Алма 15

Есүс Христийн эдгээгч хүч

Зовж шаналсан нэгэнд туслах нь Есүс Христийн мөнх бус үйлчлэлийн гол зорилго байв. Алма, Амюлек хоёр Бурханы мутраар шоронгоос гайхамшгаар суллагдсаныхаа дараа ижил зорилго тээсэн юм. Энэ хичээл танд Есүс Христээр дамжуулан эдгээх хүчийг олж авахад тусалж чадна.

Хичээнгүйлэн суралцахад урь. Суралцагчдад сайн мэдээг судлах нь идэвхгүй үйлдэл байх ёсгүй гэдгийг ойлгоход нь тусал. Үүнд нарийн үндэслэл гаргах, судлах, залбирах, үйлдэх гэх мэт шаардагддаг. Та суралцагчдадаа ярилцлагад оролцож, туршлагаа хуваалцан, асуулт тавихад нь урам зориг өгөх туршлагыг бий болгосноор тэдэнд тусалж чадна.

Суралцагчийн бэлтгэл: Суралцагчдыг Ирээд, Намайг дага—Хувь хүн, гэр бүлүүдэд зориулав: Мормоны Ном 2024 гарын авлага дахь “Алма 13–16: ‘Их Эзэний амралтад орох нь’ судалгааны тойм 6-р сарын 24–30”-ийн Алма 15:1–12-ын доорх гэр бүлээрээ судар судлах санааг уншихад урь.

Боломжит суралцах үйл ажиллагаа

Биеийн болон сүнсний өвдөлт

Дараах нь суралцагчдад нүглийн шинж тэмдэг эсвэл нөлөөллийг танин мэдэхэд бэлтгэхэд туслах зорилготой. Шаардлагатай бол та жагсаалтад байгаагаас илүү суралцагчдын сайн мэддэг эрүүл мэндийн байдлыг сонгож болно.

Дараах эрүүл мэндийн байдлуудыг шалга. Шинж тэмдгүүд, эмчлэхэд ашигладаг байсан эсвэл одоо эдгээхийн тулд хийдэг аливаа эмчилгээний талаар мөн адил төсөөлөн бод.

Зүрхний өвчин

Хавдар

Яс хугарах

• Хэрэв хэн нэгэн эдгээр өвчний үндсэн асуудлыг ойлгохыг эрэлхийлэлгүй зөвхөн шинж тэмдгүүдийг нь л эмчлээд байвал юу болох вэ?

Дараах догол мөр, боломжит асуултуудыг танилцуулахдаа суралцагчдад хувийн гэм нүглээ илчлэхийг бүү эрэлхийл, бүү зөвшөөр.

Биеийн өвчин, нүгэл—эсвэл сүнслэг өвдөлт—мөн шинж тэмдэг гэх мэт. Юу нүглийн шинж тэмдэг байх талаар төсөөлөн бодож, өөрийн сүнслэг эрүүл мэндийн байдлын талаар цаг гарган бод. Дараах асуултууд үүнийг хийхэд танд тусална.

• (topics.ChurchofJesusChrist.org) Сайн мэдээний сэдвүүд дэх “Нүгэл” сэдвийн дагуу нүглийн нөлөө гэж юу вэ?

• Нүгэл бидний өөрсдийнхөө талаарх мэдрэмж, бусадтай харилцах харилцаанд хэрхэн нөлөөлж болох вэ?

Суралцах явцдаа сүнслэг сайн сайхан байдлаа сайжруулахын тулд Есүс Христийн эдгээгч хүчийг илүү сайн олж авахыг зааж өгөх Ариун Сүнсийг сонс.

Зиезромын байдал

Алма, Амюлек хоёр Аммонайхад Бурханы мутраар шоронгоос гайхамшигтайгаар суллагдсаныхаа дараа Сайдом руу аялав (Алма 15:1–2-ыг үзнэ үү). Сайдомд байхдаа тэд Есүс Христийн тухай хэлсэн мэдээнд нь итгэснийхээ төлөө Аммонайхагаас хөөгдсөн хүмүүст тохинуулж байв. Тэдний тохинуулсан хүмүүсийн нэг нь Зиезром байлаа.

