“Суралцахуйгаа үнэлэх нь 5: Мозая 18–Алма 16,” Мормоны Номын багшийн гарын авлага (2024)
“Суралцахуйгаа үнэлэх нь 5,” Мормоны Номын багшийн гарын авлага
Суралцахуйгаа үнэлэх нь 5
Энэ хичээл танд Мормоны Номыг судлах үедээ тавьсан зорилго, хувийн өсөлт хөгжлөө үнэлэхэд туслах зорилготой.
Суралцагчдад нэг нэгнээ хүлээн зөвшөөрөх, хүндлэхийг заах нь. Суралцагчдад Аврагчийн амар амгалан, эдгээлт, ач ивээлээс хүртэх гэсэн нэгдмэл хүслээсээ мөн бие биеэсээ хүч дэм авах боломж олгодог туршлагыг бий болго. Тэгснээр суралцагчид хоорондох нийтлэг зүйлсээ мэдэж, бусдыг ойлгох сэтгэлээр хувь нэмрээ оруулах магадлал өндөр болдог.
Суралцагчийн бэлтгэл: Суралцагчдыг Мозая 18–Алма 16-аас Есүс Христийн Цагаатгалын тухай өөрсдөд нь утга учиртай санагдсан судрыг олоход урьж болно.
Боломжит суралцах үйл ажиллагаа
Энэ хичээл суралцагчдад тавьсан зорилго мөн Мормоны Номын сургаалуудыг тайлбарлах чадвар эсвэл сайн мэдээний дагуу амьдрах хандлага, хүсэл, чадвар нь хэрхэн өөрчлөгдөж байгааг үнэлэхэд туслах зорилготой. Ангиараа Мозая 18-аас Алма 16 хүртэл судлах нь дараах үйл ажиллагаанаас өөр үнэнүүдийг онцолсон байж болох юм. Хэрэв тийм бол тэдгээр үнэнийг оруулан, үйл ажиллагааг тохируулан өөрчилж болно.
Эргэж харах ба урагш тэмүүлэх
Явган аялалд гарах, дугуй унах, ахиц дэвшлээ харах, зорьсон газар луугаа үргэлжлүүлэн явах тухай хувийн туршлагаа хуваалцах талаар бодож үз. Боломжтой бол гадуур явсан зургаа хуваалц. Мөн суралцагчдыг ижил туршлагаа хуваалцахад урьж болно.
Явган аялалд гарсан, дугуй унасан, тодорхой газар луу аялсан тухайгаа бодоход цаг гарга. Таныг урагш тэмүүлэн, аялж эхлэхэд танд маш бага ахиц дэвшил гарч байгаа мэт санагдаж магадгүй. Өмнө нь хаана байсан гэдгээ хэсэг зуур эргэн харах мөчид юу болох вэ? Та өөрийгөө бодсоноосоо ч илүү хол явсан гэдгийг анзаарах болно.
-
Өөрийгөө хаана байсныг, хаашаа явж байгаа гэдгээ мэдэх нь ямар тустай вэ?
Бидний амьдралыг аялалтай харьцуулж болно. Аялалд гарахдаа хаана байсан, хаашаа явж байгаа гэдгээ эргэцүүлэн бодох нь хувь хүнийхээ хөгжлийн төлөө тавьсан зорилгынхоо талаар үе үе эргэцүүлэн бодохтой адил байж болно.
-
Зорилго, ахиц дэвшлээ үнэлэхэд цаг хугацаа зарцуулах нь танд хэрхэн тус нэмэр болж байсан бэ?
Энэ хичээл танд Есүс Христийн шавийн хувьд аялалдаа гаргасан ахиц дэвшлээ үнэлэхэд тань тусална. Ахиц дэвшлээ эргэцүүлэн бодохдоо Ариун Сүнсний өдөөлтийг эрэлхийл.
Есүс Христийн шавь болох
Энэ үйл ажиллагаа танд одоог хүртэл Мормоны Номоос судалсан зүйлээ эргэцүүлэн бодоход туслах зорилготой. Мөн энэ нь Мормоны Номын үлдсэн хэсгийг судлахдаа өөрсдийнхөө чиглэлийг тодорхойлохын тулд хүрэхийг хүссэн зорилгынхоо талаар бодоход суралцагчдад туслах зорилготой. Та самбарын доор байгаатай ижил энгийн зургийг үзүүлж эсвэл зурж, дараах зааврыг хуваалцаж болно. Сурч мэдсэн зүйлээ эргэцүүлэн бодоход утга учиртай туршлага хуримтлуулахад нь суралцагчдад туслахын тулд шаардлагатай бол үйл ажиллагааг өөрчил. Суралцагчдыг хариултыг нь дэмжихэд туслах судрын шүлгүүдийг Мормоны Номоос олж тодорхойлоход урамшуул.
