Mosia 5:6–15

“Merrni mbi Vete Emrin e Krishtit”

Emrat mund të kenë kuptime të mrekullueshme. Çfarë do të thotë të marrësh mbi vete emrin e Krishtit? Mosia 5 përmban përfundimin e fjalimit të mbretit Beniamin drejtuar popullit të tij kur ai e mblodhi popullin së bashku për t’i vënë një emër (shih te Mosia 1:11). Ky mësim mund të të ndihmojë të kuptosh rëndësinë e marrjes mbi vete të emrit të Jezu Krishtit.

Ndjekja e shembullit të Jezu Krishtit. Shpëtimtari dha shembullin e përsosur të mënyrës se si ne duhet të jetojmë për t’u bërë si Ai. Ndërsa i ndihmoni nxënësit të përcaktojnë fjalë, veprime dhe cilësi të Jezu Krishtit, ftojini ata të kërkojnë mënyra për ta ndjekur shembullin e Tij në jetën e tyre personale.

Përgatitja e nxënësve: Ftojini nxënësit të përsiatin pyetjen: “Çfarë do të thotë të marrësh mbi vete emrin e Krishtit?”

Veprimtari të Mundshme të të Mësuarit

Një emër i ri

Veprimtaria vijuese është një mënyrë për t’i ndihmuar nxënësit të mësojnë rreth marrjes mbi vete të emrit të Krishtit. Nëse ndonjë nxënës mund të jetë i ndjeshëm ndaj idesë së jetimëve ose birësimit, merrni parasysh një veprimtari alternative.

Imagjino një jetim që nuk ka askënd për ta ndihmuar ose për t’u kujdesur për të, i cili përfundimisht arrin të njohë një familje të dashur, të qëndrueshme, që ofrohet ta birësojë atë.

• Cilat janë disa arsye pse jetimi mund të dëshirojë ta birësojnë dhe të marrë mbiemrin e familjes së vet të re?

• Çfarë bekimesh mund t’i ofrojë nëna dhe babai i ri jetimit që ai nuk mund t’i sigurojë vetë?

• Si mund të ndihet jetimi rreth familjes së tij të re?

Në fjalimin e tij të mrekullueshëm drejtuar popullit të tij, mbreti Beniamin tha: “Unë do të doja që ju të merrni mbi vete emrin e Krishtit” (Mosia 5:8) dhe të quheni “fëmijët e Krishtit” (Mosia 5:7). Një pjesë nga populli i mbretit Beniamin ishin nefitët dhe të tjerët ishin pasardhësit e Mulekut. Mbreti Beniamin dëshironte që të gjithë njerëzit të bashkoheshin nën një emër të vetëm si në një familje.

Ndërsa i studion shkrimet e shenjta sot, përsiat mënyrat se si mund të jesh si jetimi në situatën e mësipërme dhe si mund të jetë Zoti si prindi i ri.

Merreni parasysh ta vizatoni tabelën vijuese në dërrasë. Mund t’i vini nxënësit në dyshe dhe t’i caktoni secilit nxënës njërën prej kolonave.

Bekimet e marrjes mbi vete të emrit të Shpëtimtarit	Si e marr mbi vete emrin e Shpëtimtarit

Sill ndër mend se te Mosia 5:1–5, njerëzit dëshmuan që Shpirti i Zotit kishte shkaktuar “një ndryshim të madh” tek ata dhe se ata ishin “të gatshëm të hy[nin] në një besëlidhje me Perëndinë … që të bë[nin] vullnetin e tij” (Mosia 5:2, 5).

Kërkojuni nxënësve të lexojnë me kujdes vargjet te Mosia 5:6–10 dhe të shkruajnë çdo gjë që iu duket se ka lidhje me kolonën e tyre. Pas një kohe të mjaftueshme, vërini nxënësit t’ia tregojnë njëri-tjetrit dhe përfshijini përgjigjet e tyre në tabelë. Mund të jetë e dobishme që t’ua bëni nxënësve të ditur se dora e djathtë e Perëndisë sugjeron favorizim simbolik dhe se dora e majtë simbolizon mospëlqim.

Nëse nxënësit nuk japin përgjigje natyrshëm për pyetjet vijuese, merreni parasysh t’i pyesni ata:

• Çfarë bekimesh dëshiron në jetën tënde që vetëm Shpëtimtari mund të t’i sigurojë? (Merre parasysh të përdorësh frazat që përcaktove nga fjalimi i mbretit Beniamin për t’iu përgjigjur kësaj pyetjeje.) Përse i dëshiron këto bekime?

