Алма 14

“Энэ нь Их Эзэний тааллын дагуу байг”

Алма, Амюлек хоёр шоронд хоригдсон нь

Бид унасан дэлхийд аж төрж байгаа учраас олон хүн хатуу ширүүн, шударга бус байдалтай тулгардаг. Алма, Амюлек хоёрыг Аммонайха хотод Есүс Христийн сайн мэдээг зааж явахад нь ёс бусчууд итгэгчдийг тарчлааж, галд шатаан хөнөөв. Алма, Амюлек хоёр шоронд хоригдож, асар ихээр хавчигдан гадуурхагдав. Энэ хичээлийн зорилго бол зовлон бэрхшээл, шаналал, шударга бус явдалтай тулгарах үед Их Эзэнд итгэхэд тань туслах явдал юм.

Ариун Сүнсний хүчээр заах. Ариун Сүнс бүх үнэнийг гэрчилж, Эцэг Хүү хоёрын тухай гэрчилдэг. Ерөнхийлөгч Хэнри Б.Айринг заахдаа “Суралцагчид маань Ариун Сүнсээр заалгаагүй бол Бурханыг болон хайр гэж юу болохыг мэдэх боломжгүй. Учир нь тэд хайрлах ёстой” гэжээ (“To Know and to Love God” [evening with a General Authority, Feb. 26, 2010], 2).

Суралцагчийн бэлтгэл: Суралцагчдыг туулсан аливаа зовлон зүдгүүрээ эргэцүүлэн бодоход урь. Тэнгэрлэг Эцэг, Есүс Христ хоёрт итгэх итгэл нь тэдэнд сорилтоо даван туулахад нь хэрхэн тусалсан эсвэл тусалж болох байсан талаар бодоход урамшуул.

Боломжит суралцах үйл ажиллагаа

Мөнх бус сорилт бэрхшээл

Далын ахлагч Антони Д.Пөркинсийн дараах мэдэгдлийг унш.

Ахлагч Антони Д.Пөркинс

Таны хаана амьдарч байгаагаас үл шалтгаалан янз бүрийн зовлон зүдгүүр, мөнх бус амьдралын сул доройн улмаас бие махбодын эсвэл оюун санааны хувьд зовж шаналах үе одоо эсвэл хэзээ нэг өдөр таны амьдралын нэг хэсэг байх болно. (Антони Д.Пөркинс, “Ай бидний Бурхан Та, зовсон гэгээнтнүүдээ санаач,” Лиахона, 2021 оны 11-р сар, 53)

Суралцагчдыг дараах асуултад аль болох олон хариулт бодож, тэдгээрийг самбар дээр жагсаан бичихэд урамшуул.

• Бид сорилтод хариу үйлдэл үзүүлэх ямар ямар арга зам байдаг вэ?

Алма 14 бол хүнд сорилт бэрхшээл туулсан зөв шударга хүмүүсийн цэдэг юм. Эдгээр зовлон зүдгүүрийн ихэнхийг сонгох эрхээ урвуулан ашигласан хүмүүс хүчээр тулгасан. Та судлах явцдаа Алма, Амюлек хоёрын мөн бусад зөв шударга хүний жишээнээс олж мэдсэн үнэнээ эргэцүүлэн бодоод, эдгээр үнэн одоо болон хожим зовлон зүдгүүрт хандах хандлагад тань хэрхэн тусалж болохыг бодож үз.

Дараах нэрсийг самбарт бич. Суралцагчдыг самбарт гарч, Алма 14:1–9-д дурдсанчлан, хүн бүр хэрхэн зовж шаналсныг бичихэд урь. ChurchofJesusChrist.org 

Дараах нэрсийг судлах тэмдэглэл дээрээ жагсааж бич. Сурч мэдсэн зүйлээ тохирох нэрийн хажууд бич.

Алма, Амюлек хоёр

Зиезром

Бурханы үгэнд итгэгчид

Алма 14:1–9-ийг уншаад, хүмүүсийн туулсан янз бүрийн зовлон шаналлын жишээг олж мэд. ChurchofJesusChrist.org 

• Хэрэв та эдгээр хүний туулсан зовлон зүдгүүрийг туулсан бол танд ямар асуулт гарч ирэх байсан бэ?

“Алма 14:11 Мөнхийн талаас нь авч үзэх үзэл баримтлал” гарчигтай нэмэлт суралцах үйл ажиллагааг ашиглаж, суралцагчдад хэрхэн утга санаа, асуултыг мөнхийн талаас нь шинжлэн судлахыг давтахад нь тусал.

Их Эзэнд итгэх

Бид зовлон шаналал амсахдаа эсвэл бусдын зовлон шаналлыг гэрчлэх үедээ олон янзаар хариу үйлдэл үзүүлж чадна. Алма 14:10–11-ийг уншиж, Алма, Амюлек хоёр итгэгчдийн зовлон шаналалд хэрхэн хариу үйлдэл үзүүлснийг олж мэд.

