Alma 30:30–60

“Ka një Krijues Suprem”

Alma dëshmoi se “të gjitha gjërat tregojnë se ka një Perëndi” (Alma 30:44). Po përse jo kushdo e pranon ose rrëfen se ka prova që Perëndia është i vërtetë? Korihori e mohoi ekzistencën e Perëndisë derisa u bë memec nga fuqia e Perëndisë. Ky mësim mund të të ndihmojë t’i dallosh provat që Perëndia ekziston dhe të zgjedhësh të besosh tek Ai.

Nxitja e shqyrtimit dhe vlerësimit të vetes. Bëni pyetje të frymëzuara në mënyrë që nxënësit të mund ta dallojnë atë që ata tashmë e dinë dhe e besojnë. Nxitini nxënësit ta ftojnë Frymën e Shenjtë t’i ndihmojë ta përcaktojnë atë që duhet të dinë dhe të japin dëshmi për të vërtetat që kërkojnë.

Përgatitja e nxënësve: Ftojini nxënësit të lexojnë tek Alma 30:40–41 ose Moisiu 6:63. Kërkojuni atyre të kërkojnë prova të Perëndisë rreth tyre dhe mbase të bëjnë një fotografi për t’ia treguar klasës.

Veprimtari të Mundshme të të Mësuarit

Ekzistenca e Perëndisë

Merreni parasysh të paraqitni disa figura që e ndieni se tregojnë prova të ekzistencës së Perëndisë. Nxënësit mund të raportojnë edhe për përgatitjen e tyre për orën mësimore. Diskutojini disa ose të gjitha pyetjet vijuese.

• Në shkollën ose komunitetin tënd, sa e zakonshme duket se është që njerëzit të shohin prova të ekzistencës së Perëndisë në botën rreth tyre (për shembull, ndërkohë që shikon një perëndim dielli ose yjet)?

• Si mendon, pse njerëzit mund të shohin të njëjtat gjëra dhe të arrijnë në përfundime të ndryshme rreth Perëndisë?

• Çfarë mund të ndikojë në aftësinë e dikujt për ta dalluar përfshirjen e Perëndisë në jetën e vet?

Reflekto mbi mënyrën se si do të bekoheshe po të mund ta shihje Perëndinë dhe përfshirjen e Tij më qartësisht në jetën tënde. Ndërsa studion sot, mundohu ta rritësh aftësinë tënde për të parë prova të Perëndisë në atë që sheh dhe përjeton.

Korihori akuzon udhëheqësit e Kishës

Korihori, një antikrisht, pati shumë sukses në përhapjen e mesazheve të tij lajkatare në vendin e Zarahemlës (shih tek Alma 30:12, 17–18). Ai gjithashtu u përpoq t’u jepte mësim popujve në Jershon dhe Gideon. Atje besimtarët në Perëndinë e kundërshtuan Korihorin dhe e çuan atë të takohej me kryegjykatësin dhe Almën, kryepriftin.

Lexo tek Alma 30:30–36, duke kërkuar mënyrën se si Alma iu përgjigj sulmeve të Korihorit ndaj Perëndisë dhe Kishës.

Nëse dëshironi, mund t’i ftoni nxënësit t’i shënojnë përkufizimet e fjalëve vijuese në shkrimet e tyre të shenjta për t’i ndihmuar ata ta kuptojnë dhe kujtojnë atë që mësojnë.

Mund të jetë e dobishme të dish se blasfemonte te vargu 30 do të thotë ta përqeshësh Perëndinë ose të flasësh “pa respekt ose pa nderim për Perëndinë ose për gjëra të shenjta” (Udhëzuesi për Shkrimet e Shenjta, “Blasfemoj, Blasfemi”, scriptures.ChurchofJesusChrist.org). Fjala përfitoj në këto vargje nënkupton të pasurohesh nga [të tjerët].

• Çfarë i akuzonte Korihori udhëheqësit e Kishës se po bënin? (Shih tek Alma 30:31.)

Dëshmia e Almës për Perëndinë

Kur Alma e pyeti Korihorin a besonte te Perëndia, Korihori tha se nuk besonte (shih tek Alma 30:37–38).

Lexo tek Alma 30:39–44, duke kërkuar mënyrën se si Alma iu përgjigj Korihorit.

• Çfarë të bën përshtypje nga përgjigjja e Almës?

• Çfarë të vërtetash rreth Perëndisë mund të përcaktosh tek Alma 30:41, 44?

Merreni parasysh t’i ftoni nxënësit t’i shënojnë si referencë kryq këto vargje me vargun te Moisiu 6:63. Lejojini nxënësit ta tregojnë çdo të vërtetë që e ndiejnë se jepet mësim në këto vargje. Ata mund të përcaktojnë të vërteta si shembulli vijues.

Një e vërtetë që mund të mësojmë është se të gjitha gjërat dëshmojnë për Perëndinë.

