Alma 9

Hinumdomi ang mga Panalangin sa Ginoo

Alma ug Amulek

Sa unsang paagi ka gipanalanginan sa Ginoo? Unsa ang Iyang gipaabot nga imong buhaton human makadawat niadto nga mga panalangin? Sa dihang si Alma ug Amulek mitawag sa katawhan sa Ammonihah sa paghinulsol, ang katawhan misalikway sa ilang mga pagtulun-an. Si Alma mitudlo nga ang Ginoo milaom kanila nga mahimong mas matarong kay sa mga Lamanite, kinsa wala matudloi sa kamatuoran. Giawhag niya ang katawhan sa paghinumdom sa mga panalangin sa Ginoo. Kini nga leksiyon gituyo aron pagtabang kanimo sa pag-ila ug paghinumdom sa mga panalangin nga gihatag sa Ginoo diha kanimo.

Pagpangutana og mga pangutana nga makatabang sa mga estudyante nga makat-on pinaagi sa Espiritu Santo.Ang pipila ka maampingong gipili nga mga pulong makadugang sa pagkaepektibo sa usa ka pangutana. Ang maayong pagkahimo nga pangutana makapadani sa mga hunahuna ug kasingkasing sa imong mga estudyante ug maghatag sa Espiritu Santo og kahigayonan sa pagtudlo.

Pagpangandam sa estudyante: Ikonsiderar ang pagdapit sa mga estudyante sa paggahin og usa o duha ka minuto sa pagsulat og pipila ka mga ehemplo sa mga panalangin nga ilang nadawat gikan sa Langitnong Amahan ug ni Jesukristo.

Mga Posibleng Kalihokan sa Pagkat-on

Ang mga panalangin sa Ginoo kanimo

Sa imong journal sa pagtuon, paggahin og pipila ka minuto sa paglista sa mga panalangin nga imong nadawat gikan sa Langitnong Amahan ug ni Jesukristo. (Ikonsiderar ang paglakip sa mga panalangin nga miabot tungod kay miyembro ka sa Simbahan ni Kristo.)

Mahimo nimong dapiton ang pipila ka mga estudyante sa pagsulat og usa o duha sa mga panalangin o mga gasa nga ilang nadawat diha sa pisara. Pangutan-a ang mga estudyante kon unsay ilang gibati mahitungod niadto nga mga gasa ug ngano. Ikonsiderar ang pagdugang og mga panalangin nga imong gihunahuna usab.

• Sa unsang paagi nga ang paghinumdom niini nga mga panalangin ug mga gasa makaapekto kanimo?

• Unsa ka sagad nimong mahunahunaan kini nga mga panalangin? Aduna ka bay mahimo aron mas makatutok niini?

Samtang magtuon ka karon, makabaton ka og mga kahigayonan sa pagdugang sa imong listahan. Tinguhaa ang giya sa Langitnong Amahan sa pag-ila sa Iyang mga panalangin nganha kanimo ug sa pagkahibalo kon sa unsang paagi nimo kini mahinumdoman sa tibuok nimong kinabuhi.

Alma ug Amulek nagsangyaw ngadto sa katawhan sa Ammonihah

Sa dihang si Alma ug Amulek misangyaw sa pulong sa Dios ngadto sa katawhan sa Ammonihah, ang katawhan mga tig-a og kasingkasing.

Basaha ang mga pulong nga gisulti ni Alma ngadto kanila diha sa Alma 9:8–11, 20–22, mangita sa mga pulong ug mga hugpong sa mga pulong nga nagpakita sa mga panalangin nga gihatag sa Ginoo niini nga mga katawhan nga ilang nakalimtan.

• Unsa man ang imong nakit-an?

• Unsa nga mga kinaiya sa Ginoo ang gipaklaro [highlight] ni Alma sa bersikulo 11? (Ikonsiderar ang pagmarka niini nga mga kinaiya diha sa imong mga kasulatan.)

Mahimong makatabang ang pagkahibalo nga ang termino nga pagkamainantoson, nagpasabot sa pagpailob ug pagpugong sa Ginoo kon adunay hinungdan sa pagkasuko.

Paggahin og kadiyot sa pagpamalandong sa mga paagi nga ang Ginoo nagpakita kanimo og pailob. Mahimo nimong idugang kini nga mga ehemplo sa imong lista sa mga panalangin.

