“Mosaea 11–17: ‘Salamo ma Liliu Atu i le Alii,’” Tusi Lesona a le Faiaoga o le Tusi a Mamona (2024)
“Mosaea 11–17,” Tusi Lesona a le Faiaoga o le Tusi a Mamona
Mosaea 11–17
“Salamo ma Liliu Atu i le Alii”
E masani ona tatou taumafai e lapataia tagata tatou te alolofa i ai e uiga i faaiuga e ono mafai ona aumaia ai le tiga ma puapuaga. Na auina atu e le Alii ia Apinati ma le savali mo le Tupu o Noa ma lona nuu ia salamo ma alofia ai puapuaga e ono mafai ona oo mai ona o a latou amioga agasala. O lenei lesona e mafai ona fesoasoani e faateleina ai lou manao e talia perofeta a le Alii ma galue i valaaulia latou te tuuina mai e mai le Alii.
Saunia oe lava e ala i le suesue ma le filiga o tusitusiga paia. Taumafai e suesue e le aunoa le faatatauga ma le anotusi o fuaitau o mau. Vaavaai mo aoaoga faavae ma mataupu faavae o le a anoa ma talafeauga ma o le a fesoasoani i tagata aoga e alolofa ma mulimuli ai ia Iesu Keriso.
Sauniuniga a le tagata aoga: Valaaulia tagata aoga e fai se lisi puupuu o valaaulia na latou faalogo o tuuina mai talu ai nei e perofeta. Fai atu ia i latou e o mai saunia e faasoa mai pe faapefea ona avea nei valaaulia ma faamaoniga o le alofa ma le popole o le Alii mo i latou.
Gaoioiga e Ono Mafai Ona Aoao Ai
Ua lapatai mai le Alii i mea matautia
Mafaufau e fatu se vaaiga faataitai e mafai ona fesootai i ai au tagata aoga e fesoasoani ai ia i latou e sailiili i le tele o auala eseese e mafai ona latou lapataia ai isi i mea matautia.
Manatu faapea faatoa e mauaina ni faamatalaga e uiga i setulaga matautia o loo ua i ai au uo ma e pele ia te oe.
-
O a nisi o auala eseese e mafai ona e faailoa atu ai se sāvali lapatai ia i latou?
E tele auala e lapataia ai i tatou e le Alii. Mafaufau i auala nei:
Mafaufau e faaali atu le lisi lenei i luga o le laupapa.
-
Fautuaga mai i matua
-
O faatonuga mai perofeta ma isi taitai o le Ekalesia
-
Aoaoga i tusitusiga paia, i le lotu, po o le seminare
-
Mafaufauga po o lagona mai le Agaga Paia
-
Isi:
Tuu i tagata aoga se taimi e mafaufau loloto ai i mea nei:
Mafaufau po o le a le lelei o loo e faia e aloese ai mai le agasala ma le matautia ona o le auala e te filifili e tali atu ai i lapataiga a le Alii.
-
O a auala e lagona le sili ona faigata ona talia? Aisea?
-
O le a se mea o ta’u mai ai e uiga i le Alii i Lona aapa mai ia i tatou i ni auala eseese?
Atonu e te manao e tusi le upumoni lenei i luga o le laupapa ma faamatala i le vasega o le a outou suesue loloto atili i ai i le lesona lenei: E fetalai mai le Alii ia i tatou e ala mai i Ana perofeta e valaaulia i tatou e salamo ma liliu atu ia te Ia.
Ua valaauina e le Alii ia Noa ma lona nuu e salamo
Manatua na taitai e Senifa se vaega o tagata mai Saraemila agai atu i le laueleele o Nifae. A o lei maliu Senifa, na ia faaee atu le malo i lona atalii o Noa (tagai Mosaea 9–10). O Noa ma faitaulaga sa ia filifilia na ola i ni olaga amioleaga. Sa latou faatalitonuina tagata i pepelo ma upu faa’ole’ole ia faia o agasala (tagai Mosaea 11:7, 11).
Faitau le Mosaea 11:2, 14–15, 19 ma vaavaai mo agasala na faia e Noa ma lona nuu. (O lefuaiupu 19 o loo faamatala ai lo latou tali atu ina ua uma ona puipuia i latou lava mai se osofaiga a Sa Lamana.) E mafai foi ona e matamata i le vitio “Ua Toe Faamatala e Alema le Amioleaga o le Tupu o Noa | Mosaea 11–12, 17” (2:26), o loo maua i le ChurchofJesusChrist.org.
I le faagasologa atoa o lenei lesona, vaavaai mo auala e fesoasoani ai i tagata aoga e faatatau tusitusiga paia i o tatou aso. O fesili nei o se tasi lea o auala e fai ai lenei mea.
-
O a ni auala e faatusatusa ai filifiliga ua faia e Noa ma lona nuu i filifiliga a tagata i aso nei?
-
O a nisi o taunuuga o le ola ai e pei ona latou faia?
Na valaauina e le Alii se perofeta e igoa ia Apinati e tuuina atu se savali ia Noa ma lona nuu e fesoasoani ia i latou ia iloa taunuuga o a latou amioga.
Faitau le savali a Apinati i le Mosaea 11:20–25, ma vaavaai mo taunuuga na lapatai mai ai le Alii. O le upu “oi talofa” i le fuaiupu 20 o loo momoli mai ai le faanoanoa po o le tiga.
