Ալմա 30.1–29

Կորիհորի ուսմունքները շատերին հեռացնում են Փրկչից

Նեփիացիների մոտ Կորիհոր անունով մի ամբարիշտ մարդ էր եկել։ Նա Հիսուս Քրիստոսի մասին մարգարեությունների դեմ էր քարոզում ու շատ մարդկանց սրտեր հեռացրեց Աստծուց։ Մեր օրերում շատ ձայներ ձգտում են հեռացնել մեզ Հիսուս Քրիստոսից։ Այս դասը կօգնի ձեզ ճանաչել ու մերժել այն ուսմունքները, որոնք կարող են հեռացնել ձեզ Հիսուս Քրիստոսից։

Պատրաստվեք լինել Սուրբ Հոգու գործիքը։ Սուրբ Հոգին իրական ուսուցիչն է և դարձի ճշմարիտ աղբյուր՝ ձեր և ձեր ուսանողների համար։ Հրավիրեք Հոգուն ուսուցանելու և դարձի եկեք՝ ապրելով այնպես, որ պահպանեք Նրա ընկերակցությունը ձեր կյանքում։ Այդպես կարող եք ստանալ Հոգու ուղղորդումը և կօգնեք ուսանողներին՝ հրավիրել Հոգուն առաջնորդելու իրենց ուսման գործընթացում։

Ուսանողի նախապատրաստում․ կեղծ ուսմունքները ճանաչելու եղանակների մասին ուսանողները կարող են խոսել ընտանիքի անդամի կամ Եկեղեցու ղեկավարի հետ։

Հնարավոր ուսումնական վարժություններ

Սատանայի խորամանկությունը

Դասը սկսեք՝ քննարկելով մակա-ֆեկեի կամ խորամանկելու և ծուղակը գցելու մեկ այլ տեսակի թակարդի մասին։ Կարող եք դիտել «Հավատքին հավատարիմ» տեսանյութի 0:00–2:30 հատվածը, հասանելի է այստեղ՝ ChurchofJesusChrist.org։

True to the Faith

Մակա-ֆեկեն ութոտնուկ որսալու խայծ է։ Ութոտնուկ որսալու խայծն այնպես է պատրաստված, որ շատ նման է իրական կերի, և խայծը բռնելուն պես ութոտնուկը այլևս բաց չի թողնում այն։ Այդպես ձկնորսը հեշտությամբ կարողանում է ութոտնուկին քաշել ու իր նավակի մեջ գցել։

Նախագահ Թոմաս Ս. Մոնսոնը (1927–2018) մակա-ֆեկեի օրինակով ուսուցանել է, թե ինչպես է գործում սատանան։

Այսօր մենք շրջապատված ենք մակա-ֆեկեներով, որոնք դևը ճոճում է մեր առաջ, և փորձում դրանցով գրավել մեզ ու ծուղակը գցել։ Հենց բռնում ես այդպիսի մակա-ֆեկեներ, հետո բավական դժվար է, իսկ երբեմն գրեթե անհնար է բաց թողնել դրանք։ Որպեսզի անվտանգ լինենք, պետք է ճանաչենք դրանք ու անսասան լինենք դրանցից խուսափելու մեր որոշման մեջ: (Թոմաս Ս. Մոնսոն, «Հավատքին հավատարիմ», Լիահոնա, մայիս 2006 թ․, 18)

• Որքանո՞վ եք վստահ, որ կարող եք ճանաչել սատանայի կեղծ ուսմունքները, որոնք կարող են «խորամանկել» և «ծուղակը գցել» ձեզ։

Խուսափեք այն ամենից, ինչը մեզ հեռացնում է Փրկչից

Նեփիացիների և լամանացիների միջև տեղի ունեցած մեծ ճակատամարտից հետո երկրում խաղաղություն հաստատվեց։ Մոտ երկու տարի անց Կորիհոր անունով մի մարդ սկսեց քարոզել Զարահեմլայի ժողովրդի մեջ։ Սատանան էր թելադրում Կորիհորին՝ ինչ ասել (տես Ալմա 30.53)։ Այսօր ուսումնասիրելիս ուշադրություն դարձրեք, թե Կորիհորն ինչպես էր իր բառերն ու կեղծ ուսմունքները որպես մակա-ֆեկե օգտագործում, որպեսզի մարդկանց թակարդը գցի։

