Iloilo Lou Aoaoina 4

Enosa–Mosaea 17

O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina seia oo mai i le taimi nei i au suesuega o le Tusi a Mamona.

Fesoasoani ai i tagata aoga e faatino faaaliga faaletagata lava ia. Ina ia faatino faaaliga, e tatau i tagata aoga ona iloa o loo latou mauaina faaaliga. Fesoasoani i tagata aoga ia malamalama o o latou lagona faaleagaga e o faatasi ma le Agaga Paia. O le talanoaina pe faapefea ona faaaoga mataupu faavae o le talalelei, e te tuuina atu ai i le Agaga Paia se avanoa e uunaia ai tagata aoga i mea e tatau ona latou faia ia avea atili ai e faapei o Iesu Keriso.

Sauniuniga a le tagata aoga: Mafaufau e valaaulia tagata aoga e talanoa ma se matua po o se uo e uiga i mea e fai e perofeta ma pe na faapefea ona faatosinaina pe faamanuiaina i latou e perofeta.

Gaoioiga e Ono Mafai Ona Aoao Ai

O nei gaoioiga ua faamoemoe e fesoasoani ai i tagata aoga e iloilo a latou sini, o latou gafatia e faamatala ai aoaoga i le Tusi a Mamona, ma pe faapefea ona suia o latou uiga faaalia, manaoga, ma gafatia e ola ai i le talalelei.

Atonu na taulai atu lau vasega i upumoni eseese i lona suesueina o le Enosa–Mosaea 17. Afai o lea, ia lagona le faitalia e fai ni iloiloga e aoaoina ai ia upumoni eseese. Mo se fesoasoani i le fetuunaiga po o le fatuina o gaoioiga iloilo, tagai i le Aoaoga Faamasani mo Iloiloga, o loo maua i le Aoaoga Mo Mataupu Aoaoina a le Seminare i le ChurchofJesusChrist.org.

“Iloilo … ma taumafai pea”

Mai lea taimi i lea taimi, e taua le faaalu o se taimi e manatunatu ma iloilo ai pe o a mai i tatou. Na saunoa mai Elder Dale G. Renlund o le Korama a Aposetolo e Toasefululua:

O la’u valaaulia ia i tatou uma ia iloilo o tatou olaga, salamo, ma taumafai pea. … A o suia i tatou, o le a tatou iloaina e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai. (Dale G. Renlund, “Le Au Paia o Aso e Gata Ai, Taumafai Pea,” Liahona, Me 2015, 58)

E mafai e tagata aoga ona tomanatu i fesili nei. Pe a manaomia, faaaoga gaoioiga i le lesona e fesoasoani ai i tagata aoga e iloilo e le tagata lava ia ni vaega e sili atu ona patino.

• O a ni auala e te lagona o loo e tuputupu ae ai pe ua suia ona o mea o loo e aoaoina mai le Tusi a Mamona?

• O faapefea ona e alualu i luma i sini na e faatutuina?

• O le a se mea e te manao e faaauau pea ona galue ai, pe o le a aoga le filifili o se isi vaega ese e taulai i ai?

O gaoioiga nei e mafai ona fesoasoani ia te oe e fua ai lou malamalama, lou iloa, ma le alualu i luma o loo e taumafai e fai. Valaaulia le Agaga Paia e fesoasoani ia te oe ia iloa au taumafaiga ma lagona le alofa o le Tama Faalelagi.

O le faamatalaina o le matafaioi a perofeta.

O le gaoioiga lenei e mafai ona fesoasoani i tagata aoga e faataitai ai le faamatalaina o le matafaioi a perofeta. Ina ia amata, e mafai ona e valaaulia se tagata aoga e toe faamatala faapuupuu mai le tala ia Apinati.

Ina ua e suesue e uiga i le perofeta o Apinati i le Mosaea 11–17, atonu na e iloaina sa talitonu Alema o ia o se perofeta ma mulimuli i ana aoaoga ae o le Tupu o Noa ma isi faitaulaga sa teena faaaliali o ia. Atonu e te maitauina i o tatou aso o nisi tagata e taliaina perofeta ae o isi e teena i latou.

