Alma 8

Pagpaminaw ug Pagsunod sa Langitnong Amahan

Ang pagsunod sa Langitnong Amahan mahimong lisod, apan kini modala ngadto sa labing dako nga kalipay. Samtang sila si Alma ug Amulek mipakita og hugot nga pagtuo ug misunod sa instruksiyon sa Dios, ang Dios mipanalangin kanila ug niadtong nagpalibot kanila. Kini nga leksiyon makatabang kanimo sa pagpaminaw ug pagsunod sa Langitnong Amahan diha sa imong kinabuhi.

Tabangi ang mga tigkat-on nga mobati nga ang ilang mga kontribusyon gihatagan og bili.Ang pagpaminaw nagkinahanglan nga ang usa ka magtutudlo mas magtutok sa mga panginahanglan sa estudyante kay sa unsay sunod sa outline sa leksiyon. Pagmahimong andam nga ipadaplin ang unsay imong giplano, kon giaghat sa Espiritu, ug paminaw sa mga panabot sa mga estudyante. Pahibaloa sila pinaagi sa imong mga pulong ug mga lihok nga matinguhaon ka sa pagpamati kanila.

Pagpangandam sa estudyante: Dapita ang mga estudyante sa pag-ampo ug sa pagpangutana sa Langitnong Amahan kon unsay Iyang gusto nga ilang buhaton aron makasunod Kaniya sa mas hingpit nga paagi.

Mga Posibleng Kalihokan sa Pagkat-on

Pagsunod sa Langitnong Amahan

Kon mas mahinungdanon pa kini ngadto sa mga estudyante kay sa mga ehemplo sa ubos, sugdi pinaagi sa pagdapit sa mga estudyante sa pagpakigbahin og mahagitong mga butang nga mahimong ipabuhat sa Ginoo kanila.

Paghunahuna kon unsay imong bation kon ang Langitnong Amahan mohangyo kanimo sa pagbuhat sa mosunod ug nganong ingon niana ang imong bation:

• Ipakigbahin ang ebanghelyo ngadto sa usa ka tawo kinsa mibalibad sa imong mga pagdapit kaniadto.

• Higalaa ug tabangi ang usa ka tawo sa imong eskwelahan nga walay nakagusto o gisalikway.

  Dapita ang pipila ka mga estudyante sa pagpakigbahin kon unsay ilang bation ug ngano.

• Unsa ang ubang mga sugo o mga pag-aghat nga mahatag sa Langitnong Amahan kanato nga mahimong lisod dawaton ug sundon? Ngano kaha nga kini nga mga sitwasyon lisod kaayo?

Sa kapitulo nga imong tun-an karon, ang Dios misugo kang Alma sa pag-atubang og sitwasyon nga susama sa unang sitwasyon sa ibabaw, ug si Amulek miatubang og sitwasyon nga susama sa ikaduha. Paggahin og kadiyot sa pagpamalandong kon aduna bay mga sugo o mga pag-aghat gikan sa Dios nga lisod alang kanimo nga sundon. Samtang magtuon ka, pangitaa kon giunsa ni Alma ug Amulek pagbuntog ang ilang mga hagit ug pagsunod sa mga sugo sa Dios. Tinguhaa ang panabang sa Langitnong Amahan aron makahibalo unsaon nimo nga mas makapaminaw ug makasunod Kaniya.

Mahimong makatabang alang sa mga estudyante nga makigtinabangay sa usa ka klasmeyt sa pagbasa ug pagpakigbahin sa mga asoy ni Alma ug Amulek nga gilista ubos sa managlahing mga ulohan sa ubos. O dapita ang katunga sa mga estudyante sa pagbasa sa asoy ni Alma ug ang laing katunga sa pagbasa sa asoy ni Amulek. Mahimo dayon nga makigpares ang mga estudyante sa usa nila ka klasmeyt kinsa mibasa sa laing asoy ug mopasabot sa usag usa kon unsay ilang nabasa. Ipakita ang kauban nga mga pangutana aron ang mga estudyante makatan-aw niini samtang sila magbasa.