Ikonsiderar ang pagdapit sa mga estudyante sa pagpakigbahin sa ilang mga hunahuna.

Sa wala madugay, si Alma mipamatuod sa dugang nga mga kinaiya sa Ginoo nga makatabang kanato nga makasabot sa mensahe ni Alma. Basaha ang Alma 9:26 ug ikonsiderar ang pagmarka niini nga mga kinaiya. Mahimong makatabang ang pagkahibalo nga diha sa mga kasulatan ang pulong nga pagkamakiangayon, nagpasabot nga “patas” o “matarong.”

Samtang si Alma nagpadayon sa pagsangyaw, iyang gihatagan og gibug-aton nga si Jesukristo puno sa grasya, pagkamakiangayon, kamatuoran, pailub, kaluoy, ug pagkamainantoson. Pamalandongi nganong gusto ni Alma nga masabtan sa katawhan sa Ammonihah kini nga mga kinaiya sa Manluluwas.

Pagtandi ug pagpangita og kalainan sa duha ka tawo

Ang mga kasulatan kasagaran nga nagtandi o nagpakita og kalainan sa mga ideya, mga panghitabo, ug mga tawo sa paagi nga makatudlo sa mga baroganan sa ebanghelyo. Ang pagpangita niini nga mga pagtandi o kalainan mahimong usa ka mapuslanon nga kahanas sa pagtuon sa kasulatan. Gitandi ni Alma ang duha ka grupo sa mga tawo kinsa anaa sa lain-laing mga sitwasyon—ang mga Lamanite ug ang katawhan sa Ammonihah. Tubaga ang mosunod nga tsart diha sa imong journal. Pangitaa kon giunsa paghatag og gibug-aton ni Alma ang mga kinaiya sa Manluluwas.

Paghimo niini nga tsart diha sa pisara ug ipabuhat kini pag-usab sa mga estudyante diha sa ilang journal. Mahimo nimong bahinon ang klase ngadto sa duha ka grupo ug ipatuon sa usa ka grupo ang mga Lamanite ug ang usa tun-an ang mga tawo sa Ammonihah. O mahimo nimong bahinon ang imong klase ngadto sa gagmay nga mga grupo ug patubagan nila og dungan ang tsart.

	Unsa ang imong nahibaloan bahin sa mga tawo	Giunsa pagpakita sa Ginoo ang grasya, pagkamakiangayon, kamatuoran, pailub, kaluoy, o pagkamainantuson ngadto niini nga mga tawo
Mga Lamanite (Alma 9:14–17)
Mga katawhan sa Ammonihah (Alma 9:20–25)

Kon mahuman na ang mga estudyante, hangyoa sila sa pagpakigbahin sa unsay ilang nakat-onan. Mahimo nimong ipasabot nga bisan og ang Ginoo maluloy-on niadtong kinsa ignorante sa Iyang mga sugo (tan-awa sa Alma 9:16), kadtong kinsa tinuyo nga misukol batok sa ebanghelyo ug nagdumili sa paghinulsol makadawat og mas dako nga panghimaraot (tan-awa sa verses 23–24). Mahimo pa gani nimong ipa-cross-reference sa mga estudyante ang Doktrina ug mga Pakigsaad 82:3 niini nga mga bersikulo. Seguroha nga ang mga estudyante mobati ug makakita sa dakong kaluoy sa Ginoo nga gihatag ngadto sa tanan kinsa andam nga maghinulsol.

• Sa unsang paagi nga ang pagpadala kang Alma ug Amulek sa pagpasidaan ug pagpamatuod ngadto sa katawhan sa Ammonihah nagpakita sa kaluoy sa Ginoo?

• Ngano sa imong hunahuna nga ang mga pagtulun-an ni Alma mahitungod sa Dios sa Alma 9 importante nga atong hinumdoman sa atong panahon?

Unsa ang nahatag sa Ginoo kanimo?

Nahibulong si Alma kon unsa kadali nga nakalimot ang katawhan sa Ammonihah sa mga panalangin nga gihatag sa Ginoo kanila isip mga katawhan (tan-awa sa Alma 9:8–11). Aron matabangan sila nga maghinulsol ug mobalik ngadto sa Ginoo, gipahinumdoman sila ni Alma sa daghang mga panalangin nga ilang nadawat (tan-awa sa mga bersikulo 20–24).

