Мормоны үгс

“Мэргэн зорилгын учир”

Та хэзээ нэгэн цагт өөр хэн нэгний урьдчилсан бэлтгэлээр адислагдаж байсан уу? Тэдний бэлтгэл таны туршлагад хэрхэн нөлөөлсөн бэ? Мормон нифайчуудын цэдгүүдийн зарим хэсгийг аль хэдийн хураангуйллыг хийснийхээ дараа Нифайн бага ялтаснуудыг олж нээсэн. Их Эзэний хүслээр бага ялтаснуудыг “мэргэн зорилгын учир” оруулахдаа Мормон Их Эзэний Сүнсний хүслээр чиглүүлэгдсэн билээ (Мормоны үгс 1:3–7-г үзнэ үү) Энэ хичээл суралцагчдад Их Эзэн бүх зүйлийг мэддэг бөгөөд Түүний ажил биелнэ гэдэгт итгэлтэй байхад тусалж чадна.

Оролцоог урих асуултууд тавь. Үр дүнтэй асуултууд нь суралцагчдад хичээлд оролцох, бие биетэйгээ харилцахад тусална. Асуултууд мөн суралцагчдыг сонголтоо ашиглаж, суралцах үйл явц дахь үүргээ биелүүлэхээр Ариун Сүнсийг суралцах туршлагадаа урихад урамшуулж чадна. Оюун ухаан, зүрх сэтгэл хоёуланг татах асуултуудыг асуу.

Суралцагчийн бэлтгэл: Суралцагчид эцэг эхээсээ эсвэл Сүмийн удирдагчаас сүнслэг сэтгэгдэл эсвэл өдөөлтөд хариулснаар хэрхэн удирдуулж, адислагдсан тухайг асууж болно.

Боломжит суралцах үйл ажиллагаа

Бурханы талаарх итгэл

Суралцагчдыг судлах тэмдэглэлдээ эсвэл нэр нууцалсан цахим саналын аппаар дараах асуултад хариулахад урьж, тэдний хариултуудыг цуглуулж болно.

Дараах мэдэгдэл тус бүрээр өөрийн итгэлийн түвшинг 0–5 оноог ашиглан, чин үнэнээр үнэлэхэд хэдэн хормыг зарцуулна уу (0 = Би итгэдэггүй, 5 = Би чин сэтгэлээсээ итгэдэг).

• Би Бурханд итгэдэг.

• Тэр бүх зүйлийг мэддэг, Түүнд бүх хүч чадал бий гэдэгт би итгэдэг.

• Бурхан надад зориулан намайг амьдралдаа амжилттай байх арга замыг бэлддэг гэдэгт би итгэдэг.

• Надад Ариун Сүнсээр дамжуулан өгдөг Түүний зөвлөгөө, өдөөлтөд найдаж чадна гэж би мэдэрч байна.

Асуултуудынхаа заримыг самбарт бичих нь тустай байж болох юм.

Өнөөдөр судлах явцдаа Бурханд, мөн Түүний хүч чадалд болон Тэрээр ажлаа хэрхэн гүйцэлдүүлдэгт итгэх итгэл, итгэлийг тань нэмэгдүүлж эсвэл тайвшруулж болох үнэнүүдийг олж мэд.

Мормоны ялтаснуудын хураангуйлал

Дараах мэдээллийг өөрийн үгээр хуваалц.

Лихайн гэр бүлийг Иерусалимаас гарснаас хойш бараг 1000 жилийн дараа амьдарч байсан бошиглогч Мормоны амьдралыг ямархуу байх байсныг төсөөлж үз. Тэрээр нифайчуудын цэдгүүдийн сүүлийн хадгалагчдын нэг байсан бөгөөд нифайчуудын мянган жилийн түүхийг нэг багц ялтаст хураангуйлахаар ажилласан. Аль үйл явдлыг оруулах, алийг нь үлдээхийг та хэрхэн шийдэх байсан бэ?

Нифайчуудын ялтаснуудын хураангуйлал дээр ажилласаар хаан Бенжамины үед хүрэхдээ Мормон чухал нээлт хийсэн. Тэрээр Мормоны үгс нэртэй номд өөрийн туршлагын тухай товч тайлбарыг оруулсан.

Мормоны үгс 1:3–6-г уншаад, Мормон юу олж мэдсэнийг мөн үүний улмаас юу хийснийг олж мэд.

