« អាលម៉ា ៨ ៖ ការស្តាប់ និងការគោរពតាមព្រះវរបិតាសួគ៌ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ៨ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ៨
ការស្តាប់ និងការគោរពតាមព្រះវរបិតាសួគ៌
ការគោរពតាមព្រះវរបិតាសួគ៌អាចជាការលំបាក ប៉ុន្តែវានាំទៅរកសុភមង្គលដ៏អស្ចារ្យបំផុត ។ នៅពេល អាលម៉ា និង អាមូលេក បានអនុវត្តសេចក្តីជំនឿ ហើយធ្វើតាមការណែនាំរបស់ព្រះ នោះព្រះបានប្រទានពរដល់ពួកលោក និងអ្នកដែលនៅជុំវិញពួកលោក ។ មេរៀននេះអាចជួយអ្នកស្តាប់ និងគោរពតាមព្រះវរបិតាសួគ៌ក្នុងជីវិតរបស់អ្នក ។
សូមជួយសិស្សឲ្យមានអារម្មណ៍ថា ការរួមចំណែករបស់ពួកគេមានតម្លៃ ។ការស្តាប់តម្រូវឲ្យគ្រូបង្រៀនផ្តោតលើតម្រូវការរបស់សិស្ស ច្រើនជាងអ្វីដែលមាននៅក្នុងគ្រោងមេរៀនបន្ទាប់ ។ សូមមានឆន្ទៈក្នុងការញែកចេញនូវអ្វីដែលអ្នកបានគ្រោងទុក តាមការបំផុសគំនិតពីព្រះវិញ្ញាណ ហើយស្តាប់ការយល់ឃើញរបស់សិស្ស ។ សូមអនុញ្ញាតឲ្យពួកគេដឹងតាមរយៈពាក្យសម្ដី និងទង្វើរបស់អ្នក ថាអ្នកចង់ស្ដាប់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យអធិស្ឋាន ហើយទូលសួរព្រះវរបិតាសួគ៌នូវអ្វីដែលទ្រង់សព្វព្រះទ័យឲ្យពួកគេធ្វើ ដើម្បីដើរតាមទ្រង់កាន់តែពេញលេញ ។
សកម្មភាពរៀនសូត្រដែលអាចមាន
ការធ្វើតាមព្រះវរបិតាសួគ៌
បើវាទាក់ទងនឹងសិស្សច្រើនជាងឧទាហរណ៍ខាងក្រោម សូមចាប់ផ្តើមដោយការអញ្ជើញសិស្សឲ្យចែកចាយរឿងពិបាកដែលព្រះអម្ចាស់អាចនឹងត្រាស់បង្គាប់ពួកគេឲ្យធ្វើ ។
សូមគិតអំពីអារម្មណ៍របស់អ្នក បើព្រះវរបិតាសួគ៌បានសុំឲ្យអ្នកធ្វើកិច្ចការដូចខាងក្រោម ហើយហេតុអ្វីបានជាអ្នកនឹងមានអារម្មណ៍បែបនោះ ៖
-
ចែកចាយដំណឹងល្អជាមួយនរណាម្នាក់ដែលបានបដិសេធការអញ្ជើញរបស់អ្នកកាលពីអតីតកាល ។
-
ធ្វើជាមិត្ត និងជួយនរណាម្នាក់នៅក្នុងសាលារបស់អ្នកដែលគេមិនចូលចិត្ត ឬត្រូវបានបដិសេធ ។
សូមអញ្ជើញសិស្សពីរបីនាក់ឲ្យចែកចាយពីអារម្មណ៍ និងមូលហេតុរបស់ពួកគេ ។
-
តើបទបញ្ញត្តិ ឬការបំផុសគំនិតអ្វីខ្លះទៀតដែលព្រះវរបិតាសួគ៌អាចនឹងប្រទានដល់យើងដែលអាចពិបាកទទួលយក និងគោរពតាម ? ហេតុអ្វីស្ថានភាពទាំងនេះពិបាកម្ល៉េះ ?
