Алма 4

Бардамналын бүдрүүлэх чулуу

Бардамнал нь даруу байдал буюу үг дуулан хүлээж авах явдал дутагдахыг хэлдэг. Бардамнал нь хүмүүсийг бие биеийнх нь болон Бурханы эсрэг тавьдаг (Судруудын удирдамж, “Бардамнал” хэсгийг scriptures.ChurchofJesusChrist.orgүзнэ үү). Та өнөөдөр дэлхий дээр байгаа бардамнал, мөн эдгээр нь танд болон эргэн тойрны хүмүүст тань хэрхэн сөргөөр нөлөөлж буй талаар бод. Алмагийн үеийн Аврагчийн Сүмийн зарим гишүүний бардамнал мөн зөрчилдөөн Сүмийн хөгжил дэвшлийг удаашрахад хүргэсэн. Үүний үр дүнд Алма Бурханы үгийг номлоход өөрийгөө зориулахын тулд ерөнхий шүүгчийн албан тушаалаасаа огцрох бурханлаг нөлөөг мэдэрчээ. Энэ хичээл танд Бурханы үгийг ашиглан бардамнал, зөрчилдөөнийг даван туулахад тусалж чадна.

Сайн мэдээний сургаал, зарчмыг олж нээхэд суралцагчдад тусал. Сургаал, зарчмуудыг тодорхой, товч хэлэх хэрэгтэй. Тэд суралцагчдад судруудын хамаарал, судрын түүх, сургаал зэрэг нь тэдний өдөр тутмын амьдралд хэрхэн хэрэглэгдэхийг зааж чадна. Сургаал, зарчмуудыг ойлгох нь суралцагчдыг сайн мэдээний сургаалыг сурч мэдэн, хэрэгжүүлэх урам зоригтой болгож чадна.

Суралцагчийн бэлтгэл: Суралцагчдыг даруу байдлын тухай судар эсвэл Сүмийн удирдагчийн хэлсэн мэдэгдлийг хуваалцахаар бэлдэж ирэхэд урь.

Боломжит суралцах үйл ажиллагаа

Бардамналын бүдрүүлэх чулуу

Ангийн үүдний шалан дээр “бүдрүүлэх чулуу” гэсэн бичигтэй цаас наа. Хэдэн суралцагч ангид орж ирэхдээ тэнд байгааг нь мэдэлгүй санамсаргүйгээр цаасан дээр гишгэснийг асуу. Хэрвээ хүсвэл суралцагчид бүдэрч унасан эсвэл бүдэрсэн үеэсээ хуваалцаж болно.

Бүдэрч унасан эсвэл бүдэрсэн үеэ эргэн сана. Юу таныг бүдрэхэд хүргэснийг санаж байна уу? Заримдаа бид амьдралдаа “бүдрүүлэх чулуу” гэж нэрлэж болох зүйлд бүдэрдэг. Мөн энэ нь сүнслэг байдлын хувьд ч үнэн юм.

Дараах санал болгож буй зургийн дасгалыг ангиараа самбар дээр хийж болно. Эсвэл суралцагчид бие даан хийж болно.

Хэдэн хайрцаг зураад, өсвөр үеийнхнийг сүнслэг байдлын хувьд бүдрэхэд хүргэж болох зүйлсийн нэрийг тавь. Жишээлбэл: Заримд нь бошиглогчийн үгийг сонсоход эсвэл мэргэн ухааны үгийг дуулгавартай дагахад хүндрэлтэй байж болно.

Эдгээр зүйлд бүдрэх нь ямар үр дагаварт хүргэх талаар бод. Эдгээр бүдрүүлэх чулууг анзаарч, зайлсхийж, даван туулахын тулд яагаад Бурханы тусламж хэрэгтэй болохыг тунгаан бод.

