Alma 17

“Alinsunod sa Salita at Kapangyarihan ng Diyos”

ipinagtatanggol ni Ammon ang mga kawan ni Lamoni

Ipagpalagay na sinisikap mong ipangaral ang ebanghelyo sa isang grupo ng mga tao na mailalarawan bilang mababangis, matitigas, at mababagsik. Ito mismo ang piniling gawin ng mga anak ni Mosias nang magtungo sila sa lupain ng mga Lamanita upang ipangaral ang ebanghelyo sa kanila. Inilalarawan sa Alma 17 ang tulong na natanggap ni Ammon mula sa Diyos nang simulan niya ang kanyang ministeryo sa mga Lamanita sa lupain ng Ismael. Ang lesson na ito ay makatutulong sa iyo na matukoy ang tulong at lakas na ibinibigay sa iyo ng Panginoon sa mahihirap na sitwasyong kinakaharap mo.

Tulungan ang mga mag-aaral na unawain ang konteksto at nilalaman. Maaaring kabilang sa konteksto at nilalaman ng mga banal na kasulatan ang maraming kuwento tungkol sa nauugnay na mga tao at pangyayari. Tulungan ang mga estudyante na maunawaan at maiugnay ang mga salaysay na ito upang mas matukoy nila ang doktrina, mga alituntunin, at inspiradong mensahe ng mga may-akda.

Paghahanda ng estudyante: Maaari mong anyayahan ang mga estudyante na dumating sa klase na handang ibahagi at talakayin ang ilang karaniwang problema o hamon na kinakaharap ng mga tinedyer at kung bakit kailangan nila ang tulong at lakas ng Diyos sa kanilang buhay. Maaari din nilang isipin ang mga pagkakataon na natanggap nila ang tulong ng Diyos sa kanilang buhay.

Mga Posibleng Aktibidad sa Pag-aaral

Ang pangangailangan natin ng tulong ng Diyos

Tulungan ang mga estudyante na mag-isip ng mga halimbawa ng mga pagkakataon na kakailanganin ng mga tinedyer ang tulong o lakas ng Diyos sa kanilang buhay. Ang mga sumusunod na sitwasyon ay maaaring makatulong dito, o maaaring gumawa ang mga estudyante ng iba’t ibang sitwasyon.

Nadama ni Luci na kailangan niyang magsisi at baguhin ang paraan ng kanyang pamumuhay, ngunit ang lahat ng bagay na pinagsikapan niyang baguhin ay tila walang malaking epekto.

Inspirado si Guillermo na magmisyon, ngunit nalulungkot ang kanyang mga magulang dahil kailangan nila ang tulong niya sa negosyo ng pamilya.

• Ano ang ilang paraan na matutulungan ng Diyos si Luci o Guillermo?

• Ano ang ilang paraan na maaari nilang hingin o kilalanin ang Kanyang tulong?

Maaari mong ipakita ang sumusunod na talata. Bigyan ang mga estudyante ng sapat na oras na mag-isip at magsulat sa kanilang study journal.

Mag-isip sandali at isulat sa iyong study journal kung paano sa palagay mo pinakakailangan mo ng tulong o lakas ng Diyos sa iyong buhay. Ano ang ilang paraan na umaasa ka na maaaring makatulong sa iyo ang Diyos? Habang pinag-aaralan mo ang Alma 17 ngayon, alamin ang mga paraan na matutukoy at maaanyayahan mo ang lakas ng Diyos sa iyong buhay.

Ang mga anak ni Mosias

Ipaliwanag sa mga estudyante na sa susunod na dalawang linggo, pag-aaralan nila ang tungkol sa paglalakbay ng apat na anak ni Mosias bilang misyonero patungo sa mga Lamanita. Upang matulungan ang mga estudyante na maunawaan kung paano naaakma ang paglalakbay na ito bilang misyonero sa buong konteksto ng aklat ni Alma, maaari mong ibuod ang sumusunod na talata.

