Մոսիա 19–20

«Աբինադիի խոսքերն իրականանում են»

Երկնային Հայրը ցանկանում է, որ դուք երջանիկ ու անվտանգ լինեք: Ուրախություն և հոգևոր պաշտպանություն զգալու ձևերից մեկը Նրա մարգարեների ուսմունքներին և նախազգուշացումներին հետևելն է: Մերժելով Աբինադիին՝ Նոյ թագավորը և նրա ժողովուրդը զրկվեցին անվտանգության օրհնություններից և մեծ տառապանքներ կրեցին: Այս դասը կօգնի ձեզ ավելի մեծ ցանկություն զգալ՝ լսելու Տիրոջ մարգարեների նախազգուշացումները և ուսմունքները:

Օգնեք ուսանողներին հասկանալ սուրբ գրությունների համատեքստը: Համատեքստը ներառում է այն հանգամանքները, որոնք շրջապատում են կամ տալիս են սուրբ գրությունների հատվածների, իրադարձությունների կամ պատմությունների նախապատմությունը: Այդ համատեքստն օգնում է մեզ հասկանալ սուրբ գրությունների հերոսների աշխարհը: Սուրբ գրությունների պատմությունների համատեքստի ըմբռնումը կարող է օգնել ուսանողներին բացահայտել վարդապետությունն ու սկզբունքները և սուրբ գրություններում գրվածը նմանեցնել իրենց:

Ուսանողի նախապատրաստում. ուսանողներին առաջարկեք մտածել սուրբ գրություններից կամ իրենց կյանքից մի օրինակի մասին, որը հաստատում է հետևյալ խոսքերը: Խրախուսեք նրանց հաջորդ դասի համար պատրաստվել՝ կիսվելու իրենց օրինակով:

«Պատմությունը ցույց է տվել, որ մենք գտնում ենք անվտանգություն, խաղաղություն, բարեկեցություն և երջանկություն, երբ արձագանքում ենք մարգարեական խորհրդին» (Մ. Ռասսել Բալլարդ, «Նրա խոսքը դուք պետք է ընդունեք», Ensign, մայիս 2001թ., 65):

Հնարավոր ուսումնական վարժություններ

Պաշտպանություն վտանգից

Կարող եք կա՛մ ստորև ներկայացվող նկարները ցուցադրել, կա՛մ անվտանգության ապահովման համար օգտագործվող տարբեր առարկաներ բերել դասարան: Կարող եք նաև խնդրել ուսանողներին, որպեսզի կիսվեն տարբեր իրերի կամ կանոնների օրինակներով, որոնք նրանք օգտագործում են ամեն օր անվտանգ լինելու համար:

• Այդ առարկաներն ի՞նչ վտանգից են պաշտպանում մեզ:

• Ըստ ձեզ՝ որոշ մարդիկ ինչո՞ւ են որոշում անտեսել անվտանգության սարքավորումները կամ ուղեցույցները:

Նախորդ նկարների կողքին կարող եք ժամանակակից մարգարեի նկար ցուցադրել:

Ֆիզիկական վտանգներից բացի՝ հոգևոր վտանգները նույնպես մեր մահկանացու փորձառության մասն են կազմում: Քանի որ Տերը սիրում է մեզ, Նա կոչ է անում մարգարեներին մեզ ուղղորդումներ և գործիքներ տալ, որոնք կարող են օգնել մեզ ֆիզիկական, հոգևոր և հուզական անվտանգություն զգալ մեր կյանքի ընթացքում:

Մի պահ մտածեք, թե ինչ անվտանգություն է Տերն առաջարկում ձեզ Իր մարգարեների ու առաքյալների միջոցով: Հետևյալ հարցերը կարող են օգնել․

Ուսանողների համար օգտակար կլինի իրենց պատասխանները գրի առնել սուրբ գրությունների ուսումնասիրության օրագրերում:

• Որքա՞ն հաճախ եք դիմում Տիրոջ մարգարեներին ու առաքյալներին՝ որպես Նրա հոգևոր պաշտպանությունը ստանալու միջոց:

• Ի՞նչ օրինակներ կան այն մասին, թե ինչպես է Տիրոջ մարգարեներին հետևելն օրհնում ձեզ:

