Alma 12

Usa ka Tig-a o Humok nga Kasingkasing

Unsa sa imong hunahuna ang gipasabot sa pagbaton og tig-a nga kasingkasing o humok nga kasingkasing ngadto sa Ginoo? Sa dihang si Zeezrom misugod sa pagpangutana kang Alma ug Amulek og sinsero nga mga pangutana, si Alma mitudlo nga kadtong dili mopatig-a sa ilang mga kasingkasing makakat-on sa mga butang sa Dios. Si Alma mitudlo sa plano sa katubsanan ug midasig sa katawhan sa pagsukod sa ilang mga kasingkasing. Kini nga leksiyon makatabang kanimo sa pagsukod sa imong kasingkasing ug sa imong kaandam sa pagdawat sa pulong sa Dios.

Dasiga ang mga tigkat-on sa pagpamalandong.Hatagi ang mga estudyante og panahon sa pagpamalandong sa unsay ilang nakat-onan mahitungod ni Jesukristo diha sa mga kasulatan ug sa mga pulong sa mga propeta. Dasiga sila sa pagpamalandong kon sa unsang paagi ang Iyang gahom gipakita diha sa mga kasulatan ug sa ilang kaugalingong mga kinabuhi.

Pagpangandam sa estudyante: Ikonsiderar ang paghatag sa matag estudyante og kopya sa pagsukod sa kaugalingon niini nga leksiyon. Dapita sila sa pagsukod sa ilang mga kaugalingon ug sa pagpamalandong kon sa unsang paagi ang ilang mga tubag makaapekto kanila.

Mga Posibleng Kalihokan sa Pagkat-on

Pagtandi sa kasingkasing ngadto sa kulonon [clay]

Ikonsiderar ang paghangyo sa duha ka estudyante sa paghimo og butang gikan sa kulonon [clay] sulod sa usa ka minuto. Kon mahimo, hatagi ang usa ka estudyante og humok nga kulonon [clay] ug ang lain nauga o tig-a nga kulonon. Kon adunay igo nga kulonon [clay], mahimo nimong hatagan ang matag estudyante sa klase og diyutay nga gidaghanon alang niini nga kalihokan.

• Sa unsang paagi ang paggamit sa humok o tig-a nga kulonon [clay] makaapekto sa imong abilidad sa paghulma niini?

Ikonsiderar ang pagdrowing og mga kasingkasing sama sa mosunod diha sa pisara.

Sa imong journal sa pagtuon, pagdrowing og duha ka kasingkasing, sulatan ang usa og “tig-a nga kasingkasing” ug ang lain “humok nga kasingkasing.” Mahimong makatabang ang pagkahibalo nga sa kasulatan ang kasingkasing kasagarang nagsimbolo sa “hunahuna ug kabubut-on” sa usa ka tawo (Giya ngadto sa mga Kasulatan, “Kasingkasing,” scriptures.ChurchofJesusChrist.org).

Itandi ang atong kasingkasing sa kulonon [clay] ug ang Ginoo sa tawo nga naghulma niini. Samtang magtuon ka niini nga leksiyon, pagtinguha sa tabang sa Ginoo sa pagtubag sa mosunod nga mga pangutana:

• Unsa ang gipasabot sa pagbaton og tig-a nga kasingkasing o humok nga kasingkasing? Nganong importante man ang kahimtang sa akong kasingkasing?

• Sa unsang mga paagi nga ako adunay tig-a nga kasingkasing o humok nga kasingkasing?

• Kon ang akong kasingkasing tig-a, unsaon nako pagtinguha sa tabang sa Ginoo sa pagpahumok niini?

Mahimong makatabang ang paglista niini nga mga pangutana diha sa pisara aron ang mga estudyante makasulat sa ilang mga tubag diha sa ilang mga journal sa pagtuon sa tibuok leksiyon. Kinahanglan nga dili laoman ang mga estudyante nga motubag niini nga mga pangutana niining puntoha sa leksiyon.

Samtang nagkat-on ka, ikonsiderar ang pagsulat og mga mubo nga sulat ubos sa matag kasingkasing nga imong gidrowing diha sa imong journal sa pagtuon.

