Alma 30:1–29

Mësimet e Korihorit i Largojnë Shumë Vetë nga Shpëtimtari

Një njeri i lig, i quajtur Korihor, erdhi mes nefitëve. Ai predikoi kundër profecive rreth Jezu Krishtit dhe i largoi zemrat e shumë njerëzve nga Perëndia. Në kohën e sotme, ka shumë zëra që kërkojnë të na largojnë nga Jezu Krishti. Ky mësim mund të të ndihmojë t’i dallosh dhe refuzosh mësimet që mund të të largojnë nga Jezu Krishti.

Përgatitja për të qenë një instrument i Frymës së Shenjtë. Fryma e Shenjtë është mësuesi i vërtetë dhe burimi i vërtetë i kthimit në besim për ju dhe nxënësit tuaj. Ftojeni Shpirtin t’ju mësojë dhe t’ju kthejë në besim duke jetuar në një mënyrë që e mban shoqërimin e Tij në jetën tuaj. Ndërsa e bëni, ju mund të merrni udhërrëfimin e Tij dhe t’i ndihmoni nxënësit ta ftojnë Atë në përvojën e tyre të të mësuarit.

Përgatitja e nxënësve: Nxënësit mund të flasin me një pjesëtar të familjes ose udhëheqës të Kishës rreth mënyrave se si t’i dallojnë mësimet e rreme.

Veprimtari të Mundshme të të Mësuarit

Mashtrimi i Satanit

Fillojeni mësimin duke diskutuar për një maka-feke ose një lloj tjetër kurthi i krijuar për të mashtruar dhe zënë në grackë.

Një maka-feke është një karrem për oktapodët. Karremat për oktapodët janë krijuar për t’u dukur shumë të ngjashëm me një ushqim të vërtetë të cilin një oktapod i mashtruar nuk do të pranojë ta lëshojë pasi ta mbërthejë. Kur ndodh kjo, peshkatari mund ta hedhë me lehtësi oktapodin në varkën e tij.

Presidenti Tomas S. Monson (1927–2018) e përdori shembullin e një maka-feke për të dhënë mësim rreth mënyrës se si punon Satani.

“Sot jemi të rrethuar nga maka‑feke që i ligu i tund përpara nesh dhe me të cilat përpiqet të na joshë e më pas të na zërë në kurth. Kur mbërthehen, të tilla maka‑feke janë tepër të vështira – e ndonjëherë pothuajse të pamundura – për t’u lëshuar. Për të qenë të sigurt ne duhet t’i shohim ato ashtu siç janë në të vërtetë dhe më pas të jemi të palëkundur në vendosmërinë tonë për t’i shmangur ato.” (Thomas S. Monson, “True to the Faith”, Liahona, maj 2006, f. 18)

• Sa i sigurt ndihesh në aftësinë tënde për t’i dalluar mësimet e rreme të Satanit që mund të të “josh[in]” dhe “zë[n]ë në kurth”?

Shmangia e gjërave që na largojnë nga Shpëtimtari

Pas një beteje të madhe midis nefitëve dhe lamanitëve, paqe u vendos në tokë. Rreth dy vite më pas, një njeri i quajtur Korihor filloi t’i predikonte popullit në Zarahemlë. Satani i tha Korihorit se çfarë të thoshte (shih tek Alma 30:53). Ndërsa studion sot, vëre re se si Korihori i përdori fjalët dhe mësimet e tij të rreme si një maka-feke për t’i zënë njerëzit në kurth.

Lexo tek Alma 30:6, 12, duke kërkuar fjalë dhe fraza që përshkruajnë mesazhin dhe misionin e Korihorit.

• Çfarë mendon se do të thotë që ai ishte “Antikrisht”? (Alma 30:6.)

Fjala antikrisht do të thotë “dikush ose diçka që falsifikon planin e vërtetë të ungjillit për shpëtimin dhe që haptazi apo fshehurazi kundërshton Krishtin” (Udhëzuesi për Shkrimet e Shenjta, “Antikrisht”, scriptures.ChurchofJesusChrist.org). Një e vërtetë që mund të mësojmë nga ndodhia e Korihorit është se Satani përdor mësime të rreme për të na larguar nga Jezu Krishti.

