Жером–Омнаи

Өөрийн бүхэл бодгалийг Есүс Христэд өргөл болгон өгөгтүн

Та нар чухал сонголттой тулгарахдаа хаанаас удирдамж заавар хүсдэг вэ? Тэнгэрлэг Эцэг, Есүс Христ хоёр судруудыг бүх хүнд удирдамж, тусламжийн үндсэн эх сурвалж болгон өгсөн. Жером, Омнаин номууд амьдралыг тань адислах янз бүрийн сургаалыг агуулдаг. Энэ хичээл таны амьдралыг адисалж, удирдаж чадах судруудаас зарчмуудыг тодорхойлж, хэрэгжүүлэх дадлага хийхэд тань туслах зорилготой.

Сайн мэдээний сургаал, зарчмыг олж нээхэд суралцагчдад тусал. Сургаал нь Есүс Христийн сайн мэдээний үндсэн бөгөөд хэзээ ч өөрчлөгдөшгүй үнэн юм. Зарчим бол хувь хүнийг шийдвэр гаргахад нь чиглүүлдэг мөнхийн үнэн юм. Сайн мэдээний зарчим нь бүх дэлхийнх бөгөөд сайн мэдээний сургаалыг амьдралдаа хэрэгжүүлэхэд хүмүүст тусалдаг.

Суралцагчийн бэлтгэл: Судраас өдөр бүр судлах явцдаа амьдралдаа тустай зарчмуудыг олж тогтоох дадлага хийхэд суралцагчдыг урь. Олж мэдсэн дор хаяж нэг зарчмаа хуваалцахаар бэлдэж ирэхэд тэднийг урамшуул.

Боломжит суралцах үйл ажиллагаа

Усан онгоцыг залуурдах нь

Хичээлийг эхлэхдээ усан онгоцны зураг үзүүлж эсвэл самбар дээр зурж болно. Эсвэл самбарт суралцагчаар усан онгоц зуруулж болно. Та тэднээс хөлгийн багт зорилтот газартаа хүрэхэд нь хөлөг онгоцны ямар ямар хэсэг шаардлагатайг асууж болно.

Амьдралаа далайд хөвж буй хөлөг онгоц мэтээр төсөөлөөд үз. Хөлөг онгоцыг аялалд чиглүүлдэг жолооны хүрд эсвэл залууртай ямар зүйлсийг харьцуулж болох вэ?

Суралцагчдын хариултыг самбарт жагсаан бичих талаар бодож үз.

Арван хоёр төлөөлөгчийн чуулгын ахлагч Дэвид А.Бэднар боломжит хариултыг ийн өгсөн.

Сайн мэдээний зарчмууд нь та бидний хувьд хөлөг онгоцны залууртай адил юм. Зөв зарчмууд бидэнд замаа олж, баттай, тууштай, хөдөлшгүй зогсох боломжийг олгодог бөгөөд тэгснээр бид тэнцвэрээ алдахгүй мөн харанхуй, будилаантай хожмын үеийн хүчит шуурганд автахгүй байх болно. (Дэвид А.Бэднар, “Миний сайн мэдээний зарчмууд,” 2021 оны 4-р сарын Ерөнхий чуулган, 132)

• Сайн мэдээний зарчмууд нь ямар учраас хөлөг онгоцны залуур буюу жолоотой адил байдаг вэ?

• Та судраас үнэн зарчмуудыг олж танин, тэдгээрийг амьдралдаа удирдан чиглүүлэхэд ашиглаж чадах итгэлээ 1-10 хүртэлх оноогоор хэрхэн дүгнэх вэ? Яагаад?

• Та өмнө нь судраас зарчмуудыг олоход тусалсан юуг хийж байсан бэ?

Суралцагчдын хариултыг анхааралтай сонс. Ангийнхандаа туслахын тулд тэдний хэлснийг самбар дээр бичих талаар бодож үз.

Хэрэв та зарчмуудыг хэрхэн олж тодорхойлох тал дээр давтахыг хүсвэл “2 Нифай 1”, “Иаков 4 хичээлүүдийг дахин үзэх талаар бодож үз.

Семинарт эсвэл хувиараа судар судлах үеэр саяхан тодорхойлсон зарчмынхаа талаар эргэцүүлэн бодоход хэсэг хугацаа зарцуул.

