Mosias 27:24–37

“Isinilang sa Diyos”

Ang pagsisisi ng Nakababatang Alma at ng mga anak ni Mosias ay makapagbibigay ng pag-asa sa sinumang nag-iisip kung posible bang magbago. Tinulungan ng Tagapagligtas ang mga kabataang lalaking ito, na inilarawan bilang “pinakamasama sa lahat ng makasalanan” (Mosias 28:4), upang magbago “tungo sa kalagayan ng kabutihan” (Mosias 27:25). Ang lesson na ito ay makatutulong sa iyo na magsisi at magpakita ng pananampalataya na mababago ng Tagapagligtas ang iyong puso.

Pagtulong sa mga estudyante na makilala si Jesucristo. Kapag nakilala ng mga estudyante ang Tagapagligtas para sa kanilang sarili, matututo sila mula sa Kanya at kusa silang magsisikap na maging katulad Niya. Maaari silang matutong tumanggap ng Kanyang tulong, pag-asa, at paggaling sa buong buhay nila. Madarama nila ang pagmamahal ng Diyos.

Paghahanda ng estudyante: Maaari mong anyayahan ang mga estudyante na mag-isip ng mga bagay sa kalikasan na sumasailalim sa malaking pagbabago (tulad ng caterpillar na nagiging paruparo). Maaari silang kumuha ng larawan ng isang bagay na ipapakita sa klase.

Mga Posibleng Aktibidad sa Pag-aaral

Pagbabago

Sabihin sa mga estudyante na magbahagi ng mga bagay na napakalaki ng pagbabago, tulad ng isang bulaklak na nagiging bunga o binhi na nagiging puno. Pagkatapos ay ipakita ang larawang ito habang itinatanong mo ang mga sumusunod.

• Paano maikukumpara ang ating espirituwal na pag-unlad sa isang caterpillar na nagiging paruparo?

• Paano ginawang posible ng Diyos na magbago tayo at maging katulad Niya?

Isipin sandali ang inyong pag-unlad sa pagiging higit na katulad ng Diyos. Mayroon bang isang bagay tungkol sa inyong sarili na gusto ninyong baguhin o pagbutihin pa? Anong mga balakid ang maaari ninyong kaharapin sa paggawa ng mga ninanais na pagbabagong ito?

Pag-aaralan mo ngayon ang isang mahimalang pagbabago na ginawa ng Tagapagligtas sa buhay ng ilang kabataang lalaki. Habang nag-aaral ka, pakinggan ang mga pahiwatig ng Espiritu kung paano ka matutulungan ng Tagapagligtas na magbago rin.

Ang Nakababatang Alma at ang mga anak na lalaki ni Mosias

Maaari mong ipakita ang sumusunod na larawan at sabihin sa isang estudyante na ipaalala sa klase ang salaysay na inilalarawan nito. Gamitin ang impormasyon sa sumusunod na talata kung kinakailangan lang.

Alalahanin na ang unang bahagi ng Mosias 27 ay naglalaman ng salaysay tungkol sa pagsagot ng Diyos sa mga panalangin ni Alma. Nagsugo ang Diyos ng isang anghel upang mangusap sa Nakababatang Alma at mga anak ni Haring Mosias ng tungkol sa mga maling gawain nila. Ang Nakababatang Alma ay hindi makapagsalita o makagalaw nang ilang araw pagkatapos ng pangyayaring ito (tingnan sa Mosias 27:19, 23). Sa panahong iyan, nakaranas siya ng di-mailarawang kapighatian dahil sa kanyang mga kasalanan. Nang sa wakas ay nakapagsalita na siyang muli, inilarawan niya ang ginawa ng Panginoon para sa kanya.

Maaari mong anyayahan ang isang estudyante na gawin ang sumusunod sa pisara upang magamit ito ng klase sa buong lesson.

Isulat ang “Ang pagbabago ay posible sa pamamagitan ni Jesucristo” sa itaas ng isang pirasong papel. Pagkatapos ay gumuhit ng dalawang patayong linya upang hatiin ang papel sa tatlong magkakapantay na column. Lagyan ang kaliwang column ng label na “bago,” ang gitnang column ng “tungkulin ni Jesucristo,” at ang kanang column ng “pagkatapos.”

Para sa sumusunod na pag-aaral ng mga banal na kasulatan, ipabasa sa kalahati ng klase ang talata 8–10 at ipabasa sa natitirang kalahati ang talata 32–37. Pagkatapos, anyayahan ang mga estudyante na isulat sa pisara ang nahanap nila.

Basahin ang Mosias 27:8–10; 28:4 upang marebyu kung ano ang pagkatao noon ng Nakababatang Alma at ng mga anak ni Mosias. Isulat ang mga paglalarawan sa kanila sa column na “bago” sa iyong papel.

Ngayon ay basahin ang Mosias 27:32–37, at isulat ang mga paglalarawan sa kanila sa column na “pagkatapos.”