• Та Амюлекийн адил зовлон зүдгүүрийн өвдөлтөөс өөрийгөө эсвэл бусдыг аврахыг хүсэж байсан уу? Яагаад?

• 11-р шүлэг дэх Алмагийн хариу үйлдлээс та Бурханы талаар юу мэдэж авсан бэ?

Алма 14:12–13-ыг уншиж, зовлон шаналал амсах үедээ бид ямар хариу үйлдэл үзүүлэх тухай Алмагийн заасан үнэнийг олж мэд.

• Алмагийн үг Их Эзэнд итгэх итгэлийг хэрхэн харуулсан бэ?

• Бид Алмагийн жишээнээс ямар зарчим сурч мэдэж болох вэ?

Бид зовлон, шаналлыг мэдрэх үедээ үр дүн нь ямар ч бай Их Эзэнд итгэхийг сонгож чадна гэсэн зарчмыг сурч болно. Судлах тэмдэглэл дээрээ энэ зарчмыг тэмдэглээд, судар дээрх “Энэ нь Их Эзэний тааллын дагуу байг” гэсэн хэллэгийг тодруул.

• Та ямар арга замаар Их Эзэнд итгэх нь сонголт гэж бодож байна вэ?

• “Энэ нь Их Эзэний тааллын дагуу байг” гэсэн хэллэгийг та одоогийн туулж буй зүйлдээ хэрхэн хэрэгжүүлэх вэ?

Та суралцагчдад зовлон зүдгүүр туулж байхдаа Их Эзэнд итгэх итгэлээ үнэлэхэд нь хэрхэн тусалж чадах талаар бод. Дараах мэдэгдлийг самбарт жагсааж, суралцагчдад өөрсдийгөө чимээгүй үнэлэх цаг гаргаж өг.

Амьдрал, нөхцөл байдлынхаа талаар бод. Та эсвэл таны хайртай нэгэн хавчлага, зовлон зүдгүүр, шударга бус зүйлтэй тулгарах үедээ юу хийдэг вэ? Дараах мэдэгдлүүдэд үргэлж, заримдаа эсвэл хэзээ ч үгүй гэж хариулна уу.

1. Би зовлон зүдгүүрээсээ ангижрахын төлөө залбирах үедээ Их Эзэний хүсэл, цаг хугацаанд итгэдэг.

2. Амьдрал шударга бус санагдах үед би тэвчээр, ойлголтыг чин сэтгэлээсээ эрэлхийлдэг.

3. Би итгэлээ өөрийн найдаж буй тодорхой үр дүнгээс илүү Есүс Христэд болон Түүний мөнхийн амлалтад төвлөрүүлдэг.

Арван хоёр төлөөлөгчийн чуулгын ахлагч Квинтин Л.Күк зовлон зүдгүүр амсах үедээ Их Эзэнд итгэхэд тусалж чадах хэтийн төлөвийг хуваалцсан. ChurchofJesusChrist.org дээрх “Хувь хүний амар амгалан бол зөв шударга байдлын шагнал мөн” видеог цагийн код 9:02-оос 9:33 хүртэл үз эсвэл дараахыг унш.

Ахлагч Квинтин Л.Күк

Бид бүгд тэнгэр дэх зөвлөгөөнд оролцож, ёс суртахууны сонгох эрхийг хүлээн зөвшөөрсөн бөгөөд энэхүү сонгох эрхийг буруу ашигласны улмаас мөнх бус байдлын өвчин зовлон, үгээр хэлэхийн аргагүй эмгэнэлт явдал бидэнд тохиолдож болно гэдгийг мэдэж байсан. Энэ нь бас биднийг уурлан бухимдах, будилж төөрөлдөх, хамгаалалтгүй, эмзэг болоход хүргэж болно гэдгийг ойлгосон. Гэвч Аврагчийн Цагаатгал эдгээр мөнх бус амьдралын бүх шударга бус явдлыг даван гарч, амар амгалан болно гэдгийг бидэнд мэдүүлсэн юм. (Квинтин Л.Күк, “Хувь хүний амар амгалан бол зөв шударга байдлын шагнал мөн,” 2013 оны 4-р сарын Ерөнхий чуулган, 39)

• Та зовлон зүдгүүр амсах үедээ эсвэл бусад хүний зовж буйг мэдэх үед өөртөө туслах юуг олж мэдсэн бэ?

Суралцагчид ярилцлагынхаа хэсэг болгон дараах мэдээллийг ойлгосон эсэхийг шалга.

