Alma 20–22

“Ano ang Nararapat Kong Gawin Upang Magkaroon ako [ng] Buhay na Walang Hanggan?”

tinedyer na nakangiti

Ano ang makatutulong sa iyo na hangaring sundin ang Diyos nang higit kaysa ano pa mang bagay? Ang ama ni Haring Lamoni ay dating masamang tao, ngunit matapos malaman ang mahahalagang katotohanan tungkol sa plano ng kaligtasan ng ating Tagapagligtas at ng Ama sa Langit, nagsimulang magbago nang husto ang kanyang mga hangarin. Ang lesson na ito ay makatutulong sa iyo na hangarin ang mga bagay ng Diyos nang higit kaysa ano pa mang bagay na maibibigay ng mundo.

Pagpapatotoo tungkol kay Jesucristo. Maghanap ng mga pagkakataon para patotohanan ang kapangyarihan, awa, at impluwensya ng Panginoon sa ating buhay. Hikayatin ang mga estudyante na itanong, “Ano ang itinuturo ng talata na ito ng banal na kasulatan tungkol kay Jesucristo na makatutulong sa akin na maunawaan at asahan ang Kanyang mga turo at Pagbabayad-sala?”

Paghahanda ng estudyante: Sabihin sa mga estudyante na basahin ang Alma 20 at 22, at alamin kung paano nagbago ang ama ni Haring Lamoni sa mga kabanatang ito. Sabihin sa kanila na isipin ang mga posibleng dahilan para sa pagbabagong iyon.

Mga Posibleng Aktibidad sa Pag-aaral

Handa ka ba?

Napansin mo na ba na may ilang partikular na sitwasyon na makaiimpluwensya sa kahandaan mong gawin ang isang bagay—o hindi gawin ang isang bagay?

Halimbawa, isipin ang mga sitwasyon kung saan magiging handa kang gawin ang mga sumusunod. Pagkatapos ay isipin ang mga sitwasyon kung saan hindi ka gaanong magiging handang gawin ang mga ito.

Maaari mong hatiin ang mga estudyante sa maliliit na grupo at ipatalakay sa bawat grupo ang isa sa mga sumusunod na gawain. Pagkatapos ay maaaring ibahagi ng mga miyembro ng bawat grupo ang kanilang mga sagot sa klase.

• Linisin ang kuwarto mo.

• Magbasa ng aklat.

• Maglakad nang malayo.

Sabihin sa mga estudyante na gumawa ng kaunting pagsusuri sa sarili sa pamamagitan ng pagbabahagi ng mga sumusunod na tagubilin. Huwag ipabahagi sa mga estudyante ang kanilang mga sagot sa mga tanong.

Ang ilang partikular na bagay ay makahihikayat sa atin na sundin ang Diyos.

Pag-isipan sandali ang iyong mga hangaring sundin ang Diyos. Kung nais mong sundin Siya, ano ang nakatulong sa iyo na madama ang hangaring iyon? Kung wala kang hangaring sumunod sa Kanya sa ngayon, ano sa palagay mo ang mga dahilan kaya nadarama mo iyon?

Ngayon, malalaman mo ang tungkol sa isang tao na nagkaroon ng mas malaking hangarin na sundin ang Diyos sa loob ng maikling panahon. Habang nag-aaral ka, bigyang-pansin kung ano ang nagdulot ng pagbabagong ito. Maghanap ng mga turo na makatutulong sa iyong magkaroon ng mas malaking hangaring sundin ang Diyos at matanggap ang mga pagpapalang tanging Siya lamang ang makapagbibigay sa iyo.

Nakasalubong nina Ammon at Lamoni ang ama ni Lamoni

Ibuod ang sumusunod na impormasyon upang matulungan ang mga estudyante na maghandang pag-aralan ang mga pangyayari sa Alma 20. Mag-ingat na huwag maglaan ng masyadong maraming oras sa bahaging ito ng lesson. Gugustuhin mong magkaroon ang mga estudyante ng sapat na oras na pag-aralan ang salaysay tungkol sa pagtuturo ni Aaron sa ama ni Lamoni sa Alma 22.