Tig-a nga mga kasingkasing ug humok nga mga kasingkasing

Samtang magsugod kamo sa pagtuon sa Alma 12 nga dungan, mahimong makatabang ang pagpangutana sa mga estudyante kon unsay ilang nahinumdoman mahitungod ni Zeezrom ug sa iyang pagpakig-istorya ni Alma ug Amulek.

Si Zeezrom ug ang uban misulay sa paglingla ug pagdaot kang Alma ug Amulek pinaagi sa pagpangutana og mga pangutana nga gituyo sa paglaang kanila (tan-awa sa Alma 11:21). Si Amulek mitubag pinaagi sa Espiritu, nagpamatuod sa Manluluwas ug sa Kataposang Paghukom (tan-awa sa Alma 11:26–46). Si Alma mipasabot nga siya ug si Amulek nasayod pinaagi sa Espiritu sa mga pagpanglimbong ni Zeezrom (tan-awa sa Alma 12:3–6).

Basaha ang Alma 12:7–8, mangita sa unsay nahitabo ni Zeezrom.

• Unsa nga mga hugpong sa mga pulong ang nagpaila kanimo nga si Zeezrom nag-usab?

• Unsa kaha ang kalainan nga nahimo sa kinaiya ni Zeezrom ngadto sa iyang abilidad sa pagdawat og mga tubag?

Tungod kay gusto gayod ni Zeezrom nga masayod mahitungod sa Kataposang Paghukom, gigamit kini ni Alma nga kahigayonan sa pagtudlo mahitungod sa plano sa katubsanan sa Dios. Hinoon, si Alma una nga mipahimangno kang Zeezrom nga ang iyang kasingkasing kinahanglan nga matarong sa atubangan sa Dios.

Samtang imong basahon ang Alma 12:9–11, markahi ang mga pulong o mga hugpong sa mga pulong nga makatabang kanimo nga makasabot kon unsay mahitabo tungod sa kahimtang sa atong mga kasingkasing. Mahimong makatabang ang pagkahibalo nga ang “ mga misteryo sa Dios mao ang mga espirituhanon nga mga kamatuoran nga mahibaloan lamang pinaagi sa pagpadayag” (Giya ngadto sa mga Kasulatan, “Mga Misteryo sa Dios,” scriptures.churchofJesusChrist.org).

Dapita ang mga estudyante sa pagpakigbahin kon unsay ilang nakat-onan. Isulat diha sa pisara ang bisan unsang mga baroganan nga ilang ipakigbahin.

Duha ka baroganan nga tingali imong nasabtan mao nga (1) kon kita dili mopatig-a sa ang atong mga kasingkasing ug kita makugihon nga mamati sa pulong sa Dios, atong masayran ang mga misteryo sa Dios ug (2) kon kita mopatig-a sa atong mga kasingkasing, gamay ra ang atong madawat sa pulong sa Dios hangtod kita wala nay masayran mahitungod sa mga misteryo sa Dios. Ikonsiderar ang pagsulat sa matag kamatuoran tapad sa mga kasingkasing nga imong gidrowing sa imong journal.

Aron makaangkon og mas dakong pagsabot kon unsay gipasabot sa pagbaton og tig-a nga kasingkasing o unsay atong mabuhat alang sa Ginoo sa pagpahumok sa atong mga kasingkasing, basaha ang pipila sa mosunod nga mga bersikulo. Sunod sa katugbang nga mga kasingkasing diha sa imong journal sa pagtuon, isulat unsay imong nakat-onan o importante nga mga hugpong sa mga pulong gikan niini nga mga bersikulo ug ang mga bersikulo nga imong gibasa gikan sa Alma 12:7–11.

• Mga katawhan nga nagpatig-a sa ilang mga kasingkasing: 1 Nephi 15:3; 2 Nephi 33:2; Mosiah 11:29.

• Unsa ang gibuhat sa mga katawhan alang sa Ginoo sa pagpahumok sa ilang mga kasingkasing: 1 Nephi 2:16; Alma 24:8.