Կարդացեք Ալմա 30.6, 12 հատվածները և փնտրեք, թե որ բառերն ու արտահայտություններն են նկարագրում Կորիհորի ուղերձն ու առաքելությունը։

• Ըստ ձեզ՝ ի՞նչ է նշանակում այն, որ նա «հակաքրիստոս» էր: (Ալմա 30.6)

Հակաքրիստոսը «ինչ-որ մեկն է կամ ինչ-որ բան, որը կեղծ նմանակում է ճշմարիտ ավետարանի փրկության ծրագիրը, և բացահայտ կամ գաղտնի՝ Քրիստոսի հակակշիռն է ստեղծում» (Սուրբ Գրքերի Ուղեցույց, «Հակաքրիստոս », scriptures.ChurchofJesusChrist.org)։ Կորիհորի պատմությունից կարող ենք սովորել այն ճշմարտությունը, որ սատանան օգտագործում է կեղծ ուսմունքներ՝ մեզ Հիսուս Քրիստոսից հեռացնելու համար։

Կորիհորի հակաքրիստոսական ուսմունքները

Կարդացեք Ալմա 30.12–18 հատվածները և փնտրեք Կորիհորի կեղծ ուսմունքները։ Կարող եք ընդգծել Կորիհորի ուսմունքները (օրինակ՝ ինչ-որ հատուկ գույնով կամ նշանով) կամ գրել դրանք ձեր օրագրում։

• Որո՞նք էին Կորիհորի կեղծ ուսմունքները։

Կարող եք առաջարկել ուսանողներին, որ Կորիհորի ուսմունքները գրեն գրատախտակին։ Գնահատեք պատասխաններ գտնելու նրանց աշխատանքը։ Անհրաժեշտության դեպքում կարող եք ուսանողների ուշադրությունը հրավիրել հետևյալի վրա․

• «քանզի ոչ մի մարդ չի կարող իմանալ որևէ բանի վերաբերյալ, որը պետք է գա» (հատված 13)

• «մարգարեությունները … ձեր հայրերի հիմար ավանդություններն են» (հատված 14)

• «դուք չեք կարող իմանալ բաների մասին, որոնք դուք չեք տեսնում» (հատված 15)

• «դուք չեք կարող իմանալ, որ պիտի լինի ինչ-որ մի Քրիստոս» (հատված 15)

• «դա մոլագար մտքի արդյունք է» (հատված 16)

• «մարդկանց մեղքերի համար ոչ մի քավություն չի կարող լինել» (հատված 17)

• «ամեն մարդ ընթանում էր այս կյանքում՝ ըստ անձնական ինքնակառավարման» (հատված 17)

• «ինչ որ մարդն արել է՝ հանցագործություն չէ» (հատված 17)

• «երբ մարդը մեռնում է, դա նրա վերջն է» (հատված 18)

Օգտվելով գրատախտակին գրված Կորիհորի ուսմունքներից՝ ուսանողները կարող են զույգերով կամ փոքր խմբերով պատասխանել ստորև բերված հարցերին։ Ուսանողների տարբեր խմբերին կարող եք ուսումնասիրության համար տարբեր կեղծ ուսմունքներ հանձնարարել, հետո նրանք կարող են իրենց պատասխաններով կիսվել մյուսների հետ։

• Ինչպե՞ս կվերաձևակերպեիք Կորիհորի մերօրյա ուսմունքները ավելի ըմբռնելի լեզվով։

• 1-10-ը սանդղակով (որտեղ 10-ը ամենաբարձր գնահատականն է) գնահատեք, թե այսօր Կորիհորի ուսմունքներն ի՞նչ ակտիվությամբ են տարածվում։

• Այդ ուսմունքներն ի՞նչ են քարոզում, որը կարող է հեռացնել մարդկանց Հիսուս Քրիստոսից։ Որո՞նք են այդ վտանգավոր գաղափարները։

Փնտրեք Հոգու ուղղորդումը և մտածեք, թե ինչ ազդեցություն ունեն Կորիհորի ուսմունքները ձեր կյանքում։ Մտածեք, թե այդ կեղծ ուսմունքներից ցանկացածն ի՞նչ ազդեցություն կարող է ունենալ անձամբ ձեզ վրա։