-
O a nisi o taunuuga na e maua na lapataia ai e le Alii tagata?
Maitau ia fasifuaitau o loo tauave pea “vagana ai ua latou salamo” ma “vagana ai ua salamo lenei nuu.” Atonu e te manao e faailoga nei upu ma mafaufau e uiga i mea e mafai ona e aoaoina e uiga i le Alii mai nei fasifuaitau.
Faitau le Mosaea 11:26–29, ma vaavaai pe na faapefea ona tali atu le tupu o Noa ma isi ia Apinati.
O le vaaia atu i le salamo o se meaalofa o le alofa mai le Alii
Valaaulia tagata aoga e lipoti mai a latou sauniuniga mo le vasega ma fai se lisi i luga o le laupapa o valaaulia na tuuina mai e le Alii i o tatou aso mo i tatou ia salamo ma suia. Ia saunia e faasoa atu ni valaaulia se lua pe tolu talu ai nei mai le konafesi aoao. O le isi lea nofoaga e mafai ona e fesoasoani ai i tagata aoga e faatatau tusitusiga paia ia i latou lava.
-
O a nisi o mea talitutusa po o ni eseesega i le va o le tali atu a tagata i ona po o Apinati ma le tali atu o tagata i o tatou aso i perofeta? Faamata aisea na latou tali ai faapea?
Tuu atu i tagata aoga sina taimi e mafaufau loloto le leoa ai i a latou tautinoga patino e faalogo i le Atua, aemaise lava pe a Ia lapataia i latou e ala mai i Ana perofeta e uiga i le agasala ma ona taunuuga. Atonu e eseese manatu ma lagona o au tagata aoga e uiga i perofeta ao latou mafaufau loloto i ai. O le faamatalaga lenei e mafai ona fesoasoani i tagata aoga e vaai ai i perofeta o se faamaoniga o le alofa o le Atua.
Na faamalamalama mai e Elder D. Todd Christofferson o le Korama a Aposetolo e Toasefululua le ala tatou te ono vaai ai i le valaaulia ia salamo mai perofeta.
Ua leva ona faagaeetia a’u, ma ou lagonaina foi, le alofa naunau o perofeta a le Atua i a latou lapataiga e faasaga i le agasala. E le o faaosofia i latou e se manao ia ta’usalaina. O lo latou naunautaiga moni e faapei o le alofa o le Atua; o le mea moni, o le alofa lava lea o le Atua. Latou te alolofa ia i latou e auina i ai i latou, po o ai lava i latou ma pe o a lava foi ituaiga o tagata ua avea ai i latou. E faapei lava foi o le Alii, e le mananao Ana auauna ia mafatia se tasi i tiga o le agasala ma filifiliga lē lelei. (D. Todd Christofferson, “O Le Alofa o le Atua,” Liahona, Nov. 2021, 17)
-
E mafai faapefea e le malamalama i lenei mea e uiga i perofeta ona uunaia lou manao e faatino a latou valaaulia?
Faatasi ma le alofa mutimutivale, na tuu atu ai e le Alii i tagata se taimi e liliu atu ai ia te Ia ma salamo ia latou agasala. Peitai, ina ua toe foi mai Apinati i le lua tausaga mulimuli ane, sa latou toe feitai foi ma vaavaai e ta’usalaina o ia (tagai Mosaea 12:1, 9, 19).
Sa molimau atu ma le lototoa Apinati e faapea e lei aoaoina e faitaulaga ia tagata e usiusitai i poloaiga a le Atua (tagai Mosaea 12:33–37; 13:12–25). Sa ia molimau mai foi o le a afio mai Iesu Keriso e togiola tagata uma ma o le faaolataga e na o le Togiola lava e mafai ai (tagai Mosaea 15:1, 19). Ina ua uma ona molimau atu Apinati e uiga ia Iesu Keriso, sa toe lamatia foi lona ola. Ae o le taimi lea, sa faapena foi le ola o se tasi o faitaulaga, o Alema.
Faitau le Mosaea 17:1–4 e sue ai tali a Noa ma Alema i le molimau a Apinati ia Keriso.
-
O a ni mea e ono fesoasoani ai nei tali e matuai eseese lava ia tatou malamalama ai?
Ina ua mavae aso e tolu i le falepuipui, sa toe aumai Apinati i luma o le Tupu o Noa. Na fai mai Noa o le a ia faasalaina Apinati i le oti vagana ua naunau o ia e faafitia upumoni sa ia aoao atu (tagai Mosaea 17:5–8).
Faitau le Mosaea 17:9–10, 13, ma vaavaai mo le tali a Apinati i le manao a le tupu e faafitia lana molimau. Pe e mafai foi ona e matamata i le vitio “Ua Mafatia Apinati i le Oti ona o Lona Faatuatua | Mosaea 16–17” (4:28), o loo maua i le ChurchofJesusChrist.org.
-
O le a se mea ua e aoaoina mai le faataitaiga a Apinati?
-
E ono mafai faapefea e lena mea ona aafia ai le ala e te tali atu ai i le Alii ma Ana perofeta?
Mafaufau e faasoa atu se molimau i le matafaioi a perofeta e molimau atu ia Iesu Keriso ma valaaulia i tatou ia salamo.