“Эдгээр ялтсууд” (Мормоны үгс 1:3–6) гэсэн нь Нифайд хийхийг зарлигласан бага ялтаснууд болохыг мэдэх нь тустай байж болох юм (1 Нифай 9:2–4-ийг үзнэ үү). Нифайн том ялтаснуудад Мормоны аль хэдийн хураангуйлсан бага ялтаснуудтай ижил цаг үеийн үйл явдлын ихэнхийг дурдсан ч тохиосон сүнслэг үйл явдлуудад голчлон төвлөрчээ. Хэрэв та эдгээр цэдгийн талаар илүү ихийг мэдэхийг хүсвэл Мормоны Номын эхлэл болох “Мормоны Номын тухай товч тайлбар”-ыг унш.

Дараах судрын шүлгүүдийг уншаад, дагалдах асуултуудыг хоёр хоёроороо ярилцахад суралцагчдыг урьж болно.

Мормон, Нифай хоёр хоёулаа бага ялтаснуудын талаар Их Эзэнээс тусгай өдөөлт хүлээн авсан. 1 Нифай 9:5–6 болон Мормоны үгс 1:7–8-ыг уншаад, эдгээр хоёр бошиглогчийн туулж өнгөрүүлсэн зүйлийн ижил төстэй байдлыг олж мэд.

• Аль үг, хэллэг та нарт онцгой санагдсан бэ?

• Эдгээр шүлэг Нифай, Мормон хоёрын тухай бидэнд юу хэлж байна вэ?

• Тэдний үг бидэнд Их Эзэний тухай ямар үнэнийг зааж чадах вэ?

Та тодорхойлсон үнэнээ самбар дээр бичихэд суралцагчдыг урамшуулж болно.

Та бусад үнэний дунд Их Эзэн бүхнийг мэддэг, бүх хүч чадлыг эзэмшдэг, ажлыг нь гүйцэлдүүлэх арга замыг бэлтгэдэг гэсэн үнэнийг анзаарсан байж болох юм.

Дараах асуултууд нь суралцагчдад Их Эзэний эдгээр зан чанарын талаар бодоход туслах зорилготой. Суралцагчид судлах тэмдэглэлдээ бодлоо бичиж авах нь утга учиртай байж болох юм.

• Их Эзэн бүхнийг мэддэг бөгөөд Түүнд бүх хүч чадал бий гэдгийг мэдэх нь та нарын хувьд яагаад чухал вэ?

• Энэ мэдлэг таны амьдралд хэрхэн тусалж болох вэ?

• Эдгээр үнэнийг ойлгох нь Их Эзэний өдөөлтийг дагах хүсэлд тань хэрхэн нөлөөлж болох вэ?

Нэг эсвэл хэд хэдэн суралцагчийг өмнөх асуултуудын аль нэгэнд өгсөн хариултаа хуваалцахыг урь. Та бас өөрийн туршлагаас хуваалцахыг хүсэж болно.

Их Эзэн замыг бэлтгэсэн

Их Эзэний урьдчилж мэдэх чадвар, хүч чадлын нотлох баримтыг Нифайд бага ялтаснуудыг бэлтгэхийг тушааж, Мормоныг эдгээр цэдгийг хураангуйлалдаа оруулахыг өдөөснөөс харж болно.

Хэдэн зуун жилийн дараа Иосеф Смит Мормоны Номын ялтаснуудыг хөрвүүлэхдээ Нифайн том ялтаснуудын Мормоны товчлолоор эхэлсэн. Иосефт бичээчээр тусалж байсан Мартин Харрис хөрвүүлсэн хуудаснуудыг эхнэртээ болон гэр бүлийн бусад гишүүндээ үзүүлэхийг удаа дараа хүссэн. Хэдийгээр Их Эзэн Мартины хүсэлтийг няцаасан ч Иосеф Их Эзэнээс зөвшөөрөл хүссэн хэвээр байв. Эцэст нь, 116 гар бичмэл хуудсыг Нью-Йоркийн Палмира дахь гэр лүүгээ авч явахыг хатуу заавар, сэрэмжлүүлэгтэйгээр Мартинд зөвшөөрөв. Тэрээр гар бичмэлийг хоёр долоо хоногийн дотор Пеннсильвани муж улсын Хармонид Иосефт буцаан өгөх үүрэг хүлээсэн.