• Та ямар зарчим олж мэдсэн бэ? Энэ зарчим таны амьдралыг хэрхэн адисалсан бэ?

Бодол санаагаа хуваалцахад хэдэн суралцагчийг урих талаар бод. Тэднийг зарчмуудыг хэр сайн тодорхойлж байгааг болон энэ хичээлээр та тэдэнд чадвараа нэмэгдүүлэхэд нь хэрхэн тусалж болохыг үнэлж дүгнэхийн тулд анхааралтай сонс. Мөн суралцаж байгаад нь баяр хүргэж, цаашдын ажилд нь урам зориг өгөх боломжийг эрэлхийл.

Сайн мэдээний зарчмуудыг тодорхойлж таних нь

Жером ба Омнаин номууд нь Нифайн бага ялтаснуудын төгсгөлийн бичвэрүүдийг агуулах бөгөөд бидний амьдралыг адислах олон зарчмыг багтаасан. Жером ялтаснуудыг эцэг Иносоосоо хүлээн авч, нифайчуудын 40 жилийн зовлон зүдүүр, адислалын талаар тэмдэглэн үлдээжээ. Тэгээд уг ялтаснуудыг өөрийн хүү Омнайд дамжуулан өгчээ. Омнаин ном нь нифайчуудын таван өөр цэдэг хөтлөгчийн бичсэн 190 орчим жилийн түүхийг агуулдаг.

Сайн мэдээний зарчмуудыг тодорхойлох утга учиртай туршлага хуримтлуулахад суралцагчдад тань юу хамгийн сайн тохирохыг тодорхойл. Суралцагчид бие даан эсвэл жижиг бүлгүүдэд хуваарилагдан, судрын нэг эсвэл хэд хэдэн эшлэл дэх зарчмуудыг олж танихын тулд хамтран ажиллаж болно.

Дараах судрын хэсгүүдийг уншаад, амьдралдаа ашиглаж болох сайн мэдээний зарчмуудыг олж таних дадлага хий. Шүлэг бүрд хэд хэдэн зарчим агуулагдаж болно. Судрын хэсэг бүрээс дор хаяж нэгийг олж мэд.

1. Жером 1:3–4

2. Жером 1:5–9

3. Жером 1:10–12

4. Омнаи 1:12–16

5. Омнаи 1:25–26

Хэд хэдэн суралцагчаас өөрсдийн тодорхойлсон зарчмуудыг самбар дээр бичихийг хүсэх талаар бодож үз.

Аврагчид болон Түүний ажилд өөрийгөө зориулах нь

Зарчмыг тодорхойлсныхоо дараа энэ нь юу гэсэн үг болохыг мөн таны амьдралд хэрхэн хэрэгжиж болох талаар тунгаан бодох цаг гаргах нь чухал юм. Жишээлбэл: Омнаи 1:26-д та дараах зарчмыг тодорхойлсон байж магадгүй: Хэрэв бид Христэд очиж, бүхэл бодгалиа Түүнд өргөвөөс аврагдах болно.

• Та энэ зарчмыг илүү сайн ойлгож, хэрэгжүүлэхийн тулд ямар арга зам хайж болох вэ?

Дараах нь үүнийг хэрэгжүүлэх нэг санаа юм.

Энэ зарчмыг өдөр тутмын амьдралдаа бусдад санал болгож болох зүйлтэй харьцуулах нь тустай байж болох юм.

• Та өөр хэн нэгэнд юу санал болгож болох вэ?

• Өгч чадах зүйлийнхээ зөвхөн аль нэг хэсгийг санал болгох арга зам бий юү? Яагаад?

• Та өгч чадах бүхнээ хэзээ санал болгож болох вэ? Яагаад?

• Энэ нь сүнсээ бүхэлд нь Есүс Христэд өргөл болгон өгөхтэй хэрхэн хамаарах вэ?

Суралцагчдын хариултыг сонсох үед тань дараах асуултууд тустай байж магадгүй: Таны бодлоор Есүс Христэд сүнсээ бүхэлд нь өргөх ямар байдаг гэж бодож байна вэ? Хүн өөрийгөө Есүс Христэд бүрэн зориулахад юу саад болж болох вэ?

• Есүс Христэд бодгалиа бүхэлд нь өргөх гэдэг нь таны бодлоор ямар утгатай вэ?

