Alma 36

“Nuk Munda T’i Kujtoj Më Dhembjet e Mia”

Tregimi i përvojave shpirtërore të dhembshura atyre që i duam, mund të jetë një burim force për ata dhe për ne. Duke folur me djalin e tij, Helamanin, Alma i tregoi përvojën kur pa një engjëll, ndjeu mundimin e mëkateve të tij dhe gjeti çlirim nëpërmjet Jezu Krishtit. Ky mësim ka për qëllim të të ndihmojë të kthehesh te Jezu Krishti me besim dhe të ndiesh gëzimin prej çlirimit të Tij.

Aftësia e studimit – shenjimi i fragmenteve. Shenjimi i shkrimeve të shenjta mund t’i ndihmojë nxënësit të bëjnë lidhje kuptimplota dhe ta mbajnë mend atë që mësojnë. Ata mund t’i nënvizojnë, hijezojnë ose përvijojnë fjalët ose frazat kyçe. Variantet elektronike të shkrimeve të shenjta përfshijnë mjete të dobishme për t’i shenjuar shkrimet e shenjta.

Përgatitja e nxënësve: Ftojini nxënësit të vijnë të përgatitur të japin një shembull të dikujt që gjeti paqe në Krisht pasi vuajti për njëfarë kohe. Çfarë e ndihmoi këtë person të gjente paqe?

Veprimtari të Mundshme të të Mësuarit

Të kundërtat

Për ta nisur këtë mësim, ndihmojini nxënësit të mendojnë rreth ndryshimit shpirtëror dhe asaj që e lehtëson atë. Një mënyrë për ta bërë këtë është t’i shkruani fjalët vijuese në tabelë dhe t’i vini nxënësit të shkruajnë antonimin e secilës.

• Dhembja →

• Keqardhja →

• Trishtimi →

Përsiat se kur mund të kesh mëkatuar dhe përjetuar një ndjenjë të anës së majtë. A është kthyer ndonjëherë ajo ndjenjë në atë që rendite në të djathtë? Çfarë ndodhi që e bëri të mundur atë kalim?

Pasi t’i diskutoni fjalët më lart, ju mund të vini në dukje se kur ndjenjat negative shkaktohen nga mëkati, vetëm Zoti mund të na ndihmojë t’i shndërrojmë ato ndjenja në të kundërtat e tyre pozitive.

Jepuni nxënësve një mundësi për të reflektuar në heshtje mbi mënyrën se si Zoti i ka ndihmuar ata të ndryshojnë kur kanë mëkatuar. Paraqiteni vetëvlerësimin vijues dhe kërkojuni nxënësve ta mbajnë shënim në ditarët e tyre të studimit çdo përshtypje që kanë ndërsa përsiatin. Këto mund të jenë pyetje, ndjenja ose nxitje për të vepruar.

Përsiat se sa të vërteta janë për ty thëniet vijuese:

• Kur kam mëkatuar, e di se si të kthehem te Zoti për të marrë falje, paqe dhe shpresë.

• Kam siguri se me ndihmën e Zotit, unë mund të ndryshoj.

• Unë i drejtohem vazhdimisht Zotit për këtë ndihmë.

Sot ti do të studiosh se si ndjenjat e agonisë së thellë të Alma të Riut për mëkatet e tij u kthyen në ndjenja të gëzimit dhe paqes ndërsa i thirri Shpëtimtarit. Ndërsa studion, shiko se si mund ta kërkosh ndihmën e Zotit për ta mposhtur mëkatin dhe pasojat e tij dhe për të përjetuar gëzim nëpërmjet Jezu Krishtit.

Ndryshimi i madh i Almës

Pasi zoramitët e refuzuan ungjillin që iu dha mësim, ata u bashkuan me lamanitët për t’i nxitur në zemërim kundër nefitëve. Zoramitët dhe lamanitët i sulmuan më pas nefitët, duke çuar në një luftë të madhe. Gjithashtu, shumë prej zemrave të nefitëve “filluan të ngurtësoheshin” kundër fjalës së Perëndisë (Alma 35:15). Si përgjigje ndaj rënies shpirtërore të nefitëve, Alma i bëri bijtë e tij të mblidheshin së bashku që ai t’u “jepte veç e veç secilit detyrën e tij, në lidhje me gjërat që kanë të bëjnë me drejtësinë” (Alma 35:16). Në fillim ai foli me djalin e tij, Helamanin, dhe i tregoi përvojën e tij të kthimit në besim.

