Mosaea 14–16

Togiolaina e le Alii o Iesu Keriso

E ui ina sa saunia le Tupu o Noa e fasioti Apinati, ae sa iloa e Apinati o le a faatagaina o ia e le Atua e faataunuu le savali na auina atu o ia e momoli atu. Sa manaomia e Noa ma ana faitaulaga ona faalogo i le savali, e valaauina e le Atua perofeta uma e aoao atu o Iesu Keriso o lo tatou Togiola. O lenei lesona e mafai ona fesoasoani e te iloa ai le taua o le iloaina o Iesu Keriso e na o Ia lava e mafai ona togiolaina i tatou mai le agasala ma le oti.

Tautala, olioli, ma talai atu Keriso. Vaavaai mo upumoni e uiga ia Iesu Keriso ma valaaulia tagata aoga e faasoa mai molimau ia te Ia. O lenei mea e mafai ai e le Agaga Paia ona molioo atu se molimau o le Faaola “i loto” o tagata aoga (2 Nifae 33:1). O lenei molimau e mafai ona fesoasoani ia i latou e iloa ai Iesu Keriso o le “punavai e mafai ona latou tepa taulai i ai mo se faamagaloga o a latou agasala” ma faalolotoina ai lo latou liua ia te Ia (2 Nifae 25:26).

Sauniuniga a le tagata aoga: Valaaulia tagata aoga e mafaufau loloto po o le fea o matafaioi ma faalagiga o Iesu Keriso e sili ona anoa ia i latou ma pe aisea foi.

Gaoioiga e Ono Mafai Ona Aoao Ai

Matafaioi ma faalagiga o Iesu Keriso

O matafaioi ma faalagiga taitasi o Iesu Keriso e mafai ona i ai se uiga faapitoa ia i tatou i ni vaega faapitoa i o tatou olaga. Mo se faataitaiga, atonu tatou te fesootai lelei ia Iesu Keriso o “le Alii le Atua Malosi Aoao” (Mosaea 11:23) pe a tatou manaomia le fesoasoani lea e na o Ia lava e mafai ona tuuina mai.

Faaaoga se minute e fai ai se lisi o faalagiga o Iesu Keriso mai tusitusiga paia o loo aoao mai ai i tatou e uiga ia te Ia.

• I le tele o faalagiga o Iesu, o le fea e te manatu e ono fesoasoani le aoao atili i ai? Aisea?

Valaaulia tagata aoga e faitau le Mosaea 13:33 ma le 16:15 e faailoa mai ai nisi faalagiga o Iesu Keriso ma mea e na o Ia lava e mafai ona faia.

O Iesu Keriso, lo tatou Togiola

O le savali a Apinati i le Tupu o Noa ma faitaulaga sa faatotonugalemu ia Iesu Keriso. Sa ia aoao mai le upumoni e faapea e na o le togiola a Iesu Keriso e mafai ona faaolaina ai i tatou (tagai Mosaea 13:33; 16:15). A o e suesue i upu a Apinati, vaavaai mo mea e mafai ona e aoaoina e uiga ia Iesu Keriso mai Lana matafaioi i le avea ai ma o tatou Togiola.

Na aoao mai Elder D. Todd Christoffferson o le Korama a Aposetolo e Toasefululua:

togiola

I le tulaga o lo tatou mulimuli ai ia Keriso, tatou te saili ai e auai ma faalautele Lana galuega togiola.

O se tasi o suafa aupito sili ona taua e faamatalaina ai Iesu Keriso o le Togiola. … O le upu togiola/togisala o lona uiga o le totogi lea o se tautinoga po o se aitalafu. O le togiola e mafai foi ona faauigaina o le laveai pe faasaoloto e ala i le totogiina o se sala. Afai e faia e se tagata se mea sese ma toe faasa’o pe faia ni fetuunaiga, tatou te faapea ua ia togiolaina o ia lava. Ua fautua mai e nei uiga taitasi ni vaega eseese o le Faaolataga sili na faataunuuina e Iesu Keriso e ala i Lana Togiola, lea e aofia ai, i upu a le lomifefiloi, “ia laveai mai le agasala ma ona faasalaga, e ala i se taulaga na faia mo le tagata agasala.” (D. Todd Christofferson, “Togiola,” Liahona, Me 2013, 109)

• O le a se mea e mafai ona e aoaoina e uiga ia Iesu Keriso mai Lona faalagiga o le Togiola?

  E mafai ona e valaaulia tagata aoga e faailoga le upu togiola i le Mosaea 16:15 ma tusi se faamatalaga o lona uiga.