Хэрэв та ямар нэг байдлаар гомдсон бол эсвэл тантай зүй бусаар харьцсан бол асуудлаа шийдэхийн тулд эцэг эхээсээ эсвэл Сүмийн удирдагчаас тусламж эрэх ёстой гэдгийг санах нь чухал юм. Их Эзэн чамайг хайрладаг ба чамайг амар амгалан, баяр баясгалантай байгаасай хэмээн хүсдэг.

Их Эзэнд итгэх итгэл, найдвараар үргэлжлүүлэх

Алма, Амюлек хоёрт зөв шударга итгэгчдийг шатаагдахыг хүчээр харуулсны дараа Аммонайхагийн захирагчид тэднийг шоолж, зодож, шоронд хорьсон (Алма 14:14–17-г үзнэ үү).

Суралцагчдыг дараах шүлгүүдийг судалж байх хооронд хичээлдээ хэрхэн сайн оролцуулахаа шийд. Суралцагчид хамтдаа уншиж эсвэл аудио хувилбарыг сонсож, дагаж мөрдөхөд дуртай байж болох юм.

Хэрэв суралцагчдад энэ цэдгийг Аврагчийн амьдралтай харьцуулах нь тустай бол “Алма 14:14–24. Есүс Христийн жишээг дагах” гэсэн нэмэлт заах ажиллагааг ашигла.

Алма 14:18–29-ийг уншиж, Алма, Амюлек хоёр зовж шаналах үедээ хэрхэн Их Эзэнд итгэсэн болохыг олж мэд. ChurchofJesusChrist.org 

• Алма, Амюлек хоёр сорилт бэрхшээлтэй үедээ Их Эзэнд хэрхэн үргэлжлүүлэн итгэсэн бэ?

Та хэнийг мэдэх вэ?

Суралцагчдыг хоёр хоёроор нь хуваарилж, зовлон зүдгүүр тохиолдсон үедээ Их Эзэнд итгэхийн сайн жишээ болсон таньдаг хүнийхээ тухай хуваалцахад урь. Мөн суралцагчдад зовлон зүдгүүр тохиолдсон үедээ хэрхэн Их Эзэнд илүү сайн итгэж чадах талаарх санаагаа хуваалцаж болно.

Зовлон зүдгүүр, сорилт бэрхшээл тулгарсан үед Их Эзэнд итгэхийг хичээдэг хэн нэгний тухай бод. Та түүний үлгэр жишээнээс юу сурч мэдэж болох вэ? Та энэ хүний хариу үйлдэл мөн Алма, Амюлек хоёрын саад тотгорт үзүүлсэн хариу үйлдэл хоёрын хооронд ямар ижил төстэй талуудыг харж байна вэ?

Танд амьдрал хэцүү эсвэл шударга бус санагдах үед Их Эзэнд илүү сайн итгэхийн тулд хийж болох тодорхой нэг эсвэл хоёр зүйлийг бич. Бичсэн зүйлээ байнга харж байх газарт байрлуул.

Тайлбар ба нөхцөл байдлын талаарх мэдээлэл

Амьдрал шударга бус санагдах үед Есүс Христ надад хэрхэн туслах вэ?

Арван хоёр төлөөлөгчийн чуулгын ахлагч Дэйл Г.Рэнланд ийн заасан.

Ахлагч Дэйл Г.Рэнланд

Есүс Христ эцэс төгсгөлгүй цагаатгагч золиослолыг хийсэн учраас бидний зовлонг төгс ойлгодог. Тэрээр бидний хэн гэдгийг мөн нөхцөл байдал маань ямар байгааг үргэлж мэддэг.

Мөнх бус амьдралд нигүүлслийг олж, эдгэрч, тусламж дэмжлэг хүлээн авахын тулд бид Аврагчид “зоримгоор очиж” чадна [Еврей 4:16-г үзнэ үү]. Ямар ч шалтгаангүйгээр зовж зүдэрч байхад маань ч гэсэн Бурхан биднийг энгийн, ердийн, ач холбогдол бүхий арга замаар адисалж чадна. Эдгээр адислалыг ялган таньж сурах үед Бурханд итгэх итгэл маань өсөн нэмэгдэх болно. Мөнх амьдралд Тэнгэрлэг Эцэг, Есүс Христ хоёр бүх шударга бус явдлыг шийдвэрлэж өгнө. Бид яаж мөн хэзээ гэдгийг ойлгохыг хүсэх нь мэдээж. Тэд яаж үүнийг хийх юм бэ? Тэд хэзээ үүнийг хийх вэ? Миний мэдэж байгаагаар, Тэд хэзээ, яаж гэдгээ илчлээгүй. Гэхдээ тэд илчлэх болно гэдгийг би мэднэ.

