Mosia 18

Besëlidhja e Pagëzimit

adoleshent duke u pagëzuar

Disa vendime janë aq të rëndësishme, saqë mund të ndikojnë në gjithçka tjetër në jetën tonë. Bërja e një besëlidhjeje me Perëndinë nëpërmjet ordinancës së pagëzimit është njëri prej atyre vendimeve. Alma i dha mësim popullit të tij pranë Ujërave të Mormonit për besëlidhjen që bëjmë me Perëndinë kur pagëzohemi. Ky mësim mund të të ndihmojë ta kuptosh më mirë besëlidhjen e pagëzimit dhe se si ajo mund të ndikojë në marrëdhënien tënde me Perëndinë dhe të tjerët.

Ndihma ndaj nxënësve që të zbulojnë lidhjen [me jetën e tyre]. Kur nxënësit e kuptojnë se si fjala e Perëndisë në shkrimet e shenjta lidhet me situatat dhe rrethanat e tyre, ata kanë përgjithësisht më tepër shtysë që t’i mësojnë dhe zbatojnë mësimet e ungjillit. Një mënyrë për t’i ndihmuar nxënësit ta kuptojnë lidhjen është duke u bërë atyre pyetje si “Si mund të jetë kjo ngjarje ose ky mësim i ngjashëm me përvojat tuaja?” ose “Si zbatohet kjo e vërtetë në jetën tuaj?”

Përgatitja e nxënësve: Merreni parasysh t’i ftoni nxënësit të sjellin në klasë një fotografi ose shënim në ditar nga dita e pagëzimit të tyre. Ata mund të pyetin edhe njerëz të tjerë që ishin të pranishëm për atë që mbajnë mend.

Kushdo që nuk është pagëzuar mund të vijë i/e përgatitur t’i shprehë mendimet dhe ndjenjat që ka përjetuar ndërkohë që ka qenë i/e pranishëm/me në një pagëzim ose pyetjet që mund të ketë rreth pagëzimit.

Veprimtari të Mundshme të të Mësuarit

Pagëzimi yt

Për ta filluar studimin tënd sot, mendo rreth pagëzimit tënd dhe përpiqu të kujtosh hollësi nga ajo ditë. Nëse nuk je pagëzuar ende, reflekto mbi atë që di rreth pagëzimit ose asaj që mban mend nga marrja pjesë në një pagëzim.

Nëse nxënësit sollën fotografi sikurse sugjerohet në veprimtarinë përgatitja e nxënësve, merreni parasysh t’i paraqitni ato dhe ta ftoni klasën të përpiqet të përcaktojë se të kujt janë ato. Më pas, mund të ftoni vullnetarë të tregojnë atë që mbajnë mend rreth pagëzimit të tyre. Pyetjet në vijim mund t’i ndihmojnë nxënësit t’i kujtojnë dhe diskutojnë ndjenjat e tyre rreth pagëzimit.

• Cilat janë kujtimet e tua të parapëlqyera nga ajo ditë? Si u ndjeve?

• Si ka ndikuar vendimi yt për t’u pagëzuar në marrëdhënien tënde me Perëndinë dhe njerëzit e tjerë?

Alma jep mësim fjalët e Abinadit

Abinadi duke dëshmuar përpara Noeut

Mosia 18 përmban rrëfimin e Almës, i cili dikur ishte një nga priftërinjtë e mbretit Noe, duke u dhënë mësim të tjerëve fjalët e Abinadit. Alma u detyrua të jepte mësim në fshehtësi për shkak se mbreti Noe donte ta vriste ngaqë ai e besoi dëshminë e Abinadit për Jezu Krishtin.

Lexo te Mosia 18:1–7, duke kërkuar atë që Alma i dha mësim popullit.

• Çfarë mësimi dha Alma rreth Shpëtimtarit pasi e dëgjoi dëshminë e Abinadit?

• Si mendon, përse Alma zgjodhi të jepte mësim atë që bëri në këto vargje?