• O le a se taimi e te lagona ai o lenei malamalamaaga o le a sili ona aoga i lou olaga? Aisea?

E mafai e tagata aoga ona faia le suesuega lenei taitoatasi, i vaega toalaiti, pe o se vasega atoa. Mafaufau i manaoga o au tagata aoga a o e filifili pe latou te faia uma uunaiga e tolu mo suesuega, pe na o le tasi pe lua foi. Afai o loo suesue tagata aoga lava ia pe i ni vaega, atonu e aoga le faaali atu o uunaiga mo suesuega ma anotusi mo tagata aoga ina ia mafai ai e i latou ona galulue i le vave latou te mafaia. E mafai foi ona e tataina filemu ni viiga faalogologo. Afai e te fai atu i tagata aoga e faasoa mai i le vasega, o le fai atu ia i latou ao lei taitai le taimi e mafai ona fesoasoani e faaitiitia ai le popole ma e mafai ona fesoasoani ai i tagata aoga e tuu atu a latou taumafaiga silisili.

Atonu e i ai ni fesili a tagata aoga e uiga i fuaiupu latou te faitauina. Mafaufau e asiasi puupuu i tagata aoga taitoatasi e fesoasoani ia i latou ia malamalama i mau a o latou suesue.

Mafaufau i se tasi i lou olaga e te lagona o le a manuia mai le malamalama e faapea o Iesu Keriso o lo latou Togiola.

Suesue uunaiga nei ma le faamoemoe e fesoasoani ia te oe e aoao atu le tagata na e mafaufau i ai.

Suesue le uunaiga 1: O le a le mea na faia e Iesu Keriso e togiolaina ai au?

Sa talanoa Apinati e uiga ia Isaia o se faataitaiga o se tasi o perofeta e toatele o e sa molimau atu e uiga ia Keriso. Sa ia faitau i aoaoga a Isaia e faaalia ai o le a afio mai le Atua lava Ia i le lalolagi ina ia “sauaina ma faapuapuagatia” (Mosaea 13:35) e togiola i tatou mai le pa’ū ma le leiloa.

Faitau le Mosaea 14, ma vaavaai mo upu ma fasifuaitau e fesoasoani e te malamalama ai i le tau na naunau Iesu Keriso e totogi e faasaoloto ai oe mai le agasala ma le oti.

Atonu e te manao e faasoa atu faamatalaga nei i tagata aoga:

• “Sa i ona luga le aoaiga o lo tatou filemu” (fuaiupu 5): Aua o agasala uma tatou te faia, e i ai se taunuuga, e aofia ai le tausalaina, tiga, faanoanoa, ma le vavaeeseina mai le Atua. Na puapuagatia Iesu Keriso i le taunuuga mo a tatou agasala ina ia mafai ai ona tatou maua le faamagaloga ma le filemu.

• “Ma o ona faalavalava ua faamaloloina ai i tatou” (fuaiupu 5): E ala i Ona puapuaga, e mafai ai e Iesu Keriso ona faamalolo i tatou mai manu’a o a tatou agasala ma taunuuga o le Pa’ū o Atamu ma Eva, e aofia ai le oti faaleagaga ma le faaletino.

• “Sa finagalo malie le Alii e faamanu’a o ia” (fuaiupu 10): Sa fiafia le Tama Faalelagi ona sa ofoina atu ma le loto i ai e Iesu Keriso o Ia lava e fai ma taulaga mo agasala a isi (tagai 3 Nifae 11:7, 11; Ioane 3:16).

• O a upu po o fasifuaitau mai nei fuaiupu o le a e faasoa atu i le tagata na e mafaufau i ai?

Suesue le uunaiga 2: E mafai faapefea ona faamanuiaina au e ala i le Togiola a Iesu Keriso?

E mafai ona e vaai faalemafaufau pe faapei le olaga pe ana le faataunuuina e Iesu Keriso Lana matafaioi i le avea ai ma o tatou Togiola? Faaaoga sina taimi e mafaufau ai pe o le a faapei lou olaga e aunoa ma Iesu Keriso.

Faitau le Mosaea 15:19; 16:4–7, ma vaavaai mo le faamatalaga a Apinati o le olaga e aunoa ma le togiola a Keriso.

Faitau le Mosaea 15:20–25; 16:8–10 e vaai ai po o a faamanuiaga e mafai ona tatou olioli ai ona o lo tatou Togiola.

• O le a se mea e te manao ia iloa e le tagata na e mafaufau i ai e uiga ia Iesu Keriso mai nei fuaiupu?

