Mosias 19–20

“Natupad na ang mga Salita ni Abinadi”

Nais ng Ama sa Langit na maging masaya at ligtas ka. Isang paraan upang makadama ka ng kagalakan at espirituwal na proteksyon ay sa pamamagitan ng pagsunod sa mga turo at babala ng Kanyang mga propeta. Sa hindi nila pagtanggap kay Abinadi, si Haring Noe at ang kanyang mga tao ay nawalan ng mga pagpapala ng kaligtasan at nakaranas ng matinding pagdurusa. Ang lesson na ito ay makatutulong sa iyo na makadama ng mas malaking hangarin na makinig sa mga babala at turo ng mga propeta ng Panginoon.

Pagtulong sa mga estudyante na maunawaan ang konteksto ng mga banal na kasulatan. Ang konteksto ay ang mga kalagayan na nakapalibot sa mga scripture passage, pangyayari, at salaysay o nagbibigay ng impormasyon tungkol sa mga ito. Ang kontekstong ito ay tumutulong sa atin na maunawaan ang kalagayan at kapaligiran ng mga tao sa mga banal na kasulatan. Ang pag-unawa sa konteksto ng mga salaysay sa banal na kasulatan ay makatutulong sa mga estudyante na matukoy ang mga alituntunin at doktrina at maihalintulad ang mga banal na kasulatan sa kanilang sarili.

Paghahanda ng estudyante: Sabihin sa mga estudyante na mag-isip ng isang halimbawa mula sa mga banal na kasulatan o sa sarili nilang buhay na sumusuporta sa sumusunod na pahayag. Hikayatin sila na pumasok sa klase na handang ibahagi ang kanilang halimbawa.

“Makikita sa kasaysayan na may kaligtasan, kapayapaan, kaunlaran, at kaligayahan sa pagsunod sa payo ng propeta” (M. Russell Ballard, “His Word Ye Shall Receive,” Ensign, Mayo 2001, 65).

Mga Posibleng Aktibidad sa Pag-aaral

Kaligtasan mula sa panganib

Maaari mong ipakita ang mga sumusunod na larawan o magdala ng iba’t ibang bagay sa klase na ginagamit upang magbigay ng kaligtasan. Maaari mo ring sabihin sa mga estudyante na magbahagi ng mga halimbawa ng mga bagay o patakarang ginagamit nila araw-araw upang manatiling ligtas.

• Saang mga panganib tayo pinoprotektahan ng mga bagay na ito?

• Sa inyong palagay, bakit pinipili ng ilang tao na balewalain ang mga kagamitan o tuntuning pangkaligtasan?

Maaari kang magpakita ng larawan ng kasalukuyang propeta kasama ng mga naunang larawan.

Dagdag pa sa mga pisikal na panganib, ang mga espirituwal na panganib ay bahagi rin ng ating mortal na karanasan. Dahil mahal Niya tayo, ang Panginoon ay tumatawag ng mga propeta upang bigyan tayo ng mga tuntunin at kasangkapan na makatutulong sa atin na maranasan ang pisikal, espirituwal, at emosyonal na kaligtasan sa buong buhay natin.

Pagnilayan sandali ang kaligtasang ibinibigay sa inyo ng Panginoon sa pamamagitan ng Kanyang mga propeta at apostol. Maaaring makatulong ang mga sumusunod na tanong:

Maaaring makatulong sa mga estudyante na isulat ang kanilang mga sagot sa kanilang study journal.

• Gaano ka kadalas umaasa sa mga propeta at apostol ng Panginoon bilang paraan upang matanggap ang Kanyang espirituwal na proteksyon?

• Ano ang ilang halimbawa kung paano ka mapagpapala ng pagsunod sa mga propeta ng Panginoon?

Sa iyong pag-aaral, maghanap ng mga turo na makatutulong sa iyo na makadama ng mas matinding hangarin na hanapin ang kaligtasan at kaligayahan na nagmumula sa pagsunod sa propeta ng Panginoon.

Naranasan ng mga tao ni Haring Noe ang mga bunga ng kanilang mga kasalanan

Alalahanin na isinugo si Abinadi upang balaan ang mga tao ni Haring Noe tungkol sa kanilang kasamaan upang maiwasan nila ang mga darating na kahatulan ng Panginoon. (Maaaring makatulong na rebyuhin ang ilan sa mga babala ni Abinadi sa Mosias 11:20–25; 12:1–8.)

Rebyuhin ang tugon ni Noe at ng kanyang mga tao sa mga babala ni Abinadi sa pagbabasa ng Mosias 12:13–15; 17:11–20.

• Sa iyong palagay, bakit pinili ni Noe at ng kanyang mga saserdote na balewalain ang mga babala ni Abinadi?