Дараах тараах материалыг суралцагчдад тараа. Тэд жижиг бүлэгт хуваарилагдан хамт ажиллаж, Алма 15:4–12-ыг ашиглан, Зиезромын шинж тэмдгүүд юу байсныг тодорхойлж, түүнийг эдгээх жорыг тогтоож болно.

Сүнслэг өвдөлт

“Шинж тэмдгүүд” доор жагсаан бичсэн судруудыг унш. Тэдний доор Зиезромын байдлыг дүрслэх аливаа үг, хэллэгийг жагсааж бич.

• Та Зиезромын байдлыг, тэр дундаа түүний сүнслэг сайн сайхан байдлыг хэрхэн дүрслэх вэ?

• Зиезромыг ийм байдалд хүргэсэн зүйлийн талаар та юуг санаж байна вэ?

Нэг суралцагчийг Зиезромын өнгөрсөн үеийн зарим түүхийг хуваалцахад урь. Дараах шүлгүүд тус болж болох юм: Алма 10:31; 11:21–22; 12:1, 7–8. Та “Тайлбар ба нөхцөл байдлын талаарх мэдээлэл” хэсэг дээрх ерөнхийлөгч Эзра Тафт Бэнсоны мэдэгдэл-ийг хуваалцаж болно.

Биеийн өвчин үргэлж нүгэлтэй холбоотой байдаггүй (Иохан 9:2–3-ыг үзнэ үү). Алма 14:6 дахь Зиезромын гэм буруугийн мэдрэмжийг тэмдэглэ. Гэм бурууг мэдрэх нь таатай биш ч гэлээ зорилготой байдаг. Арван хоёр төлөөлөгчийн чуулгын ахлагч Дэвид А.Бэднар эдгээр мэдрэмж ямар зорилготой байж болохыг тайлбарласан. ChurchofJesusChrist.org дээрх “Бид ариун явдалд итгэдэг” видеог цагийн код 13:15-аас 13:49 хүртэл үз эсвэл доорх бичвэрийг унш.

Бид бүгд биедээ ямар нэгэн байдлаар гэмтэл буюу шарх авч, улмаар өвдөлтийг мэдэрч үзсэн. Бид өвдөж байгаа үедээ үүнийг намдаахыг эрэлхийлдэг бөгөөд бидний өвдөлтийг намдааж, өвчнөөс салгасан эм эмчилгээнд талархалтай байдаг. Нүгэл бол сүнсний шарх гэж ойлгож болох бөгөөд энэ нь бидэнд харамсал гашуудал авчирч, Алма өөрийн хүү Кориантондоо хэлснээр “ухамсрын гэмшлийг” авчирдаг (Алма 42:18). Сүнсэнд ирэх гэмшил нь бидний биед ирэх өвдөлт гэсэн үг ба өвдөлт нь аюулаас болон илүү их хохирлоос биднийг урьдчилан сэргийлдэг. (Дэвид А.Бэднар, “Бид ариун явдалд итгэдэг,” 2013 оны 4-р сарын Ерөнхий чуулган, 53)

• Ахлагч Бэднарын хэлснээр, гэмшлийн нэг зорилго нь юу вэ?

• Энэ нь алдаа гаргасны дараах гэм буруугийн мэдрэмжийг харах үзэл эсвэл үүний талаарх ойлголтыг маань хэрхэн өөрчлөх вэ?

• Зиезромын шинж тэмдгүүд аль талаараа “аюулаас болон нэмэлт хохирлоос урьдчилан сэргийлэхтэй” адил байсан гэж та бодож байна вэ?