Ուսումնասիրելու ընթացքում փնտրեք ուսմունքներ, որոնք կարող են օգնել ձեզ ավելի մեծ ցանկությամբ փնտրել այն անվտանգությունն ու երջանկությունը, որոնք գալիս են Տիրոջ մարգարեին հետևելուց:

Նոյ թագավորի ժողովուրդը զգում է իր մեղքերի հետևանքները

Հիշեք, որ Աբինադին ուղարկվել էր նախազգուշացնելու Նոյ թագավորի ժողովրդին նրանց ամբարշտության մասին, որպեսզի նրանք կարողանան խուսափել Տիրոջ դատաստանից: (Օգտակար կլինի կարդալ Աբինադիի նախազգուշացումներից մի քանիսը Մոսիա 11.20–25, 12.1–8 հատվածներում:)

Վերհիշեք, թե Նոյ թագավորն ու նրա ժողովուրդն ինչպես արձագանքեցին Աբինադիի նախազգուշացումներին՝ կարդալով Մոսիա 12.13–15, 17.11–20 հատվածները:

• Ըստ ձեզ՝ Նոյն ու նրա քահանաներն ինչո՞ւ անտեսեցին Աբինադիի նախազգուշացումները:

• Ի՞նչ օրինակներ գիտեք այն մասին, թե մեր օրերում մարդիկ ինչպես են անտեսում կամ մերժում մարգարեների ուսմունքները: Ձեր կարծիքով, ինչո՞ւ են նրանք անում դա։

Ինչպես Աբինադին մարգարեացել էր (տես Մոսիա 17.15–19), Տիրոջ խոսքը և ապաշխարության հրավերը մերժելուց հետո Նոյի ժողովուրդը դժվարին փորձությունների ենթարկվեց: Մոսիա 7 գլխի ուսումնասիրությունից գուցե կհիշեք, որ Աբինադիի մահից կարճ ժամանակ անց Զարահեմլայից եկող որոնողների խումբը, որոնց ղեկավարը Ամմոն անունով մի մարդ էր, հայտնաբերեց այս ժողովրդին: Նրանց հայտնաբերելու ժամանակ Նեփիի երկրում նեփիացիները գերի էին լամանացիներին:

Նրանց առաջնորդը Լիմքին էր՝ Նոյ թագավորի որդին: Մոսիա 7.24–29 հատվածում կարդացեք Լիմքիի խոսքերը և փնտրեք, թե նա ինչն էր համարում իրենց գերության պատճառը:

• Ի՞նչ նկատեցիք այդ հատվածներում, որը կարող է օգնել մեկին, ով կարևոր չի համարում Տիրոջ մարգարեներին հետևելը:

Կարող եք հետևյալ անավարտ նախադասությունը գրել գրատախտակին: Ուսանողներին ժամանակ տվեք մտածելու դրա մասին, ապա մի քանի ուսանողի առաջարկեք կիսվել, թե ինչպես կավարտեին նախադասությունը:

Մարգարեների միջոցով փոխանցված Տիրոջ խոսքերն անտեսելը կամ մերժելը բերում է …

Ուսանողներին կարելի է բաժանել խմբերի և առաջարկել ուսումնասիրել հետևյալ հատվածների խմբերից մեկը. (1) Մոսիա 19.3–8, (2) Մոսիա 19.9–15, (3) Մոսիա 19.16–21, 20.3, 21: Առաջարկեք նրանց փնտրել մանրամասներ, որոնք ներկայացնում են հետևյալ ճշմարտությունը. Մարգարեների միջոցով փոխանցված Տիրոջ խոսքերն անտեսելը կամ մերժելը բերում է տառապանք և վիշտ:

• Այդ հատվածներում հիշատակված անձանց տառապանքի կամ վշտի ի՞նչ ապացույցներ նկատեցիք:

• Ի՞նչ սովորեցիք Տիրոջ մասին՝ այդ մարդկանց կրած տառապանքը տեսնելուց հետո, նաև իմանալով, որ Տերը մարգարե էր ուղարկել նրանց նախազգուշացնելու:

Տասներկու Առաքյալների Քվորումից նախագահ Մ. Ռասսել Բալլարդը խոսել է մի քանի օրհնությունների մասին, որոնք կարող ենք ստանալ, երբ ականջ դնենք Տիրոջ խորհրդին, որը նա մեզ է ուղարկում Իր մարգարեների միջոցով.