• Ano ang ilang halimbawa ng kung paano maaaring balewalain o tanggihan ng mga tao ang mga turo ng mga propeta sa ating panahon? Sa iyong palagay, bakit kaya nila ito ginagawa?

Tulad ng ipinropesiya ni Abinadi (tingnan sa Mosias 17:15–19), dumanas ng mahihirap na pagsubok ang mga tao ni Noe matapos tanggihan ang mga salita at paanyaya ng Panginoon na magsisi. Maaaring maalala mo mula sa iyong pag-aaral ng Mosias 7 na hindi nagtagal matapos ang pagkamatay ni Abinadi, ang mga taong ito ay natuklasan ng isang pangkat ng mga tao mula sa Zarahemla na pinamumunuan ng isang lalaking nagngangalang Ammon (tingnan sa diagram sa ibaba). Nang matuklasan sila, ang mga Nephita sa lupain ng Nephi ay mga bihag ng mga Lamanita.

Ang kanilang pinuno ay si Limhi, ang anak ni Haring Noe. Basahin ang mga salita ni Limhi sa Mosias 7:24–29, at alamin ang mga dahilang natukoy niya kaya sila nabihag.

• Ano ang nakita mo sa mga talatang ito na makatutulong sa isang taong hindi nakadarama na mahalagang sundin ang mga propeta ng Panginoon?

Maaari mong isulat sa pisara ang sumusunod na hindi kumpletong pangungusap. Matapos bigyan ng oras ang mga estudyante na pag-isipan ito, anyayahan ang maraming estudyante na ibahagi kung paano nila ito kukumpletuhin.

Ang pagbalewala o pagtanggi sa mga salita ng Panginoon sa pamamagitan ng Kanyang mga propeta ay humahantong sa …

Ang mga estudyante ay maaaring hatiin sa mga grupo at anyayahang pag-aralan ang isa sa mga sumusunod na hanay ng mga talata: (1) Mosias 19:3–8; (2) Mosias 19:9–15; (3) Mosias 19:16–21; 20:3, 21. Sabihin sa kanila na maghanap ng mga detalye na naglalarawan ng katotohanan na ang pagbalewala o pagtanggi sa mga salita ng Panginoon sa pamamagitan ng Kanyang mga propeta ay humahantong sa pagdurusa at kalungkutan.

• Anong katibayan ang nakita mo sa pagdurusa o kalungkutan na naranasan ng mga tao sa mga talatang ito?

• Matapos makita ang pagdurusang tiniis ng mga taong ito at malaman na ang Panginoon ay nagsugo ng propeta upang magbigay sa kanila ng babala, ano ang natutuhan mo tungkol sa Panginoon?

Ibinahagi ni Pangulong M. Russell Ballard ng Korum ng Labindalawang Apostol ang ilan sa mga pagpapalang matatanggap natin kapag nakinig tayo sa payo ng Panginoon sa pamamagitan ng Kanyang mga propeta:

Makikita sa kasaysayan na may kaligtasan, kapayapaan, kaunlaran, at kaligayahan sa pagsunod sa payo ng propeta. (M. Russell Ballard, “His Word Ye Shall Receive,” Ensign, Mayo 2001, 65)

• Ano ang ilang halimbawa mula sa iyong buhay o sa mga banal na kasulatan na sumusuporta sa pahayag ni Pangulong Ballard?

Ang payo ng Panginoon para sa iyo

Tulad ng mga propeta noong unang panahon, ang mga propeta ngayon ay nagbibigay sa atin ng mga payo, babala, at mga ipinangakong pagpapala ng Panginoon. Ang isang resource kung saan natin makikita ang ilan sa mga payong ito ay sa Para sa lakas ng mga Kabataan (buklet, 2022).

Maaari mong hatiin ang mga estudyante sa maliliit na grupo at magtalaga sa bawat grupo ng isa o mahigit pang mga paksa na pag-aaralan mula sa Para sa Lakas ng mga Kabataan (buklet, 2022). Maaari kang magdala ng ilang kopya sa klase para magamit ng mga estudyante. Sabihin sa mga estudyante na hanapin ang sumusunod:

1. Mga pamantayan na ipinapayo ng Panginoon na ipamuhay mo

2. Mga posibleng espirituwal na panganib sa hindi pagsunod sa payo ng Panginoon

3. Mga ipinangakong pagpapala sa pagsunod sa mga tagubilin at babala ng Panginoon

Kapag natapos na ang mga estudyante, sabihin sa kanila na ibahagi ang nahanap nila na may kaugnayan sa naunang tatlong pahayag.

• Paano makatutulong sa iyo ang pagsunod sa mga turong ito na mas masunod si Jesucristo?