Есүс Христийн хүчээр эдгээх нь

Алма 15:4–12 дахь Зиезромын эдгэрч буйг анхааралтай унш. ChurchofJesusChrist.org  Уншихдаа Зиезромыг эдгээхэд хувь нэмрээ оруулсан нарийн зүйлс дээр анхаарлаа хандуул. Тэдгээр нарийн зүйлийг эмчийн бичгийнхээ “Жор” хэсэгт тэмдэглэж бич.

• Бид Зиезромын эдгэрэлтээс ямар зарчим эсвэл үнэнийг сурч мэдэж болох вэ?

Эдгээр шүлгээс бид Есүс Христэд итгэх итгэлээ хөгжүүлснээр бид эдгэрэх боломжтой гэсэн үнэнийг сурч мэдэж болно.

• Зиезромын эдгээр шүлгээс та тэрээр эдгэхийнхээ өмнө болон дараа Есүс Христэд итгэх итгэлээ хөгжүүлсэн тухай ямар нотолгоог олж харсан бэ?

• Бид хэрхэн ижил замаар Есүс Христэд итгэх итгэлийг хөгжүүлж чадах вэ?

Ахлагч Дэвид А.Бэднар бид хэрхэн итгэлээ хөгжүүлж чадахыг заав. ChurchofJesusChrist.org дээрх “Бид ариун явдалд итгэдэг” видеог цагийн код 13:49-өөс 14:17 хүртэл үз эсвэл доорх бичвэрийг унш.

Аврагчийг Агуу Эмч гэж олонтоо нэрлэсэн байдаг бөгөөд энэ нь шууд болон бэлгэдсэн утгатай байдаг. … Аврагчийн Цагаатгалаас бидний сүнслэг шархыг эдгээх, гэмшлийг арилгах тос урсан гардаг. Харин энэ тосыг зөвхөн Их Эзэн Есүс Христэд итгэх итгэл, наманчлал, тууштайгаар дуулгавартай байх зарчмын дагуу хэрэглэж болно. Чин сэтгэлийн наманчлалын үр дүнд сэтгэлдээ амар амгалан, сүнслэг эдгэрэл болон шинэчлэлийг авдаг. (Дэвид А.Бэднар, “Бид ариун явдалд итгэдэг,” 2013 оны 4-р сарын Ерөнхий чуулган, 51)

Суралцагчид хичээлийн сүүлийн үйл ажиллагаанд бэлтгэхийн тулд эхний асуултад тодорхой хариулт өгөх шаардлагатай болно. Та суралцагчидтай энэ асуултыг ярилцаж байх үедээ тэдний санаа бодлыг самбар дээр жагсааж бичиж болно. Тэдэнд янз бүрийн санаа оноо гаргахад нь тусал.

Бусад хоёр асуултыг ярилцлагынхаа нэг хэсэг болгон нэмэлт асуулт болгож ашиглаж болно.

• Тэнгэрлэг Эцэг, Есүс Христ хоёрын эдгээх хүчийг олж авч болох ямар арга зам байна вэ?

• “Агуу Эмч” гэдгийг яагаад Аврагчид тохирох цол гэж та нар бодож байна вэ? Түүнийг яагаад биднийг эдгээх чадвартай гэж та бодож байна вэ?

  Хэрэв суралцагчдад Христ эдгээх хүчтэй гэдгийг нотолсон зарим судраас суралцах нь тустай бол дараахаас заримыг нь хуваалц: Дуулал 30:2; 147:3; Исаиа 53:5.

• Та (эсвэл таны таньдаг хэн нэгэн) хэзээ Аврагчийн эдгээлтийг мэдэрч байсан бэ?

Хэдий бид бүгд Зиезромын адил зовж шаналахгүй байж магадгүй ч бид бүгдэд Аврагчийн тусламжаар давж гарах зовлон шаналал, асуудал бий. Өсвөр үеийнхний хийж болох нүгэл эсвэл алдааны зарим үр нөлөөг мөн тэдэнд хэрхэн Аврагчийн эдгээх хүч хэрэгтэй болж болох талаар бод.

