Alma 18

Si Ammon ay Naglingkod at Nagturo kay Haring Lamoni

Hindi natin alam kung bakit napakataas ng tingin ni Haring Lamoni kay Ammon nang una silang magkita. Marahil ang dahilan ay ang kahandaan ni Ammon na maglingkod o ang liwanag ni Cristo na nakikita sa kanya, o siya ang anak ni Haring Mosias. Anuman ang dahilan ng magandang unang impresyon kay Ammon, lubos na naantig si Lamoni ng katapatan ni Ammon sa kanya na naglingkod sa kanya sa sumunod na tatlong araw. Dahil sa nadama niya, handang maniwala si Lamoni sa lahat ng salita ni Ammon. Ang lesson na ito ay ginawa upang tulungan kang makahanap ng mga paraan para matulungan ang iba na mas mapalapit sa Diyos sa pamamagitan ng iyong pagmamahal at paglilingkod na tulad ng kay Cristo.

Gamitin nang epektibo ang visual media na inaprubahan ng Simbahan. Ang mahusay na paggamit ng visual media ay makapagpapalawak ng pag-unawa ng mga estudyante at makatutulong sa mga estudyante na mabuo ang kanilang mga patotoo. Maaari mong putulin ang mas mahahabang video sa mas maiikling segment. Sabihin sa mga estudyante na alamin at talakayin kung paano inilarawan ang doktrina at mga alituntunin.

Paghahanda ng estudyante: Sabihin sa mga estudyante na hilingin sa isang kaibigan o kapamilya na tukuyin ang mga taong kilala niya na nakatulong sa iba na mas mapalapit sa Diyos sa pamamagitan ng kanilang pagmamahal o paglilingkod na tulad ng kay Cristo.

Mga Posibleng Aktibidad sa Pag-aaral

Ipangaral ang ebanghelyo

Ibahagi o ipakita ang sumusunod na pahayag, at sabihin sa mga estudyante na talakayin kung ano sa palagay nila ang ibig sabihin nito. Maaari mong gamitin ang mga tanong na kasunod ng pahayag para makatulong sa pagbuo ng talakayang ito.

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Ang isa sa pinakamagagandang sermon na ipinahayag tungkol sa gawaing misyonero ay ang simpleng ideyang ito ni St. Francis of Assisi: “Ipangaral ang ebanghelyo sa lahat ng oras at kung kailangan, magsalita kayo.” (Dieter F. Uchtdorf, “Paghihintay sa Daan Patungong Damasco,” Liahona, Mayo 2011, 77)

• Paano natin ipapangaral ang ebanghelyo nang hindi gumagamit ng mga salita?

• Bakit napakabisang paraan iyon para mangaral?

Si Jesucristo ang perpektong halimbawa ng pagtuturo ng ebanghelyo.

• May naiisip ka bang mga salaysay tungkol sa pagtulong ni Jesus sa iba para malaman nila ang tungkol sa Ama sa Langit kahit hindi siya gaanong nagsalita?

Maaari mong anyayahan ang mga estudyante na magbahagi ng mga halimbawa kung paano tinulungan ng Tagapagligtas ang iba na mas mapalapit sa Ama sa Langit sa pamamagitan ng Kanyang halimbawa, mga himala, o paglilingkod sa iba. Maaaring kabilang sa mga halimbawa ang mga salaysay mula sa Juan 11:41–45; 13:4–5, 13–15.

Maaalala mo na noong simulan ni Ammon ang kanyang misyon sa mga Lamanita sa lupain ng Ismael, hindi niya kaagad sinimulang ituro ang ebanghelyo. Sa halip, ipinangako niya sa hari, “Magiging tagapagsilbi ninyo ako” (Alma 17:25). Pagkatapos ay itinalaga si Ammon na bantayan ang mga kawan ng hari. Sa pamamagitan ng kapangyarihan ng Diyos, naprotektahan niya ang mga kawan at ang iba pang mga tagapaglingkod mula sa mga Lamanita na nagtangkang ikalat ang mga tupa.

