Alma 23

Ata “Nuk Hoqën Dorë Kurrë nga Besimi i Tyre”

Mendo për forcat e shumta në botë sot që kërkojnë ta shkatërrojnë besimin tënd dhe të të largojnë nga Zoti. Çfarë mund të bësh për të qëndruar i palëkundur dhe për të penguar që kjo të ndodhë? Ne mund të mësojmë nga shembujt e mijëra lamanitëve që ishin “[të] kthye[r] në besim te Zoti” dhe që “nuk hoqën dorë kurrë nga besimi i tyre” (Alma 23:6). Qëllimi i këtij mësimi është të të ndihmojë të dëshirosh të jesh i kthyer më plotësisht në besim te Zoti dhe të përcaktosh çdo pengesë ndaj atij kthimi në besim.

Nxitja e nxënësve që të përpiqen ta ndjekin Jezu Krishtin. Ndihmojini nxënësit të kuptojnë se ndërsa përpiqen fort ta jetojnë ungjillin e Jezu Krishtit, ata mund të bëhen më shumë si Shpëtimtari dhe të gjejnë më shumë gëzim në dishepullimin e tyre.

Përgatitja e nxënësve: Ftojini nxënësit të vijnë të përgatitur për të treguar se çfarë mendojnë se do të thotë të jesh “[i] kthye[r] në besim te Zoti” (Alma 23:6) dhe përse kthimi në besim tek Ai është kaq i rëndësishëm. Ata mund t’i referohen Udhëzuesit për Shkrimet e Shenjta nën temën “Kthim, Kthyer (i)”, nëse kanë nevojë për ndihmë.

Veprimtari të Mundshme të të Mësuarit

Të qëndruarit i fortë

Ky mësim dhe mësimi për kapitullin tek Alma 24 mund të ndërthuren për t’i ndihmuar nxënësit ta thellojnë kthimin e tyre në besim. Ky mësim mund t’i ndihmojë nxënësit të përcaktojnë pengesat ndaj kthimit të tyre në besim; mësimi i radhës ka për qëllim t’i ndihmojë ata t’i kapërcejnë ato pengesa.

Merreni parasysh të ftoni dy vullnetarë të bëjnë veprimtarinë vijuese. Kujtojuni atyre të mos sforcohen shumë.

Nëse është e mundur, qëndro me një këmbë për 30 sekonda. Mendo se sa e vështirë do të ishte të mbaje ekuilibrin nëse dikush do të të shtynte ndërkohë që qëndroje me një këmbë.

Tani qëndro me të dyja këmbët dhe mendo se sa më e thjeshtë do të ishte të mbaje ekuilibrin nëse dikush do të të shtynte.

Me raste, shkrimet e shenjta e krahasojnë besnikërinë ndaj Zotit me të qëndruarit të patundur (shih te Mosia 4:11; Alma 1:25) dhe largimin nga Zoti me rënien (shih te 2 Nefi 18:15; Helamani 5:12).

• Cilat janë disa arsye përse njerëzit heqin dorë nga Jezu Krishti dhe Kisha e Tij?

Nëse dëshironi, mund të paraqitni këto pyetje për t’i lejuar nxënësit t’i përsiatin ato.

Përsiati pyetjet vijuese:

• Nëse do të vazhdoje të jetoje siç po jeton tani, a e ndien se do të afroheshe më shumë me Zotin dhe Kishën e Tij apo do të filloje të hiqje dorë nga besimi? Përse?

• Çfarë di ti rreth Zotit dhe Kishës së Tij që të bën të mos duash të heqësh dorë nga besimi?

Ndërsa studion rreth njerëzve që “nuk hoqën dorë kurrë” (Alma 23:6), kërko ide dhe udhërrëfim për jetën tënde nëpërmjet lutjes ndaj Atit Qiellor dhe frymëzimin e Frymës së Shenjtë.

Të kthyer në besim te Zoti

Pas kthimit të tij në besim, mbreti i lamanitëve shpalli liri fetare në vend në mënyrë që bijtë e Mosias ta predikonin të sigurt ungjillin.

Lexo tek Alma 23:3–5, duke kërkuar ndikimin që pati predikimi te njerëzit.

Merreni parasysh të pyesni se cilat fraza u bënë përshtypje nxënësve tuaj.

Me raste, shkrimet e shenjta përsëritin fraza që janë të rëndësishme që ne t’i kuptojmë. Lexo tek Alma 23:6–13, 15, duke kërkuar fraza që tregojnë se përse këta mijëra të kthyer në besim “nuk hoqën dorë kurrë nga besimi i tyre” (vargu 6). Merre parasysh t’i shenjosh frazat e përsëritura.

Ftojini nxënësit të tregojnë atë që gjetën. Fraza “u kthyen në besim te Zoti” përsëritet përkatësisht tek Alma 23:6, 8, 13 dhe fraza “ulën armët e rebelimit të tyre” gjendet tek Alma 23:7, 13.