• Unsa ang pipila ka mga rason nga kita makalimot sa unsay gibuhat sa Ginoo alang kanato?

Hatagi ang mga estudyante og panahon sa pagpamalandong sa mga panalangin nga personal nilang nadawat gikan sa Dios. Dasiga sila sa pagdugang sa lista nga ilang gihimo sa sinugdanan sa klase ug tabangi sila sa paghunahuna og mga paagi sa paghinumdom niini nga mga panalangin. Mahimo nimong ipakita ang mosunod nga mga pangutana aron hilom nga pamalandongan sa mga estudyante.

• Unsa ang “gipahibalo [sa Ginoo] nganha [kanimo] sumala sa [imong] mga tinguha, ug sa [imong] hugot nga pagtuo, ug mga pag-ampo”? (Alma 9:20).

• Sa unsang paagi ka napanalanginan sa mga gasa sa Espiritu nga gihisgotan diha sa Alma 9:21?

• Sa unsang paagi ka giluwas sa Dios gikan sa mga pagsulay? (Tan-awa sa Alma 9:22.)

Ikonsiderar ang pagdapit sa pipila ka mga estudyante sa pagpakigbahin sa pipila sa ilang mga tubag.

Paggahin og kadiyot sa pagbuhat og usa ka butang aron pagtabang kanimo sa paghinumdom sa mga panalangin nga gihatag sa Ginoo diha kanimo. Ang mosunod mao ang pipila ka mga ideya:

• Pagkuha og hulagway sa lista nga imong gihimo diha sa klase ug ibutang kini diin makita nimo kini kanunay, sama sa wallpaper sa imong telepono.

• Isulat ang imong mga pagbati diha sa imong journal sa pagtuon ug paghimo og plano nga irekord kanunay ang imong mga panalangin.

• Paghimo og pahinumdom sa imong kalendaryo aron kanunay nga mamalandong sa unsay gibuhat sa Ginoo alang kanimo.

Ikonsiderar ang pagdapit og pipila ka mga estudyante sa pagpakigbahin kon unsay ilang gibuhat o unsay ilang plano nga buhaton ug unsay ilang gibati niini. Mahimo usab nimong ipakigbahin ang imong kaugalingong mga plano.

Paghatag og pagpamatuod sa mga baroganan nga gitudlo niini nga leksiyon ug sa gugma sa Dios alang sa Iyang mga anak.

Komentaryo ug Background nga Impormasyon

Unsa ang pipila sa mga panalangin nga gihatag sa Ginoo ngadto sa mga miyembro sa Iyang Simbahan?

Si Elder Neil L. Andersen sa Korum sa Napulog Duha ka Apostoles mipakigbahin sa pipila ka mga gasa nga gihatag sa Ginoo kanato:

Elder Neil L. Andersen

Ang uban nangutana, “Dili ba adunay daghan sa laing mga tinuohan nga naghigugma ni Kristo?” Siyempre aduna! Apan, isip mga miyembro sa Ang Simbahan ni Jesukristo sa mga Santos sa Ulahing mga Adlaw, kay nakabaton og pagsaksi sa Iyang katinuod dili lang gikan sa Biblia apan gikan usab sa Basahon ni Mormon; nasayod nga ang Iyang priesthood napahiuli na sa yuta; nakahimo na og sagradong mga pakigsaad sa pagsunod Kaniya ug nakadawat na sa gasa sa Espiritu Santo; natugahan na og gahom diha sa Iyang balaan nga templo; ug nahimong kabahin sa pagpangandam alang sa Iyang mahimayaong pagbalik nganhi sa yuta, dili kita makatandi kon unsa kita ngadto sa uban nga wala pa nakadawat niining mga kamatuoran. ‘Alang kaniya ngadto kinsa daghan ang gihatag daghan ang gikinahanglan’ [Doktrina ug mga Pakigsaad 82:3].” (Neil L. Andersen, “Ayaw Gayod Pagbiya Kaniya,” Liahona, Nob. 2010, 41)