Տասներկու Առաքյալների Քվորումից երեց Դ. Թոդ Քրիստոֆերսոնը խոսել է Կորիհորի և նրա ուսմունքների մասին։ Կարող եք դիտել «Ապաշխարության աստվածային պարգևը» տեսանյութի 2:08–2:40 հատվածը, որը հասանելի է ChurchofJesusChrist.org կայքում։

Ապաշխարության աստվածային պարգևը

[Մարդիկ, ինչպիսին է] Կորիհորը … մերժում են Քրիստոսի գոյությունը և ցանկացած նման բան, որը մեղք է համարվում։ Ըստ նրանց վարդապետությունների՝ արժեքները, չափանիշները և անգամ ճշմարտությունը՝ բոլորը հարաբերական են: Այսպիսով, այն, ինչ մարդը ճիշտ է համարում իր համար, չի կարող մյուսների կողմից դատապարտվել որպես սխալ կամ մեղսավոր:

Նման փիլիսոփայությունները արտաքինից հրապուրիչ են թվում, քանի որ մեզ իրավունք են տալիս տրվել որևէ ցանկության՝ առանց մտահոգվելու հետևանքների մասին: (Դ. Թոդ Քրիստոֆերսոն, «Ապաշխարության աստվածային պարգևը», Լիահոնա, նոյեմբեր 2011 թ․, 38)։

• Ըստ ձեզ՝ այս ուսմունքներն ինչպե՞ս կարող են դրդել մարդկանց մեղանչել: (տես հատված 18:)

Կարդացեք Ալմա 30.19–21 հատվածները և փնտրեք, թե Ջերշոնի և Գեդեոնի ժողովուրդներն ինչպես էին արձագանքում Կորիհորի ուսմունքներին։

Ինչո՞ւ եք կարծում, որ նրանց արձագանքն «ավելի իմաստուն» էր (Ալմա 30.20), քան Զարահեմլայի ժողովրդի արձագանքը (տես Ալմա 30.18)։

Խրախուսեք մի քանի ուսանողի պատասխանել հետևյալ հարցին։ Ուսանողները կարող են իրենց պատասխանները գրել գրատախտակին կամ որևէ թղթի վրա և փոխանցել այն դասարանի մյուս անդամներին։ Քննարկման ընթացքում նրանք կարող են խոսել այն մասին, թե որոշակի արդար գործողությունները կամ դևի ազդեցությունների վերացումը ինչպես կարող է օգնել նրանց «ավելի իմաստուն» լինել։ Օրինակ՝ ուսանողները կարող են ուշադրություն դարձնել իրենց կողմից սովորաբար օգտագործվող սոցիալական ցանցերին, երաժշտությանն ու տեսանյութերին, ապա հեռացնել ցանկացածը, որը կարող է թուլացնել Հիսուս Քրիստոսի հանդեպ իրենց հավատքն ու վիրավորել Սուրբ Հոգուն։

• Ինչպե՞ս կարող ենք «ավելի իմաստուն» լինել և մերժել հակաքրիստոսի ուղերձները։

• Փրկչի մասին ձեր գիտելիքը և Նրա հետ ունեցած ձեր հարաբերությունն ինչպե՞ս կարող են փոխել հակաքրիստոսի այս ուսմունքների ազդեցությունը ձեզ վրա։

Կարող եք ուսանողներին առաջարկել կիսվել Հիսուս Քրիստոսի մասին վկայությամբ կամ հավերժական ճշմարտությամբ։ Կարող եք խնդրել նրանց կիսվել, թե Փրկչի մասին որ սուրբ գրությունները կամ ուսմունքներն են հակասում Կորիհորի կեղծ գաղափարներին։ Օրինակ՝ Հակոբ 7.11–12, Ալմա 32.21, Մորմոն 7.3, 5–7։

Մտածեք, թե ինչ սովորեցիք և զգացիք ձեր ուսումնասիրությունից։ Փնտրեք Սուրբ Հոգու ուղղորդումը, որպեսզի օգնի ձեզ կենտրոնանալ Հիսուս Քրիստոսի վրա և մերժել Նրանից հեռացնող ուսմունքները։

Բացատրական և պատմական տեղեկություններ

Ինչո՞ւ է կարևոր ընդունել ժամանակակից մարգարեների ու առաքյալների խորհուրդը։

Նախագահ Հենրի Բ. Այրինգն ասել է.