Faaaoga punaoa nei po o isi e te mauaina e saunia ai se tali puupuu e fesoasoani ai i se tasi ia malamalama po o le a le perofeta ma pe aisea e manaomia ai perofeta i aso nei. Ia aofia ai se mau se tasi pe sili atu e lagolago ai lau tali.

Mo ni ituaiga eseese, e mafai e tagata aoga ona fatu se tusiga faaagafesootai po o se vitio puupuu e mafai ona faasoa atu i le vasega. E mafai foi e tagata aoga ona galulue taitoalua e saunia a latou tali.

Atonu e te mafaufau e faaali atu punaoa ma fesili nei e fesoasoani ai i tagata aoga a o latou sauniuni. E mafai foi ona fesoasoani le fealuai solo i totonu o le potu e fesoasoani lelei ai ia i latou atonu e i ai ni fesili.

O punaoa o mau e mafai ona fesoasoani:

• Mosaea 8:13, 16–18

• Mosaea 11:20–21; 13:33; 15:11

• Saili Autu o le Talalelei mo le “O Perofeta” i le topics.ChurchofJesusChrist.org.

O fesili e mafai ona e mafaufau i ai i le fatuina o lau tali:

• O le a le perofeta, ma o a mea a perofeta e fai?

• O a fesili po o ni le malamalama atonu o loo i ai i tagata e uiga i perofeta?

• O le a se isi mea e mafai ona e faasoa atu e fesoasoani ai i isi ia malamalama i le pogai e valaauina ai e le Atua perofeta i aso nei?

Tuu atu i tagata aoga se taimi e tuuina atu ai a latou tali pe feauauai e faamalamalama le matafaioi a perofeta.

Fesoasoani e faapotopoto Isaraelu ma auauna atu i isi

O lenei gaoioiga e mafai ona fesoasoani i tagata aoga e tulitatao ai valaaulia sa latou faatinoina ma iloilo lo latou tuputupu ae ma le alualu i luma.

O se tasi o upumoni ua faaalia mai e le Atua e ala mai i Ana perofeta e faapea, o Lana galuega ma le mamalu o le fesoasoani lea i Ana fanau ia maua le ola e faavavau (tagai Mose 1:39). I le Tusi a Mamona, na ta’u mai ai e le Tupu o Peniamina o se tasi o auala e mafai ona tatou fesoasoani ai ia ausia le galuega a le Atua o le auauna atu lea i isi (tagai Mosaea 2:17). Talu ai nei lava, na aoao mai ai Peresitene Bonnie H. Cordon, o le Peresitene Aoao o Tamaitai Talavou:

O lo tatou faamoemoega faavavau o le o mai ia Keriso ma auai ma le mataalia faatasi ma Ia i Lana galuega tele. E faigofie lava e pei o le faia o mea na aoao mai e Peresitene Nelson: “Soo se taimi lava tatou te faia ai soo se mea e fesoasoani ai i soo se tasi … osia ma tausia a latou feagaiga ma le Atua, ua tatou fesoasoani e faapotopoto Isaraelu.” Ma a tatou faia Lana galuega faatasi ma Ia, o le a tatou iloa ma alolofa atili ia te Ia. (Bonnie H. Cordon, “Sau ia Keriso ae Aua le Sau Nao Oe,” Liahona, Nov. 2021, 11)

Mafaufau i sini po o fuafuaga atonu na e faia i lesona na muamua atu o loo fesoasoani ia te oe e auai ai i le galuega a le Atua e ala i le:

• Fesoasoani i le Alii i Lana galuega e faapotopoto Isaraelu (tagai Iakopo 5:71–72, 75)

• Auauna atu i isi i auala faaKeriso (tagai Mosaea 2:17)

• O le galue i se isi sini e faatatau i le talalelei o loo e galue ai nei pe e te manao e amata ona galue ai

Tuu se taimi i tagata aoga e tali mai ai fesili nei i totonu o a latou api talaaga mo suesuega. Ia nofouta i uunaiga a le Agaga pe afai e te valaaulia tagata aoga e faasoa mai ni manatu i lo latou alualu i luma faaleagaga.

• Na faapefea ona e (pe aisea foi e te manao ai) ia alualu i luma i lenei vaega? O le a se mea na e faia (pe mafai) ona e faia ua tupu ai lenei alualu i luma?

