Mosaea 12–13

O Le Tusia o Poloaiga i Lou Loto

O Noa ma ana faitaulaga sa tatau ona avea ma taitai faaleagaga. Peitai, sa latou ola i le agasala ma aoao o latou tagata ia faia foi faapena. Sa aoao atu i latou e Apinati e uiga i le matafaioi a Iesu Keriso i lo latou faaolataga ma le taua o le tusia o poloaiga a le Atua i o latou loto. I le gasologa atoa o lenei lesona, o le a e aoao ai ia mulimuli atili ia Iesu Keriso a o e tusia poloaiga i lou loto.

Usiusitai ma le alofa. Na aoao mai le Faaola, “Afai tou te alofa mai ia te au, ia outou tausi mai i a’u poloaiga” (Ioane 14:15). Pe a faaosofia le usiusitai e le alofa, o le a avea ma mea masani ma anoa. Fesoasoani i tagata aoga ia iloa le sootaga taua i le va o le ola ai i le talalelei ma le alofa i le Faaola.

Sauniuniga a le tagata aoga: E mafai e tagata aoga ona fai atu i se tagata o le aiga po o se uo e faasoa mai se aafiaga i se taimi na anoa patino ai se poloaiga ia i latou.

Gaoioiga e Ono Mafai Ona Aoao Ai

E faapefea ona e faatulagaina lou usiusitai?

E mafai ona e tusia faamatalaga nei e lua i luga o le laupapa ona fai atu lea i tagata aoga e iloilo le leoa po o le a le lelei o le faamatalaina e faamatalaga i se fua faatatau o le 1–10 (10 o lona uiga e faamatalaina lelei ai i latou).

• Ou te LAGONA le taua o poloaiga a le Atua

• Ou te USITAI i poloaiga a le Atua

• Mata o le a le popolega pe afai e lagona e se tasi le taua o poloaiga a le Atua ae le usitai i ai?

• Mata o le a le popolega pe afai e usitai se tasi i poloaiga a le Atua ae le lagonaina lo latou taua?

A o e suesue i lenei lesona, manatunatu i ou lagona ma le usiusitai ai i poloaiga a le Atua.

O le usitai mai le loto

Ina ua uma ona lafoina i le falepuipui mo le molimau atu i le amioleaga o le Tupu o Noa (tagai Mosaea 12:9–17), sa aumaia Apinati i luma o Noa ma ana faitaulaga. Sa aoai e Apinati i latou ona o le faafoliga o loo malamalama ma aoao atu le afioga a le Atua ae latou te lei faaaogaina o latou loto e malamalama ai. Sa fai mai faitaulaga a Noa na latou aoao atu le tulafono a Mose, ae latou te lei tausia le tulafono a Mose pe usiusitai i Tulafono e Sefulu. Na aoao atu e Apinati ia Noa ma ana faitaulaga i le taua o le tausia o poloaiga (tagai Mosaea 12:25–37).

E mafai ona e filifili e faaaoga ni vaega po o le vitio atoa “Ua Molimau Apinati i luma o le Tupu o Noa ma Ana Faitaulaga” (4:35), o loo maua i le ChurchofJesusChrist.org, gasologa atoa o le lesona.

A o lei faitauina e tagata aoga ia fuaitau nei, e mafai ona e fai atu ia i latou e lisi mai le tele o Poloaiga e Sefulu e mafai ona latou manatuaina. A o ta’u mai e tagata aoga ia poloaiga, tusi i luga o le laupapa. Ona mafai lea ona latou faaaogaina le sailiga o mau nei e faamaea ai le lisi.

Faitau le Mosaea 12:34–36; 13:15–24 ma faailoa mai Tulafono taitasi e Sefulu. Mafaufau e faanumera i latou i totonu o au tusitusiga paia.

Faitau le Mosaea 13:11 ma vaavaai mo se tasi o mafuaaga na aoao atu ai e Apinati ia Tulafono e Sefulu ia Noa ma ana faitaulaga.

• O a upumoni e mafai ona tatou aoaoina mai lenei fuaiupu?

O se tasi o upumoni e mafai ona tatou aoao mai i lenei fuaiupu o le, o poloaiga a le Atua e manaomia ona tusia i o tatou loto.

• O le a sou manatu i le uiga o le tusia o poloaiga i o tatou loto?

• Mata e mafai e tagata ona usiusitai i se poloaiga e aunoa ma le tusiaina i o latou loto? Aisea pe aisea foi e leai ai?

• O le a sou manatu e faapefea e le tusia o poloaiga i o tatou loto ona fesoasoani ia i tatou e mulimuli ai ia Iesu Keriso?

