Alma 39

“Vëru Kryq Këtyre Gjërave”

Gjatë gjithë kohës, Satani i ka shtyrë shumë njerëz të besojnë se marrëdhëniet seksuale jashtë martese janë të pranueshme. Ati Qiellor dhe Jezu Krishti na e kanë dhënë ligjin e dëlirësisë për mbrojtjen, paqen dhe lumturinë tonë. Profeti Alma e këshilloi me dashuri birin e tij, Koriantonin që t’i braktiste dhe të pendohej për mëkatet e tij, duke përfshirë një shkelje të ligjit të dëlirësisë. Ky mësim mund të të ndihmojë ta kuptosh seriozitetin e mëkatit seksual dhe se si ta kundërshtosh tundimin për ta shkelur ligjin e dëlirësisë.

Ndihmojini nxënësit ta kuptojnë dhe kërkojnë kthimin në besim. Kthimi në besim është një proces i vazhdueshëm i ndryshimit dhe zhvillimit shpirtëror që ne e tregojmë me anë të përpjekjeve të drejta gjatë gjithë jetës sonë. Kërkoni mundësi për të ofruar përvoja ku nxënësit mund të arrijnë ta njohin, ta duan dhe ndjekin Jezu Krishtin dhe ungjillin e Tij të rivendosur.

Përgatitja e nxënësve: Ftojini nxënësit të mendojnë për atë që dinë rreth ligjit të dëlirësisë, se si ndihen rreth tij dhe për ndonjë pyetje që mund të kenë.

Veprimtari të Mundshme të të Mësuarit

Ligji i dëlirësisë

Merreni parasysh t’i shkruani pohimet vijuese në tabelë. Ndryshoni ose shtoni thënie që mund t’i përgatitin më mirë nxënësit tuaj për të mësuar rreth ligjit të dëlirësisë.

Lexoji thëniet vijuese dhe përcakto se cila prej tyre në vijim i përfaqëson më mirë ndjenjat e tua:

• Nuk jam dakord

• Nuk jam dakord më së shumti

• Jam dakord më së shumti

• Jam dakord

1. Të rinjtë në Kishën e Jezu Krishtit të Shenjtorëve të Ditëve të Mëvonshme e kuptojnë me qartësi ligjin e dëlirësisë ose ligjin e Zotit për pastërtinë seksuale.

2. Ata e kuptojnë përse ka rëndësi dhe përse Zoti do që ne ta jetojmë atë.

3. Mund të jetë e vështirë ta zbatosh ligjin e dëlirësisë në botë sot.

4. Të rinjtë në Kishë e dinë se si ta kundërshtojnë tundimin dhe ta mbajnë veten të pastër nga ana seksuale.

Ftojini nxënësit të tregojnë nëse ata ranë dakord ose nuk ranë dakord me thëniet më lart dhe përse.

Ligji i dëlirësisë është ligji i Zotit për pastërtinë seksuale. T’i bindesh ligjit të dëlirësisë do të thotë që ta mbash veten të pastër në mendim, fjalë dhe veprim, duke përfshirë të qëndrosh larg çdo gjëje pornografike. Ai do të thotë gjithashtu ta shmangësh çdo marrëdhënie seksuale para martese dhe të jesh plotësisht besnik ndaj bashkëshortes ose bashkëshortit gjatë martesës. “Ashtu si dhunimet e tjera të ligjit të dëlirësisë, veprimtaria homoseksuale është një mëkat i rëndë. Ajo është në kundërshtim me qëllimet e tërheqjes seksuale njerëzore” (Gospel Topics [Tema të Ungjillit], “Chastity” [“Dëlirësia”], topics.ChurchofJesusChrist.org).

Gjeje një çast për të përsiatur për kuptueshmërinë dhe ndjenjat e tua rreth ligjit të dëlirësisë. Çfarë pyetjesh ke? Përse ka rëndësi për ty? Me çfarë tundimesh përballesh në lidhje me dëlirësinë? Ndërsa e studion këtë mësim, kërko përgjigje për pyetjet e tua dhe ndihmë për t’i mposhtur tundimet e tua.

