Mosias 28

Personal na Pagbabalik-loob at Pagbabahagi ng Ebanghelyo

Ano ang mga naging karanasan mo sa pagbabahagi ng ebanghelyo ni Jesucristo? Matapos makapagbalik-loob, ang mga anak ni Mosias ay lumapit sa hari upang humingi ng pahintulot na ipangaral ang ebanghelyo sa mga Lamanita. Tinanong muna ni Haring Mosias ang Panginoon, pagkatapos ay pinayagan niya ang kanyang mga anak na humayo upang madala nila ang salita ng Diyos sa mga Lamanita (tingnan sa Mosias 28:1). Layunin ng lesson na ito na tulungan kang mapatindi ang hangarin mo na ibahagi ang ebanghelyo.

Tulungan ang mga mag-aaral na makahanap ng kaugnayan sa mga katotohanan ng ebanghelyo. May ilang estudyante na maaaring nahihirapan na makita kung paano nauugnay ang ebanghelyo sa kanilang pang-araw-araw na buhay. Mapanalanging maghanap ng mga paraan upang matulungan silang madama na ang natututuhan nila ay makabuluhan at kapaki-pakinabang sa kanilang mga personal na kalagayan, tanong, at pangangailangan.

Paghahanda ng estudyante: Maaari mong anyayahan ang mga estudyante na kausapin ang isang tao na pinaniniwalaan nila na lubos na nagbalik-loob sa ebanghelyo ni Jesucristo. Ano ang nakatulong sa taong iyon sa kanyang landas tungo sa pagbabalik-loob? Maaari mo ring anyayahan ang mga estudyante na suriin ang kanilang hangaring ibahagi ang ebanghelyo.

Mga Posibleng Aktibidad sa Pag-aaral

Pagbabahagi at pagbabalik-loob

Maaari kang magdala o magpakita ng larawan ng isang bagay na gustong-gusto mo kaya nasisiyahan kang ibahagi ito sa iba. Ibahagi ang bagay na ito sa mga estudyante bago itanong ang susunod na tanong.

• Ano ang ilang bagay na gustung-gusto ninyo kaya gusto ninyong ibahagi ang mga ito sa iba?

Itinuro ni Elder David A. Bednar ng Korum ng Labindalawang Apostol na karaniwan na sa atin na magbahagi ng mga bagay na makabuluhan sa atin. ChurchofJesusChrist.orgBasahin ang pahayag sa ibaba.

Good Things to Share

Sharing what matters most is not unusual at all. What good things will you share?

Ang pagbabahagi sa ibang tao ng mga bagay na napakahalaga sa atin o nakatulong sa atin ay karaniwan lamang.

Ang ganitong huwaran ay nakikita lalo na sa mga bagay na may espirituwal na kahalagahan at epekto. …

Ang mga paanyaya namin sa inyo na alamin at subukan ang aming mensahe ay nagmumula sa mabubuting bunga ng ebanghelyo ni Jesucristo sa aming buhay. Kung minsan maaaring nahihiya kami o hindi kami tumitigil sa pagtatangka. Hangad lamang naming ibahagi sa inyo ang mga katotohanang napakahalaga sa amin. (David A. Bednar, “Magsiparito Kayo, at Inyong Makikita,” Liahona, Nob. 2014, 109, 110)

I-rate kung gaano katotoo ang mga sumusunod na pahayag para sa iyo mula 1 hanggang 5 (kung saan ang 1 ay hindi totoo para sa iyo at 5 ay napakatotoo para sa iyo):

Maaari mong ipakita ang mga sumusunod na pahayag para sa mga estudyante habang pinag-iisipan at pinagninilayan nila ang kanilang buhay.

• Ang mga katotohanan tungkol sa Tagapagligtas na si Jesucristo at sa Kanyang ebanghelyo ay napakahalaga sa akin.

• Hangarin kong ibahagi ang Kanyang ebanghelyo sa iba.

Habang pinag-aaralan mo ang mga buhay at halimbawa ng mga anak ni Mosias, pagnilayan ang hangarin mong ibahagi ang ebanghelyo ng Tagapagligtas. Humingi ng paghahayag para malaman kung ano ang susunod na mga hakbang na gusto ng Panginoon na gawin mo upang maging mas makabuluhan ang ebanghelyo sa iyo at tumitindi hangarin mong ibahagi ang ebanghelyo.