Habang pinag-aaralan mo ang Alma 18 ngayon, bigyang-pansin ang naging epekto ng matapat na paglilingkod ni Ammon kay Haring Lamoni. Mag-isip ng mga paraan na matutulungan mo ang iba na mas mapalapit sa Diyos sa pamamagitan ng pagmamahal at paglilingkod sa kanila sa mga paraang katulad ng kay Cristo.

Ang epekto ng pagmamahal at paglilingkod ni Ammon na tulad ng kay Cristo

Ang mga sumusunod na talata ay maaaring magkakasamang pag-aralan ng buong klase, o maaaring pag-aralan nang may kapartner.

Basahin ang Alma 18:1–11, at alamin ang naging epekto kay Haring Lamoni ng mga ginawa ni Ammon. Maaari mo ring panoorin ang “Ipinagtanggol ni Ammon ang mga Kawan ni Haring Lamoni“ mula sa time code na 2:57 hanggang 5:24 habang sumasabay ka sa pagbabasa sa iyong mga banal na kasulatan. Mapapanood ang video na ito sa ChurchofJesusChrist.org.

• Ano ang pinakanapansin mo tungkol kay Ammon sa mga talatang ito?

• Ano ang naging epekto sa hari ng mga ginawa ni Ammon?

Matapos ihanda ni Ammon ang mga kabayo at karuwahe ng hari, lumapit siya sa hari at napansin niyang nagbago ang anyo ng mukha ni Lamoni. Sa pamamagitan ng Espiritu, nahiwatigan ni Ammon ang iniisip ng hari at alam niya na namamangha si Lamoni sa mahimalang paraan ng pagtatanggol ni Ammon sa mga kawan ng hari (tingnan sa Alma 18:12–19).

Basahin ang Alma 18:20–23, at alamin ang ninanais ni Lamoni. Maaari mo ring panoorin ang “Itinuro ni Ammon kay Haring Lamoni ang tungkol sa Ebanghelyo ni Jesucristo” mula sa time code na 0:23 hanggang 1:56 habang sumasabay ka sa pagbabasa sa iyong mga banal na kasulatan. Mapapanood ang video na ito sa ChurchofJesusChrist.org.

• Ano sa palagay mo ang naitulong ng pagmamahal at paglilingkod ni Ammon na katulad ng kay Cristo sa kahandaan ng hari na maniwala sa mga salita ni Ammon?

Ang isang katotohanan na matututuhan natin mula sa salaysay na ito ay sa pamamagitan ng ating pagmamahal at paglilingkod na tulad ng kay Cristo, maihahanda ng Diyos ang puso ng mga pinaglilingkuran natin upang matanggap ang mga katotohanan ng ebanghelyo.

Maaari mong sabihin sa mga estudyante na talakayin ang sumusunod na tanong sa isang maliit na grupo. Pagkatapos ay maaaring ibahagi ng mga miyembro mula sa bawat grupo ang ilan sa kanilang mga sagot sa klase.

• Ano ang ilang paraan na matutulungan natin ang iba na mas mapalapit sa Diyos sa pamamagitan ng ating pagmamahal at paglilingkod na tulad ng kay Cristo?

Kung maaari, magbahagi ng isang halimbawa ng isang pagkakataon na nakita mong mas napalapit ang iba sa Diyos dahil sa pagmamahal at paglilingkod ng isang tao na tulad ng kay Cristo. Maaari mo ring sabihin sa mga estudyante na mag-isip at magbahagi ng mga halimbawang nakita nila.

Itinuro ni Ammon kay Lamoni ang mga katotohanan ng ebanghelyo

Batay sa mga pangangailangan at kakayahan ng iyong mga estudyante, isipin kung pinakamainam para sa mga estudyante na pag-aralan ang mga sumusunod na talata nang sama-sama bilang isang klase, nang may kapartner, o nang mag-isa.