• Si mund të jetë Shpëtimtari si një prind i dashur për ne?

  Nëse dëshironi mund të bëni pyetje për ndjekjen e ecurisë si: “Në çfarë mënyrash na bën të lirë Shpëtimtari?” “Pse është e dobishme të dimë se ‘nuk ka emër tjetër nëpërmjet të cilit të vijë shpëtimi’?”

• Sipas mbretit Beniamin, si ishin bërë njerëzit fëmijët e Krishtit, ose si e kishin marrë mbi vete emrin e Jezu Krishtit?

Si e marrim ne emrin e Krishtit

Një e vërtetë që mund të mësojmë nga mbreti Beniamin, është se, ndërsa bëjmë dhe mbajmë besëlidhje të shenjta, ne bëhemi fëmijët e Krishtit dhe e marrim mbi vete emrin e Tij.

Lexoje thënien vijuese nga Presidenti Dallin H. Ouks, i Presidencës së Parë, për të sqaruar se si ne e marrim mbi vete emrin e Shpëtimtarit.

“Duke ndjekur modelin e shkrimeve të shenjta, personat që janë pagëzuar, dëshmojnë përpara Kishës ‘se janë penduar me të vërtetë për gjithë mëkatet e tyre, dhe janë të gatshëm të marrin mbi vete emrin e Jezu Krishtit, duke patur vendosmëri për t’i shërbyer atij deri në fund’. (DeB 20:37; shih edhe te 2 Nefi 31:13; Moroni 6:3.) Kur marrim sakramentin, ne e përtërijmë këtë besëlidhje dhe të gjitha besëlidhjet e tjera që bëmë në ujërat e pagëzimit.” (Dallin H. Oaks, “Taking upon Us the Name of Jesus Christ”, Ensign, maj 1985, f. 80)

• Si të ka sjellë më pranë Shpëtimtarit bërja dhe mbajtja e besëlidhjeve?

Për të të ndihmuar të vazhdosh ta thellosh kuptueshmërinë tënde rreth marrjes së emrit të Jezu Krishtit, lexo te Mosia 5:11–13, 15, duke kërkuar më tepër këshilla nga mbreti Beniamin rreth marrjes së emrit të Jezu Krishtit mbi veten tënde.

ChurchofJesusChrist.org

Merreni parasysh të bëni pyetje për ndjekjen e ecurisë si në vijim: “Çfarë mendoni se do të thotë të kesh emrin e Krishtit të shkruar në zemrën tënde?” (Shih te Mosia 5:11–12.) “Çfarë bekimesh u vijnë atyre që e kanë emrin e Krishtit të shkruar në zemrën e tyre?” “Në ç’mënyrë marrja e emrit të Krishtit mbi vete në mendimet dhe veprimet tuaja të përditshme, ju jep shtysë për të qenë një dishepull/e më i/e mirë i/e Tij?”

Mendo për shembuj që ke parë në jetën tënde të njerëzve që e kanë marrë mbi vete emrin e Krishtit.

• Çfarë bëjnë ata që tregon se e kanë marrë mbi vete emrin e Tij?

• Çfarë roli mund të luajë sakramenti te ndihma që ne ta bëjmë më mirë këtë?

Emri i Jezu Krishtit

Për t’i ndihmuar nxënësit të vlerësojnë se sa mirë e kanë marrë emrin e Zotit në zemrën e tyre, merreni parasysh t’i ftoni ata të përsiatin në heshtje sa vijon:

• Cilat janë disa mënyra se si mund të demonstrosh që e ke marrë mbi vete emrin e Krishtit?

• Çfarë bekimesh kanë ardhur nga marrja mbi vete e emrit të Krishtit?

Merri parasysh mendimet dhe mbresat që ke marrë nga Fryma e Shenjtë teksa studiove sot. Mendo për atë që mund të bësh për ta marrë më plotësisht mbi vete emrin e Krishtit.

Inkurajojini nxënësit të veprojnë sipas asaj që ndiejnë nxitje të bëjnë. Merreni parasysh të tregoni se si ka ndikuar në jetën tuaj marrja e emrit të Krishtit mbi vete.

Komente dhe Informacion për Rrethanat

Çfarë do të thotë të marrim mbi vete emrin e Krishtit?

Në bisedën e tij “Taking upon Us the Name of Jesus Christ” [“Marrja mbi Vete e Emrit të Jezu Krishtit”] (Ensign, maj 1985, f. 80–83), Presidenti Dallin H. Ouks, i Presidencës së Parë, shpjegoi kuptime të ndryshme të marrjes së emrit të Krishtit mbi vete.