Dapita ang mga estudyante sa pagsulat diha sa pisara tupad sa duha ka kasingkasing kon unsay ilang nakat-onan o mga hugpong sa mga pulong gikan sa mga bersikulo. Duol sa humok nga kasingkasing, ang mga estudyante mahimong mosugyot og pipila sa mosunod nga mga ideya nga motultol ngadto sa humok nga kasingkasing: “nangamuyo ngadto sa Ginoo” (1 Nephi 2:16); “pagpakisayod … nga makugihon” mahitungod sa ebanghelyo (Alma 12:8); paghatag og “pagpaminaw ug kakugi”sa unsay gihatag sa Ginoo kanato (Alma 12:9); ug pagbuhat sa mga butang nga makadapit sa Iyang Espiritu sa atong kinabuhi (tan-awa sa Alma 24:8).

Dapita ang mga estudyante sa paghisgot nganong importante ang kahimtang sa atong kasingkasing. Usa ka paagi sa pagbuhat niini mao ang pagdapit og pipila ka mga estudyante nga moboluntaryo sa pagtubag sa mga pangutana sa usa ka panel. Mahimo silang molingkod sa mga lingkoranan sa atubangan sa lawak [room]. Ikonsiderar ang pagsulat sa mosunod nga mga pangutana diha sa pisara. Ang klase mahimong mangutana sa panel niini o sa ubang mga pangutana aron sa paghisgot sa kalambigitan sa kahimtang sa atong mga kasingkasing.

• Unsa sa imong hunahuna ang hitsura sa usa ka tawo nga mangutana nga adunay tig-a nga kasingkasing? Unsa kaha ang hitsura sa paghangyo sa paghatag og “pagpaminaw ug kakugi” (Alma 12:9) ngadto sa Ginoo?

• Ngano kaha nga kita usahay mobati nga matintal nga mopatig-a sa atong mga kasingkasing?

• Ngano sa imong hunahuna nga ang kahimtang sa atong kasingkasing ngadto sa Ginoo makahimo og ingon nga kalainan sa atong mga kinabuhi?

Plano sa Dios sa katubsanan

Tungod kay si Zeezrom nagsugod sa pagbaton og sinsero nga tinguha sa pagsabot sa pagkabanhaw ug sa Adlaw sa Paghukom, si Alma mitudlo kaniya mahitungod sa plano sa Dios sa katubsanan. Siya mitudlo niini nga kinabuhi nga “usa ka panahon sa pagpangandam sa pagsugat sa Dios” ug mahitungod sa importante nga tahas [role] sa Manluluwas sa pagbuntog sa atong mga sala ug kamatayon (tan-awa sa Alma 12:16–18, 24–28, 33). Iyang gipunting ang kamahinungdanon sa dili pagpatig-a sa atong mga kasingkasing.

Ikonsiderar ang pagdapit sa mga estudyante sa pagpiyong sa ilang mga mata samtang ilang buhaton ang mosunod.

Paggahin og kadiyot sa paghanduraw kon sama sa unsa kaha kon mobarog sa atubangan sa Dios sa Kataposang Paghukom human sa pagpuyo uban sa matig-a nga kasingkasing. Handurawa usab kon sama sa unsa kaha kini human sa pagpuyo nga adunay humok nga kasingkasing.

Basaha ang Alma 12:12–15, 33–37, mangita kon sa unsang paagi ang imong kasingkasing makaapekto sa imong relasyon sa Langitnong Amahan ug ni Jesukristo sa Kataposang Paghukom. Mahimo nimong markahan ang importante nga mga pulong o mga hugpong sa mga pulong diha sa imong mga kasulatan.

• Sumala sa Alma 12:33–34, nganong importante man nga dili magpatig-a sa atong mga kasingkasing ug maghinulsol?

• Sa unsang paagi nga ang Manluluwas usa ka hingpit nga ehemplo sa pagbaton og humok ug mapainubsanon nga kasingkasing ngadto sa Iyang Amahan? (Tan-awa sa Mateo 26:39; 2 Nephi 31:4–7; Doktrina ug mga Pakigsaad 19:18–19.)