Алмагийн хүмүүс леменчүүдтэй хийсэн дайнд асар их хохирол амсаад удаагүй байв. Тэд зовлон зүдгүүрийнхээ улмаас “үүргийнхээ санамжинд сэрээгдэж” мөн олон хүн баптисм хүртжээ (Алма 4:1–5-ыг үзнэ үү). Гэсэн хэдий ч тэд сүнслэг байдлын хувьд бүдэрч эхэлсэн нь амар амгалан удаан үргэлжлэхгүйд хүргэжээ.

Алма 4:6–8-ыг уншаад, Сүмийн удирдагчид яагаад санаа зовниж байсныг олж мэд.

Суралцагчдыг олж мэдсэн зүйлээ хуваалцахад урьж, бардамнал яагаад сүнслэг байдлын саад тотгор болохыг ойлгоход нь тусал.

• Та нар Сүмийн удирдагчдыг хүмүүсийн бардамнал улам нэмэгдэж байгаад яагаад “ихээр шаналсан” (Алма 4:7) гэж бодож байна вэ?

Ерөнхийлөгч Эзра Тафт Бэнсон (1899–1994) ийн заасан.

Бардамнал нь Сионд бүдрүүлэх чулуу юм. Дахин хэлье: Бардамнал нь Сионд бүдрүүлэх чулуу юм. (Ezra Taft Benson, “Beware of Pride,” Ensign, May 1989, 7)

Бардамналын бүдрүүлэх чулууг илэрхийлсэн том хайрцаг зур. Хайрцаг дээр дараах асуултын хариултыг жагсаа.

• Бардамнал хүнийг хэрхэн сүнслэг байдлын хувьд бүдрэхэд хүргэнэ гэж та бодож байна вэ?

• Бардамнал биднийг Аврагчтай илүү адил болоход ямар арга замаар саад болдог вэ?

Алма 4-ийг үргэлжлүүлэн судлахдаа бардамнал танд хэрхэн саад болж болох тухай мөн түүнийг даван туулахын тулд та юу хийж чадахаа бод.

Алма 4:8–12-ыг уншаад, Сүм дэх бардамналын үр нөлөөг хайж ол. Маргаан мэтгэлцээн гэдэг нь ууртай эсвэл ширүүн санал зөрөлдөөн, зөрчилдөөн гэсэн үг гэдгийг анхаар. Өс хонзон гэдэг нь хор хөнөөл үйлдэх хүсэл эсвэл муу санаа юм.

Суралцагчдыг Сүм дэх бардамналын үр нөлөөг самбар дээр жагсааж бичихэд урь. Жагсаалтыг дараа нь хичээл дээр эргэж харах болно. Хэрэв танд хангалттай бичгийн хэрэгсэл байгаа бол хэд хэдэн суралцагчийг нэгэн зэрэг дуудаж самбарт гарга. Дараа нь суралцагчдаас дараах асуултуудад хариулахыг хүс.

• Сүм дэх бардамналын үр нөлөө юу байсан бэ?

• Эдгээр үйлдэл нь ямар байдлаар Аврагчийн Сүмийн гишүүдэд тохиромжгүй байдаг вэ?

• Сүмийн бус хүмүүст хэрхэн нөлөөлсөн бэ?

Бардамнал, зөрчилдөөнөөс зайлсхийх нь

Ерөнхийлөгч Эзра Тафт Бэнсон ийн заасан.

Бардамналын эсрэг ерөндөг бол даруу, номхон дөлгөөн, хүлцэнгүй байдал юм [Алма 7:23-ыг үзнэ үү]. (Ezra Taft Benson, “Beware of Pride,” Ensign, May 1989, 6)

Алма 4:13–14-ийг уншаад, Сүмийн гишүүд бардамналаас зайлсхийж, итгэлтэй хэвээр үлдэхийн тулд юу хийснийг хайж ол. 13-р шүлэг дэх даруухнаар үзэх гэдэг нь илүү даруу, дөлгөөн болох гэсэн утгатай болохыг анхаар.

Суралцагчдыг Сүмийн гишүүдийн даруу үйлдлүүдийг самбар дээр бичихэд урь.