Habang pinaglilingkuran at tinuturuan ni Ammon ang mga tao ni Haring Lamoni sa lupain ng Ismael, inihayag ng Panginoon kay Ammon na ibinilanggo si Aaron at ang iba pa mula sa kanilang grupo sa lupain ng Midoni. Nagplano si Ammon at ang hari na maglakbay patungo roon upang iligtas si Aaron at ang iba pa. Sa kanilang paglalakbay, nakasalubong nila ang ama ni Lamoni, na siyang hari sa buong lupain (tingnan sa Alma 20:1–8).

Maaaring makatulong na mag-anyaya ng dalawa o tatlong handang estudyante na basahin ang mga sumusunod na talata habang sumasabay sa pagbabasa sa kanilang mga banal na kasulatan ang iba pang mga miyembro ng klase.

Basahin ang Alma 20:13–28, at alamin ang pag-uusap na naganap sa pagitan nina Ammon, Lamoni, at ng ama ni Lamoni.

• Paano mo napansin na nagbago ang mga hangarin ng ama ni Lamoni habang kausap niya sina Ammon at Lamoni?

• Ano ang ilan sa mga bagay na nakatulong sa pagbabagong iyon?

Maaari mong markahan sa talata 23 kung ano ang handang isuko ng ama ni Lamoni kung hindi kikitlin ni Ammon ang kanyang buhay. Maaari mong ikumpara ang kanyang reaksyon sa talatang ito sa kanyang reaksyon sa iba pang mga talata na pag-aaralan mo kalaunan sa lesson.

Tinuruan ni Aaron ang ama ni Lamoni

Matapos palayain si Aaron at ang mga kasama niya sa bilangguan, bumalik si Ammon sa lupain ng Ismael kasama si Haring Lamoni. Inakay ng Espiritu si Aaron na bisitahin ang ama ni Lamoni sa lupain ng Nephi (tingnan sa Alma 22:1).

Basahin ang Alma 22:2–6, at alamin ang mga itinanong ng ama ni Lamoni habang nakikipag-usap kay Aaron.

• Ano ang maaari mong ibahagi tungkol sa Ama sa Langit at sa Kanyang plano bilang tugon sa mga tanong ng hari sa mga talata 5–6?

Basahin ang Alma 22:7–14 at alamin kung paano sinagot ni Aaron ang mga tanong ng hari. Tandaan na ang salitang karapatan sa talata 14 ay nangangahulugang “matamo o maging karapat-dapat.”

• Ano ang natutuhan ng hari tungkol sa Diyos at sa Kanyang plano na malamang na nakaapekto sa kanyang pananaw tungkol sa buhay?

• Paano nakakaimpluwensya sa atin ang paniniwala at pag-unawa sa mga turo ni Aaron tungkol sa Diyos at sa Kanyang plano?

Basahin ang Alma 22:15–18, at alamin kung ano ang ninanais at handang gawin ng hari matapos siyang turuan ni Aaron.

Bago talakayin ang susunod na dalawang tanong, maaari mong anyayahan ang maraming estudyante na isulat sa pisara ang kanilang mga paboritong parirala mula sa mga talatang ito. Pagkatapos ay maaari mong itanong sa mga estudyante kung may inilalarawan sa alinman sa mga parirala na isang bagay na nadama nila noon o kung may mga tanong sila. Sabihin sa mga handang estudyante na ibahagi ang kanilang mga tanong o karanasan. Sabihin sa mga estudyante na huwag magbahagi ng anumang bagay na masyadong personal o pribado.

• Anong mga salita o parirala ang nakatulong sa iyo na makita na nagbago ang mga hangarin ng hari mula nang makasalubong at makausap niya sina Ammon at Lamoni sa daan patungong Midoni?

• Ano ang sinabi ng hari sa mga talata 15 at 18 na handa niyang isuko?

• Batay sa natutuhan mo mula sa iyong pag-aaral ng Alma 20 at 22, ano ang ilan sa mga bagay na nakadagdag sa pagbabagong naranasan ng hari?

Ang isang katotohanan na matututuhan natin mula sa salaysay na ito ay kapag nauunawaan natin na kailangan natin si Jesucristo, nadaragdagan ang ating hangaring sundin Siya at tanggapin ang mga pagpapalang maibibigay Niya sa atin.