• Таны бодлоор Их Эзэн ямар учраас бодгалиа бүхэлд нь өргөхийг биднээс хүсдэг вэ?

• Та Есүс Христэд бодгалиа бүхэлд нь зориулахыг хичээж буй хэн нэгний сайн жишээг мэдэх үү? Тэд үүнийг хийснээрээ хэрхэн адислагдсан бэ?

  ChurchofJesusChrist.org 

Өөрийнхөө амьдралыг харуулсан тойрог зурах талаар бодож үз. Одоогоор Их Эзэнд өөрийгөө хэр зориулж байгааг илэрхийлэх хэсгээ буд. Та хэрхэн Есүс Христэд бодгалиа бүхэлд нь өргөх талаар хэсэгхэн зуур тунгаан бод. Үүнийг хийх нэг юм уу хоёр арга замыг болон эдгээр зүйл таны амьдралд ямар ач тустай болохыг бич.

Сургаал ба зарчмуудыг ойлгох

Жером, Омнаи хоёроос өмнө нь тодорхойлсон зарчмуудаа эргэн сана.

• Эдгээр зарчмын аль нь танд бусдаас илүү онцгой санагдсан бэ? Яагаад?

• Энэ зарчмыг хэрхэн илүү сайн ойлгож, амьдралдаа хэрэгжүүлэх вэ?

• Энэ зарчмаар амьдрах нь таны амьдралыг Есүс Христ рүү илүү сайн чиглүүлэхэд хэрхэн туслах вэ?

Тайлбар ба нөхцөл байдлын талаарх мэдээлэл

Oмнаи 1:12–22. Омнаи номонд дурдагдсан янз бүрийн бүлэг хүн гэж хэн бэ?

Омнаи номоос бид Их Эзэний амлалтын нутагт авчирсан гурван бүлэг хүний талаар суралцдаг. Эхний бүлэг нь Лихайн гэр бүл ба тэдний үр удам байв. Зарахемлагийн хүмүүс буюу мюлекчүүд гэж нэрлэгддэг хоёр дахь бүлэг нь Лихайн гэр бүлийнхэнтэй ойролцоо үед Иерусалимаас Америк тив рүү аялсан. Тэд Мозая хааны удирдлаган доор нифайчуудтай нэгдсэн (Омнаи 1:19-ийг үзнэ үү). Гурав дахь бүлэг нь эхний хоёр бүлгээс хамаагүй өмнө амлалтын нутагт ирсэн жаредчууд байв. МЭӨ 600-300 оны хооронд иргэний дайнаар тэд өөрсдийгөө сүйрүүлсэн. Жаредчуудын сүүлчийн хаан Кориантумр хэмээх эр сүйрлээс амьд үлдэж, үхэхээсээ өмнө Зарахемлагийн хүмүүсийг олох хүртлээ тэнүүчилж явсан бололтой (Омнаи 1:21-ийг үзнэ үү). Ифер ном нь жаредчуудын түүхийг өгүүлсэн Моронайн хураангуйлал юм.

Oмнаи 1:26 Би хэрхэн бодгалиа бүхэлд нь Есүс Христэд өргөх вэ?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Бидний хүн нэг бүр Христийн сайн мэдээнд … бат амлалттайгаар Түүн рүү ирэх ёстой. … Өнөөгийн өсвөр үеийнхний хэлээр, бид “байгаа бүхнээрээ” гэж өөрсдөдөө тунхаглах хэрэгтэй. (Жэффри Р.Холланд, “Хамгийн агуу хөрөнгө,” 2021 оны 10-р сарын Ерөнхий чуулган, 8)

Арван хоёр төлөөлөгчийн чуулгын ахлагч Нийл А.Максвэлл (1926–2004) өөрсдийгөө Их Эзэнд өргөхийн утга учрыг ийн заасан.

Жинхэнэ, хувийн золиос нь хэзээ ч тахилын ширээн дээр мал тавих байгаагүй юм. Оронд нь энэ бол бид өөрсдийн дотор тахилын ширээн дээр малаа гаргаж тавиад шатаана гэсэн үг юм! (Neal A. Maxwell, “Deny Yourselves of All Ungodliness,” Ensign, May 1995, 68)

Энэ сэдвийг хожим нь ахлагч Максвэлл ийн заасан.