Besëlidhja e pagëzimit

Pasi i dha mësim popullit rreth shëlbimit nëpërmjet Jezu Krishtit, Alma dha mësim rreth rëndësisë së pagëzimit. Nga mësimet e tij mund të mësojmë se kur pagëzohemi, ne hyjmë në një besëlidhje me Perëndinë. Teksa vazhdon t’i studiosh mësimet e Almës, përsiat mbi atë që di rreth besëlidhjes që bëjmë gjatë pagëzimit dhe e ripërtërijmë sa herë që marrim sakramentin, si edhe për çfarëdo pyetjeje që mund të kesh. Kërko me lutje ta kuptosh më mirë se si kjo besëlidhje mund të ndikojë në marrëdhënien tënde me Perëndinë dhe të tjerët.

Plaku D. Tod Kristoferson, i Kuorumit të Dymbëdhjetë Apostujve, shpjegoi se çfarë është një besëlidhje:

Plaku D. Tod Kristoferson

“Një besëlidhje është një marrëveshje ndërmjet Perëndisë dhe njeriut, një kontratë kushtet e së cilës përcaktohen nga Perëndia (shih Bible Dictionary, “Covenant”, f. 651). Në këto marrëveshje hyjnore, Perëndia e lidh Veten të na mbështetë, shenjtërojë dhe lartësojë në shpërblim të zotimit tonë për t’i shërbyer Atij dhe për t’i zbatuar urdhërimet e Tij.” (D. Tod Kristoferson, “Fuqia e Besëlidhjeve”, Liahona, maj 2009, f. 20)

Për veprimtarinë vijuese të studimit, merreni parasysh t’i ftoni nxënësit të punojnë me një partner. Vëreni një partner të kërkojë atë që premtojmë kur pagëzohemi dhe një tjetër të kërkojë bekimet që Ati Qiellor na ofron. Më pas, ftojini ata t’ia tregojnë njëri-tjetrit atë që gjetën.

Te Mosia 18:8–10, Alma përshkroi besëlidhjen e pagëzimit. Lexo te Mosia 18:8–10 dhe merre parasysh ta shenjosh atë që zotohemi të bëjmë kur pagëzohemi dhe, me një ngjyrë ose stil tjetër, t’i shenjosh bekimet që Ati Qiellor na ofron.

Mosia 18:8–10 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësinë në mësimin e ardhshëm të ushtrosh zbatimin e doktrinës që jepet mësim në këtë fragment për një pyetje ose situatë.

Merreni parasysh të krijoni dy kolona në tabelë dhe të shkruani “Ne besëlidhim të …” në krye të njërës dhe “Perëndia ofron …” në krye të tjetrës. Ftojini nxënësit të vijnë në tabelë dhe të plotësojnë atë që gjejnë nga Mosia 18:8–10.

• Çfarë mendon se do të thotë “vajtoni me ata që vajtojnë” dhe “ngushëlloni ata që kanë nevojë të ngushëllohen”? (Vargu 9.)

• Cilat janë disa mënyra se si ne mund të “qëndro[jmë] si dëshmitarë të Perëndisë në të gjitha kohërat dhe në të gjitha gjërat dhe në të gjitha vendet”? (Vargu 9.) Kë njeh ti që është një shembull i mirë për bërjen e kësaj?

• Si e ke parë Perëndinë të të bekojë ty ose të tjerët me premtimet që Ai bën me ne nëpërmjet pagëzimit?

Mbajtja e besëlidhjes sate të pagëzimit

Pjesa e mbetur e mësimit ka për qëllim t’i ndihmojë nxënësit të kuptojnë se si t’i mbajnë zotimet e pagëzimit që Alma i përshkroi te Mosia 18:8–10.