Та өөрийн зурсан бардамналын бүдрүүлэх чулууны эргэн тойронд Алма 4:13–14-өөс даван туулж, эсэргүүцэхэд бидэнд тусалж чадна гэж бодож буй Христтэй адил хандлага, үйлдлүүдийг жагсаан бич.

• 13–14-р шүлэг дэх ямар үйлдэл мөн хандлага танд Есүс Христийг сануулдаг вэ?

• Эдгээр хандлагыг хөгжүүлж, эдгээр үйлдлийг хийх нь Түүнтэй илүү адил болоход хэрхэн тусалдаг вэ?

• Та бусад хүнийг Христийнхтэй адил хандлага, үйлдлээр амьдарч байгааг хэрхэн харсан бэ, энэ нь танд хэрхэн нөлөөлсөн бэ?

Суралцагчдад амьдралд нь тохиолдож болох аливаа бардамнал, зөрчилдөөний талаар мөн Аврагчийн үлгэр жишээг хэрхэн дагаж болох тухай чимээгүй тунгаан бодох цаг гаргаж өг.

Таны амьдралд тохиолдож болох аливаа бардамнал, зөрчилдөөний талаар бод. Аврагчийн үлгэр жишээг дагахын тулд юу хийж болохоо тунгаан бод. Асуудлыг багасгаж, шийдлийн нэг хэсэг болохын тулд та юу хийж болох вэ?

Алма хүмүүст сүнслэг байдлын хувьд туслахад цагаа зориулах хэрэгтэй гэж шийдсэн. Тэрээр дээд санваартны албыг өөртөө хадгалж үлдээх үедээ шүүгчийн суудлыг Нифайхад шилжүүлсэн (Алма 4:15–18-ыг үзнэ үү).

Алма 4:19-ийг уншаад, хүмүүсийн дундах бардамнал, зөрчилдөөнийг “намжааж” чадах зүйлийн тухай Алма юу мэддэг байсныг олж мэд.   ChurchofJesusChrist.org 

• Ямар арга замаар Алма Есүс Христтэй адил байсан бэ?

• Бид Алмагийн үлгэр жишээнээс юу сурч мэдэж авч болох вэ?

Алма 4:19 дээрх нэг үнэн бол Бурханы үгийг мөн цэвэр гэрчлэлийг сонсох нь бардамнал, зөрчилдөөнийг даван туулахад бидэнд тусалдаг гэсэн үнэн юм.

Дараах мэдэгдлээс ерөнхийлөгч Эзра Тафт Бэнсон Бурханы үгийн талаар юу заасныг олж мэд.

Судрууд, амьд бошиглогчдын үгс, хувийн илчлэлтэд байдаг Бурханы үг гэгээнтнүүдийг хамгаалдаг төдийгүй нүгэл хилэнцийг эсэргүүцэн, сайн сайхан бүхнээс чанга зуурч, энэ амьдралд баяр баясгаланг олж болохын тулд Сүнсээр зэвсэглэх хүчтэй юм. (Ezra Taft Benson, “The Power of the Word,” Ensign, May 1986, 80)

• Бурханы үг ба цэвэр гэрчлэл нь бардамнал, зөрчилдөөнийг зогсооход ямар арга замаар тусалж болох вэ?

Суралцагчдыг өмнө нь самбар дээр жагсаан бичсэн бардамналын үр нөлөөнөөс хоёр юм уу гурвыг сонгоход урьж, жижиг бүлгүүдэд эдгээр асуудлыг хэрхэн даван туулах талаар судлах цаг гаргаж өг.

Суралцагчид Судруудын удирдамж дахь “даруу байдал” сэдвийг хайж болно. Мөн энэ нь Сайн мэдээний номын сан аппликэйшн дээр мэдээллийг хэрхэн хайж, олж болохыг харуулахад тустай байж болно.

