Rebyo 11 sa Doktrinal nga Kahanas

Isag-ulo ug Sabta

Ang pagsag-ulo sa mga tudling sa doktrinal nga kahanas ug pagsabot sa doktrina nga gitudlo niini makadapit sa Espiritu Santo sa imong kinabuhi ug makatabang kanimo nga mahimong mas mahisama ni Jesukristo. Kini nga leksiyon gituyo aron pagtabang kanimo sa pagsag-ulo sa mahinungdanon nga mga hugpong sa mga pulong sa kasulatan gikan sa unang 12 ka mga tudling sa doktrinal nga kahanas sa Basahon ni Mormon ug magtinguha og dugang nga panabot pinaagi sa pagpangutana ug pagtubag sa dinasig nga mga pangutana.

Tabangi ang mga estudyante nga makapalambo og mga kahanas sa pagtuon sa kasulatan.Dasiga ang mga estudyante sa pagpangutana diha sa klase ug atol sa ilang personal nga pagtuon. Ang pagkat-on sa pagpangutana ug pagtinguha og mga tubag gikan sa mga kasulatan makapalambo sa kasinatian sa pagtuon sa estudyante. Tabangi ang mga estudyante nga makasabot nga ang mga kasulatan magamit sa mga pangutana ug mga hagit nga ilang giatubang karon, dako man o gamay.

Pagpangandam sa estudyante: Dapita ang mga estudyante sa pagpili og usa gikan sa unang 12 ka mga tudling sa doktrinal nga kahanas nga gusto nilang makat-onan pa. Awhaga sila sa pagtambong sa klase nga andam sa pagpakigbahin sa tudling nga ilang gipili ug labing menos usa ka pangutana nga ilang gibati nga makatabang kanila nga makat-on og dugang mahitungod niana nga tudling.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa lugar o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Isag-ulo ang mga pakisayran ug ang mahinungdanon nga mga hugpong sa mga pulong sa kasulatan

Ikonsiderar ang pagpakita o paghatag sa mga estudyante sa mosunod nga handout ug dapita sila sa pagrebyo sa mga pakisayran ug sa mahinungdanon nga mga hugpong sa mga pulong sa kasulatan. Human sa pipila ka minuto, tan-awa kon unsa ka maayo nga nasag-ulo sa mga estudyante ang mga pakisayran pinaagi sa pagbasa sa usa ka mahinungdanon nga hugpong sa mga pulong sa kasulatan ug ipapangita nila ang tudling sa ilang mga kasulatan. Balika kini nga proseso nga adunay pipila ka nagkalainlaing mga pakisayran. Dayon mahimo nimong basahon og kusog ang usa sa mahinungdanon nga mga hugpong sa mga pulong sa kasulatan, mohunong panagsa aron tugotan ang mga estudyante sa pagsulat diha sa ilang journal sa sunod nga pulong o mga pulong. Balika kini nga proseso sa pipila ka higayon gamit ang nagkalainlaing mahinungdanon nga mga hugpong sa mga pulong sa kasulatan. Pahimoa ang mga estudyante og mubo nga sulat kon hain sa mga tudling sa doktrinal nga kahanas ang gusto nilang rebyohon pa.

Unang 12 ka Tudling sa Doktrinal nga Kahanas ug Mahinungdanon nga mga Hugpong sa mga Pulong

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

Pagpangutana og dinasig nga mga pangutana

Ang dinasig nga mga pangutana usa ka importante nga bahin sa proseso sa pagkat-on. Atol sa Iyang mortal nga pangalagad, ang Manluluwas kasagarang nangutana nga nagdapit sa mga tigkat-on sa paghunahuna, pagbati, ug paglihok sa mga kamatuoran nga Iyang gitudlo (tan-awa sa Mateo 16:13–16; Juan 6:66–69). Tingali namatikdan nimo ang usa ka ginikanan, magtutudlo, o lider sa Simbahan nga nangutana nga nakatabang kanimo nga mas masabtan ang ebanghelyo o makonekta ang imong nakat-onan sa imong kaugalingong kinabuhi. Ang pagpangutana ug pagtubag sa dinasig nga mga pangutana makahimo sa proseso sa pagkat-on nga mas makadani ug makahuluganon nga kasinatian alang kanimo.

Ikonsiderar ang paglista sa mosunod nga tulo ka kategoriya sa mga pangutana diha sa pisara. Aron maandam ang mga estudyante alang sa kalihokan, pagpili og usa sa unang 12 ka tudling sa doktrinal nga kahanas ug paghimo og pangutana gikan niana nga tudling alang sa matag kategoriya. Mahimo usab nimong dapiton ang mga estudyante sa pagsugyot og mga pangutana alang sa matag kategoriya. Mga ehemplo nga mga pangutana gamit ang 2 Nephi 32:8–9 gihatag.

Ang mosunod mao ang mga ehemplo sa nagkalainlaing mga matang sa mga pangutana nga mahimong magamit kon magtuon sa mga kasulatan. Ang mga ehemplo nga mga pangutana may kalabotan sa mga kamatuoran nga gitudlo sa 2 Nephi 32:8–9.

Mga pangutana aron matabangan ka nga makasabot sa konteksto sa mga kasulatan

• Kinsa ang nagsulti diha sa 2 Nephi 32:8–9?

• Kang kinsa siya nakigsulti? Ngano man?

Mga pangutana aron matabangan ka nga masabtan ang content o kahulugan sa mga kasulatan

Kini nga mga pangutana makatabang kanato sa pag-ila sa doktrina ug mga baroganan.

• Unsa ang tuyo sa tagsulat nga atong makat-onan?

• Unsa sa imong hunahuna ang gipasabot sa “mag-ampo sa kanunay, ug dili mawad-an sa paglaom”? (2 Nephi 32:9).

Mga pangutana aron matabangan ka nga makasabot sa doktrina ug mga baroganan diha sa mga kasulatan

• Sa imong hunahuna sa unsang paagi ang pag-ampo sa kanunay makaimpluwensiya sa atong relasyon uban sa Langitnong Amahan?

• Unsa ang makatabang kanato sa paghinumdom sa pag-ampo kanunay, bisan og gibati nato nga dili nato gusto?

Human sa paghatag og pananglitan sa pipila ka ehemplo nga mga pangutana uban sa mga estudyante, ikonsiderar ang pagbahin kanila ngadto sa mga parisan o gagmay nga mga grupo alang sa mosunod nga kalihokan:

Sa ilang mga grupo, papilia ang mga estudyante og usa sa unang 12 ka tudling sa doktrinal nga kahanas ug dungan nga basahon ang tibuok tudling. Dayon makahimo sila og bisan usa ka pangutana gikan sa matag usa sa tulo ka kategoriya diha sa pisara. Kon mahuman na sa mga estudyante ang paghimo sa ilang tulo ka pangutana, isagol sila sa laing parisan o grupo. Dapita ang unang pares o grupo sa pagpakigbahin sa ilang gipili nga tudling ug mga pangutana, ug dapita ang ikaduhang pares o grupo sa pagtubag sa matag pangutana. Dayon ipapuli-puli sa mga estudyante ang ilang mga tahas [roles].

Kon itugot sa panahon, balika ang kalihokan uban sa matag grupo nga mopili og lain nga tudling sa kasulatan.

Dasiga ang mga estudyante sa paggamit sa kahanas sa pagpangutana atol sa ilang personal nga pagtuon ug diha sa klase.