Veprimtaria vijuese mund t’i ndihmojë nxënësit ta dallojnë provën e Perëndisë në jetën e tyre. Kërkoni mënyra për ta përfshirë çdo nxënës në orën mësimore. Merreni parasysh të bëni një listë të përgjigjeve të nxënësve për hapat 1 dhe 2 në tabelë. Nxënësit mund të shkruajnë gjithashtu diçka për hapat 3 dhe 4 në ditarët e tyre dhe më pas të dalin vullnetarë për të folur. Disa nxënës mund të mos i dallojnë përvojat që kanë pasur derisa t’i dëgjojnë të tjerët të flasin.

1. Bëj një listë të asaj që Alma tha se siguron prova të ekzistencës së Perëndisë.

2. Shtoje çdo provë tjetër që të vjen në mendje.

3. Kërkoji në listën tënde pikat që të kanë ndihmuar ty vetë të shohësh prova të Perëndisë. Ti mund t’i shkruash disa hollësi nga përvojat e tua.

4. Mund të zgjedhësh gjithashtu një ose më shumë pika në listën tënde dhe të tregosh se si këto mund të të ndihmojnë ta rritësh aftësinë tënde për të parë prova të Perëndisë.

Thënia vijuese mund t’i ndihmojë nxënësit që mund ta kenë të vështirë t’i dallojnë përvojat me Perëndinë. Merreni parasysh ta lexoni atë dhe t’i ftoni nxënësit ta tregojnë atë që mësojnë. Ndihmojini nxënësit ta shmangin ndjenjën e shkurajimit dhe ftojini ata ta ndjekin ftesën e Presidentit Nelson.

Presidenti Rasëll M. Nelson dha këshillën vijuese rreth njohurisë që Perëndia ekziston.

“Kuptojeni se në mungesë të përvojave me Perëndinë, dikush mund të dyshojë për ekzistencën e Perëndisë. Prandaj, vendoseni veten tuaj në një gjendje që të filloni të keni përvoja me Të. Përuleni veten. Lutuni që të keni sy të shihni dorën e Perëndisë në jetën tuaj dhe në botën përreth jush. Kërkojini Atij t’ju tregojë nëse Ai është vërtet atje – nëse Ai ju njeh. Pyeteni se si Ai ndihet rreth jush. Dhe më pas, dëgjoni.” (Rasëll M. Nelson, “Eja, Më Ndiq”, Liahona, maj 2019, f. 90)

Në vend që ta ushtronte besimin për të pasur një përvojë me Perëndinë, Korihori donte që Alma ta bindte atë për fuqinë e Perëndisë dhe e sfidoi në mënyrë të përsëritur Almën që t’i tregonte një shenjë (shih tek Alma 30:43, 45, 48).

• Cili mendon se është ndryshimi ndërmjet dikujt që e ndjek ftesën e Presidentit Nelson dhe dikujt që kërkon një shenjë?

Lexo tek Alma 30:48–53, 59–60, duke kërkuar mënyrën se si Korihori u bind për fuqinë e Perëndisë.

• Çfarë mund të mësojmë nga përvoja e Korihorit?

Vëre re çfarë mësimesh Mormoni vuri në dukje me frazën “kështu ne shohim” te vargu 60. Mendo se si djalli ende i mashtron njerëzit sot dhe përpiqet t’i bindë ata ta mohojnë atë që e dinë se është e vërtetë.

Jepni dëshmi për ekzistencën e Perëndisë dhe ftojini nxënësit të përpiqen ta shohin Perëndinë në botën rreth tyre.

Komente dhe Informacion për Rrethanat

Si mund ta dalloj Perëndinë më shumë?

Presidenti Henri B. Ajring, i Presidencës së Parë, tregoi se çfarë bëri për ta dalluar Perëndinë në jetën e tij:

“[Do të përsiatja] këtë pyetje: ‘A e kam parë dorën e Perëndisë të afrohet për të na prekur ne apo fëmijët ose familjen tonë sot?’ Ndërsa vazhdova ta bëja atë, diçka filloi të ndodhë. Ndërkohë që i ktheja mendimet rreth ditës që kisha kaluar, do të shihja provën e asaj që Perëndia kishte bërë për një nga ne, të cilën nuk e kisha kuptuar gjatë momenteve të zëna të ditës. Ndërsa ajo ndodhte, dhe ajo ndodhte shpesh, [e] kupto[va] se përpjekja për të kujtuar [e] kishte [lejuar] Perëndi[n]ë të më tregonte se çfarë Ai kishte bërë.” (Henri B. Ajring, “O, Kujtoni, Kujtoni”, Liahona, nëntor 2007, f. 67)

Motra Suzan Bednar dha mësim:

“Unë dëshmoj se, kur lutemi për sy për të parë planin e Tij, ne do të jemi të ndërgjegjshëm për përfshirjen e Perëndisë në jetën tonë dhe do ta dimë se Ai na njeh.” (Suzan Bednar, “A e Kam Ndier Dorën e Perëndisë në Jetën Time?” [takimi shpirtëror i Sistemit Arsimor të Kishës për të rinjtë në moshë madhore, 3 mars 2013], broadcasts.ChurchofJesusChrist.org)

Si mund ta ftoj Frymën e Shenjtë të më ndihmojë ta shoh Perëndinë në jetën time?