Mësimet antikrisht të Korihorit

Lexo tek Alma 30:12–18, duke kërkuar mësimet e rreme të Korihorit. Merre parasysh t’i shenjosh mësimet e Korihorit në një mënyrë që i ndan ato (për shembull, me një ngjyrë ose simbol unik) ose t’i shkruash në ditarin tënd të studimit.

• Cilat ishin disa nga mësimet e rreme të Korihorit?

Merreni parasysh t’i ftoni nxënësit që t’i renditin mësimet e Korihorit në tabelë. Pranojeni punën e tyre për gjetjen e përgjigjeve. Nëse është e nevojshme, mund t’ua tërhiqni vëmendjen te pikat vijuese:

• “asnjë njeri nuk mund të dijë ndonjë gjë që do të vijë” (vargu 13)

• “profeci[të] … janë tradita të marra të etërve tuaj” (vargu 14)

• “ju nuk mund të dini për gjërat që nuk i shihni” (vargu 15)

• “nuk mund të dini se do të ketë një Krisht” (vargu 15)

• “kjo është pasoja e një mendjeje të tërbuar” (vargu 16)

• “se nuk mund të bëhet asnjë shlyerje për mëkatet e njerëzve” (vargu 17)

• “çdo njeri e kalonte këtë jetë sipas mënyrës së tij të sjelljes” (vargu 17)

• “çdo gjë që një njeri bënte nuk ishte krim” (vargu 17)

• “kur njeriu vdes, çdo gjë mbaron për të” (vargu 18)

Duke përmendur mësimet e Korihorit të renditura në tabelë, nxënësit mund t’u përgjigjen pyetjeve vijuese në dyshe ose grupe të vogla. Grupeve të ndryshme të nxënësve mund t’u caktohen mësime të rreme të ndryshme për t’i shqyrtuar dhe më pas ata mund t’ua tregojnë përgjigjet e tyre të tjerëve.

• Si mund t’i riformuloje mësimet e Korihorit duke përdorur gjuhë më të zakonshme në kohën tonë?

• Duke përdorur një shkallë nga 1 deri në 10 (ku 10 është më e forta), sa fort i sheh të nxiten mësimet e Korihorit sot?

• Çfarë kanë këto mësime që do t’i largonin njerëzit nga Jezu Krishti? Përse këto ide janë të rrezikshme?

Kërko udhërrëfimin e Shpirtit dhe reflekto mbi ndikimin e mësimeve të Korihorit në jetën tënde. Merri parasysh mënyrat se si ndonjë nga këto mësime të rreme mund të ndikojë tek ti personalisht.

Plaku D. Tod Kristoferson, i Kuorumit të Dymbëdhjetë Apostujve, foli rreth Korihorit dhe mësimeve të tij.

“[Njerëzit si] Korihori … mohojnë madje ekzistencën e Krishtit dhe çfarëdo gjëje të tillë si mëkati. Doktrina e tyre është se vlerat, standardet dhe madje e vërteta janë të gjitha relative. Si rrjedhojë, çfarëdo që dikush mendon se është e drejtë për të, nuk mund të gjykohet prej të tjerëve e gabuar ose mëkatare.

Në [pamje të parë] filozofi të tilla duken tërheqëse, ngaqë ato na japin lejë për të kënaqur çdo oreks ose dëshirë pavarësisht nga pasojat.” (D. Tod Kristoferson, “Dhurata Hyjnore e Pendimit”, Liahona, nëntor 2011, f. 38)

• Si mendon se këto mësime mund t’i shtyjnë njerëzit të kryejnë mëkat? (Shih te vargu 18.)

Lexo tek Alma 30:19–21, duke kërkuar se si populli i Jershonit dhe Gideonit iu përgjigjën mësimeve të Korihorit.

Përse mendon se përgjigjja e tyre ishte “më [e] zgjuar” (Alma 30:20) se ajo e popullit të Zarahemlës? (Shih tek Alma 30:18.)