Бүлгүүдийг ангийнхандаа суралцсан зүйлээ, тэр дундаа бид бусадтай Аврагчтай адил хэрхэн харьцах арга замуудыг хуваалцахад урь. Эсвэл тэд судалсныхаа дараа бардамнал, зөрчилдөөнтэй асуудлуудыг хөндсөн товч хэлэх үг бичиж болно.

Суралцагчдыг энэ хичээлээр сурч мэдсэн зүйлээ хэрхэн хэрэгжүүлэх талаар хүлээн авсан сэтгэгдлийнхээ дагуу үйлдэхэд урамшуул.

• Бардамнал, зөрчилдөөнөөс үүсэх хоёр, гурван асуудлыг жагсаан бич.

• Эдгээр асуудлыг шийдвэрлэхэд туслах орчин үеийн бошиглогчдын судар, сургаалуудыг жагсаан бич.

• Таны жагсаасан зүйлс бусадтай Аврагчтай адил харьцахад хэрхэн, яаж туслахыг тодорхойл.

Энэ хичээлээр сурч мэдсэн зүйлээ хэрхэн хэрэгжүүлэх талаар Ариун Сүнсний өдөөлтүүдийг анзаарч, танихыг эрэлхийл. Тэдгээр сэтгэгдлээ дагах боломжийг эрэлхийл.

Тайлбар ба нөхцөл байдлын талаарх мэдээлэл

Алма 4:8. Бид заримдаа нэгнийгээ ямар байдлаар шоолж, доромжилдог вэ?

Тэргүүн зөвлөлийн ерөнхийлөгч Даллин Х.Өүкс ийн тайлбарласан.

Сүмийн мөн сургуулийн олон багш зарим өсвөр үеийнхнийг, тухайлбал зарим ХҮГ хүүхдүүдийг нэг нэгэнтэйгээ хэрхэн харьцаж байгааг хараад, сэтгэл зовнидог. Шашин шүтлэг, арьс өнгө, соёл, санхүүгийн нөхцөл байдлаас үл хамааран нэг нэгнийгээ хайрлаж, хүндлэх нь бие биеэ хайрла гэсэн тушаалд яах аргагүй орно. Бусдыг дээрэлхэж, доромжлох эсвэл өвтгөж, сэтгэлийг нь сэвтүүлэх үг хэллэг, үйлдлийг санаатайгаар хийхгүй байхыг бид бүх өсвөр үеийнхнээс хүсэж байна. Энэ бүх үйлдэл нь бие биеэ хайрла хэмээх Аврагчийн зарлигийг зөрчиж байгаа хэрэг юм. (Даллин Х.Өүкс “Бусдыг хайрлаж, өөр үзэл бодол бүхий хүмүүстэй зэрэгцэн амьдрах нь” 2014 оны 10-р сарын Ерөнхий чуулган, 29)

Арван хоёр төлөөлөгчийн чуулгын ахлагч Гари Э.Стивэнсоны бусадтай хайр, хүндэтгэлтэй харьцах талаарх зөвлөгөөг үзэхийн тулд “Зүрх сэтгэлээ нэгтгэ” видеог цагийн код 7:03-аас 8:15 хүртэл үзнэ үү.

Алма 4:10. Бардамналаас болж Сүм хэрхэн “дэвшилдээ удааширч” эхэлсэн бэ?

Тэргүүн зөвлөлийн ерөнхийлөгч Даллин Х.Өүкс ийн тайлбарласан:

Мормоны Ном “сүмийн хүмүүс … зүрх сэтгэлээ баялаг дээр мөн дэлхийн дэмий хоосон зүйлүүд дээр суурилуулж эхэлсэн” (Алма 4:8) учраас Бурханы Сүм “дэвшилдээ удааширч” эхэлсэн цаг үеийн тухай өгүүлдэг (Алма 4:10). Материаллаг зүйлсээр баян хүн баялаг болоод дэлхийн бусад зүйлээс болж сүнслэг байдлаараа “унаж доройтох” аюулд ордог. (Даллин Х.Өүкс, “Тариачны сургаалт зүйрлэл,” 2015 оны 4-р сарын Ерөнхий чуулган, 17)

Арван хоёр төлөөлөгчийн чуулгын ахлагч Квинтин Л.Күк ийн заасан.