Суралцагчдын санааг самбарт жагсаан бич. Мөн тэд санаагаа хамт ярилцахын тулд хоёр хоёроороо эсвэл багаар ажиллаж, дараа нь санаануудаа ангиараа хуваалцаж болно.

Хэн нэгэнд туслахын тулд өөр эмчийн бичиг үүсгэ. 3 Нифай 9:13–14-ийг уншаад, өнөөдөр сурч мэдсэн зүйлээ ашиглан, жор бич. Та Алма 15-ыг эшлэл болгож болох юм. Есүс Христ хэрхэн тусалж чадах талаар, Түүнд итгэх итгэлээ хөгжүүлэх нь ямар санагдаж болохыг хуваалц. Дараах дутуу мэдэгдлийг бөглөнө үү:

• Хэрэв хэн нэгэн … [нүглийн шинж тэмдгийн жагсаалт] мэдэрвэл тэд … [жор эсвэл эмчилгээний жагсаалт] санах хэрэгтэй.

Суралцагчдад Тэнгэрлэг Эцэг, Есүс Христ хоёр маань мөн Тэдний өгч чадах эдгээх хүч бид бүгдэд хэрэгтэй гэдгийг сануул. Есүс Христэд итгэх итгэлээ хөгжүүлэх нь үргэлж бидэнд тусална гэдгийг гэрчил. Суралцагчдыг өнөөдрийн судалсан зүйлээсээ юу сурч мэдсэнээ эсвэл хамгийн их анхаарал татсан зүйлээ хуваалцахад урь.

Тайлбар ба нөхцөл байдлын талаарх мэдээлэл

Намайг хэн эдгээж чадах вэ?

Далын ахлагч Мэттью С.Холланд ийн гэрчилсэн.

Хамгийн аймшигтай өвдөлт, зовлонгийн учир шалтгаан юу байхаас үл хамааран, тусламжийн хамгийн цаад эх үүсвэр нь нэг л зүйл байдаг буюу энэ нь Есүс Христ юм. Ганцхан Түүнд л алдаа бүрийг засаж, бурууг зөв болгож, төгс бус бүхнийг тааруулж тохируулан, шарх бүрийг эдгээж, саатсан адислал бүрийг өгөх бүрэн хүч чадал, эдгээгч гавар байдаг. (Мэттью С.Холланд, “Хүүгийн үлэмж хурц бэлэг,” , 49–51)

Би хэрхэн Есүс Христ намайг эмчилж, надад тусална гэдэгт илүү их найдаж болох вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Бид Есүс Христэд итгэх үедээ Түүнд найдаж байх ёстой. Тэр бидэнд хамгийн сайн нь юу болохыг мэддэг болохоор бид Түүний хүслийг хүлээн авахад бэлэн байхуйц хангалттай их найдах ёстой. …

… Хэчнээн хүчтэй итгэл байлаа ч энэ хүчний эзэн болох Түүний хүслийн эсрэг үр дүнг бий болгож чадахгүй. … Бид Их Эзэний хүсэл, Их Эзэний цаг хугацаанд бүрэн найдахгүйгээр Их Эзэнд жинхэнэ итгэлтэй байж чадахгүй. (Dallin H. Oaks, “Faith in the Lord Jesus Christ,” Ensign, May 1994, 99–100).

Би өршөөгдсөн хэдий ч яагаад гэм нүглүүдээ эргэн санасаар байж болох вэ?

“Есүс Христийн Цагаатгал” видеог цагийн код 5:48-аас 6:56 хүртэл үзэж (ChurchofJesusChrist.org дээрээс үзэх боломжтой), Ням гаргийн ангийн ерөнхий ерөнхийлөгч асан, чөлөөндөө гарсан Далын ерөнхий эрх мэдэлтэн Тэд Р.Каллистэр ах бид уучлагдсан ч нүглээ яагаад санасаар байж болох шалтгааныг тайлбарласныг үз.

