“Суралцахуйгаа үнэлэх нь 3: 2 Нифай 26–Иаков 7 “Мормоны Номын багшийн гарын авлага (2024)
“Суралцахуйгаа үнэлэх нь 3,” Мормоны Номын багшийн гарын авлага
Суралцахуйгаа үнэлэх нь 3
Энэ хичээл суралцагчдад 2 Нифай 26–Иаков 7-г судлах явцдаа хэрхэн сайжирч, өөрчлөгдсөнөө харахад туслах зорилготой.
Суралцагчдыг суралцахад урамшуулах. Та хичээл заах үедээ суралцах туршлагад суралцагчдыг оролцуулахыг урамшуулан дэмж. Арван хоёр төлөөлөгчийн чуулгын ахлагч Дэвид А.Бэднар “Зөв зарчмуудын дагуу өөрийн чөлөөт сонголтыг хийдэг суралцагч нь өөрийн зүрх сэтгэлийг Ариун Сүнсэнд нээж, Түүний сургаал, гэрчлэгч хүч, батлагч гэрчийг урьдаг” (“Seek Learning by Faith”,” Ensign, 2007 оны 9 сар, 64) хэмээн тайлбарлажээ.
Суралцагчийн бэлтгэл: Суралцагчдыг сүүлийн дөрвөн долоо хоногийн хугацаанд Мормоны Номыг судалснаар хэрхэн сүнслэгээр өсөж хөгжсөн тухайгаа тунгаан бодоход урих талаар бодож үз. Та тэднийг судлах тэмдэглэлээ эргэн харж, хэрэгжүүлсэн тодорхой сургаалаа эсвэл өөрсдөд нь онцгой ач холбогдолтой шүлгүүдээ олж танихыг урьж болно.
Боломжит суралцах үйл ажиллагаа
Өдөр өдрөөр бага багаар сайжирч бай
Хичээлээ эхлэхдээ өөрийгөө үнэлэх зорилго, үнэ цэнийн талаар ярилцаж эхлэхийг бод. Суралцагчид Мормоны Номоос амьдралдаа хэрэгжүүлсэн тодорхой сургаалаа эсвэл Мормоны Номын өөрсдөд нь онцгой ач холбогдолтой шүлгүүдийг хуваалцаж болно.
Сүмийн тав дахь ерөнхийлөгч Лорензо Снөү ийн заасан.
Нэг дор төгс төгөлдөр болно гэж бүү бод. Хэрэв тэгвэл урам тань хугарах болно. Өнөөдөр та өчигдрөөс илүү сайн байж, маргааш та өнөөдрөөс илүү сайн бай. Магадгүй өнөөдөр биднийг зарим талаараа автуулсан уруу таталтуудад маргааш биднийг автуулах боломж бүү өг. Ийм маягаар өдөр бүр бага багаар сайжирсаар байх болно. Мөн та бусдад түүнчлэн өөрсдөдөө сайн зүйлийг хийлгүйгээр амьдралаа өнгөрөөхийг зөвшөөрч болохгүй. (Teachings of Presidents of the Church: Lorenzo Snow [2012], 103)
-
Та өнөөдөр өчигдрөөс илүү сайн байгаагаа хэрхэн мэдэх вэ?
-
Маргааш өнөөдрөөсөө илүү сайн байх хичээл зүтгэлд тань Тэнгэрлэг Эцэг, Есүс Христ хоёр хэрхэн тусалж чадах вэ?
Энэ хичээл Есүс Христийн шавийн хувьд өсөж хөгжих, үүний дотор судраас сурч мэдсэн сургаалаа тайлбарлах чадварынхаа талаар бодоход тань туслах зорилготой. Мормоны Номыг судалснаар Христийн шавийн хувьд өсөж хөгжихөд тань тус болсон арга замуудын талаар бод. Өнөөдөр суралцах явцдаа Мормоны Номыг судлах нь Есүс Христийн сайн мэдээг хуваалцаж, үүний дагуу амьдрах чадварт тань хэрхэн нөлөөлж байгааг харахад туслуулахаар Ариун Сүнсийг урь.