Imong kasingkasing

Tabangi ang mga estudyante sa paghimo og personal nga pagsusi sa ilang mga kasingkasing. Kini kinahanglan nga usa ka pribado nga kasinatian alang sa matag estudyante. Mahimo nimong gamiton ang mosunod nga pagsukod o paghimo og kaugalingon nimong pagsukod. Mahimo nimong ipakita diha sa pisara ang mga instruksiyon ug mga pamahayag, ug mahimong irekord sa mga estudyante ang ilang mga tubag diha sa ilang mga journal.

Aron matabangan ka sa pagsukod sa imong kaugalingong kasingkasing, tubaga ang mosunod nga mga pangutana sa sukdanan gikan sa 1 ngadto sa 5, nga ang 1 nagpasabot nga “dili gayod tinuod kanako” ug 5 nagpasabot nga “kanunay nga tinuod kanako.”

• Ako gusto og giya gikan sa Langitnong Amahan sa tanang mga aspeto sa akong kinabuhi.

• Ako andam nga mosunod sa Langitnong Amahan.

• Ako modawat og koreksiyon.

• Akong gibati ang panginahanglan sa tabang sa Manluluwas sa akong kinabuhi.

• Ako andam nga modangop sa Manluluwas ug maghinulsol.

Aron matabangan ang mga estudyante sa pagpamalandong sa unsay ilang nakat-onan niini nga leksiyon, ipakigbahin ang mosunod nga senaryo ug awhaga ang mga estudyante sa paggamit sa mga kasulatan sa ilang tubag.

Handurawa nga adunay mibati nga sila adunay tig-a nga kasingkasing sa pipila ka mga paagi ug nagtinguha sa tabang sa Ginoo sa pagpahumok niini. Unsaon nimo paggamit ang imong nakat-onan karon sa pagtabang kanila? Mahimo usab nimong ipakigbahin ang ehemplo sa Manluluwas ug ang imong kaugalingong personal nga mga kasinatian.

Ikonsiderar ang pagtapos pinaagi sa pagpakigbahin sa imong pagpamatuod sa mga kamatuoran niini nga leksiyon ug sa abilidad sa Ginoo sa pagpahumok sa atong mga kasingkasing aron makadawat og dugang pa sa Iyang mga pulong.

Komentaryo ug Background nga Impormasyon

Alma 12:10–11. Unsay kalainan niadtong nagpatig-a sa ilang mga kasingkasing ug niadtong wala?

Si Elder Donald L. Hallstrom sa Seventy mitudlo:

Si Apostol James miingon, “Hinoon tumana ninyo ang pulong, ug dili kay magpaminaw ra kamo niini” (Santiago 1:22).

Pipila kanato “namati” nga nagpili ug “nagbuhat” kon kini sayon. Apan alang niadtong kinsa naghatag sa ilang kasingkasing ug hunahuna ngadto sa Ginoo, kon ang palas-anon magaan man o mabug-at walay kalainan. Atong gipakita ang usa ka gipahinungod nga kasingkasing ug hunahuna pinaagi sa makanunayong pagsunod sa mga sugo sa Dios nga walay pagsapayan unsa ka lisod ang mga kahimtang. (Donald L. Hallstrom, “The Heart and a Willing Mind [Ang Kasingkasing ug usa ka Andam nga Hunahuna],” Ensign, Hun. 2011, 32)

Unsa ang akong mabuhat aron mapili ang kahimtang sa akong kasingkasing?

Samtang nag-alagad isip sakop sa Seventy, si Elder Gerald N. Lund mipasabot:

Ang mainampingong pagtugkad sa gipitik sa atong mga kasingkasing maoy usa ka labing angay nato nga buhaton niini nga kinabuhi. …

… Ang kahimtang sa atong mga kasingkasing makaapekto sa atong pagbati sa espirituhanong mga butang. Buhaton natong kabahin sa atong matag adlaw nga pagpaningkamot sa pagbukas sa atong mga kasingkasing ngadto sa Espiritu. Kay kita man ang mga magbalantay sa atong mga kasingkasing, kita makapili sa pagbuhat sa ingon. Kita makapili unsay atong pasudlon o dili pasudlon. Maayo kay ang Ginoo buot gayod nga motabang nato pagpili nga maalamon. (Gerald N. Lund, “Pagbukas sa Atong mga Kasingkasing,” Liahona, Mayo 2008, 33–34)