Finding Safety in Counsel

Կորիհորը պնդում էր, որ տղամարդիկ և կանայք ի սկզբանե սխալվել են, որ չեն համարել, թե Աստծո ծառաների խորհուրդն ընդունելը նշանակում է զիջել Աստծո կողմից տրված անկախության իրավունքները։ Բայց այդ պնդումը սխալ է, քանի որ այն խեղաթյուրում է իրականությունը։ Երբ մերժում ենք Աստծուց եկող խորհուրդը, մենք չենք ընտրում արտաքին ազդեցությունից անկախ լինելու արտոնությունը։ Մենք մեկ այլ ազդեցություն ենք ընտրում։ Մենք մերժում ենք կատարելապես սիրող, ամենազորեղ, ամենագետ Երկնքի Հոր պաշտպանությունը, որի ու նաև Նրա սիրելի Որդու ողջ նպատակն է՝ մեզ տալ հավերժական կյանք, մեզ տալ Իր ողջ ունեցածը ու մեզ կրկին ընտանիքներով վերադարձնել տուն՝ Իր սիրո գիրկը։ Մերժելով Նրա խորհուրդը՝ մենք ընտրում ենք մեկ այլ ուժի ազդեցությունը, որի նպատակն է մեզ դարձնել թշվառ, իսկ նրա շարժառիթը ատելությունն է։ (Հենրի Բ. Այրինգ, «Անվտանգություն գտնենք խորհրդի մեջ», Ensign, մայիս 1997 թ․, 25)

Կեղծ ուսմունքներն ինչպե՞ս կարող են ազդել մեր կյանքի վրա։

Նախագահ Ռասսել Մ. Նելսոնն ասել է.

Joy and Spiritual Survival

Երբ մենք ջանասիրաբար կենտրոնանում ենք Փրկչի վրա, իսկ հետո հետևում ուրախության վրա կենտրոնանալու նրա օրինակին, մենք պիտի խուսափենք այն ամենից, ինչը կխանգարի մեր ուրախությանը: Հիշո՞ւմ եք Կորիհորին` հակաքրիստոսին: Կորիհորը տեղից տեղ էր գնում և շատ կեղծիքներ էր տարածում Փրկչի մասին, մինչև նրան բերեցին քահանայապետի մոտ, որը հարցրեց նրան. «Ինչո՞ւ ես դու շրջում ամենուր՝ խեղաթյուրելով Տիրոջ ուղիները։ Ինչո՞ւ ես դու սովորեցնում այս ժողովրդին, որ ոչ մի Քրիստոս չի լինելու՝ նրանց ցնծությանը խանգարելու համար»։ [Ալմա 30.22]։

Ցանկացած բան, որն ընդդիմանում է Քրիստոսին կամ Նրա վարդապետությանը, կխանգարի մեր ուրախությանը: Այն ներառում է մարդկանց փիլիսոփայությունները, որոնցով լի են համացանցը և բլոգոլորտը, որոնք անում են ճիշտ նույն բանը, ինչ Կորիհորն էր անում:

Եթե մենք նայենք աշխարհին և հետևենք դրա երջանկության բանաձևերին, մենք երբեք չենք ունենա ուրախություն: (Ռասսել Մ. Նելսոն, «Ուրախություն և հոգևոր գոյատևում», Լիահոնա, նոյեմբեր 2016 թ․, 83–84)

Ինչպե՞ս կարող ենք իմանալ ճշմարտությունը և հետևել Փրկչին։

Նախագահ Ռասսել Մ. Նելսոնն ուսուցանել է․

Ժամանակ տրամադրեք Տիրոջը

Աշխարհի ձայներն ու ճնշումները դյութիչ են ու անհամար։ Բայց չափազանց շատ ձայներ խաբուսիկ ու հրապուրիչ են, և կարող են մեզ դուրս մղել ուխտի ճանապարհից: Դրան հաջորդող անխուսափելի տառապանքից խուսափելու համար ես աղաչում եմ, որ դուք այսօր հակազդեք աշխարհի հրապուրանքին՝ ամեն օր ձեր կյանքում ժամանակ տրամադրելով Տիրոջը։ (Ռասսել Մ. Նելսոն, «Ժամանակ տրամադրեք Տիրոջը», Լիահոնա, նոյեմբեր 2021 թ․, 120)