Танай анги 2 Нифай 26-аас Иаков 7 хүртэл судлах явцдаа үйл ажиллагаануудад тусгаснаас өөр үнэнийг онцолсон байж болох юм. Танай ангийн хэрэгцээнд хамгийн сайн нийцэх үйл ажиллагааг сонгож эсвэл суралцагчдынхаа тодорхойлсон үнэнийг багтаахын тулд дасгалыг өөрчлөх боломжтой.
А, Б үйл ажиллагааны зорилго бол өмнөх хичээлүүдэд заасан сургаалыг тайлбарлах боломжийг суралцагчдад олгох явдал юм. В эсвэл Г үйл ажиллагаанд цаг гаргахын тулд зөвхөн нэгийг нь хийх шаардлагатай болж магадгүй.
Үйл ажиллагаа А: Есүс Христийн сургаалыг тайлбарла
Дараах үйл ажиллагаагаар суралцагчид хэд хэдэн судрын шүлгийг эргэн харах шаардлагатай болох болно. Судруудыг унших эсвэл ойлгоход бэрхшээлтэй байгаа суралцагчдад мэдрэмжтэй ханд. Суралцагчдыг хоёр хоёроор нь эсвэл бүлгээр нь суулгаж, Христийн сургаалын зарчим ба ёслолуудыг олж тогтооход нь тусал. Эдгээрт Есүс Христэд итгэх итгэл, наманчлал, нүглийн ангижралын төлөөх баптисм, Ариун Сүнсний бэлгийг хүлээн авах, эцсээ хүртэл тэвчих зэрэг орно.
Мөнх амьдралыг хүлээн авахын тулд юу хийх хэрэгтэйг Нифай бидэнд заасан. Эдгээр зарчим, ёслолыг Христийн сургаал гэж нэрлэдэг (2 Нифай 31:2, 21-ийг үзнэ үү). Христийн сургаал бол “Зам нь энэ; мѳн хүмүүн Бурханы хаант улсад аврагдаж чадах ѳѳр тийм ѳгѳгдсѳн нэр болон зам гэж тэнгэрийн дор үгүй” (2 Нифай 31:21). 2 Нифай 31:10–12, 17, 20–21-ийг эргэн уншаад, Христийн сургаалын нэг хэсэг болох зарчим, ёслолуудыг олж мэд.
Суралцагчдыг бүлгийнхээ хамтаар дараах асуултуудад хариулахад эсвэл хариултаа судрын тэмдэглэлдээ бичихэд урь.
-
2 Нифай 31-д Нифайн цэдэглэсэн зүйлийг ашиглан, Христийн сургаалыг өөр хүнд хэрхэн тайлбарлаж болох вэ?
-
Авралд нь найдахад Христийн сургаал бидэнд хэрхэн тусалдаг вэ?
-
Христийн сургаалыг дагаснаар та хэрхэн адислагдсан бэ?
Үйл ажиллагаа Б: Есүс Христийн сайн мэдээний Сэргээлтэд Мормоны Номын гүйцэтгэсэн үүргийг тайлбарла.
Энэ хувилбарыг дүрд тоглох байдлаар буюу та удирдагчийн үүргийг гүйцэтгэж, суралцагчид Лукагийн дүрээр хариулан үзүүлж болно. Хэрэв та энэ дасгалыг хийх бол суралцагчдаас Библийн хамтрагч, үнэн байдлынх нь гэрч болох Мормоны Ном (1 Нифай 13:40–422 Нифай 3:11–12-ыг үзнэ үү), Сэргээлтийн тэмдэг (2 Нифай 27; 29:1–10-) мөн “манай шашны тулгуур чулууны (Мормоны Номын удиртгал) талаар гэрчлэлээ хуваалцахад туслах нэмэлт асуултуудыг асуу.
Дараах жишээг төсөөлөн бод.
Лука бүрэн цагийн номлогч болохын тулд бэлдэж байна. Түүний гадасны ерөнхийлөгч ярилцлага хийхээр уулзахаасаа долоо хоногийн өмнө дараах мессежийг илгээжээ.
