Ալմա 31.1–11

«Աստծո խոսքի ուժը»

Ի՞նչը կարող է պատճառ լինել, որ դուք ձեզ հեռու զգաք Փրկչից։ Ի՞նչն է օգնում ձեզ ավելի մոտ զգալ Նրան։ Լսելով, որ զորամացիներն «ընկել էին մեծ սխալների մեջ» (Ալմա 31.9)՝ Ալման որոշեց Աստծո խոսքի զորությամբ հրավիրել նրանց վերադառնալ դեպի Հիսուս Քրիստոսը։ Այս դասը կօգնի ձեզ ապավինել Աստծո խոսքի զորությանը՝ հավատարիմ մնալու Հիսուս Քրիստոսին։

Օգնեք ուսանողներին տեսնել, թե ինչպես կարող են արդյունավետ ու արդար գործել։ Ուսանողների համար օգտակար կլինի բացահայտել բազմաթիվ եղանակներ, որոնցով կկարողանան կիրառել ավետարանի սկզբունքները կյանքի իրավիճակներում։ Տարբեր եղանակների շուրջ խորհելուց և դրանք քննարկելուց հետո ուսանողներին առաջարկեք գործել ըստ այն սկզբունքի, որն, իրենց կարծիքով, ամենից արդյունավետն է իրենց ներկա հանգմանքներում։

Ուսանողի նախապատրաստում․ ուսանողներին առաջարկեք որևէ մեկի հետ խոսել այն մասին, թե ինչպես է Աստծո խոսքն օգնել իրենց հավատարիմ մնալ Հիսուս Քրիստոսի ավետարանին։

Հնարավոր ուսումնական վարժություններ

Շեղում

Տասներկու Առաքյալների Քվորումից երեց Դիտեր Ֆ. Ուխդորֆը կիսվել է մի հետազոտության արդյունքներով այն մասին, թե որքան դժվար է ուղիղ գծով քայլել, երբ տեսանելի ուղենշաններ չունենք։ Թեև հետազոտական փորձին մասնակցած շատ մարդիկ կարծում էին, թե հաջողությամբ են անցել, սակայն արդյունքները ցույց տվեցին, որ «առանց հուսալի ուղենշանների մենք շեղվում ենք ուղղությունից» (Դիտեր Ֆ. Ուխդորֆ, «Ամենօրյա վերականգնում», Լիահոնա, նոյեմբեր, 2021 թ․, 77)։ Կարող եք դիտել «Ամենօրյա վերականգնում» տեսանյութի 1:40–3:25 հատվածը (հասանելի է ChurchofJesusChrist.org կայքում) և մտածել, թե հոգևոր առումով այն ինչպես կարող է առնչվել մեր կյանքին։

Ամենօրյա վերականգնում

• Սա ինչպես կարող է հոգևոր առումով մեզ առնչվել։

Ալմա 31–35 հատվածում կծանոթանաք զորամացիներին, որոնք ինչ-որ ժամանակ հավատում էին Հիսուս Քրիստոսին, սակայն շեղվեցին իրենց հավատքից։ Նախքան Ալմա 31 գլխի ուսումնասիրությունը սկսելը մտածեք, թե Հիսուս Քրիստոսի հանդեպ ձեր հավատքն ինչպես է աճել։

Կարող եք ցուցադրել հետևյալ հարցը, որին իրենց օրագրերում պատասխանելով՝ ուսանողներն ինքնանդրադարձ մտորումներ կունենան։ Կարիք չկա, որ ուսանողները կիսվեն այս հարցին տված իրենց պատասխաններով։

• Եթե մնայիք ձեր ներկայիս ուղու վրա, արդյոք կընտրեի՞ք դեպի Քրիստոս տանող ճանապարհը, թե՞ կհեռանայիք Նրանից։

Ալմայի նպատակը

Ալմա 31.1–11 հատվածներում իմանում ենք զորամացիների և այն մասին, թե ինչ ջանքեր էր գործադրում Ալման՝ հրավիրելով նրանց վերադառնալ դեպի Տերը։ Ստորև ներկայացվող գծապատկերը կարող է օգնել ձեզ հասկանալ, թե ինչպես էր Ալման փորձում վերադարձնել զորամացիներին։

Կարող եք ուսանողներին տրամադրել հետևյալ աշխատաթերթի պատճենը։ Դա կօգնի նրանց պատրաստվել և դասի ընթացքում սահմանել իրենց սեփական նպատակը։

Զորամացիներին ուսուցանելու Ալմայի ծրագիրը

Մորմոնի Գիրք. Ուսուցչի ձեռնարկ (2024). «Ալմա 31.1–11. «Աստծո խոսքի ուժը»

© 2023 by Intellectual Reserve, Inc. All rights reserved.