Та дараах бичлэгийг үзүүлэхийн оронд Мормоны Номын 116 хуудас алдагдсантай холбоотой үйл явдлуудыг дахин ярихад бэлэн суралцагчийг урьж яриулж болно. Доорх түүхэн явдлууд нь эдгээр үйл явдлын нөхцөл байдлыг ойлгоход суралцагчдад тусална.

    ChurchofJesusChrist.org  Та Иосеф, Мартин хоёрт тохиолдсон зүйлийг дүрсэлсэн дараах зүйлийг уншиж болно. (Мөн Гэгээнтнүүд: Хожмын өдрүүд дэх Есүс Христийн Сүмийн түүх, боть 1, Үнэний жишиг, 1815–1846 (2018), 51–53-ыг үзнэ үү.)

1. Иосефын эхнэр Эмма анхны хүүхдээ төрүүлсэн бөгөөд уг хүүхэд хэдхэн цагийн дараа нас баржээ. Иосеф хоёр долоо хоног Эммаг асраад, дараа нь Мартиныг Хармони руу буцаж ирээгүй байхад Палмира руу явав.

2. Мартин Мормоны Номын гар бичмэлийг алдсанаа хүлээв. Их Эзэн Иосефыг шийтгэсэн бөгөөд хөрвүүлэх ажлаа үргэлжлүүлэхийг түүнд зөвшөөрсөнгүй.

3. Иосефыг чин сэтгэлээсээ наманчилж, өршөөл хүссэний дараа Их Эзэн Иосефт ялтаснуудыг үргэлжлүүлэн хөрвүүлэхийг зөвшөөрөв. Харин алдагдсан хэсгийг дахин орчуулахгүй байхыг зааварлажээ.

4. Сатаны нөлөөн доор ёс бус хүмүүс гар бичмэлийг хулгайлсан болохыг Их Эзэн илчилсэн. Тэд үгсийг өөрчилж, Иосеф зөвхөн хөрвүүлж буй дүр эсгэж, улмаар Их Эзэний ажлыг устгасан мэт харагдуулахыг зорьсон (Сургаал ба Гэрээ 10:10–19, 29–33-ыг үзнэ үү).

5. Их Эзэн Иосефт Нифайн цэдгийг бага ялтаснууд дээр хөрвүүлэхийг тушаасан бөгөөд Мормон үүнийг хураангуйлалдаа оруулан, алдагдсан хэсэг дэх цаг хугацаа болон үйл явдлын ихэнхийг дурдсан байсан. Их Эзэн “Миний мэргэн ухаан чөтгөрийн заль мэхээс илүү агуу” (Сургаал ба Гэрээ 10:43) хэмээн Иосефт хэлсэн.

Их Эзэн биднийг адисалж, ажлаа гүйцэлдүүлэхийн тулд Тэрээр мэдлэг, хүч чадлаа хэрхэн ашиглаж болохыг дүгнэхэд суралцагчдад туслахын тулд дараах болон өөрт буй бусад асуултыг ярилц.

• Сүмийн түүхээс авсан энэ жишээ танд Их Эзэний мэдлэг, чиглүүлэгч мутрын талаар юу зааж байна вэ?

• Их Эзэн амьдралын тань замыг бэлтгэж чадахыг энэ үйл явдал хэрхэн танд баталгаажуулах вэ?

• Сүнслэг өдөөлтөд хариулах нь Их Эзэний ажлыг гүйцэлдүүлэхэд хэзээ танд эсвэл таны таних хэн нэгэнд тусалсан бэ?

• Өнөөдөр таны сурч мэдсэн үнэнүүд Тэнгэрлэг Эцэг, Есүс Христ хоёртой харилцах харилцаанд тань хэрхэн нөлөөлөх вэ?

Өдөөлтийг дагах

Мормон Их Эзэн бүх зүйлийг мэддэг гэдэгт итгэж мөн бага ялтаснуудыг оруулахын тулд сүнслэг өдөөлтийг дагасны ачаар та нар энэ жил Мормоны Номоос (1 Нифай–Омнаи) эдгээр бичвэрийг судлах боломжтой болсон.

