Alam Niya ang inyong pagsisisi sa mga panahong nagkulang o nagkamali kayo. At mahal pa rin Niya kayo. (Dieter F. Uchtdorf, “Masayang Ipinamumuhay ang Ebanghelyo,” Liahona, Nob. 2014, 123)

Ano ang maipauunawa sa akin ng talinghaga ng mga punong olibo tungkol sa Pagbabayad-sala ng Tagapagligtas?

Ipinaliwanag ni Elder Jeffrey R. Holland ng Korum ng Labindalawang Apostol:

Elder Jeffrey R. Holland

Ang talinghagang ito na inilahad ni Jacob sa simula ay patungkol na kay Cristo. …

Bagama’t ang Panginoon ng olibohan at kanyang mga manggagawa ay nagsikap na palakasin, pungusan, dalisayin, at palaguin ang kanilang mga puno ayon sa isang buong kabanatang buod ng kasaysayan ng pagkalat at pagtitipon ng Israel, ang talagang naging inspirasyon at nag-impluwensya sa lahat ng kanilang mga ginawa ay ang mas malalim na kahulugan ng Pagbabayad-sala. Sa kabila ng mga pagputol at paghuhugpong at pag-aalaga sa pinaghalo at pinagsamang mga puno sa halos lahat ng dako ng olibohan, ang pagbabalik sa pinagmumulan ng mga ito ang siyang pangunahing tema ng talinghagang ito. Ang pagbabalik, pagsisisi, muling pagsasama-sama—sa pamamagitan ng pagbabayad-sala—ito ang kabuuang mensahe. (Jeffrey R. Holland, Christ and the New Covenant [1997], 165)

Mga Karagdagang Aktibidad sa Pag-aaral

Paghugot ng lakas sa Panginoon sa pamamagitan ng mga tipan

Ang mga ugat ng puno sa talinghagang ito ay mga makapangyarihang simbolo ng mga tipan ng Panginoon sa atin. Sabihin sa mga estudyante na hanapin ang salitang “mga ugat” sa Jacob 5—makikita ang salita sa Jacob 5:11, 34–37, 48, 53–54, 59–60, 65. Maaaring pag-aralan ng mga estudyante ang mga scripture passage na ito at maaari nilang sagutin ang mga tanong na tulad ng sumusunod: Ano ang ginagawa ng mga ugat para sa mga puno? Paano ito natutulad sa magagawa ng mga tipan ng Panginoon para sa atin kapag tinutupad natin ang mga ito? Kailan ninyo naranasan o ng isang kakilala ninyo ang nangangalaga at nagpapalakas na kapangyarihan ng mga tipan?