Na aoao mai e Peresitene Bonnie L. Oscarson, o le sa avea muamua ma Peresitene Aoao o Tamaitai Talavou, ni upumoni taua e mafai ona fesoasoani tatou te malamalama ai i le uiga o le tusia o poloaiga i o tatou loto:

E manaomia ona tatou aumaia le talalelei mai i o tatou mafaufau ma tuu i totonu o o tatou loto! E mafai ona tatou ola faatemutemu i le talalelei ona ua faamoemoeina ai i tatou pe ona o se tu ma aga sa tatou ola ae ai pe ona o se masani. …

E manaomia e i tatou uma ona saili suia o tatou loto ma natura ina ia le toe i ai se manao e mulimuli i ala a le lalolagi ae ia faafiafia i le Atua. (Bonnie L. Oscarson, “O O’u Talitonu Ea?” Liahona, Me 2016, 88)

• O le a sou manatu e mafai faapefea e tagata ona aumaia le talalelei mai o latou mafaufau i totonu o o latou loto?

Mafaufau e faataitai le gaoioiga lenei e ala i le filifilia o se tasi o Tulafono e Sefulu ma galulue faasolosolo i fesili faatasi o se vasega. Mo se faataitaiga, o le poloaiga “Aua e te gaoi,” pe a tusia i le loto o se tagata, e mafai ona taitai atu ai se tagata e galue malosi ae aua le faimamago. E faapena foi, “Aua e te fasioti tagata” e mafai ona taitai atu ai se tagata e faaaloalo i isi ma taumafai e aua le tali atu ma le ita. Ona mafai lea ona e tuu atu i tagata aoga e faauma le gaoioiga taitoatasi, i ni paga, po o ni vaega toalaiti.

O isi filifiliga o le atofa atu lea o poloaiga eseese i tagata aoga ma tuu atu ia i latou e faasoa mai a latou tali i fesili o se paga, ma fesuiai paga pe a uma. Pe e mafai foi e tagata aoga ona fai se tala faatino pe faapefea amioga a se tasi pe a tusia le poloaiga i lona loto.

Filifili se lua pe tolu o Tulafono e Sefulu. Mo poloaiga taitasi, tusi se ata o se fatu ma tusi le poloaiga i luga a’e o le fatu. Ona tusi lea o tali i fesili nei i totonu o ata o fatu taitasi:

• O le a se mea e ono fai pe le faia foi e tagata pe afai na tusia lenei poloaiga i o latou loto?

• O le a se mea e mafai e tagata ona fai e fesoasoani ai i lenei poloaiga ia sili atu ona tusia atoatoa i o latou loto?

Manatuaina o Iesu Keriso

E faaopoopo atu i le le tusiaina o Tulafono e Sefulu i o latou loto, sa lei malamalama Noa ma ana faitaulaga i le faamoemoega o le tulafono a Mose.

Faitau le Mosaea 13:28–32, ma vaavaai mo le faamoemoega o le tulafono a Mose.

• O le a le mea na manao Apinati i faitaulaga a Noa ia malamalama i ai e uiga i le tulafono a Mose?

Na aoao mai Peresitene Dallin H. Oaks o le Au Peresitene Sili e uiga i le manaomia o Iesu Keriso:

O alii ma tamaitai … e mafai ona faataunuu ai mea silisili. Ae a uma lo tatou usiusitai ma galuega lelei uma, e le mafai ona faaolaina i tatou mai le oti po o aafiaga o a tatou agasala taitoatasi e aunoa ma le alofa tunoa ua tuuina mai e le togiola a Iesu Keriso. Ua faamanino mai e le Tusi a Mamona lenei mea. O loo aoao mai ai e faapea “e lē ala mai le olataga i le nao le tulafono” (Mosaea 13:28). I se isi faaupuga, e le oo mai le faaolataga i le na o le tausia ai o poloaiga. “E tusa ma le tulafono, e leai se tagata e taʼuamiotonuina” (2 Nifae 2:5) … E le mafai e le tagata ona maua lona lava faaolataga. (Dallin H. Oaks, “Another Testament of Jesus Christ,” Ensign, Mat. 1994, 67)

• E mafai faapefea ona fesoasoani poloaiga ia i tatou e manatua ai Iesu Keriso?

• O le a sou manatu e mafai faapefea e le manatuaina o Iesu Keriso ona fesoasoani i poloaiga ia tusia i o tatou loto?

Mafaufau i se poloaiga e faigata ia te oe ona tausia pe e te lagona e le o tusia i lou loto. A o e manatunatu i lenei poloaiga, e mafai ona e vaavaai i totonu o le Mo Le Malosi o le Autalavou (tamaitusi, 2022). Saili musumusuga e ala i le Agaga Paia ma tali le fesili lenei i se api talaaga mo suesuega:

Mafaufau e tata musika malū a o mafaufau loloto tagata aoga ma tali mai i le fesili lenei. E mafai ona e tuuina atu i tagata aoga se ata ’oti’oti o se fatu e mafai ona latou tusia ai i luga le tali i le fesili. Ona valaaulia lea o i latou e tuu i se mea e faamanatu ai ia i latou la latou sini. I se isi itu, e mafai ona latou tusia le fatu i a latou api talaaga, tusi ai i luga, pue se ata o le fatu i a latou telefoni, ma faaaoga le ata e fai ma a latou atataula’i [wallpaper] o le telefoni mo se vaiaso.

• O le a se mea e mafai ona e faia e mulimuli atili ai ia Iesu Keriso ma tusia atoatoa ai lenei poloaiga i lou loto?