Alma këshillon birin e tij, Koriantonin

Alma 39 është i pari nga katër kapitujt që përmbajnë këshilla, urdhërime dhe mësime nga Alma për birin e tij, Koriantonin. Koriantoni e kishte shoqëruar të atin dhe vëllanë e tij, Shiblonin, për t’u predikuar ungjillin zoramitëve. Megjithatë, gjatë këtij misioni, Koriantoni kreu disa mëkate të rënda.

Lexo tek Alma 39:1–5, duke kërkuar gabimet që bëri Koriantoni dhe se si u ndien Alma dhe Zoti për to. (Fjala grua e përdalë te vargu 3 i referohet një gruaje të pamoralshme ose prostitute.)

Ftojini nxënësit t’i tregojnë fjalët ose frazat nga shkrimet e shenjta që e tregojnë atë që bëri Koriantoni dhe se si u ndien Alma dhe Zoti për të.

Për të të ndihmuar të përsiatësh se përse shkelja e ligjit të dëlirësisë është “brengos[ëse]” për një baba dhe profet (Alma 39:3) dhe një “neveri në pamjen e Zotit” (Alma 39:5), mund të jetë e dobishme t’i kuptosh bekimet prej zbatimit të tij. Lexo për bekimet dhe fuqinë tek “Të jetuarit e ligjit të dëlirësisë” në faqen 26 te materiali Për Forcën e Rinisë: Një Udhëzues për Bërjen e Zgjedhjeve (broshurë, 2022).

Lejojini nxënësit të tregojnë atë që gjetën.

• Si na përgatit zbatimi i ligjit të dëlirësisë që të marrim bekime të mëdha nga Zoti në këtë jetë dhe në tjetrën?

Merreni parasysh t’i renditni dy pyetjet vijuese në tabelë dhe t’i ftoni nxënësit të punojnë në dyshe ose në grupe të vogla për t’i gjetur përgjigjet në shkrimet e shenjta. Më pas diskutojini dy pyetjet e radhës si klasë.

• Çfarë do të ndodhë nëse një person nuk pendohet për mëkatin seksual? (Alma 39:7–9)

• Cila është një pasojë shpesh e anashkaluar e shkeljes së ligjit të dëlirësisë? (Alma 39:11–13)

• Bazuar në atë që mësove, pse mundet një prind, profet dhe Zoti të kenë ndjenja kaq të forta për dëlirësinë?

• Si e tregon ligji i dëlirësisë dashurinë e Perëndisë për fëmijët e Tij?

“Mos shko më pas epsheve të syve të tua”

Përveç se i dha mësim të birit rreth seriozitetit të mëkatit seksual, Alma i dha mësim Koriantonit edhe se si ta shmangë bërjen e të njëjtave gabime në të ardhmen.

Shqyrtoje vargun tek Alma 39:9 dhe Alma 39:13, duke kërkuar fjalë ose fraza që mund të të ndihmojnë ta kundërshtosh tundimin dhe ta zbatosh ligjin e dëlirësisë. (Fraza “t’u vësh kryq” te vargu 9 do të thotë të ushtrosh vetëkontroll ose vetëzotërim.)

Alma 39:9 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

Ftojini nxënësit të tregojnë atë që gjetën.

• Çfarë parimi i mësoi Alma Koriantonit në këto vargje?

Një parim i mundshëm nga këto vargje është se ndërsa ushtrojmë vetëkontroll dhe kthehemi te Zoti, ne mund ta mposhtim tundimin për ta shkelur ligjin e Perëndisë për dëlirësinë.

Ushtrimi i vetëkontrollit dhe kthimi te Zoti për ta mposhtur tundimin mund të jetë i vështirë ndonjëherë. Mund të ndihmojë të mendosh për një larmi mënyrash për ta bërë këtë dhe më pas të ndjekësh nxitjet nga Shpirti rreth asaj që do të ishte më e dobishme për ty.