Dugang nga mga Kalihokan sa Pagkat-on

Tig-a nga mga kasingkasing

Mahimong makatabang alang sa mga estudyante ang pagtuon sa mga bersikulo sa kasulatan nga nagtudlo mahitungod sa mga sangpotanan sa pagbaton og katig-a sa kasingkasing. Ikonsiderar ang pagpares sa mga estudyante ug i-assign sila sa usa sa mosunod nga mga bloke sa kasulatan: Mga Hebreohanon 3:12–19; 1 Nephi 15:7–11; Alma 34:30–35; 3 Nephi 2:1–3. Dapita ang mga estudyante sa pagbasa sa mga bersikulo nga dungan. Ang usa ka estudyante mahimong mangita kon giunsa pagpatig-a sa mga katawhan ang ilang mga kasingkasing samtang ang laing estudyante mangita sa mga sangpotanan.

Alma mipamatuod ni Jesukristo

Aron matabangan ang mga estudyante nga mobati sa kamatuoran sa pagpamatuod ni Alma nga narekord sa Alma 12–13, ikonsiderar ang paggamit sa bidyo nga “Si Alma Nagpasidaan ni Zeezrom” (3:59), anaa sa https://www.churchofjesuschrist.org/study/video/alma-8-15/2020-03-0550-alma-warns-zeezrom-alma-12-13-1080p?lang=ceb ChurchofJesusChrist.org. Dapita ang mga estudyante sa pagpaminaw sa mga sangpotanan sa pagpatig-a sa atong mga kasingkasing ug sa mga panalangin nga maanaa pinaagi ni Jesukristo niadtong wala mopatig-a sa ilang mga kasingkasing. Ikonsiderar ang paghunong sa bidyo sa lain-laing mga dapit aron mahatagan og gibug-aton ug dayon basaha ug hisgoti ang mga detalye nga labing mapuslanon sa imong mga estudyante.

Alma 12:19–37. Ang plano sa katubsanan

Kon makabenepisyo ang mga estudyante ang paghisgot og dugang bahin sa plano sa katubsanan, ipasabot nga usa ka tawo nga ginganlan og Antionah, kinsa mao ang usa sa labaw nga mga magmamando sa Ammonihah, nangutana kabahin sa unsay gitudlo ni Alma ug Amulek mahitungod sa pagkabanhaw. Siya miangkon nga ang mga kasulatan nagtudlo nga kita dili mabanhaw o mabuhi sa kahangtoran tungod kay ang Dios mipugong ni Adan ug Eva sa pagkaon sa bunga sa kahoy sa kinabuhi human sila makakaon sa gidili nga bunga sa Tanaman sa Eden. (Tan-awa sa Alma 12:20–21.)

Basaha ang Alma 12:22–37, mangita kon giunsa pagtubag ni Alma pinaagi sa pagtudlo mahitungod sa plano sa katubsanan. Ikonsiderar ang paghisgot sa atong katuyoan dinhi sa yuta (tan-awa sa Alma 12:24) ug unsay gibuhat sa Langitnong Amahan ug ni Jesukristo alang kanato aron makabalik sa Ilang presensiya (tan-awa sa Alma 12:25, 30, 32–34).

Alma 12:32. Ang plano sa kaluwasan ug mga sugo

Pangutan-a ang mga estudyante kon ang Dios mitudlo ba kanato sa plano sa kaluwasan o mihatag kanato og una sa mga sugo. Dapita sila sa pagbasa sa Alma 12:32 aron makit-an ang tubag. Dapita ang mga estudyante sa pagdrowing o pag-outline sa plano sa kaluwasan diha sa ilang mga journal sa pagtuon ug sa pagpasabot ngadto sa usa ka pares [partner] o sa gagmay nga grupo kon sa unsang paagi ang pagkahibalo niini makatabang nato nga makasabot nganong kinahanglan natong tumanon ang mga sugo.