នៅក្នុងជំពូកដែលអ្នកនឹងសិក្សាថ្ងៃនេះ ព្រះបានណែនាំ អាលម៉ាឲ្យប្រឈមមុខនឹងស្ថានភាពស្រដៀងនឹងស្ថានភាពប្រឌិដ្ឋទីមួយខាងលើ ហើយអាមូលេកបានប្រឈមមុខនឹងស្ថានភាពស្រដៀងគ្នានឹងស្ថានភាពប្រឌិដ្ឋទីពីរ ។ សូមចំណាយពេលមួយភ្លែតដើម្បីសញ្ជឹងគិតថា តើមានបទបញ្ញត្តិ ឬការបំផុសគំនិតពីព្រះដែលពិបាកសម្រាប់អ្នកក្នុងការគោរពតាមឬអត់ ។ នៅពេលអ្នកសិក្សា សូមរកមើលរបៀបដែល អាលម៉ា និង អាមូលេក បានយកឈ្នះលើឧបសគ្គរបស់ពួកលោក ហើយធ្វើតាមព្រះបញ្ញត្តិរបស់ព្រះ សូមស្វែងរកជំនួយពីព្រះវរបិតាសួគ៌ដើម្បីដឹងពីរបៀបដែលអ្នកអាចស្តាប់ និងធ្វើតាមទ្រង់កាន់តែប្រសើរឡើង ។
វាអាចមានប្រយោជន៍សម្រាប់សិស្ស ក្នុងការធ្វើការជាមួយនឹងមិត្តរួមថ្នាក់ម្នាក់ដើម្បីអាន និងចែកចាយដំណើររឿងរបស់ អាលម៉ា និង អាមូលេក ដូចមានសរសេរនៅក្រោមចំណងជើងខុសគ្នាខាងក្រោម ។ ឬអញ្ជើញសិស្សពាក់កណ្តាលថ្នាក់ឲ្យអានដំណើររឿងរបស់អាលម៉ា ហើយពាក់កណ្តាលថ្នាក់ទៀតអានដំណើររឿងរបស់អាមូលេក ។ បន្ទាប់មកសិស្សអាចចាប់ដៃគូជាមួយមិត្តរួមថ្នាក់ ដែលអានដំណើររឿងផ្សេងទៀត ហើយពន្យល់គ្នាទៅវិញទៅមកអំពីអ្វីដែលពួកគេអាន ។ សូមបង្ហាញសំណួរដែលភ្ជាប់មកជាមួយដើម្បីសិស្សអាចមើលសំណួរនេះនៅពេលពួកគេអាន ។
បទពិសោធន៍របស់អាលម៉ា
សូមអាន អាលម៉ា ៨:៨–១៨ ដោយរកមើលអ្វីដែលព្រះបានបង្គាប់ឲ្យអាលម៉ាធ្វើ និងមូលហេតុដែលវាពិបាកសម្រាប់លោក ។ សូមព្យាយាមស្រមៃមើលពីព្រឹត្តិការណ៍ទាំងឡាយនៅពេលអ្នកអានវា ។ អ្នកប្រហែលជាចង់មើលវីដេអូ « Alma and Amulek Are Delivered by the Power of God » ចាប់ពីនាទីទី ០:៣៦ ដល់នាទីទី ២:២២ ដែលមាននៅ ChurchofJesusChrist.orgហើយផ្ទៀងតាមនៅក្នុងបទគម្ពីររបស់អ្នក ។
បទពិសោធន៍របស់អាមូលេក
សូមអាន អាលម៉ា ៨:១៩–២១; ១០:៤–១១ ដើម្បីមើលអ្វីដែលបានកើតឡើងបន្ទាប់ ។ ( វាប្រហែលមានប្រយោជន៍ក្នុងការដឹងថា អាមូលេកភ្ជាប់ទំនាក់ទំនងនៃបទពិសោធន៍របស់លោកនៅក្នុង អាលម៉ា ១០:៤–១១ ) ។ សូមព្យាយាមស្រមៃមើលពីព្រឹត្តិការណ៍ទាំងឡាយនៅពេលអ្នកអានវា ។ អ្នកប្រហែលជាចង់បន្តមើលវីដេអូ « Alma and Amulek Are Delivered by the Power of God » ចាប់ពីនាទីទី ២:២២ ដល់នាទីទី ៤:០៣ ដែលមាននៅ ChurchofJesusChrist.org.
