Վարդապետության սերտում. Մոսիա 18.8–10

«Դուք մտել եք Նրա հետ ուխտի մեջ»

Նախորդ դասին դուք սովորեցիք, թե Փրկչի հետ մեր մկրտության ուխտն ինչպես կարող է ազդել մեր ապրելակերպի վրա: Այս դասը կարող է օգնել ձեզ մտապահել Մոսիա 18.8–10 հատվածների հղումն ու սուրբ գրության հիմնական արտահայտությունը, բացատրել այս հատվածներում ուսուցանվող վարդապետությունը և այս հատվածի օգնությամբ իրատեսական իրավիճակներում կիրառել հոգևոր գիտելիքներ ձեռք բերելու սկզբունքները:

Ուսանողներին ուսուցանեք հոգևոր գիտելիքներ ձեռք բերելու սկզբունքները Ուսանողներն ավելի լավ կյուրացնեն վարդապետության սերտման նպատակները, եթե իմանան և հասկանան հոգևոր գիտելիքներ ձեռք բերելու սկզբունքները: Անպայման օգնեք ուսանողներին հասկանալ այդ սկզբունքները և պարբերաբար վերանայել դրանք:

Ուսանողի նախապատրաստում. կարող եք ուսանողներին առաջարկել փորձել մտապահել Մոսիա 18.8–10 հատվածի սուրբ գրության հղումն ու հիմնական արտահայտությունը:

Հնարավոր ուսումնական վարժություն

Վարդապետության սերտման հատվածի այս դասը նախատեսված է անցկացնել «Մոսիա 18» դասից հետո, որը հանդիսանում է համատեքստային դաս վարդապետության սերտման Մոսիա 18.8–10 հատվածի ուսումնասիրման համար: Եթե վարդապետության սերտման այս դասն անհրաժեշտ է տեղափոխել մեկ այլ շաբաթ, համոզվեք, որ այդ շաբաթ կուսուցանվի նաև համապատասխան համատեքստային դասը:

Մտապահեք և բացատրեք

Օգտագործեք որևէ արդյունավետ միջոց, որով ուսանողներին կօգնեք մտապահել Մոսիա 18.8–10 հատվածի հղումն ու սուրբ գրության հիմնական արտահայտությունը և կբացատրեք այդ հատվածում գտած ճշմարտությունները: Ստորև ներկայացվող վարժությունները դա անելու առաջարկներ են:

Դասը սկսելուց առաջ Մոսիա 18.8–10 սուրբ գրության հիմնական արտահայտության բառերը խառը հերթականությամբ գրեք գրատախտակին: Ուսանողներին խնդրեք իրենց օրագրերում գրել արտահայտությունը ճիշտ հերթականությամբ, ապա որևէ կամավորի խնդրեք գրատախտակին գրել ճիշտ տարբերակը և սուրբ գրության հղումը: Անհրաժեշտության դեպքում խնդրեք դասարանին օգնել:

Մոսիա 18.8–10 հատվածի սուրբ գրության հիմնական արտահայտությունն է՝ «Մկրտվեք Տիրոջ անունով՝ որպես մի վկայություն …, որ դուք մտել եք նրա հետ ուխտի մեջ»:

Մեկ այլ տարբերակ է՝ գրել սուրբ գրության հիմնական արտահայտության մասերը առանձին թղթերի վրա և դրանք խառը հերթականությամբ փակցնել գրատախտակին: Հետո ուսանողները կարող են գալ գրատախտակի մոտ և թղթերը ճիշտ հերթականությամբ վերադասավորել:

Դասավորեք Մոսիա 18.8–10 հատվածի սուրբ գրության հղումը և հիմնական արտահայտությունը՝ ճիշտ հերթականությամբ գրելով այն ձեր օրագրում: Անհրաժեշտության դեպքում ստուգեք ճշտությունը՝ օգտվելով վարդապետության սերտման հղումների և սուրբ գրությունների հիմնական արտահայտությունների ցանկից, որը ներկայացված է Վարդապետության սերտման հիմնական փաստաթղթի (2022) վերջում:

Երբ ավարտեք ճիշտ արտահայտությունը, փորձեք մտապահել սուրբ գրության հղումը և հիմնական արտահայտությունը՝ մի քանի անգամ կրկնելով այն:

Նախորդ դասին դուք սովորեցիք, որ երբ մենք մկրտվում ենք, մենք Աստծո հետ մտնում ենք ուխտի մեջ, որ ծառայելու ենք Նրան և պահելու ենք Նրա պատվիրանները: Պատկերացրեք, որ ձեզ խնդրել են ութ տարեկան երեխայի մկրտության ծառայության ժամանակ խոսել նրա ուխտի մասին: Գրեք, թե Մոսիա 18.8–10 հատվածն ինչպես կարող է օգնել ձեզ բացատրել ուխտը, և ուխտը պահելն ինչպես կօգնի այդ երեխային ավելի նմանվել Հիսուս Քրիստոսին:

Երբ ուսանողներն ավարտեն գրելը, առաջարկեք նրանց դասընկերոջ հետ կիսվել գրածով: Ապա մի քանի ցանկացողների առաջարկեք դասարանի հետ կիսվել, թե ինչ սովորեցին կամ ինչ վկայություն ունեն մկրտության ուխտի մասին:

Գործնական կիրառում

Կարող եք հոգևոր գիտելիքներ ձեռք բերելու սկզբունքները գրել գրատախտակին: Դրանք կարելի է գտնել «Ձեռք բերել հոգևոր գիտելիքներ» բաժնի 5-12 պարբերություններում՝ Վարդապետության սերտման հիմնարար փաստաթղթում (2022): Որպեսզի օգնեք ուսանողներին վերանայել այդ սկզբունքները, առաջարկեք նրանց գալ գրատախտակի մոտ և վերնագրերի տակ գրել այն ամենը, ինչ կհիշեն յուրաքանչյուր սկզբունքի մասին:

Հետո ուսանողներին ցուցադրեք հետևյալ սցենարը կամ տրամադրեք դրա տպագիր օրինակը՝ դասի մնացած հատվածում ձեռքի տակ ունենալու համար: Սցենարը կարող եք հարմարեցնել ուսանողների կարիքներին կամ ուսանողներին խնդրել կազմել մկրտության ուխտը պահելու մասին իրենց սեփական սցենարը:

Աննան նկատել է, որ Պաուլան՝ եկեղեցու իր դասարանցի աղջիկը, դժվարանում է երջանիկ լինել կամ ընկերներ գտնել: Աննան լսել է, որ Պաուլան երբեմն նախընտրում է չհաճախել երիտասարդական միջոցառումներին կամ եկեղեցու հավաքներին, քանի որ զգում է, որ մյուս աղջիկների հետ ընդհանրություններ չունի: Աննան ցանկանում է օգնել Պաուլային, որ նա ավելի ընդունված զգա իրեն, բայց երբեք չի խոսել Պաուլայի հետ և անհանգստանում է, որ գուցե դժվար կամ անհարմար լինի նրա հետ զրուցելը:

Կարող եք ուսանողներին առաջարկել աշխատել փոքր խմբերով՝ պատասխանելու հետևյալ հարցերին և պատրաստելու առաջարկություններ, որոնցով կարող են կիսվել Աննայի հետ: Յուրաքանչյուր խմբի կարող եք հանձնարարել կենտրոնանալ հոգևոր գիտելիքներ ձեռք բերելու սկզբունքներից մեկի վրա: Ապա ուսանողներին առաջարկեք դասարանի հետ կիսվել իրենց պատասխաններով:

• Ինչպես կօգտագործեիք հոգևոր գիտելիքներ ձեռք բերելու սկզբունքներից յուրաքանչյուրը և Մոսիա 18.8–10 հատվածի ուսմունքները՝ Աննային իր իրավիճակում օգնելու համար:

Ուսանողներին խրախուսեք Մոսիա 18.8–10 հատվածների օգնությամբ քննարկել նախորդ հարցը, նաև, թե ինչ են սովորել՝ այս կիսամյակի ընթացքում հոգևոր գիտելիքներ ձեռք բերելու սկզբունքներն ուսումնասիրելիս: Եթե նրանք, այնուամենայնիվ, օգնության կարիք ունենան, կարող եք ուսանողներին ցուցադրել կամ տրամադրել յուրաքանչյուր սկզբունքի տակ ներկայացվող հետևյալ հարցերի տպագիր օրինակը: Եթե սցենարը հարմարեցրել եք ուսանողների կարիքներին, հարցերը նույնպես հարմարեցրեք:

Ձգտեք մեծացնել հասկացողությունը աստվածային աղբյուրների միջոցով

• Սուրբ գրությունների ի՞նչ հատվածներ կամ Եկեղեցու ղեկավարների ի՞նչ խոսքեր գիտեք, որոնք կարող են օգնել Աննային: Մոսիա 18.8–10 հատվածների ուսմունքներն ինչպե՞ս կարող են օգտակար լինել:

• Խոսելով Երիտասարդ կանանց նախագահության հետ՝ Աննան ինչպե՞ս կարող է ավելի լավ պատկերացում կազմել Պաուլայի իրավիճակի մասին:

Քննել հասկացություններն ու հարցերը հավերժության հեռանկարով

• Ի՞նչ է անհրաժեշտ Աննային, որպեսզի հասկանա, թե ինչպես է Տերը տեսնում մկրտության ուխտերը, որոնք կարող են օգնել նրան հաղթահարել տարակուսանքի զգացումը:

• Աննային ինչպե՞ս կարող է օգնել հիշելը, թե Տերն ի՞նչ է զգում Պաուլայի հանդեպ:

• Խրախուսելով Պաուլային՝ Աննան ինչպե՞ս կարող է ավելի նմանվել Երկնային Հորը և Հիսուս Քրիստոսին:

Գործեք հավատքով

• Ի՞նչ կարող է անել Աննան մկրտության որոշակի խոստումները պահելու համար, որոնք Ալման ուսուցանում էր Մոսիա 18.8–10 հատվածներում:

  Կարող եք ուսանողներին առաջարկել վերանայել իրենց նշումները Մոսիա 18 գլխից իրենց սովորածի մասին և փնտրել լրացուցիչ գաղափարներ, թե Աննան ինչպես կարող է սգալ Պաուլայի հետ, մխիթարել նրան կամ կրել նրա բեռը: Ապա ուսանողներին առաջարկեք կիսվել իրենց գտածով, նաև, թե ինչ կառաջարկեին Աննային:

• Ուրիշներին օգնելու Հիսուս Քրիստոսի օրինակներից որոնցո՞վ կկիսվեիք Աննայի հետ, որպեսզի օգնեիք նրան հավատքով գործել:

Վարդապետության սերտման կրկնություն

Հետևյալ կրկնության վարժությունը պետք է օգտագործվի մոտակա դասերից մեկի համար:

Վերանայեք Մոսիա 18.8–10 հատվածի սուրբ գրության հղումը և հիմնական արտահայտությունը՝ ուսանողներին առաջարկելով մի քանի անգամ կրկնել դրանք դասարանով: Ապա կարող եք վերանայել վարդապետության սերտման այլ հատվածների սուրբ գրությունների հղումները և հիմնական արտահայտությունները, որոնք նրանք ուսումնասիրել են մինչ այժմ և նույնպես կրկնել:

Մոսիա 18.8–10 հատվածի սուրբ գրության հիմնական արտահայտությունն է՝ «Մկրտվեք Տիրոջ անունով՝ որպես մի վկայություն …, որ դուք մտել եք նրա հետ ուխտի մեջ»:

Կարող եք կրկին օգտագործել այս դասի սկզբում առաջարկված՝ խառը հերթականությամբ դասավորման վարժությունը:

Օժանդակ ուսումնական վարժություններ

Այլընտրանքային սցենար

Եթե ձեր ուսանողներին ավելի օգտակար կլինի կենտրոնանալ «որպես Աստծո վկաներ բոլոր ժամանակներում, և բոլոր բաներում, և բոլոր տեղերում» կանգնելու վրա (Մոսիա 18.9), կարող եք նմանատիպ սցենար օգտագործել՝ ուսանողների վարժվելու համար։