Mafaufau e faaali le vitio “O le pogai tatou te manaomia ai se Faaola” (2:15) i le vaega o “Gaoioiga Faaopoopo e Aoao ai” o le lesona e fesoasoani ai i tagata aoga e vaai faalemafaufau i faamanuiaga e na o Iesu Keriso lava e ala mai ai.

Suesue le uunaiga 3: Aisea e ta’ua ai Iesu Keriso i nisi taimi o le Tama i tusitusiga paia?

Na aoao atu Apinati e uiga i matafaioi a Iesu Keriso o le Alo o le Atua ma o se Tama. O se tamā o se tasi e foaiina atu le ola. O Iesu Keriso e pei o se tamā ia i tatou aua e mafai ona Ia foaiina mai ia i tatou le tino ola pea ma le ola e faavavau. E le faapea la o Ia ma le Tama Faalelagi o le tagata lava e tasi. Faitau le Mosaea 15:1–9, ma vaavaai mo mafuaaga e mafai ai ona ta’ua Iesu Keriso o lo tatou Tama e Faavavau.

Atonu e fesoasoani le faitau o nei fuaiupu o se vasega. Taofi pe a uma ni fuaiupu patino e faasino atu ai upu po o fasifuaitau o le a fesoasoani i tagata aoga e maitau ma tuu atu i tagata aoga se avanoa e fai ai ni fesili.

Sa faamalamalama mai e Elder Jeffrey R. Holland o le Korama a Aposetolo e Toasefululua:

E pei ona aoao mai Apinati, o Keriso sa “fanauina o ia i le mana o le Atua” (Mosaea 15:3] ma o lea ua i ai i totonu ia te ia mana o le Tama. E faaopoopo atu i lena faiā tuusao paia , o Keriso foi e galue e pei o le Tama i lena tulaga o ia o le Foafoa o le lagi ma le lalolagi (tagai Mosaea 15:4), o le tamā o lo tatou toefanauina faaleagaga ma le faaolataga, ma e faamaoni i le faamamaluina—ma faapea ona maua ai le mana o—le finagalo o lona Tama e sili atu nai lo o mea e finagalo i ai o ia lava. (Jeffrey R. Holland, Christ and the New Covenant: The Messianic Message of the Book of Mormon [1997], 183, 84)

• O a ni itu e avea ai Iesu Keriso o se Tamā ma se Atalii?

• Aisea e ono fesoasoani ai mo le tagata na e mafaufau i ai le iloaina o lenei mea e uiga ia Iesu Keriso?

E mafai ona valaaulia tagata aoga e faasoa mai i le vasega po o vaega toalaiti mea na latou aoaoina. E mafai foi ona uunaia tagata aoga e faasoa atu le savali i le aiga po o le tagata sa latou mafaufau i ai.

Manatu ma Talaaga o Faamatalaga

Mosaea 14. O a faamanuiaga e oo mai ia te au ona sa puapuagatia Iesu Keriso?

Na aoao mai Peresitene M. Russell Ballard o le Korama a Aposetolo e Toasefululua:

The Atonement and the Value of One Soul

If we could truly understand the Atonement of the Lord Jesus Christ, we would realize how precious is one son or daughter of God.

E ui lava sa le ponā Lona soifuaga ma mamā mai agasala, ae na Ia totogia le tau tupito mo agasala—a oe, a a’u, ma tagata uma lava na soifua mai. O lona tiga i le mafaufau, lagona ma le agaga sa matua ogaoga, lea na mafua ai ona tafe mai le toto i pu ninii uma o Lona tino (tagai Luka 22:44; Mataupu Faavae ma Feagaiga 19:18). Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai—e ala i lo tatou faatuatua ia te Ia. … A aunoa ma le Togiola a le Alii, e leai ma se tasi o nei faamanuiaga e avanoa mai mo i tatou, ma e le mafai ona tatou agavaa ma saunia e toe foi e mau i le afioaga o le Atua. (M. Russell Ballard, “O le Togiola ma le Taua o le Agaga e Tasi,” Liahona, Me 2004, 84–85)

Mosaea 15. Aisea ua aofia ai i le fuafuaga a le Atua le manaomia o se Togiola?

Sa aoao mai Peresitene Dallin H. Oaks o le Au Peresitene Sili:

O Le Fuafuaga Sili

Ua a’oa’o mai Peresitene Oaks i elemene autu o le fuafuaga a le Tama Faalelagi, e aofia ai faamautinoaga e fa na te aumaia ia i tatou e fesoasoani ai ia i tatou i le olaga faaletino.