-
តើយើងរៀនអ្វីខ្លះនៅក្នុង អាលម៉ា ១០:៤–៦ អំពីអាមូលេក ? ហេតុអ្វីកត្តាទាំងនេះបានធ្វើឲ្យលោកពិបាកគោរពតាមព្រះ ?
-
តើអ្នកគិតថាហេតុអ្វីបានជាព្រះវរបិតាសួគ៌បានបន្តឈោងទៅរកអាមូលេក ទោះបីជាលោកមិនបានគោរពតាមកាលពីអតីតកាលនោះ ?
សូមអាន អាលម៉ា ៨:២៦–៣២ ដើម្បីមើលពីរបៀបដែល អាមូលេក និង អាលម៉ាបានទទួលពរសម្រាប់ទង្វើរបស់ពួកលោក ។
-
តើគោលការណ៍អ្វីខ្លះដែលអ្នកបានរៀនពីដំណើររឿងរបស់ អាលម៉ា និងអាមូលេក ?
សូមស្តាប់នៅពេលសិស្សចែកចាយ ។ សូមសរសេរគោលការណ៍ណាមួយនៅលើក្ដារខៀន ។ សូមសួរថាហេតុអ្វីបានជាការយល់ដឹងអំពីគោលការណ៍ទាំងនេះមានសារៈសំខាន់ ។ សូមប្រើពាក្យរបស់សិស្សដើម្បីសរសេរនៅលើក្ដារខៀននូវគោលការណ៍ស្រដៀងនឹងគោលការណ៍ខាងក្រោម ។
គោលការណ៍មួយនៅក្នុងចំណោមគោលការណ៍ដែលអ្នកប្រហែលជាបានរកឃើញគឺ នៅពេលយើងស្តាប់ និងគោរពតាមព្រះវរបិតាសួគ៌ នោះទ្រង់ប្រទានពរដល់យើង និងអ្នកដទៃ ។ យើងអាចស្តាប់ព្រះបន្ទូលរបស់ព្រះតាមរបៀបផ្សេងៗគ្នា ។ ឧទាហរណ៍ ៖ ទាំងអាលម៉ា និង អាមូលេក បានស្តាប់ព្រះបន្ទូលរបស់ព្រះពីទេវតាមួយអង្គ ។
វាប្រហែលជាមានប្រយោជន៍ក្នុងការពិភាក្សាជាមួយសិស្ស អំពីរបៀបផ្សេងៗដែលយើងអាចស្តាប់ព្រះបន្ទូលរបស់ព្រះ ។ អ្នកប្រហែលជាចង់ឲ្យសិស្សមើលពាក្យ « វិវរណៈ » នៅក្នុង សេចក្ដីណែនាំដល់បទគម្ពីរទាំងឡាយ ឬ Bible Dictionary ។
ការស្តាប់ទ្រង់
សកម្មភាពខាងក្រោមមានគោលបំណងជួយសិស្សឲ្យយកឈ្នះលើឧបសគ្គ ដែលពួកគេអាចប្រឈមមុខនឹងការស្តាប់ និងការគោរពតាមព្រះ ។ នេះអាចជាការល្អបំផុតដើម្បីធ្វើជាកិច្ចពិភាក្សាក្នុងថ្នាក់ ឬជាក្រុមតូចៗ ។ សិស្សអាចចែកចាយគំនិត និងសរសេរវានៅលើក្ដារខៀន ។ សូមលើកទឹកចិត្តសិស្សឲ្យសួរសំណួរ ហើយជួយគ្នាទៅវិញទៅមករកចម្លើយ ។ ជាផ្នែកមួយនៃសកម្មភាពនេះ អ្នកអាចណែនាំ ឬប្រើគំនិតមួយចំនួនខាងក្រោម ។
អាមូលេកបាននិយាយថា « ខ្ញុំត្រូវបានហៅជាច្រើនដង តែខ្ញុំធ្វើជាមិនឮ » ( អាលម៉ា ១០:៦ ) ។ កាលពីមុនអាលម៉ាក៏មិនបានស្តាប់ព្រះមួយរយៈដែរ( សូមមើល ម៉ូសាយ ២៧:៨ ) ។
