Seminary
Alma 10–11: “Sumala sa Espiritu sa Ginoo”

“Alma 10–11: ‘Sumala sa Espiritu sa Ginoo’,” Manwal sa Magtutudlo sa Basahon ni Mormon (2024)

“Alma 10–11,” Manwal sa Magtutudlo sa Basahon ni Mormon

Alma 10–11

“Sumala sa Espiritu sa Ginoo”

Amulek ug Zeezrom

Nalingla ka na ba? Nahinumdom ka ba sa imong gibati? Sa dihang sila nagpamatuod ngadto sa mga katawhan sa Ammonihah, si Alma ug si Amulek gisukmatan sa mga tawo kinsa migamit og pagpanglingla aron pagsulay sa pagpahunong kanila. Kini nga pagpanglingla gipahibalo ngadto kang Alma ug Amulek pinaagi sa Balaang Espiritu. Kini nga leksiyon makatabang nimo nga mahimong mas maminaw sa Balaang Espiritu aron makahibalo sa kamatuoran ug makaila sa maliputon nga mga pagpanglingla sa kaaway.

Pagtabang sa mga tigkat-on sa pagkonektar sa mga kasulatan ngadto sa ilang mga kinabuhi.Kon ikonektar sa mga estudyante ang ilang nabasa sa mga kasulatan ngadto sa ilang mga sitwasyon, mas madasig sila sa pagkat-on ug paggamit sa mga pagtulun-an sa ebanghelyo. Makakita usab sila kon sa unsang paagi ang mga kasulatan naghatag og mga tubag ug direksiyon nga makagiya kanila sa tinuod nga mga sitwasyon sa kinabuhi.

Pagpangandam sa estudyante: Dapita ang mga estudyante sa pagpamalandong og mga paagi nga si Satanas mahimong mosulay sa paglingla kanila.

Mga Posibleng Kalihokan sa Pagkat-on

Pagbantay sa dautan

Si Elder Neil L. Andersen sa Korum sa Napulog Duha ka Apostoles mipakigbahin sa mosunod nga istorya sa usa ka higala kinsa nagtrabaho isip imbestigador sa gobyerno sa Estados Unidos. Pangitaa kon unsay imong makat-onan gikan niini nga kasinatian mahitungod sa paglikay sa pagpanglingla.

9:52
Elder Neil L. Andersen

Nag-imbestigar ang akong higala og mga grupo sa sindikato nga nagpayuhot og ilegal nga mga druga ngadto sa Estados Unidos.

Usa niana ka higayon, siya ug lain nga ahente miadto sa usa ka apartment diin ilang gikatahapan ang usa ka inila kaayo nga tigbaligya og druga nag-apud-apod og cocaine. Gihulagway sa akong higala kon unsay nahitabo:

“Nanuktok kami sa pultahan sa tigpayuhot og druga. Giablihan sa suspetsado ang pultahan, ug sa pagkakita kanamo, misulay sa pagsalipod sa among panan-aw. Apan ulahi na kaayo; nakita namo ang cocaine nga diha sa iyang lamisa.

“Usa ka lalaki ug babaye nga diha sa lamisa midali dayon sa paghipos sa cocaine. Kinahanglan nga santaon namo sila sa pagwagtang sa ebidensya, mao nga dali nakong gitukmod ang suspetsado kinsa miali sa kilid sa pultahan. Sa pagtulod nako kaniya, nagkasugat ang among tinan-awan. Kahibulongan, nga wala siya mopakita og kasuko o kahadlok. Nagpahiyom siya ngari kanako.

“Ang iyang mga mata ug ang mahigalaon nga pahiyom napakahunahuna kanako nga dili siya makahatag og kadaut, mao nga gibiyaan dayon nako siya ug misugod sa pagpaingon ngadto sa lamisa. Diha na karon sa akong luyo ang suspetsado. Sa kalit, gibati nako ang lahi, may gamhanang mando nga misulod sa akong hunahuna: “Pagbantay sa pagkadautan nga nagpaluyo diha sa nagpahiyom nga mga mata.’

“Gilingi dayon nako ang suspetsado. Ang iyang kamot diha sa iyang dakong bulsa sa atubangan. Sa walay langan gipugngan nako ang iyang kamot ug gibira gikan sa iyang bulsa. Diha pa nako makita, nga gikuptan sa iyang kamot, ang usa ka semi-automatic nga pistola nga andam nang ipabuto. Usa ka panaglayog ang misunod, ug akong gidis-armahan ang tawo.” (Neil L. Andersen, “Pagbantay sa Kadautan nga nagpaluyo sa Nagpahiyum nga mga Mata,” Liahona, Mayo 2005, 46)

  • Unsa ang mipatigbabaw diha kanimo gikan sa kasinatian nga gipakigbahin ni Elder Andersen?

