Mosia 4

“Gjithmonë … Mbani një Heqje të Mëkateve Tuaja”

të reja që duken të gëzueshme

Si mund të ishte e ndryshme jeta jote po të ndieje një shtim të gëzimit dhe të paqes së ndërgjegjes? Nefitët, të prekur nga mësimet e mbretit Beniamin, u “mbushën me gëzim” dhe ndien “paqe të ndërgjegjes” ndërsa u penduan dhe morën një heqje të mëkateve të tyre (Mosia 4:3). Mbreti Beniamin më pas u mësoi atyre si ta mbanin këtë heqje të mëkateve të tyre. Ky mësim mund të të ndihmojë ta kuptosh atë që mund të bësh për të marrë dhe mbajtur heqjen e mëkateve të tua.

Mësimdhënia me anë të Shpirtit. Fryma e Shenjtë jep dëshmi për të vërtetën, dëshmon për Krishtin dhe i ndryshon zemrat. Vetëm nëpërmjet Frymës së Shenjtë mund ta plotësojmë synimin përfundimtar të mësimdhënies së ungjillit – të ndërtojmë besim te Jezu Krishti dhe t’i ndihmojmë të tjerët të bëhen më shumë si Ai. Kërkoni mënyra për ta ftuar Frymën e Shenjtë që të kryejë rolet e Tij.

Përgatitja e nxënësve: Ftojini nxënësit të lexojnë kapitullin te Mosia 4, duke kërkuar se si u ndikuan njerëzit nga Jezu Krishti dhe atë që mbreti Beniamin i ftoi të bënin njerëzit e tij pasi morën një heqje të mëkateve të tyre.

Veprimtari të Mundshme të të Mësuarit

Të qëndruarit të fortë shpirtërisht

Vështroje figurën vijuese dhe merr parasysh atë që i nevojitet të bëjë dikujt për ta mbajtur këtë bimë të shëndetshme dhe në rritje.

Merreni parasysh të sillni një bimë të shëndetshme në klasë ose të shfaqni figurën më poshtë.

bimë e shëndetshme

• Çfarë do t’i ndodhte kësaj bime po të mbahej në një dhomë të errët ose po të mos ujitej asnjëherë?

• Si mund të lidhet kjo me shëndetin dhe nevojat tona shpirtërore?

Ashtu si kujdesi për një bimë, mbajtja e vetes shpirtërisht të shëndetshëm kërkon përpjekje të vazhdueshme. Te Mosia 4, mbreti Beniamin i mësoi popullit të tij atë që i nevojitej të bënte për të qëndruar shpirtërisht i fortë. Ndërsa studion, përsiat mësime që do të të ndihmojnë në përpjekjet e tua për të qëndruar shpirtërisht i/e fortë gjatë gjithë jetës dhe për t’u zhvilluar që të bëhesh më shumë si Shpëtimtari.

Mbajtja e një heqjeje të mëkateve tona

Kujto se si pjesë e fjalimit të mbretit Beniamin, ai dha një mesazh që kishte marrë nga një engjëll rreth ardhjes së Jezu Krishtit dhe rëndësisë së kapërcimit të natyrës sonë të rënë nëpërmjet Shlyerjes së Shpëtimtarit (shih te Mosia 3).

Lexo te Mosia 4:1–3, duke kërkuar bekimet dhe ndjenjat që përjetoi populli i mbretit Beniamin.

• Çfarë të bie në sy nga këto vargje?

• Si mendon, çfarë mund të kishin nevojë të bënin njerëzit për të mbetur në këtë gjendje të pastër dhe të gëzueshme?

Merreni parasysh t’i ftoni nxënësit t’i mbyllin sytë dhe të përsiatin sa vijon. Pas përsiatjes, ata mund ta shënojnë përgjigjen e tyre për pyetjen në ditarët e tyre të studimit.

Imagjino si mund të kishte qenë të ishe një njeri nga populli i mbretit Beniamin në atë kohë. Sill ndër mend se si mendon se do të kishte ndikuar kjo te ndjenjat e tua rreth Jezu Krishtit dhe çfarë do të kishe dëshiruar, nga kjo përvojë, të mbaje me vete përgjithmonë.

• Çfarë ndryshimi mund të sjellë në jetën tënde po të ndieje një heqje të mëkateve të tua më shpesh?

Pjesa e mbetur e mësimeve të mbretit Beniamin te Mosia 4 na ndihmon të kuptojmë se, pasi kemi marrë falje nga Jezu Krishti, ne duhet të bëjmë përpjekje për të mbajtur një heqje të mëkateve tona.

• Cili mendon se është ndryshimi midis marrjes dhe mbajtjes së një heqjeje të mëkateve tona?

• Pse mendon se është e rëndësishme që ne të përpiqemi fort të mbajmë një heqje të mëkateve gjatë gjithë jetës sonë?

Paragrafi vijues ka për qëllim t’i ndihmojë nxënësit të përsiatin dhe të reflektojnë e të mos ia tregojnë mendimet ose ndjenjat e tyre klasës.