Ахлагч Нийл А.Максвэлл “Та өөрийн хүслийг Бурханыхтай нийцүүлснээр үнэн хэрэгтээ өөрийн өгч чадах цорын ганц зүйлээ Түүнд өгч буй хэрэг юм. (Neal A. Maxwell, “Remember How Merciful the Lord Hath Been,” Ensign, May 2004, 46)

Ням гаргийн ангийн ерөнхий ерөнхийлөгч Рассэлл Т.Осгуторп ах ийн нэмж хэлсэн.

Их Эзэнд өөрсдийн хүслийг нийцүүлнэ гэдэг нь бидний өдөр тутам хийдэг зүйл юм. Энэ нь тусгай нэг үйлдэл биш. Энэ нь төгсгөл биш, харин ч эхлэл юм. Бид Түүний хэлүүлэхийг хүсэж байгаа зүйлийг хэлж чадна. Бид Түүний хийлгэхийг хүсэж байгаа зүйлийг ч хийж чадна. Бид эдгээр зүйлийг хийхийг хүсэж байгаа учраас Бурханы Хайрт Хүүгийн ертөнцийн гэрч болж чадна. Бидний зүрх сэтгэлд энэ өөрчлөлт гарах үед Цагаатгалд талархах талархал минь улам их нэмэгдэж, бид үүгээр үргэлж хүчирхэгжсээр байдаг билээ. (Russell T. Osguthorpe, “I Will Give Myself to Him” [Church Educational System devotional for young adults, Nov. 3, 2013])

Нэмэлт суралцах үйл ажиллагаа

Жэром 1:9. “Их Эзэний үг нотлогдсон билээ”

Суралцагчдад Их Эзэний амлалтууд амьдралд нь биелж байгаа талаар илүү дэлгэрэнгүй судлах нь тустай гэж үзвэл 1 Жером 1:5–9-ийг уншиж, Жеромын үеэс сурч болох сургамжийг хайж олоход урь. Бид Их Эзэнд итгэж, зарлигуудыг нь дагаснаар Түүний амласан адислалуудыг хүртэх болно гэх зэрэг Жером 1:9 дэх зарчмыг олж тогтооход суралцагчдад тусал. Дараах асуултуудыг бодож үз.

• Бурханы амлалт байнга тэр даруй биелдэггүй гэдгийг санах нь яагаад чухал вэ?

• Их Эзэний тухай сурч мэдсэн зүйлээс тань юу танд Түүний амлалтад итгэх итгэлийг өгсөн бэ?

• Бурханы үг эцэстээ биелсэн судрын өөр ямар жишээ байдаг вэ?

• Их Эзэн тушаалуудыг нь сахисны төлөө таныг эсвэл таны таньдаг хэн нэгнийг хэзээ адисалсан бэ?

Энэ зарчмын жишээ болгон “Тэвчээртэйгээр үргэлжлүүл” (2:41) видеог үзүүл эсвэл 2010 оны 4-р сарын Ерөнхий чуулган дээр тухайн үед Тэргүүн Зөвлөлийн ерөнхийлөгч байсан Дийтр Ф.Угдорфын хэлсэн ижил үгийг үзнэ үү.

Oмнаи 1:14–19. Судрын үнэ цэн

Судраас тогтмол судалснаар өөрсдөд нь анзаарагдсан ашиг тус ба адислалын талаар бодоход суралцагчдыг урих талаар бодож үз. Суралцагчдыг Омнаи 1:14–19-ийг судалж Иерусалимаас “цэдгийг авчраагүйн” төлөө мюлекчүүдэд юу тохиолдсоныг олж мэдэхийг эрэлхийлүүл (Омнаи 1:17). Сүнс Нифайд юу гэж хэлснийг суралцагчдад сануул—хэрэв тэр Лебенээс гуулин ялтаснуудыг авахгүй бол бүхэл бүтэн үндэстэн итгэлгүйдээ бууран доройтно (1 Нифай 4:13--ыг үзнэ үү). Зарахемлагийн хүмүүс энэ сэрэмжлүүлгийн амьд гэрчүүд байв. Суралцагчдаас судраас тогтмол судалснаар санаж эсвэл бодоход нь тусалдаг зарим зүйлийг самбар дээр жагсаан бичихийг хүс.