  • Unsa ang mga paagi nga si Satanas tingali mosulay sa paglingla kanato karon?

Ikonsiderar ang pagsulat sa mga tubag sa mga estudyante diha sa pisara.

Samtang magtuon ka karon, pangitaa ang mga paagi nga imong mailhan ang panglimbong aron imong malikayan ang mga butang nga makadaot kanimo sa espirituhanong paagi.

Gipahimangnoan sa panglimbong

Imbis sa latid [outline] sa ubos, ang mga estudyante mahimong hatagan sa Alma 10:15–17; 11:21–25; 12:2–7 uban ang pagdapit sa pagtubag sa mosunod nga mga pangutana: Unsa nga pagpanglingla ang gigamit? Sa unsang paagi kini nga nahibaloan?

Sa dihang si Amulek mipamatuod ngadto sa mga katawhan sa Ammonihah nga siya gitawag sa Dios, pipila ka mga tawo ang natingala (tan-awa sa Alma 10:12). Siya “usa ka tawo nga dili yano og dungog” (Alma 10:4) taliwala sa iyang mga katawhan, ug siya miduyog kang Alma sa pagpamatuod batok kanila. Pipila ka hanas nga mga manlalaban gusto nga molingla kang Alma ug Amulek ug makakwarta sa proseso (tan-awa sa Alma 10:13; 11:20).

Basaha ang Alma 10:15–17, mangita kon giunsa pagreak ni Amulek niini nga mga manlalaban.

  • Sa unsang mga paagi nga ang mga panglimbong sama sa “mga laang o mga lit-ag”? (Alma 10:17).

Samtang magpadayon ka sa imong pagtuon, pangitaa kon sa unsang paagi si Amulek makasabot sa mga hunahuna ug mga laang sa mga manlalaban.

Si Zeezrom, usa sa mga manlalaban kinsa “hanas sa mga paagi sa yawa” (Alma 11:21), mibutang og laang.

Basaha ang Alma 11:21–25, mangita kon giunsa ni Zeezrom pagsulay sa paglingla ug pagtintal kang Amulek sa paglimod sa pagkaanaa sa Dios. Mahimong makatabang ang pagkahibalo nga ang “unom ka mga onti nga pilak” (Alma 11:22) maoy mga unom ka semana nga bayad sa usa ka manlalaban (tan-awa sa Alma 11:3, 11–13).

Aron mas masabtan kon unsa ang gitanyag ni Zeezrom kang Amulek, ang mga estudyante mahimong gustong mahibalo kon pila ang kita sa usa ka manlalaban sa inyong komunidad sulod sa unom ka semana.

  • Unsa ang imong nakat-onan gikan sa tubag ni Amulek?

Bisan kon si Amulek molimod sa Dios, si Zeezrom wala gayod magtinguha sa paghatag kaniya sa kwarta; gitanyagan lamang niya kini sa pagsulay sa pagdaot ug “paglaglag” ni Amulek (Alma 11:25).

Si Alma sa wala madugay mipasabot ngadto ni Zeezrom kon sa unsang paagi sila si Alma ug Amulek nakasabot sa iyang mga pagpanglingla ug mga laang. Basaha ang Alma 12:2–7, mangita sa tubag.

Samtang ipakigbahin sa mga estudyante ang unsay ilang nakaplagan, isulat diha sa pisara ang mosunod nga baroganan. Kon ang mga estudyante maglisod sa pagtubag, dapita sila sa pagbasa og usab sa Alma 12:3.

Usa ka kamatuoran nga atong makat-onan mao nga ang Dios makatabang kanato sa pag-ila sa mga panglimbong ni Satanas pinaagi sa Balaang Espiritu.

  • Sa unsang paagi nga ang istorya ni Elder Andersen usa ka ehemplo niini nga baroganan?

    Imbes nga ipangutana ang pangutana sa ubos, ikonsiderar ang pagbahin sa klase ngadto sa gagmay nga mga grupo aron makat-on unsaon sa pagpakigsulti sa Espiritu Santo. Dapita sila sa pagtuon sa mga kapanguhaan diha sa parentesis sa ubos ug ipataho unsay ilang nakaplagan. Samtang sila mopakigbahin, ikonsiderar ang pagpangutana, “Sa unsang paagi nga ang pagkahibalo niini nga impormasyon makatabang kanato kon kita mag-atubang og pagpanglimbong?”