Та Нифайн нэгэн адил өөрийн ариун нандин туршлагуудыг тэмдэглэхийн тулд судлах тэмдэглэлдээ “бага ялтаснууд” гэсэн хэсэг үүсгэхийг хүсэж болно. Та Бурханы тухай юу мэддэгээ, мөн итгэдэг зүйлсээ болон Түүний ажлыг гүйцэлдүүлэхийн тулд итгэлээр ажиллахад Тэрээр танд хэрхэн туслах талаар тунгаан бодож, бичиж тэмдэглэж болох юм.

Хэрэв цаг гарвал суралцагчдыг 1 Нифай–Омнаи хүртэл санаж буй утга учиртай хэсэг эсвэл түүхээ хуваалцахыг урих талаар бодож үз. Та хичээлийн төгсгөлд өөрийн гэрчлэлийг хуваалцаж болно.

Тайлбар ба нөхцөл байдлын талаарх мэдээлэл

Би сүнслэг өдөөлтөд хариулах хүслээ хэрхэн нэмэгдүүлэх вэ?

Арван хоёр төлөөлөгчийн чуулгын ахлагч Роналд А.Расбанд ийн заасан.

Бид эхлээд сүнслэг мэдрэмждээ итгэх ёстой. Заримдаа бид сүнсний нөлөө юү эсвэл бидний өөрийн бодол уу гэж эргэцүүлэн боддог. Гэхдээ төрж буй мэдрэмж тань юу болохыг таамаглах гэж хоёр дахь, гурав дахь удаагаа оролдох нь Сүнсийг үгүйсгэн, тэнгэрлэг зөвлөгөөнд нь эргэлзэж буй хэрэг. Бүх хүнд ийм зүйл тохиолдож байсан байх.

Хэрэв бид өөрт ирдэг сүнслэг мэдрэмждээ анхаарлаа хандуулбал илчлэлтийн сүнсээр өсөн хөгжин, Сүнсээр хөтлөгдсөн бодол санаа, удирдамжийг улам их хүлээн авах болно. Их Эзэн “Сайныг үйлдэхэд хөтөлдөг тэр Сүнсэнд итгэлээ тавигтун” [Сургаал ба Гэрээ 11:12] хэмээн хэлсэн. (Роналд А.Расбанд, “Ариун Сүнс биднийг хөтлөг,” 2017 оны 4-р сарын Ерөнхий чуулган, 81–84)

Нэмэлт суралцах үйл ажиллагаа

Нифайн их, бага ялтаснууд (1 Нифай 9)

Суралцагчдад нэг нь нөгөөгөөсөө олон хуудастай хоёр сэтгүүл үзүүлэх талаар бодож үз. Бүтэн өдрийн үйл явдлуудыг нарийвчлан бичихэд хэрэгтэй зайг зөвхөн онцгой эсвэл ариун туршлагыг тэмдэглэхэд шаардлагатай зайтай харьцуулахад тэднийг урь. Үүний нэгэн адил, Нифайн их ялтаснууд хүмүүсийн өдөр тутмын, мөн шашнаас гадуур түүхийн талаар илүү бүрэн түүхийг агуулсан. Нифай бага ялтаснууд дээр цэдэглэгдсэн түүхүүдийг илүү анхааралтай сонгож, сүнслэг асуудал, бошиглогчдын сургаалд анхаарлаа хандуулсан аж.

Суралцагчдыг Мормоны үгс 1:3–6 -г уншиж байх үед 1 Нифай 9:2–4 дэх Нифайд бага ялтаснуудыг хийхийг зарлигласан Их Эзэний зарлигийг уншихад нэг суралцагчийг урих талаар бодож болно. Амьдралд тохиолдсон сүнслэг үйл явдлуудаа тусгайлан тэмдэглэх нь яагаад үнэ цэнтэй байж болох талаар суралцагчдаас асуу. Суралцагчдыг өөрсдийн “бага ялтсыг” бүтээж, хувийн ариун нандин туршлагаа тэмдэглэхийг урамшуул.

Хичээлийг эхлүүлэх өөр хувилбар

Зарим өсвөр үеийнхэн учрыг нь хараахан ойлгоогүй байж болох Их Эзэний зарлигийг эсвэл жишгүүдийг жагсаан бичихийг суралцагчдаас хүсэх талаар бодож үз. Бидний хараахан ойлгоогүй байгаа зарлигуудыг дагахыг Их Эзэн биднээс яагаад хүсэж болох талаар ярилц.