Isinalaysay sa mga kabanata 1–16 ng Alma ang mga pangyayari sa buhay ni Alma sa unang 14 na taon ng panunungkulan ng mga hukom. Sa Alma 17–27, nalaman natin ang tungkol sa paglalakbay ng mga anak ni Mosias bilang misyonero patungo sa mga Lamanita sa panahon ding iyon. Ang Alma 17 ay nagsimula kay Alma at sa kanyang mga kaibigan, na mga anak ni Mosias, na nagkita sa unang pagkakataon matapos silang magkahiwalay sa loob ng 14 na taon (tingnan sa Alma 17:2–4; 27:16). Ang mga pangalan ng mga anak ni Mosias ay Ammon, Aaron, Omner, at Himni.

Maaari mong hatiin ang klase sa apat na grupo. Bigyan ang bawat grupo ng isa sa mga sumusunod na scripture passage na pag-aaalan. Pagkatapos ay maaaring ibahagi sa klase ng mga miyembro ng bawat grupo ang kanilang natuklasan.

Basahin ang mga sumusunod na talata, at alamin ang mahahalagang detalye tungkol sa misyon nina Ammon, Aaron, Omner, at Himni.

• Ang dahilan nila sa pagpunta: Mosias 28:1–3

• Ang pangakong natanggap nila: Mosias 28:5–7

• Ang ginawa nila para maging mga kasangkapan sa mga kamay ng Panginoon: Alma 17:2–3, 9–12

• Ang mga taong tinuturuan nila: Alma 17:13–15

• Ano ang pinakanapansin mo tungkol sa mga anak ni Mosias mula sa mga talatang ito?

• Anong katibayan ang nakita mo na gumagana ang tulong o lakas ng Diyos sa kanilang buhay? Maaari mong markahan ang katibayang ito sa iyong mga banal na kasulatan.

Si Ammon at si Haring Lamoni

Bago naghiwalay ang mga misyonerong ito upang ipangaral ang ebanghelyo sa iba’t ibang lugar, tinuruan at binasbasan sila ni Ammon. Pagkatapos ay nagtungo si Ammon sa lupain na tinatawag na Ismael. Nang pumasok siya sa lupaing iyon, siya ay dinakip at dinala sa harapan ng hari, na ang pangalan ay Lamoni (tingnan sa Alma 17:17–20).

Basahin ang Alma 17:21–25, at alamin ang sinabi ni Ammon kay Haring Lamoni. Maaari mo ring panoorin ang video na “Si Ammon ay Naging Tagapagsilbi ni Haring Lamoni” (3:47), na matatagpuan sa ChurchofJesusChrist.org.

• Paano kaya nakatulong ang sinabi ni Ammon sa hari na “Magiging tagapagsilbi ninyo ako” (Alma 17:25) upang maging mas epektibong misyonero si Ammon?

Habang binabantayan ni Ammon at ng iba pang mga tagapagsilbi ng hari ang mga kawan, nakaranas sila ng isang mahirap na sitwasyon.

Maaari mong anyayahan ang ilang handang estudyante na pumunta sa harapan ng silid para magsalitan sa pagbabasa nang malakas ng mga sumusunod na talata habang sumasabay ang klase sa kanilang banal na kasulatan.

Basahin ang Alma 17:26–39, at alamin kung paano tumugon si Ammon sa sitwasyong ito. Maaari mo ring panoorin ang “Ipinagtanggol ni Ammon ang mga Kawan ni Haring Lamoni” mula sa time code na 0:00 hanggang 3:10. Mapapanood ang video na ito sa ChurchofJesusChrist.org.

• Paano nauugnay ang tiwala ni Ammon sa sitwasyong ito sa pangakong ibinigay ng Panginoon sa ama ni Ammon na si Mosias, sa Mosias 28:7?

• Kung naroon ka, ano kaya ang maiisip mo tungkol kay Ammon?

Basahin ang Alma 18:1–3, at alamin ang sinabi ng iba pang mga tagapagsilbing Lamanita kay Haring Lamoni tungkol sa karanasang ito.