• Sa iyong palagay, bakit maaaring magkaroon ng malaking epekto sa ating mga hangarin at kilos ang pag-unawa sa pangangailangan natin sa Tagapagligtas?

• Ano ang maaaring makatulong o nakatulong sa iyo upang mas maunawaan ang pangangailangan mo kay Jesucristo?

Paano nakakaimpluwensya sa atin ang ating mabubuting hangarin

Ang karanasan ng hari kasama si Aaron ay nagkaroon ng malaking epekto sa hari at sa kanyang mga tao. Ang hari, ang kanyang asawa, ang kanyang buong sambahayan, at marami pang ibang Lamanita ay nagbalik-loob sa Panginoon at naging tapat sila sa Kanya habambuhay (tingnan sa Alma 22:23; 23:6).

Isiping muli ang sinabi ng hari na ninais niya sa mga talata 15–18. Kabilang sa mga ito ang

• mga pagpapala ng buhay na walang hanggan (mga talata 15, 18);

• “[ma]isilang sa Diyos, nang ang masamang espiritung ito ay mabunot mula sa [kanyang] dibdib” (talata 15);

• matanggap ang Espiritu Santo (talata 15);

• mapuspos ng galak (talata 15); at

• makilala ang Diyos (talata 18).

Ilista ang mga hangarin ng hari sa pisara kung hindi pa ito nagagawa. Sa halip na itanong ang susunod na tanong, maaari mong anyayahan ang mga estudyante na sumulat ng maikling paglalarawan sa kanilang study journal tungkol sa uri ng tao na maaaring maging sila sa loob ng 5 o 10 taon kung palagi nilang hahangarin ang mga bagay na ito sa panahong iyon.

Pagkatapos ay maaaring ibahagi ng mga estudyante sa klase ang kanilang mga naisip.

• Ano sa palagay mo ang kaibahang magagawa nito sa iyong buhay para patuloy na hangarin ang mga bagay na ito?

• Ano ang kailangan nating isuko o baguhin para matamo ang mga pagpapalang ito?

Isipin ang natutuhan at nadama mo habang nag-aaral ka ngayon. Isipin kung ano ang magagawa mo para mas lubos na hangarin ang mga pagpapalang nais ibigay sa iyo ng Ama sa Langit. Isipin kung ano ang maaaring kailanganin mong gawin o isuko para matanggap ang mga pagpapalang ito. Isulat ang mga naisip at espirituwal na impresyon mo sa iyong study journal.

Bigyan ang mga estudyante ng sapat na oras para isulat sa kanilang study journal ang mga naisip at impresyon nila. Maaari mong anyayahan ang ilang handang estudyante na ibahagi sa klase ang ilan sa mga isinulat nila na hindi masyadong personal.

Komentaryo at Impormasyon ng Konteksto

Paano ko mararanasan ang “labis na kagalakan” (Alma 22:15) na inilarawan ng ama ni Lamoni?

Itinuro ni Pangulong Russell M. Nelson:

Pangulong Russell M. Nelson

Kung titingnan natin ang mundo at susundin ang mga pormula nito sa kaligayahan, hindi tayo kailanman daranas ng kagalakan. Maaaring maranasan ng masasama ang maraming uri ng damdamin, ngunit hindi sila kailanman daranas ng kagalakan! Ang kagalakan ay isang kaloob sa matatapat. Ito ang kaloob na nagmumula sa sadyang pagsisikap na mamuhay nang matwid, tulad ng itinuro ni Jesucristo.

Itinuro Niya sa atin kung paano tayo magagalak. Kapag pinili natin ang Ama sa Langit na maging ating Diyos at kapag nadarama natin na may epekto ang Pagbabayad-sala ng Tagapagligtas sa ating buhay, mapupuspos tayo ng kagalakan. (Russell M. Nelson, “Kagalakan at Espirituwal na Kaligtasan,” Liahona, Nob. 2016, 84)

Ano ang makatutulong sa akin para maunawaan ko na kailangan ko si Jesucristo?