Si Sister Sheri L. Dew, kinsa nagserbisyo isip magtatambag sa Kinatibuk-ang Kapangulohan sa Relief Society, mipamatuod sa susama nga mga panalangin:

Sister Sheri L. Dew

Lahi kita. Lahi kita tungod sa atong mga pakigsaad, sa atong espirituhanong mga pribilehiyo, ug sa mga responsibilidad nga nalakip sa duha. Natugahan kita sa gahom ug nagasahan sa Espiritu Santo. Kita adunay buhi nga propeta nga naggiya kanato, mga ordinansa nga nagbugkos kanato ngadto sa Ginoo ug sa usag usa, ug ang gahom sa priesthood sa atong taliwala. Nakasabot kita kon asa kita nagbarog diha sa talagsaong plano sa kalipay. Ug nasayod kita nga ang Dios mao ang atong Amahan ug ang Iyang Anak mao ang atong walay kapakyasan nga Tigpataliwala.

Uban niining mga pribilehiyo moabot ang talagsaong responsibilidad, tungod kay “kaniya ngadto kinsa daghan ang gihatag daghan ang gikinahanglan” (Doktrina ug mga Pakigsaad 82:3). (Sheri L. Dew, “We Are Women of God,” Ensign, Nob. 1999, 98)

Dugang nga mga Kalihokan sa Pagkat-on

Alma 9:1–7. Ang reaksiyon sa katawhan sa Ammonihah

Kon mapuslanon, dapita ang mga estudyante sa pagbasa sa Alma 9:1–7, mangita kon giunsa pagsanong sa katawhan sa Ammonihah si Alma ug Amulek. Ikonsiderar ang pagpangutana sama sa mosunod: Unsa nga mga pulong o mga hugpong sa mga pulong ang nagpakita nga wala nila masabti ang Dios ug giunsa Niya paglihok taliwala sa Iyang mga anak? Sa unsang paagi ang ilang pagkawalay pagtuo nakaapekto sa ilang kaandam nga maminaw sa mga sulugoon sa Ginoo? Unsa ang imong nahibaloan mahitungod sa Dios nga nagtabang kanimo sa pagpaminaw sa iyang mga propeta?

Bidyo

Kon mapuslanon, ikonsiderar ang pagpakita sa bidyo nga “Si Alma ug Amulek Naluwas pinaagi sa Gahom sa Dios” (22:56) gikan sa mga time code 4:20 hangtod sa 6:23, anaa sa https://www.churchofjesuschrist.org/study/video/alma-8-15/2020-03-0500-alma-and-amulek-are-delivered-by-the-power-of-god-alma-8-15-1080p?lang=ceb ChurchofJesusChrist.org. Kini nga bidyo naghulagway sa usa ka gipamubo nga asoy sa unsay gipamatuod ni Alma ngadto sa katawhan sa Ammonihah ug kon sa unsang paagi siya gidawat nila.

Alma 10:22–23. “Mga pag-ampo sa mga matarong”

Kon ang imong mga estudyante makabenepisyo gikan sa paghisgot sa gahom sa mga pag-ampo sa mga matarong, ipasabot nga human si Alma mitudlo ug mipamatuod, siya hapit na dakpon. Si Amulek mibalda sa iyang asoy sa anghel nga mibisita kaniya. Dapita ang mga estudyante sa pagbasa sa Alma 10:22–23, mangita sa epekto sa mga pag-ampo sa mga matarong diha sa katawhan sa Ammonihah. Mahimo usab nga basahon sa mga estudyante ang Alma 62:40 ug Helaman 13:12–14 aron makita kon sa unsang paagi ang mga pag-ampo sa mga matarong nakaapekto sa mga Nephite atol sa mga adlaw ni Kapitan Moroni ug Samuel nga Lamanite. Dapita ang mga estudyante sa paghisgot kon sa unsang paagi ang mga pag-ampo sa mga matarong makapanalangin kanato ug sa uban karon.

Mahimong makatabang ang pagpasabot nga sa higayon nga ang mga matarong nangamatay o nawala na gikan sa Ammonihah, ang mga pag-ampo sa mga matarong mihunong sa pagpanalipod sa siyudad, ug “matag buhi nga kalag sa mga Ammonihahite namatay” pinaagi sa mga Lamanite. (Alma 16:9).