“Moзая 2:19–41: “Бүх зүйлд адислагдсан,” Мормоны Номын багшийн гарын авлага (2024)
“Мозая 2:19–41,” Мормоны Номын багшийн гарын авлага
Moзая 2:19–41
“Бүх зүйлд адислагдсан”
Та төгсгөлгүй аз жаргалыг хүлээж авахын тулд юу хийхэд бэлэн байна вэ? Хаан Бенжамин өөрийн хүмүүсийг зөв шударга амьдрал, Бурханд үнэнч байх замаар аз жаргалыг эрэлхийлэхэд урьсан. Энэ хичээл “Бурханы зарлигуудыг сахидаг тэдний адислагдсан мөн баярт байдлыг” (Мозая 2:41) эрэлхийлэхэд тусалж чадна.
Идэвхтэй суралцах орчныг бүрдүүлэх. Суралцагчдыг сургалтын үйл явцад идэвхтэй оролцуулах нь тэдэнд илүү гүнзгий суралцахад тусалж чадна. Их хэмжээний агуулгыг хуваах, суралцагчдад сурч мэдсэн зүйлдээ хариуцлагатай байх боломжийг олгохын тулд сурах өртөөнүүдийг ашигла. Суралцагчдыг өртөө хооронд явж, сонгож байх зуур хэн нэгэнд туслалцаа хэрэгтэй байж болох эсэхийг ажигла. Хичээлийн цагийг үр дүнтэй ашиглахад анхаар.
Суралцагчийн бэлтгэл: Суралцагчдыг дараах өгүүлбэрийг гүйцээж, өөрсдийн хариултыг ярилцахад бэлдэж ирэхэд урьж болно: “Жинхэнэ, мөнхийн аз жаргалыг …-аас олно”
Боломжит суралцах үйл ажиллагаа
Адислал бүрээ тоол
“Адислал бүрээ тоол” (Дуулал, ду. 125) дууллыг дуулах буюу үгийг нь унш. Эдгээр үгийн талаар мөн таны амьдралтай хэрхэн холбоотой байгаа талаар бод.
Суралцагчид өөрсдийн адислалуудын жагсаалтыг судлах тэмдэглэлдээ бие даан бичиж эсвэл самбар дээр ангиараа гаргаж болно. Тэднийг адислалуудаа жагсаан бичихдээ анзаарсан эсвэл олж мэдсэн зүйлээ хуваалцахад урь.
Хаан Бенжамин үйлчлэлийн талаар заасныхаа дараа нифайчуудыг Тэнгэрлэг Эцэгийн адислалуудыг хэрхэн эрэлхийлж, хүлээн авах талаар бодоход урьсан. Өнөөдөр суралцах явцдаа Түүний зарлигуудыг сахихыг хичээх үед Их Эзэн таныг аль хэдийн хэрхэн адисалсан байдгийг тунгаан бод.
Суралцагчдыг гурав гурваар нь бүлэг болгон хуваарил. Бүлгийн гишүүн бүрээс дараах асуултуудын аль нэгийг бүлгийнхэнтэйгээ хамт шүлгийг уншиж байхдаа тунгаан бодохыг хүс. Дараа нь тэднийг олж мэдсэн зүйлээ бүлгийнхэнтэйгээ ярилцахад урь.
Мозая 2:19–25-ыг уншаад, дараах асуултуудын аль нэгийнх нь хариултыг хайж ол.
-
Бурхан нифайчуудыг ямар ямар арга замаар адисалсан бэ? Тэдэнд байх адислалууд танд мөн байвал тэмдэглэ.
-
Биднийг зарлигуудыг нь дуулгавартай сахивал Бурхан юу хийдэг вэ? Тэрээр үүнийг хэр хурдан гүйцэтгэдэг вэ?
-
Эдгээр шүлэг Бурханы талаар танд юу заадаг вэ?
Нифайчуудад адислалуудыг танихад тусалсныхаа дараа хаан Бенжамин өөрийн хүү Мозаяг тэдний шинэ хаан болохыг зарлав. Тэрээр хүмүүс маргаан, зөрчил, бослого, Бурханы зарлигуудыг зөрчих гэх мэт олон арга замаар адислалаа алдаж болох талаар сануулсан. Мөн тэрээр эдгээр үйлдлийн мөнхийн үр дагаврыг зааж, зарлигуудыг сахидаг хүмүүст амлалт өгсөн. (Мозая 2:29–40-ийг үзнэ үү.)
Адислагдсан мөн баярт байдал
Мозая 2:41-ийг уншиж, хаан Бенжамины өгсөн амлалтыг ол.
Мозая 2:41 бол төгс эзэмших сургаалын судрын хэсэг юм. Төгс эзэмших сургаалын судрын хэсгүүдийг дараа нь амархан олохын тулд онцгойлон тэмдэглэ. Та дараагийн хичээл дээр асуултад эсвэл нөхцөл байдалд энэ хэсэгт заасан сургаалыг хэрэгжүүлэх дадлага хийх боломжтой болно.
-
Та шүлэг 41-ийг үнэний зарчимд хэрхэн нэгтгэн дүгнэх вэ?
Мозая 2:41-д хэлсэн амлалтуудын нэг нь хэрэв бид Бурханы зарлигуудыг сахивал Бурхан биднийг биеийн мөн сүнслэг байдлаар адисална. Гэсэн хэдий ч үг хэллэг бүрийг тусад нь судалснаар бид энэ шүлгээс илүү их зүйлийг сурч мэдэх болно.