Si duhet të ndikojë te ne marrja e emrit të Tij?

Presidenti Henri B. Ajring, i Presidencës së Parë, tregoi disa gjëra që mund të bëjmë për të treguar se e kemi marrë mbi vete emrin e Shpëtimtarit.

“Ne premtojmë të marrim mbi vete emrin e Tij. Kjo do të thotë që ne duhet ta shohim veten tonë si të Tijët. Ne do ta vëmë Atë të parin në jetën tonë. Ne do të duam vërtet atë që Ai do më shumë sesa atë që ne duam apo çka bota na mëson që të duam.” (Henry B. Eyring, “That We May Be One”, Ensign, maj 1998, f. 67)

Çfarë do të thotë që të jemi të gatshëm të marrim mbi vete emrin e Jezu Krishtit?

Presidenti Henri B. Ajring, i Presidencës së Parë, dha mësim:

“Kam pyetur veten se çfarë do të thotë të jesh i gatshëm të marrësh mbi vete emrin e Jezu Krishtit.

Presidenti Dallin H. Ouks shpjegon: ‘Është domethënëse se kur ne e marrim sakramentin, ne nuk dëshmojmë se marrim mbi vete emrin e Jezu Krishtit. Ne dëshmojmë se jemi të gatshëm ta bëjmë atë. (Shih te DeB 20:77.) Fakti që ne dëshmojmë vetëm për gatishmërinë tonë sugjeron se diçka tjetër duhet të ndodhë përpara se ne të marrim faktikisht mbi vete atë emër të shenjtë në kuptimin më të rëndësishëm’ [Dallin H. Oaks, “Taking upon Us the Name of Jesus Christ”, Ensign, maj 1985, f. 81].

Deklarata se ne jemi ‘të gatshëm të marri[m] mbi vete’ emrin e Tij na tregon se ndërsa marrim fillimisht emrin e Shpëtimtarit kur pagëzohemi, marrja e emrit të Tij nuk mbaron me pagëzimin. Ne duhet të punojmë vazhdimisht për ta marrë emrin e Tij gjatë gjithë jetës sonë, përfshirë kohën kur i përtërijmë besëlidhjet në tavolinën e sakramentit dhe bëjmë besëlidhje në tempujt e shenjtë të Zotit.” (Henri B. Ajring, “Përpiquni, Përpiquni, Përpiquni”, Liahona, nëntor 2018, f. 91)

Veprimtari Plotësuese të të Mësuarit

Një fillim alternativ

Merreni parasysh t’i ftoni nxënësit të përgjigjen për pyetjet vijuese në dyshe ose në grupe të vogla:

• Pse njerëzit u vënë emrin e vet gjërave të tilla si detyrave të shkollës, fanellave sportive e kështu me radhë?

• Cilat janë disa arsye pse mbajmë veshje me emra ose logo të caktuara në to?

• Pse mund të duam që të tjerët ta dinë se jemi pjesë e grupeve ose organizatave të caktuara?

Ftojini nxënësit të përsiatin sa vijon:

• Çfarë mendon se do të thotë ta marrësh emrin e Shpëtimtarit mbi vete?

• Si është pasja e emrit të Shpëtimtarit mbi vete një bekim?

• Si ndihesh rreth faktit që të tjerët e dinë se ke marrë mbi vete emrin e Shpëtimtarit?

Nxënësit mund t’i përsiatin këto pyetje ndërsa e studiojnë këtë mësim.

Merreni mbi vete emrin e Krishtit

ChurchofJesusChrist.org

“Për t’i nxitur ata në kujtim të betimit që kishin bërë”

Kërkojuni nxënësve të lexojnë te Mosia 6:1–3, duke kërkuar atë që bëri mbreti Beniamin përpara se ta linte turmën të ikte. Bëjuni nxënësve pyetjet vijuese.

• Pse mbreti Beniamin mund të ketë dëshiruar t’i shkruante emrat e të gjithë atyre që e bënë besëlidhjen?

• Përse mbreti Beniamin caktoi priftërinj mes njerëzve?

• Çfarë mund të bëjmë që t’ia kujtojmë vetes në jetën tonë të përditshme, besëlidhjet që kemi bërë?

• Si mund ta ndihmojnë anëtarët e kuorumit ose të klasës njëri-tjetrin për t’i kujtuar besëlidhjet e tyre?