Basahin ang Alma 18:24–43, at alamin ang itinuro ni Ammon kay Lamoni. Maaari kang gumawa ng listahan ng malalaman mo, at bigyang-pansin ang mga salitang “inulit,” “ipinaliwanag,” at “sinabi.” Maaari mo ring panoorin ang video na “Itinuro ni Ammon kay Haring Lamoni ang tungkol sa Ebanghelyo ni Jesucristo” mula sa time code na 1:56 hanggang 5:41, na matatagpuan sa ChurchofJesusChrist.org, at sumabay sa pagbabasa sa iyong mga banal na kasulatan.

• Ano ang ilan sa mahahalagang katotohanan na ipinaunawa ni Ammon kay Lamoni?

  Sabihin sa mga estudyante na ilista sa pisara ang kanilang mga sagot sa naunang tanong. Maaari ding maglagay ng bituin ang mga estudyante sa tabi ng mga katotohanang itinuturo ng mga missionary ngayon.

• Ano ang naging epekto ng mga katotohanang ito kay Lamoni?

• Bakit mahalagang maunawaan natin ngayon ang mga katotohanang ito?

Tumingin ng isang mungkahi sa bahaging “Mga Karagdagang Aktibidad sa Pag-aaral“ na makatutulong sa mga estudyante na maunawaan ang kahalagahan ng mga katotohanang itinuro ni Ammon sa hari sa mga talatang ito.

Bagama’t inakala ng marami sa mga Lamanita na namatay na si Lamoni nang bumagsak siya sa lupa, kalaunan ay tinulungan sila ni Ammon na maunawaan na ang hari “ay nasa ilalim ng kapangyarihan ng Diyos,” o “tinangay siya sa Diyos” (Alma 19:6). Marami ka pang malalaman tungkol sa pagbabalik-loob ni Lamoni habang pinag-aaralan mo ang Alma 19.

Pagsasabuhay ng natutuhan mo

Bigyan ng oras ang mga estudyante na pag-isipan kung paano nila maipamumuhay ang mga katotohanang napag-aralan nila ngayon. Maaaring makatulong na ipakita ang mga sumusunod na tagubilin at sabihin sa mga estudyante na itala ang kanilang mga sagot sa kanilang study journal. Pagkatapos ay maaari mong anyayahan ang ilang estudyante na ibahagi ang ilan sa kanilang mga mithiin o plano, ngunit hindi ang mga pangalan ng mga taong naisip nila.

Isipin ang isang tao na sa palagay mo ay makatutulong sa iyo na mas mapalapit sa Diyos sa pamamagitan ng pagmamahal at paglilingkod na tulad ng kay Cristo.

• Paano ka makapaglilingkod o makapagpapakita ng pagmamahal na katulad ng kay Cristo sa taong ito?

• Paano makatutulong ang mga pagsisikap mo na mas mapalapit sa Diyos ang taong ito?

• Anong mga balakid ang nakikita mo na maaaring magpahirap para mapaglingkuran ang taong ito nang may dalisay na pag-ibig? Paano mo madaraig ang mga balakid na ito?

Komentaryo at Impormasyon ng Konteksto

Bakit epektibong paraan ang paglilingkod sa iba para maibahagi ang ebanghelyo?

Pinagnilayan ni Pangulong Henry B. Eyring ng Unang Panguluhan ang kahalagahan ng paghahanda ni Ammon sa mga kabayo ng hari matapos matagumpay na maprotektahan ang mga kawan ng hari. Pagkatapos ay sinabi ni Pangulong Eyring:

Hindi ba’t kakaiba iyon? Tinawag siya upang ituro ang mga doktrina ng kaligtasan, ngunit siya ay nasa mga kuwadra. Sa inyong palagay, hindi ba’t dapat siya ay nagdarasal at nag-aayuno at pinapahusay ang kanyang plano sa pagtuturo? Hindi, siya ay nasa mga kuwadra. …

… Huwag maliitin kailanman ang espirituwal na kahalagahan ng paggawa ng mga bagay na temporal para sa mga pinaglilingkuran ninyo.