• Paano inilarawan ng mga tagapagsilbi ng hari si Ammon?

Bagama’t nahirapan ang mga tagapagsilbi ng hari na ilarawan kung bakit naprotektahan ni Ammon ang mga kawan ng hari sa gayong mahimalang paraan, natukoy nila na may kapangyarihan siya na nakahihigit sa matataglay ng isang mortal na tao.

Mula sa karanasan ni Ammon, matututuhan natin na ipinagkakaloob ng Panginoon ang Kanyang lakas at kapangyarihan sa Kanyang mga tagapaglingkod na nagsisikap na gawin ang Kanyang kalooban.

Nang malapit nang matapos ang kanyang 14 na taong misyon, pinagnilayan ni Ammon ang lakas at kapangyarihang ibinigay sa kanya ng Diyos sa kanyang buong panahon ng paglilingkod sa mga Lamanita.

Basahin ang Alma 26:12, at alamin ang sinabi ni Ammon tungkol sa pinagmumulan ng kanyang lakas.

Maaari mong hatiin sa tatlong grupo ang klase at italaga sa bawat grupo ang isa sa sumusunod na mga tanong na tatalakayin. Ang bawat grupo ay maaaring gumawa ng listahan ng maraming sagot na maiisip nila sa loob ng isa o dalawang minuto at pagkatapos ay ibahagi sa klase ang kanilang mga sagot.

Bilang alternatibo, maaari mong isulat ang mga tanong sa iba’t ibang lugar sa pisara. Ang mga estudyante ay maaaring pumunta sa pisara at ilista ang mga sagot sa isa o mahigit pang mga tanong hanggang sa magkaroon ng maraming sagot na nakasulat sa tabi ng bawat tanong. Pagkatapos ay maaaring talakayin ng buong klase ang mga sagot ng mga estudyante.

• Ano ang ilang halimbawa ng mga sitwasyon kung saan kailangan natin ang tulong o lakas ng Panginoon sa ating buhay?

• Ano ang ilan sa mga paraan na maaaring biyayaan tayo ng Panginoon ng Kanyang tulong o lakas?

• Ano ang magagawa mo para maanyayahan o matamo ang tulong o lakas ng Diyos sa iyong buhay?

Sabihin sa mga estudyante na pag-isipan ang natutuhan nila tungkol sa Diyos ngayon na makatutulong sa kanilang personal na buhay. Anyayahan sila na itala sa kanilang study journal ang mga naisip at espirituwal na impresyon nila. Hikayatin sila na humingi ng tulong sa Ama sa Langit para maisakatuparan nila ang mga bagay na hindi nila magagawa nang mag-isa.

Komentaryo at Impormasyon ng Konteksto

Paano ko matatanggap ang kapangyarihan o tulong na maibibigay sa akin ng Diyos?

Nagbahagi si Pangulong Russell M. Nelson ng maraming paraan na matatanggap natin ang kapangyarihan ng Tagapagligtas sa ating buhay:

Pangulong Russell M. Nelson

Gusto kong magsalita tungkol sa kung paano tayo makakahugot ng lakas sa ating Panginoon at Maestro na si Jesucristo sa ating buhay.

Magsisimula tayo sa pamamagitan ng pag-aaral tungkol sa Kanya. …

Kapag naglaan tayo ng oras sa pag-aaral tungkol sa Tagapagligtas at sa Kanyang nagbabayad-salang sakripisyo, mahihikayat tayong makilahok sa isa pang mahalagang sangkap sa paghugot ng lakas sa Kanya: pinipili nating sumampalataya sa Kanya at tularan Siya. …

Ang pananampalataya kay Jesucristo ay nagtutulak sa atin na gawin ang mga bagay na kung tutuusin ay hindi natin gagawin. Ang pananampalatayang naggaganyak sa atin na kumilos ay nagbibigay-daan upang higit tayong makahugot ng lakas sa Kanya.