Paraqiteni figurën vijuese. Ftojini nxënësit të punojnë me një partner për t’iu përgjigjur pyetjes që vijon.

Një mundësi tjetër është të shkruani në tabelë fjalë të ngjashme me ato në vijim: Alma, bijtë e Mosias, shkatërro kishë, engjëll, tri ditë. Më pas, kërkojuni dysheve të bashkëpunimit ta tregojnë historinë e tyre duke përdorur secilën prej fjalëve ose frazave.

• Çfarë mban mend rreth Alma të Riut dhe çfarë paraqitet në këtë figurë?

Lexo tek Alma 36:6–11 dhe kërko hollësitë që mund të të kenë shpëtuar.

• Si mendon, pse fjalët e engjëllit patën një ndikim kaq të fortë tek Alma?

• Përveç se të parit e një engjëlli, çfarë mund ta çojë dikë të kuptojë se ai ose ajo duhet të ndryshojë?

Nëse dëshironi, mund t’i ndihmoni nxënësit ta kuptojnë vlerën e shenjimit të shkrimeve të shenjta dhe t’i nxitni ata ta ushtrojnë këtë aftësi gjatë këtij mësimi. Nëse kjo mundësi është në dispozicion, merreni parasysh të paraqitni një variant elektronik të shkrimeve të shenjta ose një grup letrash dhe të tregoni mënyrat se si t’i shenjojnë fragmentet e shkrimeve të shenjta.

Për veprimtarinë vijuese, merreni parasysh t’i ftoni nxënësit t’i shenjojnë fjalët dhe frazat në mënyra të ndryshme. Merreni parasysh të punoni me grupin e parë të vargjeve si klasë duke e përshtatur veprimtarinë për ta. Më pas, nxënësit mund të punojnë vetë me grupin e dytë dhe të tretë të vargjeve. Kur të mbarojnë, ata mund t’ua tregojnë partnerëve ose klasës atë që gjetën dhe se si e shenjuan atë.

Lexoje në grupet vijuese të vargjeve përshkrimin e Almës për atë që ai përjetoi dhe ndjeu gjatë tri ditëve që nuk mund të lëvizte. Merre parasysh ta shenjosh atë që sugjerohet.

• Alma 36:12–16: fjalët ose frazat që e përshkruajnë se si Alma u ndje rreth mëkateve të tij

• Alma 36:17–18: fjalët ose frazat që e tregojnë atë që Alma kujtoi dhe bëri që çoi në ndryshimin e tij

• Alma 36:19–21: fjalët ose frazat që e përshkruajnë Almën që ndien diçka të kundërt me atë që ai përjetoi në fillim

Jepuni nxënësve mundësi për ta treguar atë që vunë re ose mësuan ndërsa studiuan vargjet 12–21. Nëse është e nevojshme, merreni parasysh të bëni një pyetje si “Çfarë vutë re duke i krahasuar emocionet e Almës para dhe pas ndryshimit të tij?” Ju mund të bëni gjithashtu disa nga pyetjet vijuese.

• Çfarë të bën përshtypje rreth asaj që çoi në ndryshimin e Almës?

• Çfarë të vërtetash mund të mësojmë nga përvoja e tij?

Një e vërtetë që mund ta mësojmë është se Jezu Krishti ka fuqi të na çlirojë nga dhembja e mëkateve tona dhe të na mbushë me gëzim.

• Si e ftoi Alma fuqinë e Shpëtimtarit për çlirim?

Thëniet vijuese mund t’i ndihmojnë nxënësit ta kuptojnë më tej të vërtetën e theksuar me ngjyrë të zezë. Ju gjithashtu mund t’i ftoni nxënësit t’i studiojnë vargjet 24–26, duke kërkuar mënyrat se si Alma e ushtroi besimin te Jezu Krishti.