Ang mga anak ni Mosias

Alalahanin na matapos ang kanilang pagbabalik-loob, ipinangaral ng mga anak ni Haring Mosias ang ebanghelyo sa kanilang sariling lupain, na naghahangad na maisaayos ang mga kapinsalaang nagawa nila (tingnan sa Mosias 27:32–37).

Basahin ang Mosias 28:1–5, at alamin ang ninanais ng mga anak ni Mosias at kung bakit. (Maaari mo ring markahan ang malalaman mo sa iyong mga banal na kasulatan.)

• Anong mga salita o parirala sa mga talatang ito ang pinakanapansin mo? Ano ang mga dahilan ng pagbabahagi ng ebanghelyo ng mga anak ni Mosias sa mga Lamanita?

  Maaari mong sabihin sa ilang estudyante na ibahagi ang nalaman nila.

• Bakit maaaring nakahihikayat ang mga dahilang ito para ibahagi ang ebanghelyo?

• Anong mga katotohanan ang natutuhan ninyo sa mga talatang ito?

Maaaring magbahagi ang mga estudyante ng iba’t ibang totoong alituntunin. Kung hindi mababanggit ng mga estudyante ang naka-bold letter na alituntunin sa ibaba, maaari mong itanong ang mga sumusunod: Paano maiuugnay ang hangarin nating ibahagi ang ebanghelyo sa ating personal na pagbabalik-loob? Bakit?

Ang isang katotohanan na matututuhan natin mula sa mga talatang ito ay kapag lumalalim ang ating pagbabalik-loob sa Panginoon, tumitindi ang hangarin nating ibahagi ang ebanghelyo.

Pinagtibay ni Pangulong Dallin H. Oaks ng Unang Panguluhan ang katotohanang ito nang ituro niya ang sumusunod:

Ang kasidhian ng pagnanais nating ibahagi ang ebanghelyo ay malaking palatandaan ng lalim ng ating pagbabalik-loob (Dallin H. Oaks, “Sharing the Gospel,” Ensign, Nob. 2001, 7).

• Ano ang mga naranasan ng mga anak ni Mosias na nakatulong sa kanila na magbalik-loob kay Jesucristo at sa Kanyang ebanghelyo? (Tingnan sa Mosias 27:34–36; 28:4).

  Maaari mong ipakita ang mga sumusunod na tanong na pag-iisipan o sasagutin ng mga estudyante sa kanilang study journal bago sumagot.

• Anong mga karanasan ang nakatulong sa iyo o sa mga kakilala mo na mas magbalik-loob kay Jesucristo at sa Kanyang ebanghelyo?

• Ano ang gustung-gusto mo tungkol kay Jesucristo at sa Kanyang ebanghelyo na gusto mong ibahagi sa iba? (Halimbawa, maaaring nagkaroon ka ng mga makabuluhang karanasan sa pagpapatawad ng Tagapagligtas, pagmamahal ng Diyos, panalangin, atbp.)

Kahit nagbalik-loob tayo sa Panginoon, maaaring may mga dahilan kung bakit mahirap pa ring ibahagi ang ebanghelyo.

• Kung isa ka sa mga anak ni Mosias, ano kaya ang ipag-aalala mo tungkol sa pangangaral ng ebanghelyo sa mga Lamanita?

Bilang kanilang ama at bilang hari, si Mosias ay nagkaroon ng maraming dahilan upang mag-alala sa pagpapadala ng kanyang mga anak upang ipangaral ang ebanghelyo sa mga Lamanita. Hindi lang natakot si Haring Mosias para sa kaligtasan ng kanyang mga anak, inalala rin niya na kung aalis ang kanyang mga anak, hindi siya magkakaroon ng tagapagmana sa korona bilang susunod na hari ng mga Nephita.

Basahin ang Mosias 28:6–8, at alamin kung bakit pinayagan ni Mosias ang kanyang mga anak sa gayong mapanganib na misyon.

• Anong mga pagpapala ang ipinangako ng Panginoon kay Mosias?

Ang mga susunod mong hakbang

Mag-ukol ng ilang sandali na ilista ang mga alalahanin mo o ng iba tungkol sa pagbabahagi ng ebanghelyo.