Гэрээний зам, Есүс Христийн шавь болох аялал хоёрыг харуулсан зам зур. Замын төгсгөлд Селестиел хаант улсыг оруул. Өөрийгөө замын голд байгаагаар зур.
Мормоны Номоос судалсан зүйлсээ мөн юу сурч мэдсэнээ эргэн санахад тань туслах судлах тэмдэглэл дэх тэмдэглэлээ уншиж давт. Өөрийнхөө зурсан зургийн ард Есүс Христийн шавь болоход тусалсан Мормоны Номын эхний хагасыг судлахдаа сурч мэдсэн зүйлсээ бич. Та олж авсан мэдлэг, хөгжүүлж буй хандлага эсвэл хүсэл юм уу хийсэн үйлдлээ оруулж болно.
Суралцагчдад дуусаад хуваалцахыг зөвшөөр. Зарим суралцагч самбар дээрх зам дээр буй хүний ард хариултуудаа жагсааж бичихийг хүсэж болох юм. Дараа нь та тэдэнд хамгийн утга учиртай гэж санагдсан зүйлээ хуваалцах замаар ерөнхий ярилцлага эхлүүлж болно. Эсвэл та суралцагчдаас одоо сайн тайлбарлаж чадах олж авсан мэдлэг, суралцсан зүйлийнхээ ачаар өөрчилсөн мэт санагдаж байгаа хандлага юм уу хүсэл эсвэл Мормоны Номоос амьдралдаа хэрэгжүүлж байгаа зан төлөвийнх нь талаар асууж болно. Мөн та самбарт бичигдсэн хариултуудын нэгэнд төвлөрч, суралцагчдыг хариултыг нь урамшуулан дэмжих тодорхой судрын хэсэг эсвэл түүхүүдийг хуваалцахад урьж болно. Та хуваалцахыг хүсэж буй суралцагчдаас самбараас өөрсдийнх нь биш хариултыг сонгохыг мөн уг хариулт яагаад сэтгэлийг нь хөдөлгөсөн болохыг хуваалцахыг хүсэж болно. Суралцагчдыг хэт хувийн чанартай туршлагаа хуваалцахгүй байхыг урамшуулан дэмж.
Суралцагчдыг хуваалцаж дууссаны дараа, Мормоны Номыг үргэлжлүүлэн судалснаар ямар нэмэлт мэдлэгийг олж авна гэж найдаж байгаагаа бодохыг тэднээс хүс. Та суралцагчдад дараах зааврыг хуваалцаж болох ба судлах тэмдэглэлийнхээ хуудсан дээр нэмж оруулахыг хүс.
Судлах тэмдэглэлийнхээ зургийг дахин хар. Таныг илэрхийлсэн зургийн урдах зам дээр Есүс Христтэй адил болохыг хичээхдээ хийхийг эсвэл үргэлжлүүлэхийг хүсэж буй үйлдлүүдээ бич.
-
Та Мормоны Номын дараагийн хагасыг судлахдаа юу сурч мэднэ гэж найдаж байна вэ?
-
Мормоны Номын хоёр дахь хагасыг судалсныхаа үр дүнд жилийн эцэст та юу мэдэж, мэдэрч эсвэл хийнэ гэж найдаж байна вэ?
Та зурсан зургаа Есүс Христийг дагахаа үргэлжлүүлэн хичээхийг тань сануулах газарт байрлуулаарай.
Зүрх сэтгэлийн өөрчлөлтийг мэдэрсэн нь
Энэ үйл ажиллагаа суралцагчдад зүрх сэтгэлийн өөрчлөлтийг мэдэрсэн арга замаа эргэцүүлэн бодоход тусална.
Сүүлийн үед та зүрх сэтгэлийн өөрчлөлтийг мэдэрсэн олон хүний тухай уншсан. Жишээлбэл: Залуу Алмагийн болон Мозаягийн хөвгүүдийн өөрчлөлт маш хурдан бөгөөд гайхалтай байсан. Харин Амюлекийн болон Лимхайн хүмүүсийн хувьд зүрх сэтгэлийн өөрчлөлт цаг хугацааны явцад болсон.