“Лука, би чамтай уулзаж байгаадаа баяртай байна. Уулзалтдаа бэлтгэхдээ Мормоны Номыг ашиглан, Есүс Христийн сайн мэдээний Сэргээлтэд Мормоны Ном ямар үүрэг гүйцэтгэдэг вэ? гэсэн асуултад хариулахад бэлтгэж ирэх үү? (2 Нифай 3:11–12; 2 Нифай 27:25–26; 2 Нифай 29:7–11-ийг үзнэ үү).”
-
Есүс Христийн сайн мэдээг сэргээхэд гүйцэтгэсэн үүргийнх нь талаар Мормоны Номоос Лука юу хуваалцаж чадах вэ?
Үйл ажиллагаа В: Есүс Христэд итгэх итгэлээр чөтгөрийг эсэргүүц
Хэрэв “2 Нифай 28:1–26” хичээлийн үед төлөвлөгөө гаргахад суралцагчдыг уриагүй бол энэ хэсэгт зохих өөрчлөлт оруулах шаардлагатай болно. Жишээлбэл: Та суралцагчдад Сатаны хүчин чармайлтыг эсэргүүцэх төлөвлөгөө гаргахад нь эсвэл стратегийн талаар ярилцахад нь дэмжлэг үзүүлж болно.
Эцсийн өдрүүдэд хүмүүсийг Бурханаас холдуулахын тулд Сатаны ашиглах арга мэхийн талаар Нифай 2 Нифай 28:20–22-т заасан. Үүнд сайн сайхны эсрэг уурлуулахаар хүмүүсийг хутган үймүүлэх, хүмүүсийг тайтгаруулж, зуурдын аюулгүй байдалд тэднийг тайвшруулах, там, чөтгөр гэж байхгүй хэмээн хүмүүст хэлэх зэрэг орно. “2 Нифай 28:1–26” хичээлийг судлах явцдаа та бүхэн Сатаны арга заль мэхийн эсрэг өөрийгөө илүү сайн хамгаалах төлөвлөгөө гаргасан байж болох юм. Тэр хичээлээс судлах тэмдэглэлдээ юу бичсэнээ эргэн хар.
-
Та төлөвлөгөөгөө хэр үр дүнтэй хэрэгжүүлж байна вэ? Яагаад?
-
Таны төлөвлөгөө Сатаны арга заль мэхийн эсрэг Аврагчийн хамгаалалтыг авахад тань ямар арга замаар тус болсон бэ?
-
Төлөвлөгөөндөө нэмснээр танд тус болох юуг та сурч мэдэж эсвэл туршлагажсан бэ?
Төлөвлөгөөгөө дахин хэрэгжүүлэх арга замыг бодож үз. Тэнгэрлэг Эцэг, Есүс Христ хоёрт хандан, аюулаас сэрэмжлүүлэх, Сатаны хүчин чармайлтаас зугтах буюу даван туулах хүч чадлыг олж авахаа бүү март (Сургаал ба Гэрээ 10:5-ыг үзнэ үү).
Үйл ажиллагаа Г: Израилын цугларалтад оролцох
Нифай, Иаков хоёр хоёулаа Израилын цугларалтыг ихэд сонирхож байв. Энэ нь нэг талаасаа үр удамд нь юу тохиолдохыг Их Эзэн Нифайд харуулсантай холбоотой байж болох юм (1 Нифай 12–13-ыг үзнэ үү).
Та 1 Нифай 19–22, 2 Нифай 6 эсвэл Иаков 5:52–776:1–13-ыг судалж байхдаа Израилын цугларалтад оролцохоор уригдсан байж магадгүй. Хэрэв тийм бол өөрийн хийсэн амлалт, төлөвлөгөө, ажилд оролцох хандлага, хүсэл эрмэлзлээ нягталж үз.
-
Та Израилын цугларалтын талаар суралцахдаа ямар урам зориг авсан эсвэл хэрэгтэй зүйл олж мэдсэн бэ?
-
Та өмнө нь хийж үзээгүй ямар хүчин чармайлт гаргасан бэ? Та амжилтад хүрсэн үү? Яагаад тийм эсвэл үгүй вэ?
-
Аврагчийн ажилд оролцох үедээ Түүний таныг удирдаж, хүчирхэгжүүлж байгааг та хэрхэн мэдэрсэн бэ?
-
Та энэ ажилд оролцсоноор ямар адислал олж харсан бэ?