Պատմությունը ցույց է տվել, որ անվտանգություն, խաղաղություն, բարեկեցություն և երջանկություն ենք գտնում, երբ արձագանքում ենք մարգարեական խորհրդին: (Մ. Ռասսել Բալլարդ, «Նրա խոսքը դուք պետք է ընդունեք», Ensign, մայիս 2001թ., 65)

• Ձեր կյանքից կամ սուրբ գրություններից ի՞նչ մի քանի օրինակներ կբերեք, որոնք հաստատում են նախագահ Բալլարդի խոսքերը:

Տիրոջ խորհուրդը ձեզ

Ինչպես հնագույն ժամանակներում, այնպես էլ այսօր մարգարեները մեզ են փոխանցում Տիրոջ խորհուրդը, նախազգուշացումները և խոստացված օրհնությունները: Այդ խորհուրդը կարող ենք գտնել, օրինակ, այստեղ՝ Երիտասարդներին զորացնելու համար (գրքույկ, 2022թ.):

Կարող եք ուսանողներին փոքր խմբերի բաժանել և յուրաքանչյուր խմբի հանձնարարել ուսումնասիրել Երիտասարդներին զորացնելու համար գրքույկի (2022) թեմաներից մեկը կամ մի քանիսը: Կարող եք գրքույկի մի քանի օրինակ բերել դասարան, որպեսզի ուսանողներն օգտվեն դրանցից: Ուսանողներին առաջարկեք փնտրել հետևյալը.

1. Չափանիշներ, որոնցով Տերն առաջարկում է ձեզ ապրել

2. Տիրոջ խորհուրդն անտեսելու հնարավոր հոգևոր վտանգները

3. Խոստացված օրհնությունները՝ Տիրոջ հրահանգներին և նախազգուշացումներին ականջ դնելու համար

Երբ ուսանողներն ավարտեն, նրանց առաջարկեք կիսվել, թե ինչ են գտել նախորդ երեք կետերի վերաբերյալ:

• Այդ ուսմունքներին հետևելով՝ ինչպե՞ս կօգնեք ձեզ ավելի լավ հետևել Հիսուս Քրիստոսին:

Մտածեք, թե ինչ սովորեցիք այսօր Տիրոջ մարգարեին հետևելու կարևորության մասին: Մտածեք, թե ինչպես կարող եք ավելի լավ հետևել մարգարեին, և ձեզ համար ինչու է կարևոր այդպես անելը: Ձեր մտքերն ու հոգևոր տպավորությունները գրանցեք ձեր ուսումնասիրությունների օրագրում:

Բացատրական և պատմական տեղեկություններ

Մարգարեական նախազգուշացումներն ի՞նչ են ուսուցանում ինձ Աստծո մասին:

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Երկար տարիներ ինձ վրա մեծ տպավորություն է գործել և նաև զգացել եմ մարգարեների մեծ սերը, երբ նրանք նախազգուշացրել են մեղքի մասին։ Նրանք չեն ցանկանում մեղադրել։ Նրանց իրական ցանկությունն արտացոլում է Աստծո սերը, իրականում դա է Աստծո սերը: Նրանք սիրում են նրանց, ում մոտ իրենց ուղարկում են՝ ով և ինչպիսին էլ նրանք լինեն։ Ինչպես Տերը, Նրա ծառաները ևս չեն ցանկանում, որ որևէ մեկը տառապի մեղքի և սխալ ընտրությունների պատճառով: (Դ. Թոդ Քրիստոֆերսոն, «Աստծո սերը», Լիահոնա, նոյեմբեր 2021թ., 17)

Ինչո՞ւ որոշ մարդիկ միանգամից չեն զգում մարգարեին անտեսելու բացասական հետևանքները:

Առաջին Նախագահությունից նախագահ Հենրի Բ. Այրինգն ուսուցանել է.