Կարդացեք Ալմա 31.1–4, 8–11 հատվածները և փնտրեք, թե զորամացիներն ինչպես և ինչու սկսեցին շեղվել։ Այն, ինչ կգտնեք, գրանցեք «Խնդիր» բաժնում։

Կարող եք ստորև ներկայացվող հարցերի նման հարցեր օգտագործել, որոնք կօգնեն ուսանողներին հասկանալ, թե ինչպես շեղվեցին զորամացիները, և դա ինչ ազդեցություն ունեցավ նրանց վրա։ Օգնեք ուսանողներին տեսնել նմանություններ մեր օրերում։ Օրինակ՝ եթե մարդիկ չպահեն պատվիրանները, չհաճախեն եկեղեցի, չմասնակցեն արարողություններին, ինչպես օրինակ՝ հաղորդությանը և չաղոթեն, ապա կշեղվեն Տիրոջ ճանապարհից։

• Ինչպե՞ս շեղվեցին զորամացիները։ Ի՞նչ խնդիրներ ստեղծեց դա։

• Նմանատիպ ի՞նչ գործողություններ կարող են պատճառ դառնալ, որ մարդիկ շեղվեն մեր օրերում։

Կարդացեք Ալմա 31.34 հատվածը և փնտրեք, թե ինչ նպատակ և հույս ուներ Ալման զորամացիների համար։ Դա կարող եք գրել «Նպատակ» բաժնում։

• Մտածելով Ալմա 31.1–2 հատվածներում կարդացած Ալմայի նպատակի և նրա զգացմունքների մասին՝ ի՞նչ եք կարծում, ո՞րն էր Ալմայի շարժառիթը։ Ինչո՞ւ է դա կարևոր։

Կարդացեք Ալմա 31.5–7, 11 հատվածները և նշեք այն բառերը կամ արտահայտությունները, որոնք նկարագրում են, թե ինչ ծրագիր ուներ Ալման իր նպատակի իրականացման համար։ Հատված 5-ի մոտ կարող եք նշել, որ virtue (ուժ) բառը ծագում է լատիներեն virtus բառից, որը նշանակում է ամրություն կամ զորություն (տես «Ուժ» Ավետարանի թեմաներում), իսկ փորձել բառն այս համատեքստում նշանակում է ստուգել կամ փորձարկել։

Պատրաստեք ուսանողներին լրացնել աշխատաթերթի «Ինչպես հասնել նպատակին» բաժինը՝ տալով հետևյալ հարցերից մի քանիսը։

• Ըստ ձեզ՝ ի՞նչ է նշանակում «փորձել Աստծո խոսքի ուժը»։ Որտե՞ղ կարող եք գտնել Աստծո խոսքը: (Կարող եք կարդալ և համեմատել Վարդապետություն և Ուխտեր 18.2–4, 34–36, 68.4 հատվածները:)

• Ի՞նչ ճշմարտություն կարող ենք սովորել Ալմայի նպատակից և այն իրագործելու նրա ծրագրից։

Ճշմարտություններից մեկը, որ կարող եք բացահայտել, հետևյալն է. Աստծո խոսքը մարդկանց դեպի Հիսուս Քրիստոսը ուղղորդելու զորություն ունի։

• Ի՞նչ գիտեք Աստծո մասին, որը Նրա խոսքը ձեզ համար զորավոր կամ ուժեղ է դարձնում։ Ըստ ձեզ՝ ինչո՞ւ է այն ավելի զորավոր, «քան սուրը կամ մեկ այլ բան»: (Ալմա 31.5)

• Աստծո խոսքն ինչպե՞ս կարող է օգնել մեզ կիսվել ավետարանով, ուղղել կեղծ գաղափարները կամ ուղղորդել մարդկանց դեպի Հիսուս Քրիստոսը։

• Աստծո խոսքն ի՞նչ ազդեցություն է ունեցել ձեր կյանքում։

Ալմայից սովորածի և նախորդ հարցերից ձեր ունեցած մտորումների օգնությամբ լրացրեք «Ինչպես իրագործել նպատակը» բաժինը։

Աստծո խոսքն իմ կյանքում

Մտածեք, թե Ալմայից և զորամացիներից սովորածն ինչպես է առնչվում ձեր կյանքին։

Ստորև ներկայացվող հարցերը նախատեսված են օգնելու ուսանողներին կապել այս պատմությունն իրենց կյանքի հետ։ Կարող եք տալ նմանատիպ հարցեր կամ ձեր մտածած հարցերը։