Merr parasysh si gjen zbatim kjo e vërtetë në jetën tënde. Sa mirë ndien se po e mban një heqje të mëkateve të tua? Ndërsa vazhdon të studiosh, kërko të vërtetat që mund të të ndihmojnë të kuptosh atë që mund të bësh për të mbajtur një heqje të mëkateve të tua.

Merreni parasysh të renditni kreun vijues në tabelë: Çfarë mund të bëjmë për të mbajtur një heqje të mëkateve tona. Nxënësit mund të renditin në tabelë atë që gjejnë ndërsa studiojnë. Një listë e ngjashme mund të bëhet në ditarët e tyre të studimit.

Lexo te Mosia 4:9–16 dhe kërko mësimet e mbretit Beniamin që na ndihmojnë të kuptojmë se si mund të mbajmë një heqje të mëkateve tona.

Si pjesë e veprimtarisë vijuese të studimit, merrni parasysh t’u lejoni nxënësve të vijnë tek tabela dhe të shkruajnë disa fraza nga Mosia 4:9–16 që ndiejnë se janë më kuptimplotat për ta. Pyetje si ato në vijim mund të përdoren më pas për t’i ndihmuar nxënësit t’i diskutojnë gjetjet e tyre nga këto vargje.

• Cilat janë të paktën tri gjëra që mbreti Beniamin dha mësim se duhet t’i bëjmë për të mbajtur një heqje të mëkateve tona, të cilat të bien më shumë në sy?

• Si mendon se do të ishte për ty po t’i zbatoje këto ftesa nga mbreti Beniamin në jetën tënde?

• Si mund të të ndihmojë bërja e këtyre gjërave që të mbash një heqje të mëkateve të tua?

Nëse e lejon koha, nxënësit mund të studiojnë theksin e mbretit Beniamin mbi kujdesin për të tjerët te Mosia 4:17–26. Disa ide gjenden nën titullin “Përgjegjësia jonë për t’u kujdesur për të tjerët” në pjesën “Veprimtari Plotësuese të të Mësuarit”.

Hapat e mi të radhës

Reflekto se sa mirë po ecën me zbatimin e mësimeve të mbretit Beniamin nga këto vargje. Mund ta bësh këtë duke u përqendruar në tri ose katër sjellje që sapo përcaktove, dhe t’i bësh vetes pyetje si:

• Sa përpjekje po bëj për këtë?

• Sa rregullisht e bëj këtë?

• Çfarë ndjenjash dhe mbresash kam ndier sot që mund të sugjerojnë fusha tek të cilat mund të përmirësohem?

Me lutje, bëj një plan specifik për t’u përmirësuar në një fushë. Sill ndër mend ndonjë pengesë me të cilën mund të përballesh ndërkohë që përpiqesh të përmirësohesh në këtë fushë dhe atë që mund të bësh për të marrë ndihmën e Zotit për t’i kapërcyer këto sfida. Mund të jetë e dobishme t’ia tregosh synimin tënd një pjesëtari të familjes ose një njeriu të dashur që mund të të përkrahë në këtë gjë. Nëse dëshiron gjithashtu mund ta përfshish këtë synim te synimet e tua në programin Fëmijët dhe Rinia.

Komente dhe Informacion për Rrethanat

Mosia 4:2. Çfarë do të thotë që njerëzit e mbretit Beniamin e “kishin parë veten … më të paktë se pluhuri i tokës”?

Njerëzit e mbretit Beniamin mund ta kenë konsideruar veten se ishin “më të paktë se pluhuri i tokës” (Mosia 4:2) ngaqë pluhuri i tokës gjithnjë u bindet urdhrave të Zotit, por fëmijët e Perëndisë shpesh nuk u binden (shih te Helamani 12:4–8). Mbani mend se Ati Qiellor i vlerëson fëmijët e Tij dhe se mëkatet tona nuk ndikojnë te vlera jonë hyjnore (shih te Doktrina e Besëlidhje 18:10).

Motra Xhoi D. Xhons, ish-Presidente e Përgjithshme e Fillores, dha mësim:

Xhoi D. Xhons

“Nëse mëkatojmë, ne jemi më pak të denjë, por nuk jemi kurrë pa vlerë! Ne vazhdojmë të pendohemi dhe të përpiqemi që të jemi si Jezusi pa na u cenuar vlera.” (Xhoi D. Xhons, “Vlerë e Pamasë”, Ensign ose Liahona, nëntor 2017, f. 14)

Çfarë roli luajnë ordinancat e ungjillit në mbajtjen prej nesh të heqjes së mëkateve tona?