Գալիք օրերում հնարավոր չի լինի հոգևորապես գոյատևել առանց Սուրբ Հոգու առաջնորդության, ուղղորդման, մխիթարող և մշտական ազդեցության: (Ռասսել Մ. Նելսոն, «Հայտնություն Եկեղեցու համար, հայտնություն մեր կյանքի համար», Լիահոնա, մայիս 2018 թ., 96)

Մեր օրերում հակաքրիստոսի ի՞նչ ուղերձներ են ուսուցանվում։

Սփոփող միության նախկին գերագույն նախագահ Քույր Ջուլի Բ. Բեքն ուսուցանել է.

Կորիհորը հակաքրիստոս էր։ Հակաքրիստոսը հակաընտանիք է։ Երիտասարդների լսած ցանկացած վարդապետություն կամ սկզբունք, որը հակաընտանիք է, նաև հակաքրիստոս է։ Դա շատ պարզ է։ Եթե մեր երիտասարդները դադարեն հավատալ իրենց հայրերի արդար ավանդույթներին …, եթե մեր երիտասարդները չհասկանան ծրագրի իրենց մասը, կարող են հեռանալ։ (Ջուլի Բ. Բեք, «Ուսուցանենք ընտանիքի վարդապետությունը», Ensign, մարտ 2011 թ․, 15)։

Օժանդակ ուսումնական վարժություններ

Ի՞նչի վրա են կենտրոնանում նրանք, ովքեր կեղծ ուսմունքներ են ուսուցանում:

Որպեսզի օգնեք ուսանողներին ճանաչել կեղծ ուսմունքները, առաջարկեք նրանց կարդալ Ալմա 30.6, ապա 1 Նեփի 11.34–36 հատվածները։ Օգնեք ուսանողներին հասկանալ, որ շատերը, որոնք փնովում են ճշմարիտ վարդապետությունը, հաճախ բացահայտ քննադատում են մարգարեներին։ Կարող եք ուսանողներին այսպիսի հարցեր տալ․ «Ըստ ձեզ՝ ինչո՞ւ են որոշ մարդիկ այդքան ձգտում պարսավել ժամանակակից մարգարեներին» կամ «Ժամանակակից մարգարեներն ինչպե՞ս են օգնել ձեզ խուսափել խաբեությունից»։

Հակաքրիստոսի ուսմունքներն ինչպե՞ս կարող են ազդել ավետարանով ստացած մեր ուրախության վրա

Հետևյալը կարող է օգնել ուսանողներին հասկանալ, թե ինչո՞ւ հակաքրիստոսի ուղերձներին հավատալը ուրախություն չի բերում։ Կարող եք առաջարկել ուսանողներին կարդալ Ալմա 30.22 հատվածը։ Առաջարկեք նրանց մտածել, թե ինչ է նշանակում «խանգարել նրանց ցնծությանը» արտահայտությունը։ Ուսանողները կարող են քննարկել, թե հակաքրիստոսի ուսմունքներն ինչպես կարող են խանգարել իրենց ցնծությանը։ Հետո նրանք կարող են կիսվել Հիսուս Քրիստոսի կամ նրա մասին ուսմունքներով, որոնք օգնում են մեզ ուրախություն զգալ։ Կարող եք կիսվել նաև նախագահ Նելսոնի «Կեղծ ուսմունքներն ինչպե՞ս կարող են ազդել մեր կյանքի վրա» վերնագիրը կրող ելույթով, որը ներկայացված է «Բացատրական և պատմական տեղեկություններ» բաժնում։

Օգնեք ուսանողներին կապեր գտնել մեր օրերի հետ

Որպեսզի օգնեք ուսանողներին ճանաչել հակաքրիստոսի այսօրվա ուղերձները, կարող եք նրանց զույգերի կամ փոքր խմբերի բաժանել և Երիտասարդներին զորացնելու համար գրքույկից (2022 թ․) որևէ թեմա հանձնարարել։ Առաջարկեք նրանց քննարկել, թե սատանան ինչպես կարող է հակաքրիստոսի ուղերձներ տարածել նրանց հանձնարարված թեմայի վերաբերյալ։