Nxitni nxënës të shumtë t’i përgjigjen pyetjes vijuese. Nxënësit mund t’i shkruajnë përgjigjet e tyre në tabelë ose në një copë letër që përcillet nëpër klasë. Diskutimi mund të përfshijë se si veprime të drejta të veçanta dhe eliminimi i ndikimeve të liga mund t’i ndihmojë ata të jenë “më të zgjuar”. Për shembull, nxënësit mund të shohin mediat shoqërore, muzikën dhe materialet filmike që i përdorin rregullisht dhe të heqin ndonjë që mund ta dobësojë besimin e tyre te Jezu Krishti dhe që e fyen Frymën e Shenjtë.

• Si mund të jemi “më të zgjuar” dhe t’i refuzojmë mesazhet antikrisht?

• Si mund të ndikojë njohuria jote rreth Shpëtimtarit dhe marrëdhënia jote me Të në masën e ndikimit që kanë tek ti këto mësime antikrisht?

Ju mund t’i ftoni nxënësit të japin dëshminë ose të vërtetën e përjetshme rreth Jezu Krishtit. Mund t’u kërkoni gjithashtu të tregojnë shkrime të shenjta ose mësime të Shpëtimtarit që i kundërshtojnë idetë e rreme të Korihorit. Shembujt përfshijnë Jakobi [LiM] 7:11–12; Alma 32:21; Mormoni 7:3, 5–7.

Reflekto mbi atë që ke mësuar dhe ndier nga studimi yt. Kërko udhërrëfimin e Frymës së Shenjtë për të të ndihmuar të përqendrohesh te Jezu Krishti dhe t’i refuzosh mësimet që do të të largonin prej Tij.

Komente dhe Informacion për Rrethanat

Përse është e rëndësishme ta pranojmë këshillën e profetëve dhe apostujve bashkëkohorë?

Presidenti Henri B. Ajring tha:

“Korihori po argumentonte, siç kanë argumentuar burrat dhe gratë në mënyrë të gabuar që nga fillimi i kohëve, se të marrësh këshillë nga shërbëtorët e Perëndisë do të thotë të heqësh dorë nga e drejta e pavarësisë e dhënë nga Perëndia. Por argumenti është i rremë, sepse e shtrembëron realitetin. Kur e hedhim poshtë këshillën që vjen nga Perëndia, ne nuk zgjedhim të jemi të pavarur nga ndikimi i jashtëm. Ne zgjedhim një tjetër ndikim. Ne hedhim poshtë mbrojtjen e një Ati përsosmërisht të dashur, të gjithëfuqishëm, të gjithëditur në Qiell, gjithë qëllimi i të cilit, ashtu si ai i Birit të Tij të Dashur, është të na japë jetën e përjetshme, të na japë të gjithëve gjithçka që Ai ka dhe të na sjellë përsëri në shtëpi me familje, në krahët e dashurisë së Tij. Kur e hedhim poshtë këshillën e Tij, ne zgjedhim ndikimin e një fuqie tjetër, qëllimi i së cilës është të na mjerojë dhe shtysa e së cilës është urrejtja.” (Henry B. Eyring, “Finding Safety in Counsel”, Ensign, maj 1997, f. 25)

Si mund të ndikojnë mësimet e rreme në jetën tonë?

Presidenti Rasëll M. Nelson tha:

“Ndërsa përqendrohemi me zell te Shpëtimtari dhe pastaj ndjekim modelin e Tij të të përqendruarit te gëzimi, ne duhet të shmangim ato gjëra që mund ta prishin gëzimin tonë. Ju kujtohet Korihori, anti-Krishti? Duke vjellë pavërtetësi për Shpëtimtarin, Korihori shkonte nga njëri vend në tjetrin derisa e sollën para një prifti të lartë që e pyeti: ‘Përse vete poshtë e lart duke përdhosur udhët e Zotit? Përse u mëson këtyre njerëzve se nuk do të ketë Krisht, për të prishur gëzimin e tyre?’ [Alma 30:22].

Çdo gjë që i kundërvihet Krishtit ose doktrinës së Tij, do ta prishë gëzimin tonë. Ajo përfshin filozofitë e njerëzve, kaq të shumta në internet dhe në botën e faqeve personale në internet, të cilat bëjnë pikërisht atë që bëri Korihori.