Isipin ang natutuhan mo ngayon tungkol sa kahalagahan ng pagsunod sa propeta ng Panginoon. Pag-isipan sandali kung paano mo mas masusunod ang propeta at kung bakit mahalaga para sa iyo na gawin ito. Isulat ang mga naisip at espirituwal na impresyon mo sa iyong study journal.

Komentaryo at Impormasyon ng Konteksto

Ano ang itinuturo sa akin ng mga babala ng propeta tungkol sa Diyos?

Itinuro ni Elder D. Todd Christofferson ng Korum ng Labindalawang Apostol:

Matagal ko nang hinahangaan, at nadarama rin, ang magiliw na pagmamahal ng mga propeta ng Diyos sa kanilang mga babala laban sa kasalanan. Hindi sila inuudyukan ng hangarin na magparusa. Ang kanilang totoong hangarin ay sumasalamin sa pagmamahal ng Diyos; sa katunayan, iyon ang pagmamahal ng Diyos. Minamahal nila ang mga tao kung kanino sila ipinadadala, sinuman sila at anuman ang katangian nila. Tulad ng Panginoon, hindi gusto ng Kanyang mga tagapaglingkod na pagdusahan ninuman ang mga kirot ng kasalanan at mga maling pagpili. (D. Todd Christofferson, “Ang Pagmamahal ng Diyos,” Liahona, Nob. 2021, 17)

Bakit hindi kaagad nadarama ng ilang tao ang mga negatibong epekto ng hindi pagsunod sa propeta?

Itinuro ni Pangulong Henry B. Eyring ng Unang Panguluhan:

Nagpadala ang Diyos ng mga mortal na lingkod na tutulong sa atin, sa pamamagitan ng Espiritu Santo, na malaman ang nais Niyang ipagawa sa atin at kung ano ang ipinagbabawal Niya. Ginagawang kaakit-akit ng Diyos na piliin ang tama sa pagpapadama sa atin ng mga epekto ng ating mga pagpili. Kung pipiliin natin ang tama, liligaya tayo—pagdating ng panahon. Kung pipiliin natin ang masama, darating ang kalungkutan at panghihinayang—pagdating ng panahon. Tiyak na madarama ang mga epektong ito. Gayunman kadalasan ay naaantala ito dahil sa isang layunin. Kung agarang darating ang mga biyaya, ang pagpili ng tama ay hindi magpapalakas ng pananampalataya. At dahil kung minsan ay lubha ring natatagalan ang kalungkutan, kailangan ng pananampalataya para madama na kailangang ihingi kaagad ng tawad ang kasalanan sa halip na pagkatapos nating madama ang lungkot at pait na dulot nito. (Henry B. Eyring, “Isang Walang-Katumbas na Pamana ng Pag-asa,” Liahona, Mayo 2014, 24–25)

Mga Karagdagang Aktibidad sa Pag-aaral

Sundin ang propeta

Pag-isipang kantahin ang isang himno o awit sa Primary tungkol sa mga propeta upang simulan ang klase. Sabihin sa klase na tumukoy ng mga alituntuning nauugnay sa pagsunod sa mga propeta mula sa mga salita ng awitin. Hikayatin ang mga estudyante na maghanap ng katibayan ng mga alituntuning ito habang pinag-aaralan nila ang mga bungang kinaharap ni Haring Noe at ng kanyang mga tao matapos tanggihan ang payo ni Abinadi bilang propeta.

Pagsalig sa pundasyon ng mga turo ni Jesucristo

Hindi nagbabago ang mga alituntunin ng ebanghelyo. Bukod pa sa paggamit ng mga alituntunin mula sa sinaunang banal na kasulatan at pagsasabuhay ng mga ito sa ating makabagong panahon, magagamit natin ang mga makabagong turo ng mga propeta at magagamit ang mga ito sa mga kuwento ng mga banal na kasulatan. Sabihin sa mga estudyante na alamin kung paanong ang talata 6–8 ng “Ang Mag-anak: Isang Pagpapahayag sa Mundo” (ChurchofJesusChrist.org) ay maaaring magamit sa mga sitwasyon ng pamilya na makikita sa Mosias 19:6–24; 20:3.

Ang pagsunod sa masasamang tao ay maaaring mag-udyok sa atin na gumawa ng mga desisyon na pagsisisihan natin

Sabihin sa mga estudyante na basahin ang Mosias 19:18–21, at alamin kung ano ang nangyari sa pagitan ni Haring Noe at ng mga sumunod sa kanya. Sabihin sa mga estudyante na ibahagi ang nalaman nila.

Isipin kung ano ang maaari mong gawin upang matulungan ang mga estudyante na masuri kung may mga impluwensya sa kanilang buhay na maaaring mag-udyok sa kanila na gumawa ng mga desisyong pagsisisihan nila kalaunan.