• Ի՞նչը կարող է ստիպել երիտասարդներին շեղվել Հիսուս Քրիստոսից։

• Աստծո խոսքին ապավինելը ինչպե՞ս կարող է թույլ չտալ մեզ շեղվել Հիսուս Քրիստոսից կամ օգնել մեզ վերադառնալ դեպի Նա։

Առաջարկեք ուսանողներին կիսվել և գրատախտակին գրել այն սուրբ գրությունները, որոնք ուղղորդել են իրենց դեպի Տերը։ Նրանք կարող են գտնել այն սուրբ գրությունները, որոնք անդրադառնում են Տիրոջից շեղող մի քանի պատճառների։

Մտածեք Հիսուս Քրիստոսի հետ ունեցած ձեր հարաբերության մասին։ Կա՞ ինչ-որ բան, որը ստիպում է ձեզ շեղվել Նրանից։ Ցանկանո՞ւմ եք ավելի սերտ կապ ունենալ Նրա հետ։ Աղոթքի միջոցով անհատականացված նպատակ սահմանեք, որը կօգնի ձեզ ամրապնդել ձեր կապը Նրա հետ։ Այդ նպատակը կարող է վերաբերել կամ ավելացվել ձեր՝ Երեխաների և երիտասարդների ծրագրի նպատակներին։

Կարող եք ուսանողներին տալ մեկ այլ աշխատաթերթ, որում նրանք կգրեն իրենց սեփական նպատակը։ Անհրաժեշտության դեպքում քննարկեք, թե ինչ տարբեր եղանակներով ուսանողները կարող են ապավինել Աստծո խոսքի ուժին։ Օրինակ՝ ամեն օր ուսումնասիրելով սուրբ գրությունները, պատասխաններ կամ ուղղորդում որոնելով սուրբ գրություններում, հաճախելով սեմինարիա կամ այլ գաղափարներ։ Ստորև ներկայացվող առաջարկները կարող են օգնել ուսանողներին անհատականացված ձևով լրացնել աղյուսակը՝ իրենց սեփական նպատակի համար։

Գրեք ձեր նպատակը «Նպատակ» բաժնում։

«Խնդիրներ» բաժնում կարող եք գրել ցանկացած բան, որը խոչընդոտում է ձեր նպատակին։

«Ինչպես իրագործել նպատակը» բաժնում գրեք, թե ինչպես կարող եք ապավինել Աստծո խոսքի ուժին։ Գրեք, թե դա ինչպես կօգնի ձեզ հասնել ձեր նպատակին։

Հետևյալ հարցերը կարող են օգնել։

Ուսանողներից ոմանք գուցե ցանկանան կիսվել իրենց նպատակներով։ Կարող եք հետևյալ հարցերով օգնել նրանց կիսվել և քննարկում ծավալել։

• Ինչո՞ւ եք կարծում, որ հենց այս նպատակն է անհրաժեշտ ձեր կյանքում։ Այդ նպատակի իրագործումն ինչպե՞ս կարող է ազդել Հիսուս Քրիստոսի հետ ունեցած ձեր հարաբերության վրա։

• Ի՞նչ հատուկ գործողություններ կարող եք ձեռնարկել, որոնք կօգնեն ձեզ ապավինել Աստծո խոսքի զորությանը։ Դա ինչպե՞ս կարող է օգնել ձեզ՝ հասնելու ձեր նապատակին։

• Ո՞ր սուրբ գրությունները կամ Եկեղեցու ղեկավարների խոսքերը կարող են խթան լինել ձեզ համար՝ աշխատելու այդ նպատակի ուղղությամբ։

Կարող եք եզրափակել՝ առաջարկելով ուսանողներին կիսվել Ալմա 31.1–11 հատվածներն ուսումնասիրելու իրենց փորձառությամբ և անձնական մտքերով կամ տպավորություններով։ Վկայեք Աստծո խոսքի ուժի և այնպիսի բաներ անելու կարևորության մասին, որոնք մեզ ավելի են մոտեցնում Հիսուս Քրիստոսին։

Բացատրական և պատմական տեղեկություններ

Պարզ, հետևողական ջանքերն ինչպե՞ս կարող են օգնել ինձ ամուր մնալ ավետարանում։

Հետևյալ տեսանյութերը ներկայացնում են հոգևոր առումով ամուր մնալու համար այդ փոքր քայլերը կատարելու կարևորությունը․

Living with Purpose and Real Intent

Staying Spiritually Fit

Ի՞նչ օգուտ կքաղեմ ես՝ ապավինելով Աստծո խոսքին

Նախագահ Էզրա Թավտ Բենսոնն (1899–1994) ուսուցանել է.