Ilista sa pisara ang mga sagot ng mga estudyante. Magpasiya kung pinakamainam na pumili ng isang alalahanin para sa buong klase na pagtutuunan nang sama-sama o hayaang gumawa ang mga estudyante nang mag-isa o sa maliliit na grupo.

Pumili ng isa sa mga alalahaning ito at manalangin na mapatnubayan habang sinasaliksik mo ang mga banal na kasulatan at pinag-iisipan mo kung paano madaraig ang alalahaning ito. Halimbawa, kung mayroon kang isa sa mga sumusunod na alalahanin, maaari mong pag-isipan ang mga tanong at pag-aralan ang mga banal na kasulatan na nakalista pagkatapos ng mga pahayag.

Maaari mong ipakita ang mga sumusunod na pahayag o isulat ang mga ito sa pisara.

Hindi ako sigurado kung sapat ang pagbabalik-loob ko upang maibahagi ang ebanghelyo. Paano makatutulong sa iyo ang mga halimbawa ng mga anak ni Mosias? (Tingnan sa Mosias 28:1–5.) Habang binabasa mo ang ilan sa mga sumusunod na talata, alamin ang mga paraan na maaari kang mas magbalik-loob: Mga Gawa 3:19; Santiago 5:20; Enos 1:2–5; Mosias 3:19; 5:2; 27:25; Alma 5:12–14; 22:15–18; 53:10; Helaman 15:7; 3 Nephi 9:20.

Natatakot akong matanggihan. Pag-aralan sa Mosias 28:2–4 ang mga dahilan kung bakit gustong ibahagi ng mga anak ni Mosias ang ebanghelyo kahit marami ang nag-aakala na malamang na hindi ito tanggapin ng mga Lamanita. Paano makatutulong sa iyo ang mga dahilang ito? Paano makatutulong sa iyo ang pag-iisip tungkol sa ginawa ng Tagapagligtas para sa iyo (at magagawa Niya para sa iba) upang madaig mo ang iyong takot?

Hindi ako naging pinakamabuting halimbawa ng pamumuhay ng ebanghelyo. Bago sila nagbalik-loob, nangaral ang mga anak ni Mosias laban sa ebanghelyo (tingnan sa Mosias 27:8–10), ngunit matapos silang magsisi, sila ay naging ilan sa mga pinakamatagumpay na misyonero sa Aklat ni Mormon (tingnan sa Alma 17:4). Ano ang nahikayat kang gawin dahil sa halimbawa nila? Anong iba pang mga halimbawa sa mga banal na kasulatan ang naiisip mo na maaaring makatulong?

Sabihin sa ilang estudyante na ibahagi ang nalaman nila at kung paano ito makatutulong sa alalahanin.

Maaari mong ipakita ang mga sumusunod na pangungusap para sa mga estudyante habang sila ay nag-iisip at sumasagot sa kanilang study journal.

• “Isa sa pinakamahahalagang bagay na natutuhan ko mula sa mga anak ni Mosias ay …”

• “Ang isang bagay na nadarama ko na nais ng Panginoon na gawin ko upang matularan ang halimbawa ng mga anak ni Mosias ay …”

• “Para magawa ito nang epektibo, ako ay …”

Anyayahang magbahagi ang mga estudyante. Maaaring makatulong na tapusin ang lesson sa pagbabahagi ng iyong patotoo, damdamin, at impresyon o sa pag-anyaya sa isa o dalawang estudyante na gawin ito.

Komentaryo at Impormasyon ng Konteksto

Paano ko mas maibabahagi ang ebanghelyo sa iba?

Nagmungkahi si Pangulong M. Russell Ballard, Gumaganap na Pangulo ng Korum ng Labindalawang Apostol ng isang epektibong paraan upang maibahagi ng mga miyembro ng Simbahan ang ebanghelyo:

Ang susi sa matagumpay na gawaing misyonero ng miyembro ay ang magpakita ng pananampalataya. Ang isang paraan para ipakita ang pananampalataya ninyo sa Panginoon at sa mga pangako Niya ay mapanalanging itakda ang petsa [para sa] pakikipagkita ng isang [taong naihanda para makinig] sa mga misyonero. Daan-daang liham na ang natanggap ko mula sa mga miyembrong nagpakita ng pananampalataya sa simpleng paraan na ito. Kahit hindi maisip ng mga pamilya kung sino ang babahaginan ng ebanghelyo, nagtakda sila ng petsa, nagdasal, at kumausap ng marami pang tao. Ang Panginoon ang Mabuting Pastol at kilala Niya ang Kanyang mga tupa na inihanda upang marinig ang Kanyang tinig. Gagabayan Niya tayo kapag nagpatulong tayo sa Kanya sa pagbabahagi ng Kanyang ebanghelyo. (M. Russell Ballard, “Paglikha ng Tahanang Nagbabahagi ng Ebanghelyo,” Liahona, Mayo 2006, 86)

Paano ko mapapalalim ang pagbabalik-loob ko?

Binanggit muli ni Elder Arnulfo Valenzuela ng Pitumpu ang mga turo ni Pangulong Nelson tungkol sa pagsisikap at pagbabalik-loob sa sumusunod na pahayag:

Itinuro sa atin kamakailan ni Pangulong Russell M. Nelson, “Ang gawin nang mahusay ang anumang bagay ay nangangailangan ng pagsisikap. Hindi naiiba diyan ang pagiging tunay na disipulo ni Jesucristo. Ang pagpapalakas ng inyong pananampalataya at tiwala sa Kanya ay nangangailangan ng pagsisikap.” Kabilang sa mga mungkahing ibinigay niya upang mapalakas ang ating pananampalataya kay Jesucristo ay ang pagiging masigasig na mag-aaral, na itinutuon ang ating sarili sa pag-aaral ng mga banal na kasulatan upang mas maunawaan ang misyon at ministeryo ni Cristo. (Tingnan sa “Si Cristo ay Nagbangon; Ang Pananampalataya sa Kanya ay Makapagpapalipat ng mga Bundok,” Liahona, Mayo 2021, 103.) (Arnulfo Valenzuela, “Pagpapalalim ng Ating Pagbabalik-loob kay Jesucristo,” Liahona, Nob. 2021, 59)

Mga Karagdagang Aktibidad sa Pag-aaral

Karagdagang alalahanin

Kung kapaki-pakinabang, maaari mo ring isama ang sumusunod na alalahanin sa aktibidad sa ilalim ng heading na “Ang mga susunod mong hakbang” sa itaas:

Pakiramdam ko ay hindi ko masasabi ang tama. Pag-isipang basahin ang tungkol kina Enoc (tingnan sa Moises 6:27, 31–34) at Moises (tingnan sa Exodo 4:10–12). Ano ang itinuro sa kanila ng Panginoon? Paano makatutulong sa iyo ang kanilang halimbawa?

Ang bisa at kahalagahan ng pag-iingat ng mga talaan

Nagtatapos ang natitirang bahagi ng Mosias 28 sa pagpapaliwanag na isinalin ni Mosias, sa kanyang kakayahan bilang tagakita, ang talaan ng mga Jaredita—ang mga laminang natagpuan ng grupong ipinadala ni Haring Limhi upang hanapin ang lupain ng Zarahemla (tingnan sa Mosias 8:7–9). Maaari mong ipabasa sa mga estudyante ang Mosias 28:11–19, at hanapin ang mga parirala na nagpapakita ng nadarama ng mga tao sa mga talaang ito. Ano sa palagay ninyo ang natutuhan nila mula sa mga taong ito? Paano ito nauugnay sa inyo at sa nadarama ninyo sa mga banal na kasulatan?

Pagsasalin ng mga talaan

Ang Mosias 28:13–16 ay nagbibigay ng ilang impormasyon kung paano at bakit naisalin ni Mosias ang mga talaan. Kung may mga tanong ang mga estudyante tungkol sa prosesong ito, maaari mong sabihin sa kanila na pag-aralan ang Mosias 8:13–18 ChurchofJesusChrist.org Hikayatin ang mga estudyante na ibahagi ang natutuhan nila.

Pagkatuto mula sa iba pang mga kabataan tungkol sa pagpapalalim ng pagbabalik-loob at pagbabahagi ng ebanghelyo

ChurchofJesusChrist.org

Youth Share Their Experiences

Young Women General President Bonnie H. Cordon and Young Men General President Steven J. Lund ask youth gathered in person and online about their experiences of loving others and sharing the gospel.