Tumigil sandali upang pag-isipan ang pagbabagong nakita mo sa isang taong nagsisi nang may pananampalataya sa Tagapagligtas. (Maaari mo ring isipin ang iyong sarili.) Magdagdag ng mga paglalarawan sa iyong mga column kung ano sila (o ano ka) bago at pagkatapos ng pagbabagong ito.

Sabihin sa mga estudyante na pumunta sa pisara at magsulat ng isang bagay sa ilalim ng bawat column upang ipakita ang pagbabagong nakita nila sa taong naisip nila.

Basahin ang Mosias 27:23–26, at maghanap ng mga parirala na naglalarawan sa pagbabagong kailangan upang maging katulad tayo ng Tagapagligtas. Maaaring makatulong na malaman na ang salitang makamundo (talata 25) ay maaaring mangahulungang mahalay, at ang pariralang “naging mga anak na lalaki at anak na babae [ng Diyos]” (talata 25) ay maaaring tumukoy sa mga “[magmamana ng] kaharian ng Diyos” (talata 26).

Sa column na “tungkulin ni Jesucristo” sa iyong papel, isulat ang mga pariralang pinakanapansin mo. Pag-isipan sandali ang kahulugan ng mga ito. Kung kinakailangan, hanapin ang anumang salita na gusto mong mas maunawaan sa Gabay sa mga Banal na Kasulatan.

Maaari mong sabihin sa mga estudyante na ibahagi ang mga pariralang isinulat nila at kung ano ang kahulugan ng mga ito. Maaari mo ring itanong kung paano naging mahusay na paglalarawan ang mga ito ng mga pagbabagong nakita nila sa mga taong lumalapit sa Tagapagligtas. Maaaring kabilang sa ilang parirala na maaaring mahanap ng mga estudyante ang mga sumusunod:

• Tinubos ng Panginoon

• Isinilang na muli

• Isinilang sa Diyos

• Nagbago mula sa kanilang makamundong kalagayan

• Naging kanyang mga anak na lalaki at anak na babae

• Naging mga bagong nilikha

Ang isang katotohanan na itinuro sa mga talatang ito ay ang buong sangkatauhan ay kailangang magbago sa pamamagitan ng Pagbabayad-sala ni Jesucristo.

Maaari kang maglagay ng larawan ni Jesucristo sa gitna ng pisara at itanong ang mga sumusunod:

• Anong mga parirala na naglalarawan sa mga pagbabagong ginawang posible sa pamamagitan ni Jesucristo ang pinakamahalaga sa iyo? Bakit?

• Paano tayo binabago ng pagtanggap sa kapatawaran ng Tagapagligtas?

• Ayon sa talata 24, ano ang hinihingi sa atin upang maanyayahan ang Tagapagligtas na baguhin tayo?

Ang pagbabalik-loob ay isang proseso, hindi isang pangyayari

Itinuro ni Elder Neil L. Andersen ng Korum ng Labindalawang Apostol:

Bagama’t sa ilang tao ang bunga ng pagsisisi ay maaaring kapansin-pansin, tulad ng kay Alma, hindi ito ang karaniwang nangyayari. Karamihan sa atin ay sumusulong nang paisa-isang hakbang, nang paunti-unti patungo sa higit na kabutihan, mas lubos na pagtupad sa ating mga tipan, higit na paglilingkod at katapatan. (Neil L. Andersen, The Divine Gift of Forgiveness [2019], 11)

• Bakit mahalagang tandaan ang pahayag ni Elder Andersen?

Mag-ukol ng oras na maglista ng ilang bagay na magagawa natin upang magsisi at unti-unting mabago ng Panginoon. (Para sa mga ideya, basahing muli ang pahayag ni Elder Andersen sa itaas at pag-isipang basahin ang ilan sa mga sumusunod na talata: Mosias 26:29; 27:35; Alma 36:18; 3 Nephi 9:22; Doktrina at mga Tipan 6:9; 58:42–43).

• Ano ang magagawa natin upang bumaling sa Panginoon at magsisi?

• Sa iyong palagay, paano makatutulong sa atin ang mga pagsisikap na ito na unti-unting magbago sa pamamagitan ng Tagapagligtas?

Magpatotoo na ang salaysay sa Mosias 27 ay nagpapakita ng kapangyarihan at hangarin ng Tagapagligtas na baguhin ang sinumang nagsisisi nang may pananampalataya sa Kanya.

Pagkatapos ay sabihin sa mga estudyante na gawin ang sumusunod sa kanilang study journal.

Isipin sandali kung paano nauugnay sa iyo ang lesson na ito. Isulat sa iyong study journal ang mga sagot mo sa mga sumusunod na tanong:

1. Ano ang mga unti-unting pagbabago na nagawa mo sa tulong ng Tagapagligtas? Ano ang nadarama mo sa iyong pagsisikap at sa tulong ng Panginoon?

2. Ano ang susunod na hakbang na sa palagay mo ay gusto ng Panginoon na gawin mo upang magsisi at patuloy na magbago sa pamamagitan Niya?