Nëse i mbajmë sytë nga bota dhe ndjekim formulat e saj për lumturinë, ne kurrë nuk do ta njohim gëzimin.” (Rasëll M. Nelson, “Gëzimi dhe Mbijetesa Shpirtërore”, Liahona, nëntor 2016, f. 83–84)

Si mund ta njohim të vërtetën dhe ta ndjekim Shpëtimtarin?

Presidenti Rasëll M. Nelson dha mësim:

“Zërat dhe trysnitë nga bota janë ndjellëse dhe të shumta. Por tepër shumë zëra janë mashtrues, joshës dhe mund të na heqin nga shtegu i besëlidhjeve. Për ta shmangur zemërthyerjen e pashmangshme që vijon, ju përgjërohem sot që t’i kundërviheni tërheqjes së botës, duke gjetur kohë për Zotin në jetën tuaj – në secilën dhe për çdo ditë.” (Rasëll M. Nelson, “Gjeni Kohë për Zotin”, Liahona, nëntor 2021, f. 120)

“Në ditët e ardhshme, nuk do të jetë e mundur të mbijetojmë shpirtërisht pa ndikimin udhërrëfyes, drejtues, ngushëllues dhe të vazhdueshëm të Frymës së Shenjtë.” (Rasëll M. Nelson, “Zbulesë për Kishën, Zbulesë për Jetën Tonë”, Liahona, maj 2018, f. 96)

Cilat janë disa mesazhe antikrisht të dhëna mësim në kohën tonë?

Motra Xhuli B. Bek, ish-Presidente e Përgjithshme e Shoqatës së Ndihmës, dha mësim:

“Korihori ishte një antikrisht. Antikrishti është kundër familjes. Çdo doktrinë ose parim që rinia jonë e dëgjon nga bota që është kundër familjes, është edhe kundër Krishtit. Kaq e qartë është. Nëse rinia jonë pushon së besuari në traditat e drejta të etërve … , nëse rinia jonë nuk e kupton pjesën e saj në plan, ajo mund të largohet prej tij.” (Julie B. Beck, “Teaching the Doctrine of the Family”, Ensign, mars 2011, f. 15)

Veprimtari Plotësuese të të Mësuarit

Cili është përqendrimi i atyre që japin mësim doktrinën e rreme?

Për t’i ndihmuar nxënësit t’i dallojnë mësimet e rreme, ftojini ata të lexojnë tek Alma 30:6 dhe më pas te 1 Nefi 11:34–36. Ndihmojini nxënësit të kuptojnë se shumë që e sulmojnë doktrinën e vërtetë, shpesh i kritikojnë haptazi profetët. Merreni parasysh t’u bëni nxënësve pyetje si “Pse mendoni se disa njerëz janë kaq në ankth për të gjetur të meta te profetët bashkëkohorë?” ose “Si ju kanë ndihmuar profetët bashkëkohorë ta shmangni mashtrimin?”

Si mund të ndikojnë mësimet antikrisht në gëzimin tonë prej ungjillit?

Sa vijon mund t’i ndihmojë nxënësit të kuptojnë se si të besuarit e mesazheve antikrisht nuk çon në gëzim. Merreni parasysh t’i ftoni nxënësit të lexojnë tek Alma 30:22. Ftojini ata të mendojnë se çfarë kuptimi ka fraza “për të prishur gëzimin e tyre”. Nxënësit mund të diskutojnë se si mësimet antikrisht mund ta prishin gëzimin e tyre. Më pas, ata mund të tregojnë mësime të Jezu Krishtit ose rreth Tij që na ndihmojnë të ndiejmë gëzim. Ju mund të merrni parasysh gjithashtu të jepni thënien e Presidentit Nelson te pjesa “Komente dhe Informacion për Rrethanat” poshtë titullit “Si mund të ndikojnë mësimet e rreme në jetën tonë?”.

Ndihma ndaj nxënësve që të bëjnë lidhje me kohën tonë

Për t’i ndihmuar nxënësit t’i dallojnë mesazhet antikrisht sot, merreni parasysh t’i vini ata në dyshe ose grupe të vogla dhe t’u caktoni një temë nga materiali Për Forcën e Rinisë (broshurë, 2022). Ftojini ata të diskutojnë se si Satani mund të përhapë mesazhe antikrisht rreth temës që u është caktuar.