Itinuro ni Pangulong Ezra Taft Benson (1899–1994):

Pangulong Ezra Taft Benson

Tulad ng pag-ayaw ng tao sa pagkain hangga’t hindi siya gutom, gayon din naman na hindi niya hahangaring maligtas kay Cristo hangga’t hindi niya alam kung bakit niya kailangan si Cristo.

Walang sinuman ang malalaman nang sapat at wasto kung bakit kailangan niya si Cristo hangga’t hindi niya nauunawaan at tinatanggap ang doktrina ng Pagkahulog at ang epekto nito sa buong sangkatauhan. At wala nang iba pang aklat sa mundo ang nagpapaliwanag sa mahalagang doktrinang ito nang halos kasinglinaw ng Aklat ni Mormon. (Ezra Taft Benson, “The Book of Mormon and the Doctrine and Covenants,” Ensign, Mayo 1987, 85)

Paano nagbago ang ama ni Lamoni mula sa unang pag-uusap nila ni Ammon hanggang sa panahong tinuruan siya ni Aaron?

Habang naglilingkod bilang miyembro ng Pitumpu, itinuro ni Elder Terence M. Vinson:

Mga Karagdagang Aktibidad sa Pag-aaral

Matuto mula sa mga halimbawa nina Ammon at Aaron tungkol sa pagbabahagi ng ebanghelyo

Maaaring makatulong na anyayahan ang mga estudyante na pagtuunan ang natutuhan nila tungkol sa pagbabahagi ng ebanghelyo sa iba mula sa mga turo ni Ammon sa Alma 18:24–39 kay Haring Lamoni at sa mga turo ni Aaron sa Alma 22:1–14 sa ama ni Haring Lamoni. Maaari mong anyayahan ang mga estudyante na talakayin ang ilan o ang lahat ng mga sumusunod na tanong bilang bahagi ng talakayang ito:

Anong mga katotohanan ang pinagtuunan nina Ammon at Aaron habang nagtuturo? Bakit mahalagang ituro ang mga katotohanang iyon sa mga taong natututo tungkol sa ebanghelyo?

Ano ang matututuhan mo sa paraan ng pagtugon nina Ammon at Aaron sa mga itinanong sa kanila na makatutulong sa iyo habang itinuturo mo sa iba ang tungkol sa ebanghelyo?

Alma 22:14. “Ang tao … ay walang karapatan sa alinmang bagay para sa kanyang sarili”

Upang matulungan ang mga estudyante na mas maunawaan ang turo ni Aaron na ang tao ay walang karapatan sa alinmang bagay para sa kanyang sarili, maaari mong ibahagi ang sumusunod mula kay Elder Dale G. Renlund ng Korum ng Labindalawang Apostol: “Hindi kayo nagtatamo ng mga pagpapala dahil lamang sa mga ginawa ninyo—mali ang ideyang iyan—ngunit kailangang maging marapat kayo para dito. Ang ating kaligtasan ay darating lamang sa pamamagitan ng kabutihan at biyaya ni Jesucristo” (“Mananagana sa Pagpapala,” Liahona, Mayo 2019, 71).

Maaari ding panoorin ng mga estudyante ang “Mananagana sa Pagpapala“ mula sa time code na 0:00 hanggang 1:14, na matatagpuan sa ChurchofJesusChrist.org, para makakita ng mga karagdagang kaalaman mula kay Elder Renlund tungkol sa paksang ito.

Alma 22:18. Pagtalikod sa ating mga kasalanan upang makilala ang Diyos

Maaari mong talakayin ang mapanalanging pahayag ng hari sa talata 18 na tatalikuran niya ang lahat ng kanyang kasalanan upang makilala ang Diyos. Maaari mong anyayahan ang mga estudyante na isipin kung paano nakatutulong sa atin ang pagsisisi sa ating mga kasalanan para mas lubos nating makilala ang Diyos. Maaari mo silang anyayahang isipin ang mga kasalanang gusto nilang “talikuran” o pagsisihan para matanggap ang mga pagpapalang nais ibigay sa kanila ng Diyos. Itanong sa mga estudyante kung ano ang maaaring kailanganin nilang gawin para madaig ang mga kasalanang iyon.