Сэргээлтийн үнэн сургаал байдаг учраас гишүүд маань сайн мэдээнд баясаж, Сүмээс баяр баясал, сэтгэл ханамжийг мэдэрдэг. Бид Есүс Христийн сайн мэдээний дагуу амьдарч байх үедээ бусдад тааламжтай сайхан сэтгэгдэл төрүүлдэг. Харин гишүүд маань сургаалын дагуу амьдрахгүй байвал Сүмийн биш хүмүүст тээглэх чулуу болдог (Алма 4:10). (Квинтин Л.Күк, “Тэнгэрлэг Эцэгийн төлөвлөгөө— хүүхдүүдэд нь хангалттай,” Ensign эсвэл Liahona, May 2009, 35)

Бардамнал яагаад хор хөнөөлтэй байдаг вэ?

Арван хоёр төлөөлөгчийн чуулгын ахлагч Гари Э.Стивэнсон ийн хуваалцсан.

Бид бардамнасан үедээ бусдад мөн Их Эзэнд алдар хүндийг өгөхөөс илүү өөртөө авахыг хичээдэг. Бардамнал голдуу өрсөлдөөнд суурилсан байдаг бөгөөд илүү их зүйл олж авахыг эрэлхийлж, өөрсдийгөө бусдаас илүүд тооцдог. Бардамнал ихэвчлэн уур, үзэн ядах сэтгэлийн үр дүн байдаг бөгөөд хүнд атаа хорсол төрүүлж, уучлахаас татгалзахад хүргэдэг. (Гари И.Стивэнсон, “Сүнслэг хиртэлт,” 2017 оны 10-р сарын Ерөнхий чуулган, 36)

Нэмэлт суралцах үйл ажиллагаа

Сайн, муу жишээнүүд

   

Бардамналын үр нөлөөг хэрхэн даван туулах тухай

Хэрэв суралцагчдад бардамнал санаа зовоож байгаа жишээн дээр ажиллах нь тустай бол та дараах жишээг хуваалцаж, суралцагчдаар хоёр жишээг үлдсэн түүх дээр зохиолгож болно. Үүнийг ангиараа хийж болно. Жишээлбэл: Залуу хүний сонголт бардамналын бүдрүүлэх чулуунаасаа болж бүдрэхэд хүргэдэг гэсэн хувилбар байж болно. Нөгөө жишээ нь: залуу хүн даруу байхын тулд Бурханы үгийг хэрхэн ашигладаг тухай байж болно.

“Раул бол онцгой залуу. Ахлах сургуульд байхдаа тэрээр үеийнхнээсээ дор хаяж хоёр дахин өндөр цалинтай гайхалтай ажилд орсон юм.”

Харьцуулах ба жиших

Суралцагчдыг Алма 1:19–24-д дүрсэлсэн хүмүүс, Алма 1:25–31-д дүрсэлсэн хүмүүс хоорондын ижил төстэй болон ялгаатай талуудыг хуваалцахад урь. Алма 4:1–5-д болон Алма 4:6–10-д дүрсэлсэн хүмүүсийг мөн адил харьцуул. Суралцагчдыг эдгээр хэсэгт байгаа Христийнхтэй адил зан чанаруудыг болон Тэнгэрлэг Эцэг, Есүс Христ хоёртой илүү адил болж, илүү сайн шавь байхын тулд бид хэрхэн эдгээр жишээг дагаж болох тухай хуваалцахад урь.

Алма 4:19. Цэвэр гэрчлэлийн хүч

  Суралцагчдыг Христийн тухай гэрчлэлд нь бусдын гэрчлэл хэрхэн нөлөөлсөн жишээг хуваалцахад урьж, тэдэнд сайнаар нөлөөлөхийн тулд гэрчлэлээ бусадтай хуваалцах боломжийг эрэлхийлэхэд урамшуул.