សូមស្រមៃថា នរណាម្នាក់ដែលអ្នកស្គាល់កំពុងមានការលំបាកក្នុងការស្តាប់ និងគោរពតាមព្រះ ។ សូមចំណាយពេលពីរបីនាទីដើម្បីគិតគូរអំពីអ្វីដែលអាចជំរុញទឹកចិត្តបុគ្គលនោះឲ្យទុកចិត្តលើព្រះអម្ចាស់ ។ ការណ៍នេះអាចរួមមានដូចខាងក្រោមនេះ ៖
-
គំរូរបស់ អាលម៉ា និងអាមូលេកអំពីការគោរពប្រតិបត្តិ
-
គំរូពីការប្រត្តិបត្តិរបស់ព្រះអង្គសង្គ្រោះចំពោះព្រះវរបិតា
-
ដំណើររឿងក្នុងព្រះគម្ពីរផ្សេងទៀត ពេលនរណាម្នាក់បានស្តាប់ ហើយគោរពតាមព្រះ
-
ពរជ័យដែលអ្នកបានដកពិសោធពេលអ្នកបានព្យាយាមគោរពតាមព្រះ
សូមពិចារណាមើលវីដេអូ « Faith Is Not by Chance, but by Choice » ចាប់ពីនាទីទី ១:៤០ ដល់នាទីទី ៤:២៥ ដែលមាននៅ ChurchofJesusChrist.org. នៅក្នុងវីដេអូនេះ អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ពិពណ៌នាអំពីយុវជនម្នាក់ ដែលធ្វើសកម្មភាពដោយស្មោះត្រង់ និងដោយគោរពប្រត្តិបត្តិតាមការបំផុសគំនិតក្នុងអំឡុងពេលដែលគ្មានភាពប្រាកដប្រជា ។
សូមអញ្ជើញសិស្សបីបួននាក់ឲ្យចែកចាយគំនិតរបស់ពួកគេ ។ សូមពិចារណាចែកចាយគំនិតរបស់អ្នកផងដែរ ។
សូមចំណាយពេលខ្លះដើម្បីកត់ត្រាចំណាប់អារម្មណ៍ណាមួយ ដែលអ្នកប្រហែលជាមានពីព្រះវរបិតាសួគ៌ ។ សូមគិតអំពីអ្វីដែលអ្នកអាចធ្វើបានដើម្បីធ្វើសកម្មភាពតាមចំណាប់អារម្មណ៍ទាំងនោះ ។ ការណ៍នេះអាចរួមបញ្ចូលទាំងការប្តេជ្ញាចិត្តដើម្បីគោរពតាមបទបញ្ញត្តិជាក់លាក់ ឬការបំផុសគំនិត និងជំហានណាមួយដែលអ្នកគួរធ្វើ ។ បើការគោរពតាមបទបញ្ញត្តិទាំងនេះមានការពិបាក សូមពិចារណាអធិស្ឋានឲ្យព្រះវរបិតាសួគ៌នឹងជួយអ្នក ។
សូមអញ្ជើញសិស្សឲ្យចែកចាយអ្វីដែលពួកគេចង់ចងចាំពីគំរូរបស់ អាលម៉ា និងអាមូលេក ។
សូមចែកចាយទីបន្ទាល់របស់អ្នកជាមួយសិស្សថា ព្រះវរបិតាសួគ៌នឹងជួយពួកគេ នៅពេលពួកគេព្យាយាមស្តាប់ ហើយគោរពតាមទ្រង់ ។