Përpara se ta kryeni veprimtarinë vijuese, merreni parasysh t’i ftoni të rinjtë të mbledhin ide të mënyrave se si ata mund të kthehen te Zoti dhe t’i mposhtin tundimet për ta shkelur ligjin e dëlirësisë. Ata mund të bëjnë më pas dy prej pikave vijuese për t’i pohuar ose shtuar idetë e tyre.

Merreni parasysh ta renditni sa vijon në tabelë. Merreni parasysh ta hiqni materialin filmik nga lista dhe ta pyesni klasën pas studimit të tyre nëse do të donin ta shikonin atë.

1. Lexoje pjesën tjetër të këshillës rreth pastërtisë seksuale te materiali Për Forcën e Rinisë: Një Udhëzues për Bërjen e Zgjedhjeve (shiko “pastërtia seksuale” te pjesa “Po për … ?”). Për këshillë shtesë nga anëtarët e Kuorumit të Dymbëdhjetë Apostujve, merre parasysh të lexosh “Personal Purity” (Jeffrey R. Holland, Ensign, nëntor 1998, f. 75–78) ose “Ne Besojmë në Qenien të Dëlirë” (Dejvid A. Bednar, Ensign ose Liahona, maj 2013, f. 41–44).

2. Gjej shkrime të shenjta që ti e ndien se mund të të forcojnë përballë tundimeve për ta shkelur ligjin e dëlirësisë. Ti mund të renditësh edhe himne ose këngë të Fillores që mund të duash t’u drejtohesh për forcë kur tundohesh.

3. Renditi mënyrat se si mund të përpiqesh të “kthehesh drejt Zotit” me “mendjen, fuqinë dhe forcën” tënde (Alma 39:13). Përfshije atë që ke bërë në të kaluarën që e ndien se të ka forcuar.

4. Shkruaje këshillën që ke marrë nga prindërit dhe udhëheqësit e Kishës që mund të të ndihmojë përballë tundimit.

5. Shikoje materialin filmik “Chastity: What are the Limits?” [“Dëlirësia: Cilët Janë Kufijtë?”] (3:59), në dispozicion në ChurchofJesusChrist.org.

Pas disa minutash, merreni parasysh të ftoni nxënës të shumtë t’i tregojnë idetë e tyre dhe se si këto ide mund t’i ndihmojnë ata ta mposhtin tundimin. Nëse e ndieni se klasa juaj mund ta ketë të vështirë ta diskutojë haptazi këtë temë, ftojini nxënësit t’i japin mendimet e tyre në mënyrë anonime në një copë letër. Mblidhini letrat së bashku dhe lexojuani ato klasës.

Reflektimi vetjak

Gjeje një çast për të përsiatur pse dëshiron të qëndrosh i pastër nga ana seksuale. Më pas, mbaji shënim hapat që do të ndërmarrësh për t’iu bindur vazhdimisht ligjit të Zotit për dëlirësinë. Merre parasysh atë që Fryma e Shenjtë mund të të ketë frymëzuar të bësh dhe mbaje shënim çdo mendim tjetër në ditarin tënd të studimit. Nëse ti ose dikush që ti njeh e ka shkelur ligjin e dëlirësisë, kujtohu se Jezu Krishti ka “[ardhur] … për t’i marrë botës mëkatet” (Alma 39:15) dhe do t’i falë të gjithë ata që pendohen me sinqeritet dhe i braktisin mëkatet e tyre (shih te Mosia 26:30, Alma 39:9).

Merreni parasysh të jepni dëshminë tuaj.

Komente dhe Informacion për Rrethanat

Alma 39:5. Përse mëkatet seksuale janë pranë vrasjes për sa i përket seriozitetit?

Teksa shërbente si anëtar i Të Shtatëdhjetëve, Plaku Brus C. Heifën dha mësim:

“Mbase ka një element të përbashkët në ato dy gjëra – dëlirësia dhe vrasja. Të dyja kanë të bëjnë me jetën, në lidhje me fuqitë hyjnore më të larta. Vrasja përfshin marrjen e gabuar të jetës; shkelja seksuale mund të përfshijë dhënien e gabuar të jetës ose ndërhyrjen e gabuar në burimet e shenjta të fuqisë jetëdhënëse.” (Bruce C. Hafen, “The Gospel and Romantic Love”, New Era, shkurt 2002, f. 10)

Alma 39:6. Çfarë do të thotë ta mohosh Frymën e Shenjtë?