  • Unsa ang pipila ka mga paagi nga ang Espiritu Santo makigsulti kanato? (Kon mapuslanon, ikonsiderar ang pagbasa sa Doktrina ug mga Pakigsaad 8:2–3; 9:7–9; 11:12 o pagtuon sa “Espiritu Santo” diha sa Giya ngadto sa mga Kasulatan.)

  • Sa unsang paagi nga ang mga pagpili nga atong gihimo makaapekto sa atong abilidad nga magiyahan sa Espiritu Santo?

Ikonsiderar ang pagmarka sa bisan unsa nga mga hugpong sa mga pulong diha sa Alma 11:22 nga nagpakita sa determinasyon ni Amulek sa pagsunod sa Espiritu. Pamalandongi kon sa unsang paagi kini nga pagpili nakatabang kaniya.

Paglikay sa pagpanglingla pinaagi sa pagkahibalo sa kamatuoran

Usa ka paagi nga si Satanas nagtinguha sa paglingla kanato mao ang paglibog sa atong pagsabot ni Jesukristo.

Imbes nga basahon ang mosunod nga mga bersikulo isip usa ka klase, ikonsiderar ang pagdapit og duha ka estudyante sa pag-adto sa atubangan sa klase ug basahon ang panagsultihanay ni Amulek ug Zeezrom. Ikonsiderar ang pag-imprinta sa teksto ug ipaklaro [highlight] ang duha ka bahin, tangtangon ang mga hugpong sa mga pulong sa asoy sama sa “ug siya mitubag” (Alma 11:29).

Basaha ang Alma 11:26–37, 40–41, mangita sa sayop nga mga pagtulun-an ni Zeezrom mahitungod ni Jesukristo ug sa unsang paagi mitubag si Amulek.

Aron matabangan ka nga makasabot niini nga mga bersikulo, ikonsiderar ang pagdrowing sa mosunod nga tsart diha sa imong journal sa pagtuon. Ubos sa matag pagtulun-an, isulat ang mga kinaiya, ideya, o pamatasan nga mahimong mosangpot sa matag pagtulun-an.

Ikonsiderar ang pagdrowing sa mosunod nga tsart diha sa pisara. Samtang motubag ang mga estudyante, isulat ang ilang mga hunahuna ubos sa tukma nga ulohan.

Sayop nga pagtulun-an: Si Jesukristo moluwas kanato “sa [atong] mga sala” nga walay paghinulsol (Alma 11:34).

Tinuod nga pagtulun-an: Si Jesukristo moluwas kanato gikan sa atong mga sala samtang kita kinasingkasing nga modangop ngadto Kaniya ug maghinulsol.

  • Ngano nga importante nga mahibalo nga si Jesukristo makaluwas kanato gikan sa atong mga sala apan dili diha sa atong mga sala?

  • Unsa ang imong nakat-onan gikan sa paagi sa pagtubag ni Amulek sa mga pangutana ni Zeezrom?

Mahimong gamiton sa mga estudyante ang mga pagpanglingla nga gisulat diha sa pisara sa pagsugod sa klase sa mosunod nga kalihokan.

Paghimo og listahan sa labing menos tulo ka mga tinud-anay nga mga paagi nga si Satanas mahimong mosulay sa paglingla sa mga tin-edyer karon. Mahimo nimong ilakip ang mga pagpanglingla nga giatubang ni Amulek, sama sa sayop nga mga pagtuo mahitungod sa Dios, sa saad sa bahandi o gahom, o mga pag-atake sa atong pagpamatuod sa Dios. Ang ubang posibleng mga pagpanglingla mao ang paghimo sa usa ka butang nga maayo nga makita nga dautan o vice versa (tan-awa sa Isaias 5:20) ug ang bakak nga walay ingon nga butang nga husto o sayop (tan-awa sa 2 Nephi 28:22).

Sunod sa matag paagi nga si Satanas tingali mosulay sa paglingla kanato, pagsulat og bisan usa ka paagi nga kita magtinguha og tabang gikan sa Dios pinaagi sa Espiritu Santo aron mabuntog kana nga pagtintal. Isulat ang piho nga mga butang nga imong nahibaloan mahitungod sa Espiritu Santo nga makatabang.

Dasiga ang mga estudyante sa pagdapit sa Espiritu Santo sa pagtabang kanila sa pagsukol sa pagpanglingla. Pagpamatuod sa tahas [role] sa Espiritu Santo ug sa panalangin nga Iyang mahimo diha sa ilang mga kinabuhi.