“Алма 29: Бидний зүрхний хүсэл,” Мормоны Номын багшийн гарын авлага (2024)
“Алма 29,” Мормоны Номын багшийн гарын авлага
Алма 29
Бидний зүрхний хүсэл
Таны амьдралын хүсэл Их Эзэний танаас хүсдэг зүйлтэй нийцэж байгаа эсэхийг та хэрхэн мэдэх вэ? Алма 29 нь Алмагийн зүрхний хүсэл, бодол Бурханы түүнд хүсдэг зүйлтэй нийцэж байгаа эсэх тухай түүний эргэцүүллийг цэдэглэжээ. Энэ хичээл таныг өөрийнхөө хүслийг дүгнэж, Их Эзэний хүсэлд нийцүүлэхэд тань тусалж чадна.
Есүс Христэд итгэх итгэлийг хөгжүүлэх. Хичээл заахаар бэлтгэж байхдаа өөрөөсөө “Судрын энэ хэсэгт онцлон тэмдэглэж болох бүх үнэнээс аль нь суралцагчдад Тэнгэрлэг Эцэгт болон Аврагчид ойртоход нь хамгийн их тус болох вэ?” гэж асуу. Сайн мэдээний аль үнэн энэ зорилгыг хамгийн сайн биелүүлэхийг илүү сайн ойлгохын тулд Ариун Сүнсний сүнслэг нөлөөг эрэлхийл.
Суралцагчийн бэлтгэл: Суралцагчдыг Алма 29:1–6-г уншаад, хүслийн талаар юу суралцсанаа тунгаан бодоход урь.
Боломжит суралцах үйл ажиллагаа
Миний амьдралын хүсэл
Бага насныхаа зургийг харуулж, дараах асуултад хариулсан хариултаа хуваалц. Мөн та цөөн хэдэн суралцагчийг бага насныхаа зургуудыг авчирч, асуултад хариулахад урьж болно.
Мөн олон соёлд хэн нэгнээс хамгийн их хүсэж буй зүйлийг нь асуудаг үлгэр, домгууд байдаг. Жишээлбэл: Хүслээ одонд шивнэх, бирд эсвэл дагинаас хүслийг тань биелүүлэхийг гуйх эсвэл төрсөн өдрийн лаа үлээж байхдаа хүслээ шивнэх зэрэг юм. Та эдгээр танил түүхийн аль нэгийг авч үзээд, “Хэрэв таны хамгийн их хүсдэг хүслийн аль нэгийг биелүүлэх боломжтой байсан бол тэр нь юу байх байсан бэ?” гэж асууж болно.
-
Та багадаа ямар зүйлийг хамгийн их хүсдэг байсан бэ?
-
Одоо таны хүсэл хэрхэн өөрчлөгдсөн байна вэ? Таны хүсэл ирээдүйд хэрхэн өөрчлөгдөж болох вэ?
Судлах тэмдэглэлийнхээ хуудасны нэг талд амьдралынхаа хэд хэдэн хүслийг бич. (Та хичээлийн төгсгөлд хуудасныхаа нөгөө талыг нь ашиглах болно.)
-
Бидний хүсэл амьдралд маань хэрхэн нөлөөлдөг вэ?
Бид сайн мэдээнд өсөж том болон, төлөвшиж, Бурханд ойртох тусам бидний зарим хүсэл өөрчлөгдөж, Түүний бидэнд хүсдэг зүйлтэй илүү нийцэж магадгүй юм.
-
Бидний хүсэл Бурханы бидний төлөө хүсдэг зүйлтэй нийцэж байгаа эсэхийг бид хэрхэн тодорхойлох вэ?
Та энэ хичээлийг судлахдаа хүслээ тунгаан бод. Бурханы хүсэлтэй нийцэж байгаа болон төлөвшиж, өөрчлөх шаардлагатай хүслээ олж тогтоохыг хичээ.
Хүсэл тэмүүллээ Их Эзэний хүсэлд нийцүүлэх нь
Алма 29-д Алма нэг хүслээ цэдэглэсэн. Алма 29:1–2-ыг уншаад, түүний юу дүрсэлснийг олж мэд.
-
Алма яагаад тэнгэр элч болохыг хүссэн бэ? Энэ нь танд Түүний талаар юу хэлдэг вэ?
-
Алмагийн тэнгэр элч болох хүсэлд бурханлагаар нөлөөлсөн байж болох өнгөрсөн үеийн талаар та юу мэдэх вэ? (Мозая 27:11–17-г үзнэ үү).