[Մորմոնի Գրքի մեջ] մի զորություն կա, որը սկսում է թափանցել ձեր կյանք այն պահից, երբ սկսում եք լրջորեն ուսումնասիրել այդ գիրքը։ Դուք ավելի մեծ զորություն կգտնեք՝ փորձությանը դիմակայելու համար: Դուք զորություն կգտնեք՝ խաբեությունից խուսափելու համար: Դուք զորություն կգտնեք՝ մնալու նեղ ու անձուկ արահետի վրա: (Էզրա Թավտ Բենսոն, «Մորմոնի Գիրքը. մեր կրոնի պորտաքարը», Ensign, նոյեմբեր 1986 թ․, 7)։

Յոթանասունից երեց Մայքլ Ջոն Ու. Թեհը բացատրել է.

Սուրբ գրություններից ամեն օր «կում անելը» … կօգնի մեզ հոգևոր ամրություն և գիտելիք ձեռք բերել, քողազերծել դևի խաբեություններն ու բացահայտել մեզ բռնելու համար նրա պատրաստած ծուղակները (Մայքլ Ջոն Ու. Թեհ, «Աստծո խոսքի զորությունը», Լիահոնա, մարտ 2013 թ․, 53)։

Տասներկու Առաքյալների Քվորումի նախագահ Բոյդ Ք. Փաքերն (1924–2015) ուսուցանել է.

Ճշմարիտ վարդապետությունը, երբ ընկալվում է, փոխում է վերաբերմունքը և վարքը։ Ավետարանի վարդապետությունների ուսումնասիրությունն ավելի արագ կբարելավի վարքը, քան վարքի ուսումնասիրությունը կբարելավի այն։ (Բոյդ Ք. Փաքեր, «Մի վախեցիր», Լիահոնա, մայիս 2004 թ․, 79)։

Նախագահ Մ․ Ռասսել Բալլարդը կիսվել է մի զորեղ պատմությունով այն մասին, թե Աստծո խոսքն ինչ զորություն է ունեցել մի երիտասարդ տղայի կյանքում, որը դժվարանում էր իր վկայության մեջ։

Օժանդակ ուսումնական վարժություններ

Էլեկտրոնային նյութերի ներառումը

Կարող եք որոշ նյութեր ներառել «Բացատրական և պատմական տեղեկություններ» բաժնից։ Դա անելու համար կարելի է, օրինակ՝ ցուցադրել այս տեսանյութերից մեկը և առաջարկել ուսանողներին քննարկել, թե այս ուսմունքներն ինչպես կարող են օգնել և ինչպես են օգնել նրանց ամուր մնալ Հիսուս Քրիստոսի ավետարանում։ Որպես այլընտրանք կարող եք օգտագործել տեսանյութերից մեկը, որպեսզի օգնեք ուսանողներին հասկանալ, թե որքան կարևոր է ուշադրություն դարձնել այն բաներին, որոնց մեջ սխալվել էին զորամացիները։ Ուսանողները կարող են քննարկել, թե ինչպես են տեսնում այդ բաներն իրենց կյանքում, և դրանք չանտեսելու ինչ հնարավոր լուծումներ կան։

Եկ, հետևիր ինձ ձեռնարկի օգտագործումը

Ստորև ներկայացվող վարժությունը Եկ, հետևիր ինձ․ Անհատների և ընտանիքների համար ձեռնարկից է։ Այն կարող եք օգտագործել այս դասում։

Ալմա 31.5–6․ Հիսուս Քրիստոսի շնորհիվ բոլորը կարող են փոխվել։

Ուշադրություն դարձրեք այն մարդկանց խմբին, որ Ալման տարավ իր հետ՝ ուսուցանելու ավետարանը զորամացիներին (տես Ալմա 31.6)։ Ի՞նչ գիտեք այդ մարդկանցից յուրաքանչյուրի կյանքի մասին (տես Մոսիա 27.8–37, 28.4, Ալմա 10.1–6, 11.21–25, 15.3–12)։ Նրանց փորձառություններն ի՞նչ ուղերձ են պարունակում ձեզ համար։

Օգտվեք սուրբ գրություններից՝ Աստծո խոսքի զորությունը ներկայացնելու համար

Որպեսզի օգնեք ուսանողներին հասկանալ Աստծո խոսքի զորությունը, կարող եք առաջարկել նրանց մտածել որոշակի վարդապետության կամ սուրբ գրության մասին, որը կարող է օգնել ուղուց շեղված զորամացուն։ Ուսանողները կարող են աչքի անցկացնել Ալմա 31.8–11 հատվածներում նշված զորամացիների խնդիրները, հետո պատկերացնել, թե պատրաստվում են Ալմայի հետ միսիայի գնալ։ Առաջարկեք նրանց մտածել, թե ինչով կկիսվեին։ Կարող եք խրախուսել ուսանողներին օգտվել վարդապետության սերտման հատվածներից։