Алма Зарахемлагийн хүмүүсээс “Та нар энэ хүчит өөрчлөлтийг зүрх сэтгэлээрээ эдэлсэн үү?” (Алма 5:14). Хэрэв тийм бол “та нар одоо тийн мэдэрч чадна уу?” хэмээн асуусан. (Алма 5:26). Зүрх сэтгэлийнхээ өөрчлөлтийн ахиц дэвшлийг тунгаан бод. Заримдаа Их Эзэн өөрчлөгдөхөд тань хэрхэн тусалж байгааг олж танихад хэцүү байдаг уу? Та судалж байсан зарим түүхээсээ өөрийгөө ямар байдлаар харсан бэ?
Алма 5:14–19, 26–29-ийг уншаад, Алмагийн асуултуудыг залбирч тунгаан бод.
Магадгүй та тэдгээр шүлгийг анх судлах үедээ судлах тэмдэглэл дээрээ Алмагийн асуултуудад хариулж бичсэн байх. Өмнө бичсэн хариултаа болон одоо хариулах харилтуудаа харьцуул. Та юу анзаарсан бэ? Таныг хариултуудаа харьцуулсны дараа Тэнгэр дэх Эцэг тань таныг юуг танин мэдэж, мэдэрч эсвэл хийхийг хүснэ гэж та бодож байна вэ?
Шинэ хариултаа эсвэл ахиц дэвшлийнхээ талаарх мэдрэмжээ бичиж ав.
Суралцагчдад заримдаа хувийн өсөлт хөгжлөө ухамсарлахад хэцүү байдгийг ойлгоход нь тусал. Суралцагчдад өөрсдийн өсөлт, ахиц дэвшлийг харахад туслах боломжийг эрж хай. Хэрэв та тодорхой нэг сурагч зүрх сэтгэлийн өөрчлөлтийг мэдэрсэн болохыг анзаарсан бол үүнийгээ тухайн суралцагчид хуваалц.
Есүс Христийн Цагаатгалын сургаалыг тайлбарлах нь
Дараах дасгал нь Есүс Христийн Цагаатгалын сургаалыг тайлбарлах дадлага хийхэд тусална. Суралцагчдад үүнийг гүйцэтгэхэд нь туслах нэг арга бол тэднийг хоёр хоёроор нь ажиллуулах юм. Суралцагч бүр Аврагчийн Цагаатгалыг ойлгох ойлголт нь тусалж болох нөхцөл байдлыг эсвэл асуултыг бичиж болно. Нөхцөл байдлыг эсвэл асуултыг бичсэний дараа суралцагчид цаасаа солилцож, хариулт бичиж болно. Суралцагчид бичиж дууссаныхаа дараа хариултуудаа хоорондоо хуваалцаж болно.
Есүс Христийн Цагаатгалын тухай мэдэх нь хэн нэгэнд тус болох жишээ эсвэл нөхцөл байдлыг бич. Жишээлбэл: Өөрийгөө уучлагдах болов уу хэмээн тунгаан бодох залуу эмэгтэй эсвэл зовлон зүдгүүр туулах үедээ ганцаардаж буй залуу эрэгтэй байж болно. Эсвэл нөхцөл байдлыг бичихийн оронд та Аврагчийн Цагаатгалын тухай таны эсвэл өөр нэгний асууж болох асуултыг бичиж болно.
Мормоны Номыг судлахдаа Есүс Христийн Цагаатгалын тухай юу сурч мэдсэнээ бод. Тэмдэглэсэн судрууд эсвэл судлах тэмдэглэл дээрх тэмдэглэлүүдээ хар. Та Мозая 26 эсвэл Алма 7 (2 Нифай 9; Мозая 14–16-г мөн үзнэ үү)-оос судлахдаа зарим судрыг тэмдэглэж эсвэл тэмдэглэл үлдээсэн байж болох юм.
Нөхцөл байдалд эсвэл асуултад хэрхэн хариулах байснаа бич. Есүс Христийн Цагаатгалыг ойлгох нь тус нөхцөл байдалд эсвэл асуултад хариулахад хэрхэн туслах талаар тайлбарла. Мормоны Номоос нэг юм уу хэд хэдэн хэсгийг ашиглахыг хичээ.
Есүс Христийн Цагаатгалын тухай өөрийн гэрчлэлийг хуваалцаж, суралцагчдыг мөн адил гэрчлэлээ хуваалцахад урь.