Биеийн адислалууд нь бие махбодын эрүүл мэнд, хөгжил цэцэглэлт эсвэл мөнх бус амьдралтай холбоотой бусад адислалыг агуулж болно. Сүнслэг адислал бол мөнхийн зүйл юм. Үүнд бидний гэрчлэл, Бурхантай болон гэр бүлтэйгээ харилцах харилцаа, нүглийн өршөөл, Ариун Сүнснээс авах удирдамж гэх зэрэг орно.
Дараах үйл ажиллагаануудыг сурах өртөөнүүдэд хувааж болно. Суралцагчид өгсөн тараах материалыг ашиглан, үйл ажиллагааг бие даан эсвэл жижиг бүлгээр солигдон хийх боломжтой. Суралцагчдад юу хүлээж байгааг загварчлахын тулд ангиараа үйл ажиллагаа А-г хийж гүйцэтгэ.
Зарлигуудыг сахидаг тэдний адислагдсан мөн баярт байдал
Үйл ажиллагаа А: “Бурханы зарлигуудыг сахидаг тэдний адислагдсан мөн баярт байдлыг та нар тунгаагаасай. … Тэд бүх зүйлд биеийн мөн сүнсний аль алинд нь адислагдсан болой.”
Энэ хичээлийн эхэнд үүсгэсэн адислалынхаа жагсаалтыг хар. Санаандаа орж ирсэн нэмэлт адислалуудыг нэм. Илүү биеийн гэсэн адислалуудын доогуур зурж, илүү сүнслэг гэсэн адислалуудыг дугуйл. Зарим нь энэ хоёр ангилалд багтдаг гэдгийг та ойлгож болох юм.
-
Мозая 2:41-д гарч буй эдгээр үгс үнэн гэдгийг харуулах ямар нотолгоо таны амьдралд байгаа вэ?
-
Сургаал ба Гэрээ 130:20–21-ийг унш. Та зарлигуудыг сахих, Бурханы адислалуудыг хүлээн авах хоёрын хоорондох уялдаа холбооны талаар юу сурч мэдэж авсан бэ? Та эдгээр шүлгийг Мозая 2:41-тэй холбогдох эшлэл болгож эсвэл холбоос үүсгэхийг хүсэж болох юм.
-
Тэнгэрлэг Эцэг яагаад биднийг биеийн болон сүнслэг адислалаар адисалдаг хэмээн бодож байна вэ? Энэ нь Түүний талаар юу зааж байна вэ?
Үйл ажиллагаа Б: “Хэрэв тэд эцсээ хүртэл итгэлтэй байвал тэднийг диваажинд хүлээн авах бөгөөд үүгээрээ тэд Бурхантай хамт хэзээ ч төгсгөшгүй аз жаргалын төлөв байдалд оршиж болно.”
Энэ үгсийг судлах тэмдэглэлийнхээ хоосон хуудасны голд эргэн тойронд нь тэмдэглэл бичих зай үлдээж бич. Өгүүлбэрт буй, таны хувьд ач холбогдолтой үг, хэллэгийг дугуйл. Дугуйлсан үг, хэллэг бүрд тайлбар оруулж, тодорхойлолт, холбогдох судрын хэсгүүд эсвэл өөрт байгаа бусад ойлголтыг бич.
Жишээлбэл: Хэрвээ та “диваажинд хүлээн авах” гэсэн хэллэгийг дугуйлсан бол тайлбарын хэсэгт “хүлээн авах гэдэг нь хэн нэгэн намайг хүлээж байгаа гэсэн үг. Есүс биднийг диваажинд байлгах газар бэлдэж, дараа нь биднийг тэнд хүлээж авах болно хэмээн заасан (Иохан 14:2–3-ыг үзнэ үү). Хайрт Тэнгэрлэг эцэг эх минь, мөн Есүс Христ тэнд байгаа бөгөөд хэрвээ би итгэлтэй хэвээр байвал намайг хүлээж авах болно” гэх мэт зүйлийг оруулж болно.
Дугуйлсан үг эсвэл хэллэг бүрдээ тайлбарын хэсгийг бөглө. Санаандаа орж ирсэн асуулт эсвэл сэтгэгдэлд анхаарлаа хандуул.
-
Та энэ үйл ажиллагааг хийж байхдаа ямар ойлголттой болсон бэ?
-
Эдгээр ойлголт яг одоо таны амьдралд хэрхэн тус болж байна вэ?
Үйл ажиллагаа В: Ай санагтун, эдгээр зүйлүүд үнэнийг санагтун; учир нь Их Эзэн Бурхан үүнийг ярьсан юм.
-
Ямар зүйлсийг санахад амархан байдаг вэ? Ямар зүйлсийг санахад хэцүү байдаг вэ?
Та Moзая 2-ыг судалж байхдаа Бурханы талаар юу сурч мэдсэнээ сана. Мозая 2:22-ыг уншиж, Бурханы талаарх мөнхийн үнэнийг хай.
-
Түүний амлалтуудад итгэж, зарлигуудыг сахихад тань туслах Бурханы талаарх ямар зүйлийг та мэдэх вэ?
-
Түүний тухай үүнийг санахын тулд та юу хийж чадах вэ?
© 2023 by Intellectual Reserve, Inc. Бүх эрх хамгаалагдсан.
Суралцагчдыг суралцаж байхдаа мэдэрсэн мэдрэмжээ болон сурч мэдсэн зүйлсээ хуваалцахыг урьж хичээлээ дуусга. Тэднийг итгэлтэй дуулгавартай байдал, наманчлалаар дамжуулан Их Эзэний адислалуудыг эрэлхийлэхийг урамшуул.