Дараах зураг танд Алмагийн өмнөх амьдралын нэгэн чухал туршлагыг санахад тусална.
Шаардлагатай бол суралцагчдад Мозая 27-д цэдэглэсэн Алмагийн тэнгэр элчтэй уулзсан туршлагыг ойлгоход тусал. Үүнийг хийх нэг арга зам бол дараах зургийг үзүүлээд суралцагчдаас түүний дүрсэлсэн түүхийн талаар юу санаж байгаагаа хуваалцахыг хүсэх юм.
Шүлгүүдийн хам сэдвийг ойлгох нь бидэнд нэмэлт ойлголтыг өгнө. Алма 29-өөс өмнөх бүлгүүдэд Их Эзэн Антай-Нифай-Лихайчуудыг хамгаалахын тулд нифайчуудтай хамт амьдруулахаар авчрахыг Аммонд зарлигласан (Алма 27:4–12-ыг үзнэ үү). Нифайчууд Антай-Нифай-Лихайчуудад Жершоны нутгийг суурьшуулахаар өгч, тэднийг хамгаалахаа амлав. Ёс бус леменчүүд Антай-Нифай-Лихайчуудыг дагаж, тулаан эхлэв. Нифайчууд леменчүүдээс өөрсдийгөө болон гэр бүлээ хамгаалав. Үүний үр дүнд, “леменчүүдийн хэдэн арван мянга нь алагдан мөн тараан сарниулагдав… мөн түүнчлэн Нифайн хүмүүсийн дунд ч аймшигт аллага болов” (Алма 28:2–3).
-
Алма яагаад хүмүүсийг наманчлалд зоригтой дуудаж, уй гашуугаас урьдчилан сэргийлэхийг хүссэн байж болохыг ойлгоход энэ хам сэдэв танд хэрхэн туслах вэ?
Алма 29:3–6-г уншаад, Алма хүслийн талаар юу ойлгосныг хайж ол.
Суралцагчдаас юу сурч мэдсэнийг нь асуу. Суралцагчид янз бүрийн авсан сургамжаа эсвэл зарчмуудыг хуваалцаж болох юм. Хэрэв суралцагчид энэ тухай дурдаагүй бол Алма 4-р шүлэг-т юу заасныг хураангуйлахыг хүс.
Таны тодорхойлсон нэг зарчим нь бидний хүсэлд тулгуурлан сонголт хийх боломжийг Бурхан бидэнд олгодог гэсэн зарчим байж болно.
Суралцагчдыг 4-р шүлэг дэх энэ үнэнийг тодорхойлсон түлхүүр үг, хэллэгийг судар дээрээ тэмдэглэхэд урь.
-
Энэ зарчмыг ойлгох нь бидний хувьд яагаад ач холбогдолтой вэ?
Өөрийнхөө хүслийг Их Эзэнийхтэй харьцуулахын тулд Их Эзэн хүүхдүүдийнхээ төлөө юу хүсдэгийг судлах тэмдэглэл дээрх хуудасныхаа нөгөө талд жагсаан бич. Энэ жагсаалтыг гаргахын тулд та дараах хэсгүүдийн заримыг уншиж болно.
Суралцагчдыг бичсэн зүйлээ хуваалцахад урь. Бид Аврагчийг сонсож, таньж мэдэж болох зарим жишээ нь (Матай 17:5; Иохан 17:3; 3 Нифай 11:3–7-г үзнэ үү), дуулгавартай байдлаа харуулах (Абрахам 3:25-ыг үзнэ үү), Түүний ажлыг хийх (Сургаал ба Гэрээ 6:6-г үзнэ үү), бусдыг хайрлах (Леви 19:18; Матай 22:37–40-ийг үзнэ үү), гэрлэж, гэр бүлтэй болох (Сургаал ба Гэрээ 131:1–4; Эхлэл 1:22-ыг үзнэ үү), баяр хөөрийг мэдрэх (2 Нифай 2:25-ыг үзнэ үү), мөн Түүнтэй хамт мөнх амийг өвлөх гэх зэрэг юм (Мосе 1:39-ийг үзнэ үү).
Хуудасныхаа хоёр талыг хар. Их Эзэн биднээс Өөрийг нь болон найз нөхдөө хайрлаж, үйлчлэхэд хүслээ төвлөрүүлээсэй гэж хүсдэгийг анхаар. Таны хүсэл Бурханы танд өгөх хүсэлтэй хэр нийцэж байгааг тунгаан бод.