Kasinatian ni Alma

Basaha ang Alma 8:8–18, mangita sa unsay gisugo sa Dios nga buhaton ni Alma ug ngano nga tingale lisod kini alang kaniya. Sulayi sa paghanduraw ang mga panghitabo samtang basahon nimo kini. Mahimo usab nimong tan-awon ang bidyo nga “Si Alma ug Amulek Naluwas pinaagi sa Gahom sa Dios” gikan sa time code 0:36 hangtod sa 2:22, anaa sa https://www.churchofjesuschrist.org/study/video/alma-8-15/2020-03-0500-alma-and-amulek-are-delivered-by-the-power-of-god-alma-8-15-1080p?lang=ceb ChurchofJesusChrist.org, ug sunda subay diha sa imong mga kasulatan.

• Unsa nga mga hugpong sa mga pulong sa bersikulo 14 ang nagpakita kon unsay gibati ni Alma sa dihang nadawat niya kini nga sugo?

• Unsa nga hugpong sa mga pulong sa bersikulo 18 ang naghulagway unsa ka dugayon si Alma sa pagsunod?

• Ngano sa imong hunahuna nga si Alma dali kaayong misunod bisan og siya mibati og ingon nga kasubo?

Kasinatian ni Amulek

Basaha ang Alma 8:19–21; 10:4–11 aron makita kon unsa ang sunod nga nahitabo. (Mahimong makatabang ang pagkahibalo nga si Amulek miasoy sa iyang kasinatian diha sa Alma 10:4–11.) Sulayi sa paghanduraw ang mga panghitabo samtang basahon nimo kini. Mahimo usab nimong tan-awon ang bidyo nga “Si Alma ug Amulek Naluwas pinaagi sa Gahom sa Dios” gikan sa time code 2:22 hangtod sa 4:03, anaa sa https://www.churchofjesuschrist.org/study/video/alma-8-15/2020-03-0500-alma-and-amulek-are-delivered-by-the-power-of-god-alma-8-15-1080p?lang=ceb ChurchofJesusChrist.org.

• Unsa ang atong nakat-onan sa Alma 10:4–6 mahitungod ni Amulek? Ngano kaha nga kini nga mga butang nakapalisod kaniya sa pagsunod sa Dios?

• Ngano sa imong hunahuna nga ang Langitnong Amahan nagpadayon sa pagtabang kang Amulek bisan og wala Siya mosunod kaniadto?

Basaha ang Alma 8:26–32 aron makita kon sa unsang paagi si Amulek ug Alma napanalanginan tungod sa ilang mga binuhatan.

• Unsa nga mga baroganan ang imong nakat-onan gikan sa asoy ni Alma ug Amulek?

Paminaw samtang ang mga estudyante nagpakigbahin. Isulat diha sa pisara ang bisan unsa nga mga baroganan. Pangutana nganong ang pagsabot niini nga mga baroganan importante. Gamita ang mga pulong sa mga estudyante sa pagsulat diha sa pisara og baroganan nga susama sa ubos.

Usa sa mga baroganan nga tingali imong nailhan mao ang kon kita maminaw ug mosunod sa Langitnong Amahan, Siya mopanalangin kanato ug sa uban. Atong mapaminaw ang pulong sa Dios sa nagkalainlaing paagi. Sama pananglit, si Alma ug Amulek parehong nakadungog sa pulong sa Dios gikan sa usa ka anghel.

Mahimong makatabang ang paghisgot uban sa mga estudyante sa nagkalain-laing mga paagi nga kita makadungog sa pulong sa Dios. Mahimo nimong iparebyo sa mga estudyante ang “Pagpadayag” diha sa Giya ngadto sa mga Kasulatan.

Pagpaminaw Kaniya

Ang kalihokan sa ubos gituyo aron matabangan ang mga estudyante nga mabuntog ang mga babag nga mahimo nilang atubangon sa pagpaminaw ug pagsunod sa Dios. Kini mahimong labing maayo nga buhaton isip panaghisgotan sa klase o sa gagmay nga mga grupo. Mahimong mopakigbahin ang mga estudyante og mga ideya ug ilista kini diha sa pisara. Dasiga ang mga estudyante sa pagpangutana ug pagtabang sa usag usa sa pagpangita sa mga tubag. Isip kabahin niini nga kalihokan, mahimo nimong isugyot o gamiton ang pipila sa mga ideya sa ubos.