Pinalalakas din natin ang kapangyarihan ng Tagapagligtas sa ating buhay kapag gumagawa tayo ng mga sagradong tipan at ganap na tinutupad ang mga tipang ito. …

Isa pang sangkap sa paghugot ng lakas sa Tagapagligtas sa ating buhay ang lumapit sa Kanya nang may pananampalataya. Ang ganitong uri ng paglapit ay nangangailangan ng masigasig at nakatuong pagsusumikap. …

Kung huhugot kayo ng lakas sa Panginoon sa inyong buhay na kasingtindi ng isang taong nalulunod na nagpupumilit at nangangapos ang hininga, sasainyo ang lakas mula kay Jesucristo. Kapag alam ng Tagapagligtas na talagang gusto ninyong lumapit sa Kanya—kapag nadama Niya na pinakamimithi ng inyong puso na humugot ng lakas sa Kanya sa inyong buhay—gagabayan kayo ng Espiritu Santo na malaman kung ano mismo ang dapat ninyong gawin.

Kapag nagsikap kayo na espirituwal na lumapit sa Kanya nang higit pa sa dati ninyong nagawa, dadaloy ang Kanyang lakas sa inyo …

Ang ebanghelyo ni Jesucristo ay puno ng Kanyang lakas, na laan sa lahat ng anak ng Diyos na masigasig na naghahangad nito. Pinatototohanan ko na kapag humugot tayo ng lakas sa Kanya sa ating buhay, Siya at tayo man ay magagalak. (Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 39–42)

Mga Karagdagang Aktibidad sa Pag-aaral

Alma 17:2–4. “Itinuon nila ang kanilang sarili sa maraming panalangin, at pag-aayuno”

Maaaring makinabang ang mga estudyante sa mas malalim na pag-aaral ng Alma 17:2–4. Matapos basahin ang mga talatang ito, maaari mong anyayahan ang mga estudyante na tukuyin ang mga alituntuning natutuhan nila mula sa mga ito. Ang isang katotohanan na maaaring matukoy ng mga estudyante ay kapag tayo ay nag-aaral ng salita ng Diyos, nanalangin, at nag-ayuno, matatanggap natin ang diwa ng propesiya at paghahayag at makapagtuturo tayo nang may kapangyarihan.

Kung kailangang pagsamahin ang mga lesson mula sa linggong ito, maaari mong gamitin ang mga talatang ito na makatutulong para malaman ng mga estudyante ang mga salaysay tungkol sa pagtuturo ni Ammon kay Haring Lamoni sa Alma 18 at sa pagtuturo ni Aaron sa ama ni Lamoni sa Alma 22. Maaaring pag-aralan ng mga estudyante ang mga salaysay na iyon at hanapin ang katibayan na napuspos sina Ammon at Aaron ng “diwa ng propesiya, at [ng] diwa ng paghahayag” at nagtuturo “nang may kapangyarihan at karapatan ng Diyos” (talata 3).

Ang mga pangako ng Panginoon

Maaari mong tulungan ang mga estudyante na magtiwala sa Diyos sa pamamagitan ng pagtuturo kung paano tinupad ng Panginoon ang Kanyang mga pangako kay Mosias at sa kanyang mga anak. Maaaring gumawa ang mga estudyante ng entry sa kanilang study journal na may heading na “Ang mga Pangako ng Panginoon sa mga Anak ni Mosias.”

Habang pinag-aaralan ng mga estudyante ang Alma 17–27 sa darating na mga araw, maaari nilang matukoy ang mga pagkakataon na tinupad ng Diyos ang Kanyang mga pangako mula sa Mosias 28:7 at Alma 17:11, at maaari nilang isulat ang mga pagkakataong ito sa kanilang study journal. Kabilang sa ilang halimbawa ng katuparan ng mga pangakong ito ang Alma 17:34–38; 19:22–23; 20:20–30; 22:22–26; 23:5–6; at 26:27–31.

Matapos pag-aralan ang Alma 27, maaaring talakayin ng mga estudyante kung paano natupad ang mga pangako ng Panginoon at kung paano Niya tinutupad ang Kanyang mga pangako sa atin ngayon.