Manatu ma Talaaga o Faamatalaga

Aisea e talafeagai ai pea Tulafono e Sefulu i aso nei?

Na aoao mai Peresitene Gordon B. Hinckley (1910–2008) e faapea o Tulafono e Sefulu (tagai Esoto 20:3–17) o se vaega taua o le talalelei a Iesu Keriso i augatupulaga uma:

[O] Tulafono e Sefulu [na] tusia e le tamatamai aao o Ieova i papa ma’a mo le faaolataga ma le saogalemu, mo le malupuipuia ma le fiafia o le fanauga a Isaraelu, ma augatupulaga uma o le a oo mai pe a mavae atu i latou. (Gordon B. Hinckley, “O o Tatou Tiutetauave Paia,” Ensign, Nov. 1991, 51)

I le vitio “O le Usiusitai i Tulafono e Sefulu” (3:10), o loo maua i le ChurchofJesusChrist.org, Ua aoao mai Elder L. Tom Perry (1922–2015) o le Korama a Aposetolo e Toasefululua e uiga i le fiafia lea e oo mai mai le tausia o Tulafono e Sefulu.

Mosaea 12:27. O le a le uiga o le faaaoga o lou loto e malamalama ai?

Na aoao mai Elder Kim B. Clark, a o avea ma se tasi o Fitugafulu:

Sa i ai i faitaulaga [a le Tupu o Noa] ia tusitusiga paia, ma sa latou iloaina e uiga i le tulafono ma perofeta, ae sa latou lei faaaogaina o latou loto e malamalama ai. O le loto o le nofoaga autu faafaatusa lea o o tatou naunautaiga, o tatou manaoga, o tatou tautinoga, o tatou tulaga faatauaina, mea tatou te faamuamua, o tatou lagona, ma a tatou molimau o le upumoni.

O le malamalama i le talalelei e sili atu nai lo se aafiaga faalemafaufau. O se aafiaga faaleagaga lea e molimau mai ai le Agaga Paia i le upumoni, faamalamalama ai o tatou mafaufau, ma suia ai o tatou loto. O le malamalama i le loto o se meaalofa a le Agaga.

Pe a manao [se tagata aoga] e faaaoga lona loto e malamalama ai i se mataupu faavae o le talalelei e pei o le faatuatua ia Iesu Keriso, e ao ona ia faaaoga lana faitalia e filifili ai Iesu Keriso ma ola ai i lena mataupu faavae. O lona aafiaga i le mataupu faavae o le faitotoa lea i lona loto. O lana faatinoga e faatagaina ai le Agaga Paia e molimau atu, faamalamalama, ma suia le ala e opogi ai e lona loto le Alii ma lena mataupu faavae. A o faaauau pea ona ia ola ai i le mataupu faavae, mafaufau i lona aafiaga, ma molimau atu i mea ua ia iloa e moni, o le a tuputupu ae lona malamalama i le faatuatua, ma o le a suia lona loto.” (Kim B. Clark, “Apply Your Hearts to Understanding” [afiafi faatasi ma se Pulega Aoao, 8 Fep., 2019], Tapeneko i le Aai o Sate Leki)

Gaoioiga Faaopoopo e Aoao Ai

Mosaea 12:27. “Tou te lei faaaogaina o outou loto tou te malamalama ai”

O se tasi auala e aoao atu ai le anotusi o lenei fuaiupu o le valaaulia lea o tagata aoga e mafaufau e uiga i auala eseese tatou te maua ai le malamalama, e pei o le suesue po o le aafiaga. Valaaulia tagata aoga e faitau le Mosaea 12:27 ma vaavaai mo mea na aoao atu e Apinati ia Noa ma ana faitaulaga e uiga i le malamalama ai i tusitusiga paia. E mafai ona e fesili i tagata aoga po o le a so latou manatu i le uiga o le fasifuaitau “faaaogaina o outou loto tou te malamalama ai.” E mafai ona fesoasoani le saunoaga a Elder Kim B. Clark i le vaega o Manatu ma Talaaga o Faamatalaga.

O le musika o le talalelei

A o avea ai o se tasi o Fitugafulu, sa faatusatusa e Elder Wilford W. Andersen le usitai i poloaiga a le Atua i taga o le siva ma le lagonaina o le olioli o le ola ai i le talalelei i le faalogoina o musika (“O le Musika o le Talalelei,” Liahona, Me 2015, 54–56). Mafaufau e faaaoga ni vaega o lana lauga po o le vitio lenei e fesoasoani ai i tagata aoga ia malamalama i le uiga o le tusia o le talalelei i o latou loto.

Ona valaaulia lea o tagata aoga e talanoaina nisi po o fesili uma nei i ni paga po o ni vaega toalaiti:  

• O le a le uiga o le lagonaina o le musika o le talalelei ia te oe? 

• Mata e faapefea ona talitutusa lenei mea ma le tusia o poloaiga i o tatou loto?

• Mata e mafai faapefea e le lagonaina o le musika o le talalelei ona suia le ala e te vaai ai i le ola ai i le talalelei?