Materiali filmik vijues mund të përdoret për të dhënë shembull. Ftojini nxënësit t’i kërkojnë dhe tregojnë frazat nga vargjet 8–10 që i shohin të demonstruara në materialin filmik. (Materiali filmik është në dispozicion në ChurchofJesusChrist.org.) Nxënësit më pas mund të dalin në tabelë dhe të nënvizojnë një thënie që ata e ndiejnë se u demonstrua në materialin filmik. Më pas, mund t’i pyetni se përse e zgjodhën atë thënie.

• “Sy për të Parë” (nga kodi kohor 04:55 deri në 06:53)

Zgjidh të paktën njërin nga premtimet që bëjmë gjatë pagëzimit që Alma e dha te Mosia 18:8–10. Për shembull, ti mund të zgjedhësh frazën “mbani barrat e njëri-tjetrit” (vargu 8) ose “zbatoni urdhërimet e tij” (vargu 10).

Merreni parasysh t’i paraqitni pyetjet vijuese dhe t’u jepni nxënësve kohë të mjaftueshme për t’i përsiatur përgjigjet e tyre. Më pas, ftojini ata t’i japin përgjigjet e tyre dhe ide të tjera në grupe të vogla.

• Cilat janë disa mënyra se si një adoleshent/e mund ta mbajë atë premtim?

• Përse mendon se Ati Qiellor e përfshiu atë si pjesë të besëlidhjes sonë të pagëzimit?

• Si e ka treguar Shpëtimtari me anë të shembullit se si ta mbajmë atë premtim?

• Kur e ke mbajtur ti ose dikush që e njeh atë premtim? Çfarë ke mësuar nga ato përvoja?

Gjej ca kohë për të mbajtur shënim në ditarin tënd se si ndien se po ia del me mbajtjen e premtimeve të pagëzimit që Alma i dha te Mosia 18:8–10. Si i ke mbajtur me sukses disa prej këtyre premtimeve? Në cilat situata mund ta mbash në mënyrë më të qëllimshme njërin prej tyre? Si mendon, si do të ndikojë kjo në marrëdhënien tënde me Zotin dhe me njerëzit e tjerë nëse e bën këtë?

Komente dhe Informacion për Rrethanat

Përse është e rëndësishme që ta kuptoj besëlidhjen time të pagëzimit?

Plaku Xhozef B. Uirthlin (1917–2008), i Kuorumit të Dymbëdhjetë Apostujve, dha mësim:

Plaku Xhozef B. Uirthlin

“Gjatë jetës sime kam vënë re se, kur njerëzit arrijnë t’i kuptojnë plotësisht bekimet dhe fuqinë e besëlidhjes së tyre të pagëzimit, qoftë si të sapokthyer në besim apo anëtarë të lindur në Kishë, gëzim i madh vjen në jetën e tyre dhe ata u qasen detyrave të tyre në mbretëri me entuziazëm ngjitës.” (“Alma the Elder: A Role Model for Today”, te Heroes from the Book of Mormon [1995], f. 84)

Mosia 18:14. A e pagëzoi Alma veten?

Presidenti Jozef Filding Smith (1876–1972), shpjegoi:

Presidenti Jozef Filding Smith

“Ne mund të arrijmë në përfundimin se Alma e mbajti priftërinë përpara se ai me të tjerët, të shqetësoheshin nga mbreti Noe. Pavarësisht nëse kjo është kështu ose jo, nuk përbën asnjë ndryshim sepse në librin e Mosias është shpallur në mënyrë të qartë që ai kishte autoritet [shih te Mosia 18:13]. Nëse ai kishte autoritet të pagëzonte, kjo është prova që ai qe pagëzuar.

Prandaj, kur Alma e pagëzoi veten me Helamin, ky nuk ishte një rast ku Alma pagëzoi veten, por thjesht një shenjë para Zotit për përulësinë dhe pendimin e tij të plotë.” (Answers to Gospel Questions, përmb. Joseph Fielding Smith Jr., 5 vëll. [1957–1966], 3:203)

Si mund ta mbaj besëlidhjen time për t’u kujdesur për të tjerët?