Si Amulek miingon, “Ako gitawag sa makadaghan ug ako wala mopatalinghog” (Alma 10:6). Sa sayo pa sa iyang kinabuhi, si Alma wala usab maminaw sa Dios sulod sa usa ka panahon (tan-awa sa Mosiah 27:8).

Handurawa nga ang usa ka tawo nga imong nailhan naglisod sa pagpaminaw ug pagsunod sa Dios. Paggahin og pipila ka mga minuto sa pagbinayloay og mga ideya kon unsa ang makadasig niana nga tawo sa pagsalig sa Ginoo. Kini mahimong maglakip sa mosunod:

• Ang ehemplo ni Alma ug Amulek sa pagkamasulundon

• Mga ehemplo sa pagkamasulundon sa Manluluwas ngadto sa Amahan

• Ang ubang mga istorya sa kasulatan sa dihang adunay naminaw ug misunod sa Dios

• Mga panalangin nga imong nasinati samtang naningkamot ka sa pagsunod sa Dios

Ikonsiderar ang pagtan-aw sa bidyo nga “Ang Pagtuo Dili pinaagi sa Sulagma, apan pinaagi sa Pagpili” gikan sa time code 1:40 hangtod sa 4:25, anaa sa https://www.churchofjesuschrist.org/study/general-conference/2015/10/faith-is-not-by-chance-but-by-choice?lang=ceb ChurchofJesusChrist.org. Sa bidyo, si Elder Neil L. Andersen sa Korum sa Napulog Duha ka Apostoles naghulagway sa usa ka batan-ong lalaki kinsa matinud-anon ug masulundon nga milihok sumala sa pag-aghat atol sa panahon sa walay kasegurohan.

Pagdapit og pipila ka mga estudyante sa pagpakigbahin sa ilang mga hunahuna. Ikonsiderar usab ang pagpakigbahin sa imong mga hunahuna.

Paggahin og panahon sa pagrekord sa bisan unsang mga impresyon nga tingali imong nabatonan gikan sa Langitnong Amahan. Paghunahuna kon unsay imong mahimo aron mabuhat kana nga mga impresyon. Mahimong maglakip kini sa pagpasalig sa pagsunod sa piho nga mga sugo o mga pag-aghat ug bisan unsang mga lakang nga kinahanglan nimong buhaton. Kon ang pagsunod niini nga mga sugo lisod, ikonsiderar ang pag-ampo nga ang Langitnong Amahan motabang kanimo.

Dapita ang mga estudyante sa pagpakigbahin kon unsay gusto nilang mahinumdoman gikan sa mga ehemplo ni Alma ug Amulek.

Ipakigbahin ang imong pagpamatuod ngadto sa imong mga estudyante nga ang Langitnong Amahan motabang kanila samtang sila maningkamot sa pagpaminaw ug pagsunod Kaniya.

Komentaryo ug Background nga Impormasyon

Unsa ang pipila sa mga panalangin nga resulta sa atong pagkamasulundon sa Dios?

Si Presidente George Q. Cannon (1827–1901) miingon:

Ang pagkamasulundon ngadto sa Ebanghelyo modala sa [mga tawo] ngadto sa suod kaayo nga relasyon uban sa Ginoo. Nag-establisar kini og suod nga koneksiyon tali sa mga tawo sa yuta ug sa atong Halangdon nga Tiglalang didto sa mga langit. Mapatik ngadto sa hunahuna sa tawo ang usa ka pagbati sa hingpit nga pagsalig sa Makagagahom ug sa Iyang pagkaandam nga maminaw ug motubag sa pangaliya niadtong kinsa mosalig Kaniya. Sa mga panahon sa pagsulay ug kalisod kini nga pagsalig bililhon kaayo. Ang kasamok moabot sa indibidwal o sa katawhan, ang katalagman mohulga ug ingon og ang matag tawhanong paglaom mahubsan, apan, kon ang mga [tawo] mogamit sa mga pribilehiyo nga gidalit sa pagkamasulundon ngadto sa Ebanghelyo, sila anaa sa sigurado nga katindogan; ang ilang mga tiil anaa sa usa ka bato nga dili matarog. (Gospel Truth: Discourses and Writings of George Q. Cannon, sel. Jerreld L. Newquist [1987], 116)

Unsa ang atong makat-onan gikan ni Amulek?