• O a nisi o mea faalavefau po o tauiviga sa e oo i ai (pe faamoemoe) e oo i ai? Na faapefea (pe e mafai) ona e taumafai e faatoilaloina?

• Na faapefea ona e lagonaina le alofa o le Tama Faalelagi a o e galue i lenei sini? Aisea e te manatu ai o le a fiafia o Ia i au taumafaiga?

Lagonaina o le fiafia ma le olioli e ala ia Iesu Keriso

O le gaoioiga lenei ua faamoemoe e fesoasoani i tagata aoga e iloilo ai le maualuga o le fiafia ma le olioli latou te oo i ai e ala ia Iesu Keriso. Ina ia uunaia manatuaga o tagata aoga, e mafai ona e mafaufau e faaali atu ata o nei tala faatusi paia.

I lau suesuega o le Tusi a Mamona, ua e faitau ai i tala o le toatele o tagata o e na maua le olioli ma le fiafia e ala ia Iesu Keriso ma Lana talalelei. Faaalu sina taimi e iloilo ai nisi o nei faataitaiga. E aofia ai [faataitaiga] nei:

• O Liae ma i latou na o mai i le laau o le ola (tagai 1 Nifae 8:10–12, 30)

• Enosa (tagai Enosa 1:1–8)

• O le nuu o le Tupu o Peniamina, o e na olioli ona o mea sa latou aoaoina e uiga ia Iesu Keriso ma Lana talalelei (tagai Mosaea 2:41; 4:3; 5:1–5)

Mafaufau pe faapefea ona e faamatalaina pe faapupula atu le fiafia e te lagonaina e ala i le talalelei a Iesu Keriso.

E mafai ona e mafaufau e amata le gaoioiga lenei o le faafanua o le mafaufau i luga o le laupapa o se vasega a o lei galulue na o tagata aoga lava latou. Faamautinoa atu i tagata aoga o o latou manatu e le faalauaiteleina ma e le manaomia ona faasoa mai.

I le ogatotonu o se itulau avanoa i lau api talaaga mo suesuega po o se isi fasipepa, tusi ai upu Olioli ma le Fiafia e ala ia Iesu Keriso. Tusi se li’o faataamilo i upu. Ia amata nei loa ona faaopoopo manatu e te faatataua i upu nei. Ina ia amata, atonu e te mafaufau pe faapefea ona e taliina fesili nei.

• Pe e te lagonaina o le talalelei a Iesu Keriso o loo saofagā i le olioli i lou olaga? Aisea pe aisea foi e leai ai?

• O le a se mea ua e aoaoina i le Tusi a Mamona ua fesoasoani ia te oe e lagona ai le fiafia sili atu?

• Pe o e lagonaina ea ua sili atu ona lelei lou sootaga ma le Tama Faalelagi ma Iesu Keriso ona o au suesuega o tusitusiga paia? Aisea pe aisea foi e leai ai?

A o e mafaufau i manatu, tusi i lalo i lau pepa ma li’o i latou. Faafesootai le tasi i le isi pe toe faasino atu i le fasifuaitau i le ogatotonu. A o e faaopoopoina nisi mafaufauga ma manatu, e mafai e lau faafanua o le mafaufau ona amata tilotilo i se mea faapenei:

Tuu atu i tagata aoga se taimi e faaauau ai ona galulue i a latou faafanua patino o le mafaufau. E mafai ona latou faaaogaina lanu eseese o penitala po o peni e faamamafa ai ni manatu anoa.

A uma ona faamaea lau faafanua o le mafaufau, mafaufau e tuu i se nofoaga o le a e vaai i ai mo le vaiaso a sau. Atonu e te manao e tatalo i le Tama Faalelagi mo se fesoasoani e saili ai ma iloa le olioli ma le fiafia sili atu ia Iesu Keriso ma Lana talalelei.

E ui e le o faamoemoe e faasoa mai e tagata aoga a latou faafanua o le mafaufau, atonu e te manao e valaaulia tagata aoga e talanoaina o latou lagona a o latou fatuina ia faafanua. Ia nofouta ma mulimuli i uunaiga a le Agaga a o mafaufau pe valaaulia tagata aoga e faasoa mai o latou manatu.