… Maging mga tagapaglingkod nila, at mamahalin ninyo sila. At madarama nila ang inyong pagmamahal. At ang mas mahalaga, madarama nila ang pagmamahal ng Diyos. (Henry B. Eyring, “The Book of Mormon Will Change Your Life,” Ensign, Peb. 2004, 13–14)

Dapat ko lang bang paglingkuran ang iba para tanggapin nila ang ebanghelyo?

Sinabi ni Pangulong Dieter F. Uchtdorf, na noon ay kabilang sa Unang Panguluhan:

Mahal ng Tagapagligtas ang lahat ng anak ng Diyos anuman ang kanilang katayuan sa lipunan, lahi, wika, paniniwala sa pulitika, nasyonalidad, o anupamang grupo. At dapat gayon din tayo!

Ang pinakamalaking gantimpala ng Diyos ay mapupunta sa mga naglilingkod nang walang iniisip na kapalit o gantimpala. Ito ay makakamit ng mga taong naglilingkod nang walang pagkilala ng publiko; ng mga tahimik na naghahanap ng paraan para tulungan ang iba; ng mga naglilingkod sa iba dahil lamang sa mahal nila ang Diyos at ang mga anak ng Diyos. (Dieter F. Uchtdorf, “Ang Pinakadakila sa Inyo,” Liahona, Mayo 2017, 79–80)

Ano ang mga halimbawa ng mga taong mas napapalapit sa Diyos sa panahong ito sa pamamagitan ng pagmamahal sa iba na tulad ng kay Cristo?

 ChurchofJesusChrist.org

Mga Karagdagang Aktibidad sa Pag-aaral

Simulan sa mga karaniwang paniniwala

Maaaring pag-aralan ng mga estudyante ang Alma 18:24–32, at alamin kung paano ginamit ni Ammon ang pinaniniwalaan na ni Haring Lamoni para ituro ang mga katotohanan ng ebanghelyo. Maaari mong gamitin ang kuwento tungkol kay Kevin ni Pangulong Bonnie H. Cordon, Young Women General President, sa kanyang mensaheng “Upang Makita Nila” (Liahona, Mayo 2020, 79–80).

Maaaring talakayin ng mga estudyante ang kahalagahan ng pagsisimulang magturo gamit ang mga karaniwang paniniwala. Pagkatapos ay maaari nilang isipin ang mga pagkakatulad ng kanilang mga paniniwala at ng paniniwala ng mga miyembro ng kanilang pamilya o mga kaibigan na iba ang relihiyon. Paano nila sisimulan sa mga paniniwalang iyon para matulungan ang kanilang pamilya o mga kaibigan na maunawaan ang mga katotohanan ng ipinanumbalik na ebanghelyo ni Jesucristo?

Alma 18:36–43. Ang pangangailangan natin sa isang Tagapagligtas

Ipaliwanag na ang pamamaraan ni Ammon sa Alma 18:36–39 ay isang huwarang ginagamit ng mga missionary ngayon upang ituro na kapag nauunawaan natin na kailangan natin ang Tagapagligtas, hahangarin nating magsisi. Matapos basahin ang mga talata 36–43, maaaring matuklasan at matalakay ng mga estudyante ang ilan sa mga sumusunod na ideya:

• Ano ang ilang elemento ng plano ng pagtubos na itinuro ni Ammon?

• Ano ang naging epekto ng mga turong ito kay Lamoni? Ano ang handa niyang gawin matapos siyang turuan?

• Sa iyong palagay, bakit mahalagang ituro ang tungkol sa Paglikha at Pagkahulog kapag itinuturo natin ang Pagbabayad-sala ni Jesucristo?

Itinuro ni Pangulong Russell M. Nelson:

Bago natin maunawaan ang Pagbabayad-sala ni Cristo, … kailangan muna nating maunawaan ang Pagkahulog ni Adan. At bago natin maunawaan ang Pagkahulog ni Adan, kailangan muna nating maunawaan ang Paglikha. Ang tatlong mahalagang bahagi na ito ng plano ng kaligtasan ay may kaugnayan sa isa’t isa. (Russell M. Nelson, “The Atonement,” Ensign, Nob. 1996, 33)