Profeti Jozef Smith (1805–1844) dha mësim:

“Çfarë duhet të bëjë një njeri që të kryejë mëkatin e pafalshëm? Ai duhet ta marrë Frymën e Shenjtë, t’i hapen qiejt dhe ta njohë Perëndinë e më pas të mëkatojë kundër tij. Pasi një njeri ka mëkatuar kundër Frymës së Shenjtë, nuk ka pendim për të. Ai duhet të thotë se dielli nuk shkëlqen ndërsa e sheh atë; ai duhet ta mohojë Jezu Krishtin kur qiejt janë hapur për të, dhe ta mohojë planin e shpëtimit me sytë e tij të hapur ndaj të vërtetës së tij.” (Joseph Smith, te History, 1838–1856 [Manuscript History of the Church], vëllimi E-1, 1976, josephsmithpapers.org, pikësimi dhe përdorimi i germës së madhe u modernizuan; shih edhe “Accounts of the ‘King Follett Sermon’”, josephsmithpapers.org)

Alma 39:13. Si mund t’i kontrolloj më mirë mendimet e mia dhe t’i shmang dëshirat epshore?

Plaku Ulises Soares, i Kuorumit të Dymbëdhjetë Apostujve, dha mësim:

“Unë dëshmoj se kur mbështetemi mbi shkëmbin e shpëtimit, Shpëtimtarin e shpirtrave tanë, … aftësia jonë për t’i kontrolluar mendimet tona do të rritet shumë. … Atëherë, tundimet e armikut, pak nga pak, do ta humbasin fuqinë e tyre mbi ne, duke sjellë si rezultat një jetë më të lumtur, më të dëlirë e më të përkushtuar.” (Ulises Soares, “Kërkojeni Krishtin në Çdo Mendim”, Liahona, nëntor 2020, f. 84)

Veprimtari Plotësuese të të Mësuarit

Fillim alternativ

Merreni parasysh t’i renditni në tabelë gënjeshtrat rreth ligjit të dëlirësisë si ato në vijim:

1. Ligji i dëlirësisë nuk mund të jetë aq i rëndësishëm nëse kaq shumë njerëz në botë nuk po e jetojnë atë.

2. Kryerja e mëkatit seksual nuk është aq i rëndë.

3. Unë mund të kryej mëkat seksual pa ndikuar dikë tjetër.

Pyetini nxënësit se cilën prej këtyre gënjeshtrave ose gënjeshtra të tjera rreth dëlirësisë i kanë dëgjuar dhe përse disa njerëz mund të besojnë në to. Ftojini nxënësit të kërkojnë kuptueshmëri të mëtejshme dhe t’i korrigjojnë këto pohime ndërsa studiojnë kapitullin tek Alma 39.

Materiali filmik

Nëse do t’ju parapëlqente të shfaqni një material filmik që portretizon kapitullin tek Alma 39, merreni parasysh të shihni [“24 - Alma Këshillon Bijtë e Tij” pjesën kur Alma këshillon djalin e tij, Koriantonin, të pendohet, nga kodi kohor 9:24 deri në 11:40, në dispozicion në kishaejezukrishtit.org].

Muzika e shenjtë

Ndërsa nxënësit diskutojnë për mënyrat se si ata mund t’i bëjnë ballë dhe ta mposhtin tundimin, merreni parasysh të këndoni ose të dëgjoni himne të tilla si “Çdo Or’ më Duhesh Ti” (Himne, nr. 51) ose “Jezus, Vet’ Mendimi për Ty” (Himne, nr. 79). Ftojini nxënësit të përsiatin dhe të diskutojnë se si muzika e shenjtë mund t’i ndihmojë ata t’i mbajnë mendimet e tyre të pastra.