Plaku Dejvid A. Bednar, i Kuorumit të Dymbëdhjetë Apostujve, dha mësim:

Plaku Dejvid A. Bednar

“Si anëtarë të Kishës së rivendosur të Zotit, ne bekohemi si nëpërmjet pastrimit tonë fillestar nga mëkati, që lidhet me pagëzimin [e]dhe me mundësinë për një pastrim të vazhdueshëm nga mëkati, të mundësuar nëpërmjet shoqërimit dhe fuqisë së Frymës së Shenjtë. …

Nganjëherë shenjtorët e ditëve të mëvonshme shprehin dëshirën që të mund të pagëzoheshin sërish – dhe në këtë mënyrë të bëhen po aq të pastër e të denjë sa në ditën në të cilën e morën ordinancën e tyre të parë shpëtuese të ungjillit. Me respekt më lejoni të sugjeroj se Ati ynë Qiellor dhe Biri i Tij i Dashur nuk kanë për qëllim që ne ta përjetojmë një ndjenjë të tillë të ripërtëritjes, rigjallërimit dhe rivendosjes shpirtërore vetëm një herë në jetën tonë. Bekimet e marrjes dhe të mbajtjes së heqjes së mëkateve tona gjithmonë nëpërmjet ordinancave të ungjillit na ndihmojnë të kuptojmë se pagëzimi është një pikë nisjeje në udhëtimin tonë shpirtëror në vdekshmëri; nuk është një vendmbërritje të cilën na merr malli ta vizitojmë përsëri herë pas here.” (Dejvid A. Bednar, “Gjithmonë Mbani një Heqje të Mëkateve Tuaja”, Ensign ose Liahona, maj 2016, f. 61, 62)

Çfarë mund të bëj për t’u kujdesur për të varfrit dhe nevojtarët?

Plaku Diter F. Uhtdorf, i Kuorumit të Dymbëdhjetë Apostujve, dha mësim:

Plaku Diter F. Uhtdorf

“Mënyra e përkujdesjes së Zotit për nevojtarët është e ndryshme nga mënyra e botës. Zoti ka thënë: ‘Por duhet të bëhet sipas mënyrës sime’ [Doktrina e Besëlidhje 104:16]. Ai nuk interesohet vetëm për nevojat tona të ngutshme; Ai shqetësohet edhe për përparimin tonë të përjetshëm. Për këtë arsye, mënyra e Zotit ka përfshirë gjithmonë mbështetjen te vetja dhe shërbimin ndaj të afërmve tanë përveç përkujdesjes ndaj të varfërve.” (Diter F. Uhtdorf, “Ndihma sipas Mënyrës së Zotit”, Ensign ose Liahona, nëntor 2011, f. 54)

Merre parasysh të kërkosh, në këndin e internetit JustServe.org, mundësi për t’u kujdesur për të varfrit dhe nevojtarët në zonën tënde.

Veprimtari Plotësuese të të Mësuarit

Krahasimi i kapitullit te Mosia 4 me kapitullin te 2 Nefi 31

Ndërsa nxënësit studiojnë kapitullin te Mosia 4, merreni parasysh t’i ftoni të vënë re marrëdhënien mes këtij kapitulli dhe mësimeve te 2 Nefi 31:17–21. Si mund ta ndihmojnë dikë mësimet e mbretit Beniamin te Mosia 4 që të ketë një kuptueshmëri më të mirë të asaj që do të thotë të durosh deri në fund përgjatë shtegut të ngushtë dhe të ngushtuar? Çfarë ngjashmërish shohin nxënësit mes mësimeve të Nefit te 2 Nefi 31:17–21 dhe mësimeve të mbretit Beniamin te Mosia 4?

Shikoni mendimet tuaja, fjalët tuaja dhe veprat tuaja (Mosia 4:30)

Shpjegoni se pasi mbreti Beniamin i mësoi popullit të tij se si të mbante një heqje të mëkateve të veta dhe të shpëtohej, ai i paralajmëroi ata për atë se çfarë mund të shkaktonte që ata të “vdisni[n]” ose të humbnin shpirtërisht dhe të ndaheshin nga Perëndia. Merreni parasysh t’i ftoni nxënësit të lexojnë te Mosia 4:29–30, duke kërkuar se si mund ta shmangim vdekjen shpirtërisht. Cila është marrëdhënia midis mendimeve, fjalëve dhe veprave tona? Çfarë mund të bëjmë që ta shikojmë veten tonë?

Përgjegjësia jonë për t’u kujdesur për të tjerët

Ndërkohë që dha mësim rreth veprimeve që duhet të ndërmarrim për të mbajtur një heqje të mëkateve tona, mbreti Beniamin theksoi se ne duhet t’u japim të tjerëve që kërkojnë ndihmën tonë. Nxënësve mund t’u kërkohet të lexojnë te Mosia 4:16–26, duke kërkuar mësimet e mbretit Beniamin rreth kujdesit për të varfrit dhe nevojtarët. Ftojini nxënësit të tregojnë për atë që u bie në sy nga këto vargje. Pyetje që mund të merrni parasysh për t’i diskutuar, përfshijnë: Si mund ta ndryshojë mbajtja mend e marrëdhënies sonë me Perëndinë mënyrën se si u përgjigjemi të tjerëve që janë në nevojë? Si mendon, pse mbreti Beniamin do t’i theksonte këto mësime në një kapitull rreth marrjes dhe mbajtjes së një heqjeje të mëkateve tona?