Një e vërtetë që mund të mësojmë nga këto vargje është se ndërsa kthehemi në besim te Zoti dhe i ulim armët e rebelimit tonë, ne mund të qëndrojmë gjithnjë besnikë ndaj Tij.

• Çfarë do të thotë të jesh “[i] kthye[r] në besim te Zoti”? (Alma 23:6.) (Nëse është e dobishme, merre parasysh të studiosh zërin “Kthim, Kthyer (i)” tek Udhëzuesi për Shkrimet e Shenjta ose the Topical Guide [Udhëzuesi Tematik].)

• Përse është e rëndësishme të jesh i kthyer në besim “te Zoti” dhe jo te një misionar apo mësim i veçantë?

Paraqitni një figurë të Shpëtimtarit ndërsa i ftoni nxënësit të bëjnë sa vijon.

Mendo se çfarë di për Shpëtimtarin dhe përsiat se përse dëshiron të bëhesh dhe të qëndrosh i kthyer në besim tek Ai gjatë gjithë jetës tënde. Merre parasysh të lexosh disa nga vargjet vijuese për të të ndihmuar:

• Gjoni 14:6

• Omni 1:26

• Helamani 5:12

• Ethëri 12:27

Ftojini nxënësit të japin mendimet e tyre dhe atë që gjetën.

• Çfarë të ka ndihmuar ty dhe të tjerë që ti njeh të bëheni më të kthyer në besim te Zoti?

Ulja e armëve të rebelimit tonë

Për të qenë më të vërtetë të kthyer në besim te Zoti dhe për të mos hequr dorë kurrë nga besimi, ne duhet të jemi të gatshëm t’i ulim armët e rebelimit tonë. Armët e rebelimit të lamanitëve ishin edhe të vërteta, edhe simbolike. Por për ne, këto armë ka të ngjarë të jenë vetëm simbolike.

Merreni parasysh t’i shkruani pohimet vijuese në tabelë.

Plaku Dejvid A. Bednar, i Kuorumit të Dymbëdhjetë Apostujve, dha mësim se armët e rebelimit tonë mund të jenë “egoizmi, krenaria dhe mosbindja” (“Të Kthyer në Besim te Zoti”, Liahona, nëntor 2012, f. 108). Plaku Dejll G. Renland, i Kuorumit të Dymbëdhjetë Apostujve, dha mësim se armët tona mund të jenë “dëshirat vetjake që janë në kundërshtim me të qenit i ankoruar te Shpëtimtari dhe ndjekjen e shtegut të besëlidhjes” (“Zotim i Patundur ndaj Jezu Krishtit”, Liahona, nëntor 2019, f. 22).

Qëllimi i veprimtarisë vijuese është t’i ndihmojë nxënësit t’i përcaktojnë shembujt e armëve të rebelimit që janë të përshtatshme për kohën tonë. Merreni parasysh ta ndani klasën në grupe të vogla. Pas një kohe të mjaftueshme, ftojeni secilin grup të përzgjedhë një anëtar që të vijë tek tabela dhe vizatojë e emërtojë një armë rebelimi, ndërkohë që anëtari tjetër paraqet shkurtimisht disa përgjigje të grupit për pyetjet vijuese. Ndërsa flasin, kërkoni mënyra për t’i përgëzuar nxënësit që i bënë shkrimet e shenjta të përshtatshme për kohën tonë dhe falënderojini ata për përpjekjet e tyre.

Vizatoji dy armë të thjeshta (shpata, heshta ose armë të tjera) në ditarin tënd të studimit ose në një copë letër. Pranë ose mbi çdo armë, shkruaj një shembull të caktuar dhe real të një qëndrimi ose veprimi në kundërshtim me ungjillin e Jezu Krishtit që një adoleshent mund të ketë në kohën tonë. Për shembull, dikush që ka probleme me krenarinë mund të mos e dëgjojë këshillën e prindërve të tij ose të saj, ose mund të ndiejë se profetët janë me të vjetrën dhe s’e kanë idenë e realitetit. Ose dikush tjetër mund të kryejë mëkate të caktuara për shkak se ai ose ajo mendon se urdhërimet e Perëndisë janë tepër kufizuese.

• Si mund të ndikojnë këto qëndrime ose veprimeve në kthimin në besim te Zoti të këtij personi?

• Si mund ta ndihmojë dikë braktisja ose lënia pas e këtyre qëndrimeve ose veprimeve që të jetë më i kthyer në besim te Zoti?

Armët e rebelimit tënd

Merreni parasysh t’i ftoni nxënësit ta bëjnë veprimtarinë vijuese në ditarët e tyre të studimit.