3. Anong mga balakid ang maaaring kaharapin mo sa prosesong ito, at paano ka makakabaling sa Panginoon para matulungan kang madaig ang mga ito?

Komentaryo at Impormasyon ng Konteksto

Bakit hindi ako nakakita ng mga mahimalang pagbabago na tulad ng sa Nakababatang Alma sa buhay ko?

Ipinaliwanag ni Elder D. Todd Christofferson ng Korum ng Labindalawang Apostol:

Maaaring itanong ninyo, Bakit hindi nangyayari sa akin nang mabilis ang malaking pagbabagong ito? Dapat ninyong tandaan na ang mga di pangkaraniwang halimbawa ng mga tao ni Haring Benjamin, ni Alma, at iba pa sa mga banal na kasulatan ay sadyang ganoon—pambihira at hindi pangkaraniwan. Para sa karamihan sa atin, mas dahan-dahan ang mga pagbabago at matagal bago dumating. Ang pagsinilang na muli, di tulad ng ating pisikal na pagsilang, ay isang proseso sa halip na pangyayari. At ang pakikibahagi sa prosesong iyon ang pinakamahalagang layunin ng mortalidad.

… Pinatototohanan ko na habang patuloy kayo sa landas ng espirituwal na pagsilang na muli, tatanggalin ng nagbabayad-salang biyaya ni Jesucristo ang inyong mga kasalanan at ang mga mantsa ng kasalanang iyon sa inyo, hindi na magiging kaakit-akit ang mga tukso, at sa pamamagitan ni Cristo kayo ay magiging banal, tulad Niya at ng Ama na banal. (D. Todd Christofferson, “Isinilang na Muli,” Liahona, Mayo 2008, 78)

Yamang napakamapagmahal ng Diyos, bakit natin kailangang magsisi at magbago?

Itinuro ni Elder Jeffrey R. Holland ng Korum ng Labindalawang Apostol:

“Pumarito ka bilang ikaw,” ang sabi ng isang mapagmahal na Ama sa bawat isa sa atin, subalit idinagdag Niya, “Huwag kang manatiling ganyan.” Ngumingiti tayo at naaalala na determinado ang Diyos na gawin tayong higit pa sa inaakala natin na kahihinatnan natin. (Jeffrey R. Holland, “Mga Awiting Naawit at Hindi Naawit,” Liahona, Mayo 2017, 51)

Mga Karagdagang Aktibidad sa Pag-aaral

Ang pagsisisi at pagbabago ay nangangailangan ng panahon at paulit-ulit na pagsisikap

Upang matulungan ang mga estudyante na maunawaan na ang pagsisisi at pagbabago upang maging katulad ng Tagapagligtas ay isang proseso, hindi isang pangyayari, maaari mo silang anyayahang gawin ang isang bagay na hindi posibleng gawin nang perpekto sa unang pagkakataon. Pagkatapos ay anyayahan silang pagbutihin pa nang maraming beses ang kanilang gawain. Halimbawa, hilingin sa kanila na mabilis na idrowing ang kanilang bahay, at pagkatapos ay hilingin sa kanila na magdagdag ng isang bagay sa kanilang drowing o baguhin ang isang bagay upang maging mas tumpak ito. Itanong sa mga estudyante kung ilang beses nila maaaring ulitin ang prosesong ito at mas mapaganda rin ang drowing. Pagkatapos ay ibahagi ang sumusunod na pahayag ni Elder D. Todd Christofferson ng Korum ng Labindalawang Apostol, at sabihin sa mga estudyante na ibahagi kung paano ito nauugnay sa pagbabagong binanggit ni Alma sa Mosias 27:24–26.

“Upang malutas ang isang malaking problema, kailangan natin itong lutasin nang paunti-unti sa araw-araw. …

“Ang pagdagdag ng bago at mabuting pag-uugali sa ating pagkatao o pagwawaksi sa masasamang pag-uugali o adiksyon ay [pinaka] kadalasang nangangahulugan ng pagsisikap ngayon na susundan ng bukas at ng isa pang bukas, marahil ng maraming araw, maging ng mga buwan at taon. … Ngunit magagawa natin ito dahil makahihingi tayo sa Diyos … ng tulong na kailangan natin sa bawat araw” (“Pagkilala sa Tulong ng Diyos sa Ating mga Pagpapala sa Araw-araw,” Liahona, Ene. 2012, 20–21).

Mga pipino at pickles

Upang matulungan ang mga estudyante na maunawaan ang pagbabagong kailangan upang maging katulad ng Tagapagligtas, maaari mong ipabasa sa kanila ang bahaging “Mga Pipino at Pickles” ng mensaheng “Kinakailangan Ngang Kayo’y Ipanganak na Muli” ni Elder David A. Bednar ng Korum ng Labindalawang Apostol (Liahona, Mayo 2007, 19). Ang ideyang ito ay magagamit upang simulan ang lesson sa halip na magbahagi ng mga bagay na nagbabago sa kalikasan.