Нүглийн зарим нөлөөлөл юу вэ?

Ерөнхийлөгч Эзра Тафт Бэнсон (1899–1994) ийн тайлбарласан.

[Та нар] буруу юм хийчхээд, үүнийгээ зөв гэж мэдэрч чадахгүй—Энэ бол боломжгүй зүйл. Хүн Бурханы хуулийг зөрчих бүрдээ сэтгэлийн шаналал, уйтгар гуниг, харамсал, өөрийгөө хүндлэхгүй байх шийтгэл хүлээж, өөрийгөө Бурханы Сүнстэй харьцахаас холдуулдаг. (Teachings of Presidents of the Church: Ezra Taft Benson [2014], 221)

Алма 15:8-9. Бид Есүс Христэд итгэдэг гэдгээ тунхаглах нь хангалттай юу?

Тэргүүн Зөвлөлийн ерөнхийлөгч Даллин Х.Өүкс Есүс Христэд итгэхээс илүү ихийг хийх хэрэгтэй байгаа талаар ийн тайлбарласан.

Тэнгэрийн хаант улсад орох хүмүүсээс (Матай 18:3-ыг үзнэ үү) [Есүсийн] шаарддаг хөрвөлт нь зүгээр л нэг сайн мэдээний үнэний талаар гэрчлэх хэмжээний хөрвөлтөөс илүү их зүйл байсан гэдгийг харуулдаг. Гэрчлэх гэдэг нь мэдэх, тунхаглах гэсэн үг юм. Сайн мэдээ биднийг ‘хөрвөгдөхөд’ урьдаг. Хөрвөгдөх нь биднээс хийхийг мөн болохыг шаарддаг. Хэрэв бидний хэн нэгэн нь зөвхөн сайн мэдээний талаарх мэдлэг, гэрчлэлдээ тулгуурладаг бол Есүсийн “хөрвөгдөхөд” урьсан мөн адислагдсан боловч гүйцэд гүйцэлдүүлээгүй, төлөөлөгчдийнхтэй ижил байр суурьтай байх болно. (Dallin H. Oaks, “The Challenge to Become,” Ensign, Nov. 2000, 33)

Нэмэлт суралцах үйл ажиллагаа

Аврагч мөн Түүний сайн мэдээ эдгээх хүчтэй

Суралцагчдыг дараах шүлгүүдийг судалж, Аврагчийн эдгээх хүчний талаар юу сурч мэдэж, мэдэрч болохоо олж мэдэхэд урь: Дуулал 30:2; 147:3; Исаиа 53:5; Матай 4:23; Иаков 2:8. Эдгээр шүлгийн юу нь танд онцгой санагдаж байна вэ? Эдгээр зүйлийг ойлгох нь Аврагчийн эдгээх хүчийг амьдралдаа хэрэгжүүлэхэд хэрхэн тусалж чадах вэ?

Амюлекээс олж авсан сургамж

Суралцагчдыг Амюлекийн амьдралыг нягталж үзэхэд урьж болно. Суралцагчдыг Мозая 15:16–18-ыг уншаад, Амюлек ямар мэдрэмж, сэтгэл хөдлөл, зовлон зүдгүүр туулсныг төсөөлөн бод. Амюлек сайн мэдээний дагуу амьдарч, номлогчоор үйлчлэхийг сонгохын тулд юуг орхисон бэ? Тэр юу олж авсан бэ? Түүнийг хүчирхэгжүүлэхэд туслах юу хэрэгтэй байсан бэ? Та суралцагчдыг ерөнхийлөгч Дийтр Ф.Угдорфын хэлсэн “Алма, Амюлек хоёроос суралц” (2016 оны 10-р сарын Ерөнхий чуулган, 59–62) үг рүү хандуулахыг хүсэж болно.