Plaku Kim B. Klark, i Të Shtatëdhjetëve, dha mësim:

“Bindja e thjeshtë sjell Shpirtin në zemrën tonë. Në shtëpitë tona ne lutemi me besim, i hetojmë shkrimet e shenjta dhe e mbajmë të shenjtë ditën e Shabatit. Në kishën tonë ne marrim sakramentin dhe i bëjmë premtime të shenjta Atit Qiellor në emër të Krishtit. Në tempujt e shenjtë, ne marrim pjesë në ordinanca të shenjta në emër të vëllezërve dhe motrave tona në anën tjetër të velit. Në familjet tona dhe në detyrat tona nga Zoti, ne u shtrijmë dorën të tjerëve, duke i ngritur barrët e tyre dhe duke i ftuar të vijnë te Krishti.

Vëllezër e motra, e di se nëse do t’i bëjmë këto gjëra, Fryma e Shenjtë do të vijë! Ne do të rritemi shpirtërisht dhe do të fitojmë përvojë me Frymën e Shenjtë dhe Ai do të jetë shoqëruesi ynë. Nëse shikojmë te Krishti dhe i hapim sytë dhe veshët tanë, Fryma e Shenjtë do të na bekojë ta shohim Zotin Jezu Krisht duke vepruar në jetën tonë, duke e forcuar besimin tonë tek Ai me siguri dhe prova.” (Kim B. Klark, “Sy për të Parë dhe Veshë për të Dëgjuar”, Liahona, nëntor 2015, f. 125)

Po sikur të besoj te Perëndia por të mos e di me siguri se Ai është i vërtetë?

Plaku Xhefri R. Holland, i Kuorumit të Dymbëdhjetë Apostujve, tregoi:

“Një djalë 14–vjeçar kohët e fundit më tha me pak ngurrim: ‘Vëllai Holland, nuk mund të them ende se e di që Kisha është e vërtetë, por unë besoj se është’. E përqafova atë djalë derisa i gufuan sytë. I thashë me gjithë zjarrin e shpirtit tim se të besuarit është një fjalë e çmuar, një veprim akoma më i çmuar dhe ai kurrë nuk kishte pse të kërkonte falje ngaqë ‘vetëm besonte’. I thashë atij se Krishti Vetë tha: ‘Mos ki frikë, vetëm ki besim’ [Marku 5:36] . … I thashë këtij djali se të besuarit ishte gjithmonë hapi i parë drejt bindjes. … Dhe i thashë atij se sa shumë krenar isha për të, për ndershmërinë e kërkimit të tij.” (Xhefri R. Holland, “Unë Besoj, o Zot”, Liahona, maj 2013, f. 94–95)

Veprimtari Plotësuese të të Mësuarit

Ftesa ndaj të rinjve për të studiuar dhe dëshmuar për Perëndinë

Pasi të përcaktoni një të vërtetë rreth të gjitha gjërave që dëshmojnë për Perëndinë (shih tek Alma 30:41, 44), merreni parasysh t’i ftoni nxënësit t’i studiojnë disa nga shkrimet e shenjta, himnet ose pjesët vijuese të fjalimeve të konferencave të përgjithshme. Mund t’i ftoni nxënësit t’i forcojnë dëshmitë e tyre nëpërmjet studimit, të vepruarit sipas asaj që mësojnë dhe dhënies së dëshmisë para të tjerëve. Merreni parasysh t’i ftoni disa vullnetarë t’ia tregojnë klasës atë që mësuan. Mund t’i ftoni gjithashtu nxënësit t’i tregojnë në shtëpi.

• Alma 30:44

• Moisiu 6:63

• “Fëmi’ i Per’ndis’ Jam”, Himne, nr. 196

• “Sa i Madh Je Ti”, Himne, nr. 42

• Kim B. Klark, “Sy për të Parë dhe Veshë për të Dëgjuar”, Liahona, nëntor 2015, f. 124–126

Ndihmesa ndaj të tjerëve që dyshojnë në ekzistencën e Perëndisë

Nxënësit mund të nxjerrin dobi nga interpretimi me role i një situate në të cilën ata mund ta ndihmojnë dikë që e duan, i cili dyshon për ekzistencën e Perëndisë. Për shembull, ju mund t’i ftoni nxënësit të interpretojnë me role një bisedë me një pjesëtar të familjes i cili lexoi ose pa diçka që e shtyu ta vinte në pikëpyetje ekzistencën e Perëndisë. Jepuni nxënësve kohë për ta përgatitur përgjigjen e tyre dhe ftojini ata të përfshijnë një ose dy gjëra që u dëshmojnë atyre për realitetin e Perëndisë.