Шударга бус нөхцөл байдалд орохдоо бидний биелүүлбэл зохих үүргүүдийн нэг бол “Амьдралын талаарх шударга бус юм бүхэн Есүс Христийн Цагаатгалаар дамжин зөв болгогдох болно” гэдэгт итгэх явдал юм [Миний сайн мэдээг номло: Номлогчийн үйлчлэлд зориулсан удирдамж (2018), 52]. Есүс Христ энэ дэлхийг ялан дийлж, бүх шударга бус зүйлийг “Өөр дээрээ авсан.” Түүний ачаар бид энэ дэлхийд амар амгаланг мэдэрч, зоригтой байж чадна. (Дэйл Г.Рэнланд, “Уур хүрмээр шударга бус байдал,” 2021 оны 4-р сарын Ерөнхий чуулган)

Нэмэлт суралцах үйл ажиллагаа

Алма 14:11. Мөнхийн талаас нь авч үзэх үзэл баримтлал

Суралцагчдад сүнслэг мэдлэг олж авах хоёрдугаар зарчмыг давтаж, утга санаа, асуултыг мөнхийн талаас нь шинжлэн судлах нь тустай байж болох юм. Жишээлбэл: Дотнын хэн нэгэн нь гай зовлонтой учирсан ба “Яагаад сайн хүмүүст муу зүйл тохиолддог юм бэ?” гэж асууж байна хэмээн төсөөлөхөд та суралцагчдыг урьж болно. Харин суралцагчид асуултыг мөнхийн талаас нь авч үзэхэд найздаа туслахын тулд Алма 14:11 дэх үнэнийг болон зарчмуудыг ашиглаж болно.

Алма 14:13. “Энэ нь Их Эзэний тааллын дагуу байг.”

Хэрэв суралцагчдад энэхүү хэллэгийн утга, ач холбогдлыг цаашид задлан шинжлэх нь тустай бол тэднийг судруудаас ижил төстэй мэдэгдэл, санаануудыг хайхад урь. Жишээлбэл: Та дараах эшлэлүүдийг самбарт жагсааж бичээд, суралцагчдад оноож өгч болно. Суралцагчдыг сурч мэдсэн зүйл нь Алма 14:13 дахь итгэлийн талаарх Алмагийн мэдэгдэлтэй хэрхэн холбогдож байгааг хуваалцахад урьж болно.

• Даниел 3:12–18

• Матай 26:36–39

• 1 Нифай 18:11–16

• Иосеф Смит—Түүх 1:22–25

• Эдвард Партрижийн давирхай ба өд (Гэгээнтнүүд, 1-р боть, Үнэний жишиг, 179–180)

Алма 14:14–24. Есүс Христийн жишээг дагах

Алма 14:14–24 Алма, Амюлек хоёрын Есүс Христийн жишээг дагасан хүчирхэг түүхийг агуулдаг. Та суралцагчдыг 1 Нифай 19:9-ийг уншиж, судар дээрээ Алма 14:14–24-тэй холбоход урьж болно. Дараа нь суралцагчид Алма 14:14–24-ийг задлан шинжилж, Аврагчийн зовлон шаналалд үзүүлсэн хариу үйлдэл (Матай 26:57–67; 27:26–31-ийг үзнэ үү), Алма, Амюлек хоёрын хариу үйлдэл хоёрын хооронд ямар ижил төстэй талууд байгааг олж мэдэж болно. Дараах мэдэгдлийг тодорхойлоод, суралцагчдыг ингэж амьдрахыг хичээдэг таньдаг хүмүүсийнхээ талаар бодоход урь: Бид зовлон шаналал, сорилт бэрхшээлтэй тулгарахдаа Есүс Христийн үлгэр жишээг дуулгавартай дагахыг сонгож болно.

Сэтгүүлчид

Суралцагчдыг Алма 14:18–29-ийн унших даалгаврыг дуусгасны дараа өөрсдийгөө Алма, Амюлек хоёроос Аммонайха хотод болсон явдлын талаар ярилцлага авах сэтгүүлчид байна гэж төсөөлөхөд урьж болно. Суралцагчдыг Амюлек, Алма хоёроос Их Эзэний талаар юу сурч мэдсэнээ мөн зовлон зүдгүүр тохиолдох үед Түүнд хэрхэн илүү их итгэж болох талаар асууж болох асуултуудын талаар бодоход урамшуул. Тэдний асуултуудыг самбарт жагсааж бич. Дараа нь та суралцагчдыг дүрд тоглуулахаар дөрөв дөрвөөр нь бүлэг болгон хуваарилж, хоёрыг нь сэтгүүлчдийн дүрд, хоёрыг нь Алма, Амюлек нарын дүрд тоглуул. Сэтгүүлчдийн дүрд тоглож буй суралцагчид самбар дээрх асуултуудыг ашиглаж болно. Харин та Алма, Амюлек хоёрын дүрд тоглож буй суралцагчдаас Алма 14 дэх зарчим, санаануудыг ашиглахад урамшуулж болно.