I le olaga fuafuaina faaletino, o le a tatou eleelea ai i le agasala a o tatou feagai ai ma mea faatauagai e manaomia mo lo tatou tuputupu a’e faaleagaga. O le a noatia foi i tatou i le oti faaletino. Ina ia toe faaola mai i tatou mai le oti ma le agasala, o le a saunia ai e lo tatou Tamā Faalelagi se Faaola. O Lona Toetu o le a togiola ai tagata uma mai le oti, ma o Lana taulaga togiola o le a totogi ai le tau e manaomia mo tagata uma ina ia faamamaina ai mai agasala e tusa ma tuutuuga ua faatuina e siitia ai lo tatou tuputupu a’e. O lenei Togiola a Iesu Keriso e totonugalemu i le fuafuaga a le Tama. (Dallin H. Oaks, “O Le Fuafuaga Sili,” Liahona, Me 2020, 93)

Aisea e fetalai ai Iesu Keriso mo le Tama Faalelagi?

I le 1916, na aoao mai ai e le Au Peresitene Sili ma le Korama a le Toasefululua ni upumoni se fa e uiga i le Tama ma le Alo. O se tasi o nei [upumoni] na taulai ia Iesu Keriso o loo fetalai mo le Tama “e ala i le faaeega paia o le pule” (tagai Ensign, Ape. 2002, 17). O lona uiga ua faatagaina Iesu Keriso e fai ma sui o Lona Tama i le faia o le galuega a le Atua.

Na aoao mai e Elder Bruce R. McConkie (1915–85) o le Korama a Aposetolo e Toasefululua:

O [Iesu Keriso] o le Tama e ala i le faaeega paia o le pule, o lona uiga ua faaee e le Tama-Elohima lona suafa i luga o le Alo, ua tuuina atu ia te ia lona lava mana ma le pule, ma ua ia faatagaina o ia e fetalai i le tagata muamua e faapei o ia lava o le uluai po o le Tama muamua . (Bruce R. McConkie, The Promised Messiah: The First Coming of Christ [1978], 63)

Gaoioiga Faaopoopo e Aoao Ai

“O Le Pogai Tatou te Manaomia ai se Faaola”

Afai e te lei faaaogaina talu ai nei le vitio “O Le Pogai Tatou te Manaomia ai se Faaola” (2:15), fuafua e faaali atu e fesoasoani ai i tagata aoga e vaai faalemafaufau pe o le a faapei le olaga e aunoa ma Iesu Keriso.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Viiga e faatatau ia Iesu Keriso le Togiola

Ina ia fesoasoani i tagata aoga ia lagona le upumoni o Iesu Keriso o lo latou Togiola, mafaufau e usu viiga faatasi ai ma lenei taulaiga. O faataitaiga i le tusipese faaPeretania e aofia ai le “O Loo Soifua Lo’u Faaola” (nu. 72) ma le “Ua Ou Iloa Lo’u Faaola” (nu. 73).

“Ona iloa lea e ia o lana fanau”

E mafai ona e fesoasoani i tagata aoga ia malamalama i le uiga o le avea ma fanau a Keriso. Na aoao mai Isaia o le Faaola o le a “iloa [lea] e ia o lana fanau” (tagai Isaia 53:10; Mosaea 15:10). O “Lana fanau” e faasino ia i latou o e avea ma fanau a Keriso. Valaaulia tagata aoga e faitau le Mosaea 15:10–13, ma vaavaai mo mea e fai e i latou o e avea ma fanau a Keriso. E mafai foi e tagata aoga ona vaavaai pe faapefea ona faamanuiaina le fanau a Keriso. E le gata i lea, e mafai ona e faasino atu pe na faapefea ona afio atu Iesu Keriso i le lalolagi o agaga ina ua mavae lona maliu. O iina na Ia vaai ai i Lana fanau, “se vaega lē mafaitaulia o agaga o e amiotonu, o e na faamaoni i le molimau ia Iesu aʼo soifua i latou i la le tino” (Mataupu Faavae ma Feagaiga 138:12). O i latou nei na faapotopoto uma i le parataiso, le nofoaga e o atu i ai agaga o tagata amiotonu i le taimi e oti ai.

Faaolaina e Iesu Keriso

Ina ia faamamafa atu na togiolaina i tatou e Iesu Keriso, e mafai ona e valaaulia tagata aoga e faitau ma maka pe faafia ona latou vaai i upu togiolaina, togiola, ma le togiolaina i le Mosaea 15–16. Fesoasoani ia latou iloa le mea na faia ma le naunautai e Iesu Keriso e avea ai ma o tatou Togiola.