Si Presidente Dieter F. Uchtdorf, samtang nagserbisyo sa Unang Kapangulohan, mitudlo:

Tingali, sama ni Amulek, nasayod mo sa inyong kasingkasing nga ang Ginoo “mitawag [kanimo] sa makadaghan” apan ikaw “wala maminaw.”

Bisan pa man, nakita sa Ginoo diha kaninyo unsay iyang nakita kang Amulek—ang potensiyal sa maisog nga sulugoon nga may mahinungdanong buhaton. May mga tawo nga nagkinahanglan nga maminaw sa inyong pagpamatuod. Adunay pangalagad nga walay laing makahatag sa samang paagi. Ang Ginoo misalig kaninyo sa Iyang balaang priesthood, nga naghupot sa balaang potensiyal sa pagpanalangin ug pagbayaw sa uban. Paminaw sa mga pagbati sa inyong kasingkasing ug sunda ang mga pag-aghat sa Espiritu. (Dieter F. Uchtdorf, “Magkat-on gikan ni Alma ug Amulek,” Liahona, Nob. 2016, 73)

Dugang nga mga Kalihokan sa Pagkat-on

Kabubut-on sa plano sa Langitnong Amahan

Si Alma mitudlo sa ebanghelyo ngadto sa katawhan sa Melek ug sa Ammonihah nga adunay nagkalain-lain nga mga resulta. Mahimong itandi sa mga estudyante ang mga reaksiyon sa mensahe ni Alma sa Alma 8:3–5, 8–13 ug hisgotan nganong gihatagan og bili sa Langitnong Amahan ang kabubut-on. Ang klase mahimong mohimo og lista sa inadlaw-adlaw nga mga pagpili nga makatabang nila nga maduol ngadto sa Langitnong Amahan ug sa mga pagpili nga makapahilayo kanila gikan Kaniya. Ikonsiderar ang pagdapit kanila sa paggamit sa ilang kabubut-on aron mas mapaduol ngadto sa Ginoo.

Pagdapit sa uban sa pagduol kang Jesukristo

Sila si Alma ug Amulek mao ang maayong mga ehemplo sa mga disipulo kinsa makanunayon ug mapailubon sa pagdapit sa uban sa pagduol kang Jesukristo. Ikonsiderar ang pagdapit sa klase sa pagbasa sa Alma 8:10–21, 27–32, mangita kon giunsa pagpakita ni Alma ug Amulek ang ilang pailob ug hugot nga pagtuo. Mahimong mopakigbahin ang mga estudyante og mga paagi nga sila mahimong makanunayon ug mapailobon samtang sila nagtinguha sa pagtabang sa uban sa pagduol ngadto kang Jesukristo. Mahimo silang magplano o mag-drama-drama kon unsaon nila pagtubag nga may gugma ug pailob kon adunay mobalibad sa pagdapit gikan kanila.

Nawad-an og kadasig si Alma

Ikonsiderar ang pagdapit sa mga estudyante sa paghunahuna kon sa unsang paagi gitabangan sa Ginoo si Alma sa dihang nawad-an siya og kadasig (tan-awa sa Alma 8:14). Mahimong makatabang nga makita kon giunsa pagtubag sa Ginoo ang mga kabalaka ni Alma (tan-awa sa bersikulo 15) ug unsay gibuhat ni Alma pagkahuman (tan-awa sa bersikulo 18). Dapita ang mga estudyante sa pagsulat og makapadasig nga mubo nga sulat ngadto sa usa ka tawo nga ilang nailhan nga tingali nawad-an og kadasig.

Ang Langitnong Amahan dili mobiya kanato

Ikonsiderar ang pagdapit sa mga estudyante sa pagtuon sa pipila sa mosunod nga mga asoy, mangita sa mga ehemplo sa Ginoo nga padayong nagkab-ot aron sa pagtabang sa mga tawo.

• Mga katawhan sa Melek (Alma 8:3–5)

• Mga katawhan sa Ammonihah (Alma 8:8–10, 13, 16, 18, 29)

• Alma (Alma 8:14–15, 30–32)

• Amulek (Alma 10:4–7, 11, 30–32)

Mahimo dayong ikonsiderar sa mga estudyante kon giunsa sa Ginoo pagtabang o nagtabang kanila.