Хэдийгээр Алмагийн сайн мэдээг хуваалцах хүсэл нь сайн байсан ч сайн мэдээг тэнгэр элч мэт хуваалцах хүсэл нь Бурхан өөрийг нь хаана, хэрхэн үйлчлэхээр дуудсантай бүрэн нийцэхгүй гэдгийг тэрээр ойлгосон. Алма өөрийн хүслийг Бурханы хүсэлд нийцүүлэхийг хүссэн гэдгийг харуулсан Алма 29:3–6 дахь үг хэллэгүүдийн доогуур зур.
-
Их Эзэний бидэнд өгсөн зүйлд сэтгэл хангалуун байна гэдэг нь таны бодлоор юу гэсэн үг вэ?
-
Бид яагаад Алмагийн адил хүслээ Их Эзэнийхтэй нийцүүлэхийг эрэлхийлэх ёстой гэж та бодож байна вэ?
-
Өөрсдийнхөө хүслээс өөр арга замаар үйлчлэх дуудлагыг хүлээн авах үед бид хэрхэн хүслээ Бурханы хүсэлд нийцүүлэх вэ?
Энэ бүлгийн сүүлд Алма Бурхан бүх үндэстэнд Өөрийн мэргэн ухаан, цаг хугацаанд заах учраас бүх дэлхийн хязгаарт ярихын тулд тэр өөрөө тэнгэр элч байх шаардлагагүй гэж тайлбарласан (Алма 29:7–8-ыг үзнэ үү). Алма 29:9, 13-ыг уншаад, Алма юугаараа алдаршсаныг, хүслээ Бурханы хүсэлд нийцүүлэхдээ ямар мэдрэмж авсныг олж мэд.
Хүслийн ач холбогдол
Суралцагчдад хүслийн талаарх ойлголтоо гүнзгийрүүлэх боломж олго. Та дараах асуулт, зааварчилгааг ангидаа нийтэлж болно. Суралцагчид сонирхож буй асуултынхаа дэргэд зогсоод, зааврыг дагаж, асуултын хариултыг жижиг бүлгүүдээр ярилцаж болно. Энэ нь давтагдах боломжтой тул суралцагчид нэгээс олон асуултыг судалж болно.
Би Их Эзэнийг дагах хүслээ хэрхэн нэмэгдүүлэх вэ?
Та энэ асуултыг тунгаан бодож байхдаа Их Эзэнд хөрвүүлэгдсэн хүмүүсийн жишээг бодох нь тустай байж болно. Таны судалж болох зарим хүн бол Инос (Инос 1:1–7-г үзнэ үү), Хаан Бенжамины хүмүүс (Мозая 5:1–5-ыг үзнэ үү), хаан Лемонай (Алма 22:15–16-г үзнэ үү) юм.
Би амьдралдаа юу хүсэх хэрэгтэй вэ?
Та энэ асуултын илчлэлтийг эрэлхийлэх явцдаа бусад хүн юу хүсэж байсныг эсвэл Их Эзэн тэднийг юу хүсээсэй гэж хүсэж байсан тухай жишээнүүдийг судал (Ром 10:1; 3 Нифай 19:7–9; Сургаал ба Гэрээ 6:6–8-ыг үзнэ үү).
Судрууд бидний хүслийн талаар өөр юу заадаг вэ?
Сэдэвчилсэн гарын авлага эсвэл Сайн мэдээний номын сангийн аппаас “Хүсэл”-ийг судлах нь тустай байж болно. Эсвэл дараах шүлгүүдийн заримыг унш: Дуулал 37:4; Сургаалт үгс 10:24; Инос 1:12; Алма 41:5; Сургаал ба Гэрээ 18:38; 137:9.
Суралцагчдыг олж мэдсэн зүйлээ хуваалцахад урь. Ангийнхнаар туслуулахыг хүссэн ямар нэг асуулт байгаа эсэхийг суралцагчдаас асуу. Хамтдаа судруудыг хайж, асуусан аливаа асуултад хариулахад тус болох туршлага, гэрчлэлээ хуваалц.
Цаг гарган, энэ хичээл танд хэр хамаатайг тунгаан бод. Өөрийн зөв шударга хүслийг хүчирхэгжүүлэхийн тулд юу хийж чадахаа судлах тэмдэглэлдээ бичээд, бусад хүслээ Их Эзэний хүсэлд нийцүүлэхийн тулд Түүнээс тусламж хүс.