Աստված մահկանացու ծառաներ է ուղարկել, որոնք Սուրբ Հոգու օգնությամբ կարող են մեզ օգնել հասկանալ, թե Նա ինչ է ցանկանում, որ մենք անենք, և ինչն է Նա արգելում։ Աստված ճիշտն ընտրելու որոշումը գրավիչ է դարձնում մեզ համար՝ հնարավորություն տալով մեզ զգալ մեր որոշումների հետևանքները։ Եթե մենք ընտրում ենք ճիշտը, մենք ժամանակին գտնում ենք երջանկություն։ Եթե մենք ընտրում ենք չարը, դրան ի վերջո հետևում է վիշտն ու ափսոսանքը։ Այդ հետևանքները անխուսափելի են։ Այնուամենայնիվ, դրանք հաճախ ուշանում են՝ նպատակով։ Եթե օրհնություններն անմիջապես տրվեին, ճիշտն ընտրելը հավատք չէր ձևավորի։ Եվ քանի որ վիշտը նույնպես երբեմն շատ է ուշանում, ապա հավատք է պահանջվում ավելի շուտ մեղքի ներում փնտրել, քան այն բանից հետո, երբ մենք զգում ենք դրանց վշտագին և ցավագին հետևանքները։ (Հենրի Բ․ Այրինգ, «Հույսի անգին ժառանգություն», Liahona, մայիս 2014թ., 24–25):

Օժանդակ ուսումնական վարժություններ

Հետևեք մարգարեին

Դասը սկսելու համար կարող եք երգել մի հիմն կամ Երեխաների միության երգը մարգարեների մասին: Դասարանին առաջարկեք երգի խոսքերից առանձնացնել մարգարեներին հետևելու հետ կապված սկզբունքները: Ուսանողներին խրախուսեք փնտրել այդ սկզբունքների ապացույցներ, երբ ուսումնասիրեն, թե Նոյ թագավորի և նրա ժողովրդի համար ինչ հետևանքներ ունեցավ Աբինադիի մարգարեական խորհուրդի մերժումը:

Կառուցեք ամուր հիմք Հիսուս Քրիստոսի ուսմունքների վրա

Ավետարանի սկզբունքները չեն փոխվում: Հնագույն սուրբ գրքերից սկզբունքներ օգտագործելուց և դրանք մեր օրերում կիրառելուց բացի՝ մենք կարող ենք օգտագործել ժամանակակից մարգարեական ուսմունքները և կիրառել դրանք սուրբ գրությունների պատմություններում: Ուսանողներին առաջարկեք մտածել, թե «Ընտանիք. հայտարարություն աշխարհին» (ChurchofJesusChrist.org) նյութի 6–8 պարաբերություններն ինչպես կարող են կիրառվել Մոսիա 19.6–24, 20.3 հատվածների ընտանեկան իրավիճակներում:

Կարող եք ցուցադրել նաև «Դավաճանությունից հետո ներումը գործընթաց է» տեսանյութը (5:21): Ուսանողներին առաջարկեք փնտրել, թե այս տեսանյութն ինչպես կարող է կիրառվել այն ընտանիքների համար, որոնց հայրերը վերադարձան՝ Նոյ թագավորի հետ միասին հեռանալուց հետո:

Անարդար մարդկանց հետևելը կարող է դրդել մեզ կայացնելու որոշումներ, որոնց համար ափսոսալու ենք

Ուսանողներին առաջարկեք կարդալ Մոսիա 19.18–21 հատվածները և փնտրել, թե ինչ տեղի ունեցավ Նոյ թագավորի և նրա հետևորդների հետ: Հրավիրեք ուսանողներին զեկուցել իրենց գտածի մասին:

Մտածեք, թե ինչ կարող եք անել, որպեսզի օգնեք ուսանողներին գնահատել՝ արդյոք իրենց կյանքում կան ազդեցություններ, որոնք կարող են հանգեցնել այնպիսի որոշումների, որոնց համար հետագայում զղջալու են:

Առնչվող տեսանյութ

Որպեսզի օգնեք ուսանողներին ճանաչել անվտանգությունը, որը գալիս է Նրա մարգարեների միջոցով Տիրոջ ուսմունքներին հետևելուց,կարող եք ցուցադրել «Ապահով խարիսխ» տեսանյութը (3:36):