Për ta përmbyllur këtë mësim, kërko ndihmën e Atit Qiellor nëpërmjet Frymës së Shenjtë për të përcaktuar se çfarë armësh të rebelimit mund të kesh. Nëse e përcakton njërën, merre parasysh ta shkruash atë në ditarin tënd të studimit dhe të vizatosh një armë pranë tij.

Përsiat se çfarë mund të bësh për t’i ulur armët e rebelimit tënd dhe se si ai zotim mund të të ndihmojë të bëhesh i kthyer në besim te Zoti dhe të mos heqësh dorë kurrë nga besimi.

Merreni parasysh të jepni dëshmi për parimet e dhëna në këtë mësim.

Komente dhe Informacion për Rrethanat

Alma 23:6. Çfarë do të thotë të jesh i kthyer në besim te Zoti?

Shikoni “Kthehuni në Besim” nga kodi kohor 00:48 deri në 3:21 dhe “Ju Do të Jeni të Lirë” nga kodi kohor 6:43 deri në 8:52 për të parë shembuj të kthimit në besim.

Çfarë bekimesh mund të vijnë ndërsa i lëmë mënjanë armët e rebelimit tonë?

Plaku Patrik Kiëron, i Të Shtatëdhjetëve, dha mësim:

“Ne gjejmë shërim dhe lehtësim vetëm kur sjellim vetveten te këmbët e Mjekut të Madh, Shpëtimtarit tonë, Jezu Krishtit. Duhet të ulim armët e rebelimit (e secili nga ne e di se cilat janë ato). Duhet të braktisim mëkatin, kotësinë dhe krenarinë tonë. Duhet të heqim dorë nga dëshirat e ndjekjes së botës dhe të respekteve e lëvdatave nga bota. Duhet të pushojmë së luftuari kundër Perëndisë dhe, në vend të kësaj, t’ia japim Atij të gjithë zemrën, pa i mbajtur asgjë. Atëherë Ai mundet të na shërojë. Atëherë Ai mundet të na pastrojë nga thumbi helmues i mëkatit.” (Patrik Kiëron, “Ejani tek Unë me Qëllim të Plotë të Zemrës, dhe Unë Do t’Ju Shëroj”, Liahona, nëntor 2010, f. 51–52)

Çfarë do të thotë emri anti-nefi-lehitë?

Emri anti-nefi-lehitë mund të tregojë bashkimin e pasardhësve të Nefit dhe atyre që e ndoqën atë me pasardhësit e tjerë të Lehit: “Emri ‘Anti’ tek ‘anti-nefi-lehitë’ mund të jetë një emër i prejardhur nga nty që në gjuhën egjiptiane do të thotë ‘ai i, ai që’. Prandaj, në vend që të ketë kuptimin ‘kundër’, ka kuptimin ‘ai i Nefit dhe Lehit’” (Stephen D. Ricks, “Anti-Nephi-Lehi”, në Dennis L. Largey, red., Book of Mormon Reference Companion [2003], f. 67).

Veprimtari Plotësuese të të Mësuarit

Një fillim alternativ

Kërkojuni nxënësve të përsiatin për atë që mund t’i ndihmojë ata të qëndrojnë të vërtetë ndaj Zotit dhe ungjillit të Tij gjatë gjithë jetës së tyre, pavarësisht nga pengesat.

Kthimi në besim

Nëse nxënësit do të merrnin dobi nga studimi i mëtejshëm i kuptimit të kthimit në besim dhe se si duket ai, merreni parasysh të shfaqni materialin filmik nga Plaku Bednar si edhe një ose të dy materialet filmike që ilustrojnë shembujt e kthimit në besim nga pjesa “Komente dhe Informacion për Rrethanat”. Ftojini nxënësit të tregojnë shembuj të kthimit në besim te Zoti për të cilët edhe ata janë të vetëdijshëm. Kërkojuni atyre të përcaktojnë veprimet që mund të ndërmarrin për t’u bërë vetë më të kthyer në besim te Zoti.

Liria fetare

Udhëheqësit e Kishës e kanë theksuar rëndësinë e lirisë fetare në kohën tonë. Nëse nxënësit do të merrnin dobi nga studimi i mëtejshëm i kësaj teme të rëndësishme, merreni parasysh t’i ftoni ata të studiojnë tek Alma 23:1–7 dhe të tregojnë se çfarë bekimesh erdhën për shkak të lirisë fetare që iu dha lamanitëve. Kërkojuni nxënësve të tregojnë përse Zoti do të donte që ne të kemi liri fetare dhe çfarë na mëson kjo rreth Tij. Ftojini nxënësit të mendojnë për atë që mund të bëjnë për ta ruajtur lirinë fetare në komunitetet e tyre dhe se si kjo mund të ndihmojë që puna e Zotit të shkojë përpara. (Shih edhe Ronald A. Rasband, “Për të Shëruar Botën”, Liahona, maj 2022, f. 91–94)