Motra Sheron Iubank, e Presidencës së Përgjithshme të Shoqatës së Ndihmës, tha:

Motra Sheron Iubank

“Si anëtarë të pagëzuar të Kishës, ne jemi nën besëlidhje për t’u kujdesur për njerëzit nevojtarë. Përpjekjet tona individuale nuk kërkojnë medoemos para ose vendndodhje të largëta; ato vërtet kërkojnë udhërrëfimin e Shpirtit të Shenjtë dhe një zemër të gatshme për t’i thënë Zotit: ‘Ja ku jam, dërgomë mua’.” (Sheron Iubank, “Lutem që Ai do të na Përdorë”, Liahona, nëntor 2021, f. 55)

Veprimtari Plotësuese të të Mësuarit

Vende te shenjta

Pasi të lexoni përshkrimin për Ujërat e Mormonit te Mosia 18:30, kërkojuni nxënësve të reflektojnë për vendet që janë të shenjta për ta për shkak se atje “erdhën … në njohurinë e Shëlbuesit të tyre”. Mund t’u jepni atyre kohë për të mbajtur shënim kujtime në ditarët e tyre dhe t’u kërkoni vullnetarëve që të tregojnë për vende që u erdhën në mendje pa dhënë hollësi që janë tepër vetjake.

Zemërgjerësia e Perëndisë

Merreni parasysh ta përdorni këtë ide në pjesën e mësimit nën kreun “Besëlidhja e pagëzimit”. Mbani lart një objekt që nxënësit mund të jenë të interesuar ta kenë dhe pyetini ata se sa të gatshëm janë që të paguajnë për atë objekt. Pyetini ata se si do të ndiheshin kundrejt jush nëse do t’ua jepnit objektin si dhuratë nëse ranë dakord të përpiqen me të gjitha forcat për ta vlerësuar dhe përdorur atë. Teksa nxënësit studiojnë atë që Perëndia po na ofron nëpërmjet besëlidhjes së pagëzimit dhe atë që Ai kërkon prej nesh, ndihmojini ata ta kuptojnë dashurinë dhe bujarinë e Tij duke ofruar aq shumë në krahasim me atë që Ai kërkon në këmbim. (Shih edhe te Romakëve 8:16–17; Doktrina e Besëlidhje 84:38.)

Sakramenti

Merreni parasysh t’i ftoni nxënësit t’i renditin në tabelë premtimet që ripërtërijmë kur marrim sakramentin. Këto premtime gjenden te Doktrina e Besëlidhje 20:77, 79.

Më pas, pyetini ata se si mbajtja e këtyre premtimeve mund të na ndihmojë t’i mbajmë premtimet e përvijuara te Mosia 18:8–10. Për shembull, mund të bëni pyetjen: “Si mund të na ndihmojë të kujtuarit e Tij gjithmonë që të mbajmë barrët e njëri-tjetrit?” ose “Si mund të na ndihmojë marrja e emrit të Tij mbi vete që të qëndrojmë si dëshmitarët e Tij në të gjitha vendet?”

Alma i dha mësim popullit të tij se si ta përmbushnin besëlidhjen e pagëzimit

Shkruajini në tabelë referencat e shkrimeve të shenjta vijuese: Mosia 18:21; Mosia 18:18–19; Mosia 18:23, 25; Mosia 18:27–29.

Ndajini studentët në grupe me nga katër veta. Ftojeni çdo nxënës të lexojë në heshtje njërin nga fragmentet e shkrimeve të shenjta, duke menduar rreth pyetjeve vijuese. Më pas, ftojini ata t’ia raportojnë atë që mësuan grupit të tyre.

• Si ju ndihmon fragmenti ta kuptoni më mirë se si të jetoni sipas besëlidhjes që bëjmë gjatë pagëzimit?

• Si mund të ndikojë mbajtja e besëlidhjes suaj në këtë mënyrë tek të tjerët në lagjen ose degën tuaj?

• Si do t’ju ndihmojë zbatimi i këshillës në këtë fragment që ta keni Shpirtin e Zotit me vete?