Presidenti Bojd K. Paker (1924–2015), i Kuorumit të Dymbëdhjetë Apostujve, shpjegoi:

“Ju nuk ka nevojë të dini gjithçka përpara se fuqia e Shlyerjes të veprojë për ju. Kini besim te Krishti; ajo fillon të veprojë ditën që ju e kërkoni!” (Boyd K. Packer, “Washed Clean”, Ensign, maj 1997, f. 10)

Plaku Nil L. Andersen, i Kuorumit të Dymbëdhjetë Apostujve, dha mësim:

“Kur i rrëfejmë ndershmërisht mëkatet tona, kur i kthejmë atë që mundet personit të cenuar dhe i braktisim mëkatet tona nëpërmjet zbatimit të urdhërimeve, ne jemi në procesin e marrjes së faljes. Me kalimin e kohës, ne ndiejmë që ankthi i trishtimit tonë qetësohet, duke e ‘nxjerrë fajin nga zemrat tona’ e duke sjellë ‘paqe të ndërgjegjes’.” (Nil L. Andersen, “Pendohuni … Që të Mund t’Ju Shëroj”, Liahona, nëntor 2009, f. 42)

• Çfarë pikëpamjesh shtesë fitove nga thëniet?

Mund të jetë e dobishme të vini në dukje se ndihma nga Jezu Krishti mund të fillojë në çastin që e kërkojmë atë, por procesi i pendimit dhe ndjenjës së faljes mund të jetë më gradual.

Merreni parasysh t’i vini nxënësit të diskutojnë në grupe të vogla ose në dyshe se si ata do të reagonin në situatat vijuese.

Çfarë do t’i thoshe një adoleshenti i cili:

• Ndien keqardhje dhe dhembje të jashtëzakonshme për shkak të mëkateve të tij ose të saj.

• E ndien se mëkatet e tij ose të saj nuk janë të tmerrshme dhe do të zgjidhen vetë me kalimin e kohës pa pendim.

Gjeje një çast për të përsiatur mbi situatën tënde dhe se si mësimi i sotëm mund të gjejë zbatim në jetën tënde. Merre parasysh një gjë që mund të bësh sot për t’u kthyer te Shpëtimtari dhe për ta ftuar fuqinë e Tij për çlirim në jetën tënde.

Merreni parasysh të jepni dëshminë tuaj se si jeni bekuar nga fuqia shëruese e Shpëtimtarit dhe sigurinë tuaj në dëshirën e Tij për të sjellë paqe dhe gëzim në jetën e nxënësve tuaj.

Komente dhe Informacion për Rrethanat

Alma 36:12–16. Çfarë kuptimi kanë disa nga fjalët që përdori Alma?

Presidenti Bojd K. Paker (1924–2015), i Kuorumit të Dymbëdhjetë Apostujve, dha mësim:

“I torturuar do të thotë ‘i munduar me mjete torture’. Në lashtësi një rrotë torture ishte një strukturë mbi të cilën viktima shtrihej me secilin kyç të duarve dhe të këmbëve të lidhur te rrota, e cila më pas mund të rrotullohej për të shkaktuar dhembje të padurueshme.

Një lesë është një strukturë me maja përgjatë saj. Kur tërhiqet nëpër tokë, ajo e copëton dhe e shpon tokën. Shkrimet e shenjta shpesh flasin për shpirtra dhe mendje që ‘ngacmohen’ nga faji.

Mundim do të thotë ‘të përdredhësh’, një mënyrë torturimi aq e dhembshme sa edhe i pafajshmi do të pohonte se ishte fajtor.” (Boyd K. Packer, “The Touch of the Master’s Hand”, Ensign, maj 2001, f. 23)

Alma 36:19. Nëse pendohem, a i harroj mëkatet e mia?

Duke folur për kujtesën e mëkateve tona, Plaku Diter F. Uhtdorf, i Kuorumit të Dymbëdhjetë Apostujve, shpjegoi:

“Satani do të përpiqet të na bëjë të besojmë se mëkatet tona nuk na janë falur sepse ne mund t’i mbajmë mend ato. Satani është një gënjeshtar; ai përpiqet të turbullojë shikimin tonë dhe të na largojë nga [shtegu i pendimit] dhe i faljes. Perëndia nuk premtoi që ne nuk do t’i mbajmë mend mëkatet tona. Të mbajturit mend [do të na ndihmojë] të shmangim [bërjen përsëri të të njëjtave] gabime. Por nëse [qëndrojmë të vërtetë dhe] besnikë, kujt[imi] i mëkateve tona do të zbutet me kalimin e kohës. Kjo do të jetë pjesë e procesit [të nevojshëm] të shërimit dhe të shenjtërimit. Alma dëshmoi se, pasi [iu lut] Jezusit për mëshirë, përsëri mund t’i mbante mend mëkatet e tij, por kujtesa e mëkateve [të tij] nuk e [shqetësoi dhe torturoi] më atë, sepse e dinte se ishte falur (shih tek Alma 36:17–19).” (Diter F. Uhtdorf, “Pikë Kthimi të Sigurt”, Liahona, maj 2007, f. 125; Konferenca e Përgjithshme, prill 2007, f. 125)

Si krahasohet vuajtja e përfshirë në pendim me vuajtjen që do të përjetojmë nëse nuk pendohemi?

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Çdo dhembje e kërkuar nga pendimi do të jetë shumë më pak, sesa vuajtja që kërkohet për të kënaqur drejtësinë për shkeljen e pazgjidhur. Shpëtimtari foli paksa për atë që Ai duroi që të kënaqte kërkesat e drejtësisë dhe të shlyente për mëkatet tona, por Ai bëri këtë deklaratë qartësuese:

‘Pasi vër re, unë, Perëndia, i kam vuajtur këto gjëra për të gjithë, që ata të mos vuajnë nëse do të pendohen;

Por nëse nuk do të pendohen, ata duhet të vuajnë po aq sa unë;

Vuajtje që më bëri mua, madje Perëndi, më i madhi i të gjithëve, të dridhem për shkak të dhembjes e të më dalë gjak nga çdo pór dhe të vuaj si në trup e në shpirt–dhe të dëshiroj që të mos e pi kupën e hidhur’ (DeB 19:16–18).” (D. Tod Kristoferson, “Dhurata Hyjnore e Pendimit”, Liahona, nëntor 2011, f. 40)

Veprimtari Plotësuese të të Mësuarit

Kiazma

Merreni parasysh t’i ndihmoni nxënësit të kuptojnë se Alma 36 është një shembull i formës gjuhësore në hebraisht e njohur si kiazmë. Në kiazmë, fjalët ose idetë rregullohen në një renditje të caktuar dhe më pas përsëriten në renditje të kundërt. Kjo përsëritje thekson idetë dhe fjalët e rëndësishme dhe shpesh ideja kryesore e autorit është në qendër të kiazmës.

Në tabelën më poshtë, vini re se mesazhi qendror i kiazmës gjendet tek Alma 36:17–18, kur Alma u kthye nga Jezu Krishti për ndihmë.

Nëse zgjidhni ta përfshini këtë informacion në mësim, bëni kujdes që ai të mos zëvendësojë përmbajtjen kryesore të kapitullit tek Alma 36.

Alma 36:2–3, 27–29. Nëse mirëbesojmë te Perëndia, Ai do të na mbështetë në sprovat tona

Nëse nxënësit e përcaktojnë këtë të vërtetë, ndihmojini ata ta thellojnë kuptueshmërinë e tyre për të duke u kërkuar atyre të gjejnë rrëfime të tjera të shkrimeve të shenjta për t’ia shtuar atyre që përmendi Alma, që e pohojnë këtë të vërtetë. Më pas, merreni parasysh t’i vini nxënësit të ushtrojnë përdorimin e një ose më shumë prej këtyre rrëfimeve për t’i shpjeguar një personi tjetër se si Perëndia mund ta ndihmojë atë në sprovat e veta. Mund t’u paraqitni nxënësve një skenar rreth dikujt që ndihet i/e shkurajuar nga sprovat me të cilat ai ose ajo po përballet.

Gëzim jashtëzakonisht i madh

Merreni parasysh t’i ftoni nxënësit të lexojnë tek Alma 36:25–26, duke kërkuar se si përpjekjet e Almës për ta dhënë mësim ungjillin ndikuan tek ai dhe të tjerët. Nxënësit mund të tregojnë atë që gjejnë. Ndihmojini nxënësit të kuptojnë se ne mund të marrim gëzim të madh ndërsa përpiqemi t’i sjellim të tjerët te Krishti.